ಜಾನ್‌ ಡಿಸೋಜ ಕುಂದಾಪುರ ಮಂಗಳೂರು: ಪಾಶ್ಚಾತ್ಯ ದೇಶಗಳಲ್ಲಿ ಕೋಟ್ಯಂತರ ಬೆಲೆಬಾಳುವ ತಿಮಿಂಗಲದ ವಾಂತಿ() ಮೇಲೆ ಕಾಕದೃಷ್ಟಿ ಬಿದ್ದಿದೆ. ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರದಿಂದ ಶಿರಸಿ ಮೂಲಕ ಸಾಗಿಸುತ್ತಿದ್ದ ವೇಳೆ ದಾಳಿ ನಡೆಸಿದ ಶಿರಸಿ ಪೊಲೀಸರು ಮರಾಠಿ ಕೊಪ್ಪದಲ್ಲಿ ಇಬ್ಬರನ್ನು ಬಂಧಿಸಿ, 5 ಕೋಟಿ ಬೆಲೆ ಬಾಳುವ ನಿಷೇಧಿತ 5.50 ಕೆಜಿ ತೂಕದ ಆ್ಯಂಬರ್‌ಗ್ರೀಸ್‌ನ್ನು ವಶಪಡಿಸಿ, ಸಾಗಾಟಕ್ಕೆ ಬಳಕೆ ಮಾಡಿದ್ದ ಮಹಾರಾಷ್ಟ್ರ ನೋಂದಣಿಯ ಕಾರು ವಶಕ್ಕೆ ತೆಗೆದುಕೊಳ್ಳಲಾಗಿದೆ. ಹಾವೇರಿ ಮೂಲದ ಮಹಿಳೆಯೊಬ್ಬರು ಇವರಿಗೆ ಆ್ಯಂಬರ್‌ಗ್ರೀಸ್‌ ಸಪ್ಲೈ ಮಾಡಿದ್ದಾರೆ ಎನ್ನಲಾಗಿದ್ದು ಪೊಲೀಸ್‌ ತನಿಖೆ ಮುಂದುವರಿದಿದೆ. ಉತ್ತರ ಕನ್ನಡ ಜಿಲ್ಲೆಯ ಮುರುಡೇಶ್ವರದಲ್ಲಿ 6 ತಿಂಗಳು ಹಿಂದೆ ತಿಮಿಂಗಲ ವಾಂತಿ ಪತ್ತೆ ಪ್ರಕರಣ ವರದಿಯಾಗಿತ್ತು. ಬೆಂಗಳೂರು ಅಲ್ಲದೆ ಮಂಗಳೂರಿನಲ್ಲಿಯೂ ವಹಿವಾಟಿನ ಊಹಾಪೋಹ ಕೇಳಿಬಂದಿದೆ. ಏನಿದು ತಿಮಿಂಗಲ ವಾಂತಿ?ಸಮುದ್ರದಲ್ಲಿ ತಿಮಿಂಗಲ ತಿಂದ ಆಹಾರ ಜೀರ್ಣಿಸಿಕೊಳ್ಳಲಾಗದೆ ಮರಳಿ ಅದನ್ನು ಹೊರ ಹಾಕುತ್ತದೆ. ಹೊರ ಹಾಕಿದ ಆಹಾರ ದ್ರವ ರೂಪದಲ್ಲಿ ಗಟ್ಟಿಯಾಗಿರುತ್ತದೆ. ಇದಕ್ಕೆ ಆ್ಯಂಬರ್‌ಗ್ರೀಸ್‌(ತಿಮಿಂಗಲ ವಾಂತಿ) ಎಂದು ಕರೆಯಲಾಗುತ್ತದೆ. ಈ ದ್ರವರೂಪದ ಗಟ್ಟಿ ಆಹಾರ ವಸ್ತು ಮೊದಲು ಸಮುದ್ರದ ಆಳದಲ್ಲಿ ಇದ್ದು, ನಂತರ ಕೆಲವು ರಾಸಾಯನಿಕ ಕ್ರಿಯೆಯ ಮೂಲಕ ಸಮುದ್ರದಲ್ಲಿ ತೇಲುತ್ತದೆ. ಇವುಗಳನ್ನು ಹೊರ ದೇಶಗಳಲ್ಲಿ ಸುಗಂಧದ್ರವ್ಯ ತಯಾರಿಸಲು ಬಳಸಲಾಗುತ್ತಿದೆ. ಹೀಗೆ ತೇಲಿದ ಆ್ಯಂಬರ್‌ಗ್ರೀಸ್‌ಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಭಾರೀ ಬೆಲೆ ಇದೆ. ಒಂದು ಕೆಜಿ ತಿಮಿಂಗಲ ವಾಂತಿಗೆ 1 ಕೋಟಿ ರೂ. ಮೌಲ್ಯವಿದೆ. ಅರಣ್ಯ ಕಾಯಿದೆಯಡಿ ಮಾರಾಟ ಮಾಡುವುದು ನಿಷೇಧ. ಹೀಗಾಗಿ ಇಲ್ಲಿಂದ ಅನ್ಯ ದೇಶಗಳಿಗೆ ಕಳ್ಳಸಾಗಾಟ ನಡೆಯುತ್ತಿದೆ. ಮುರುಡೇಶ್ವರದಲ್ಲಿ ಇತ್ತೀಚೆಗೆ 1 ಕೆಜಿ ಮೌಲ್ಯದ ಆ್ಯಂಬರ್‌ಗ್ರೀಸ್‌ ದೊರಕಿತ್ತು. ಮೀನುಗಾರ ಜನಾರ್ದನ ಹರಿಕಾಂತ ಗುರುತಿಸಿ ಅದನ್ನು ಅರಣ್ಯ ಇಲಾಖೆಗೆ ಹಸ್ತಾಂತರಿಸಿದ್ದರು. ಬೆಂಗಳೂರಿನಲ್ಲಿಯೂ ಕೋಟ್ಯಂತರ ರೂ. ಬೆಲೆಬಾಳುವ ಆ್ಯಂಬರ್‌ಗ್ರೀಸ್‌ನ್ನು ಪೊಲೀಸರು ಸ್ವಾಧೀನಪಡಿಸಿಕೊಂಡಿದ್ದರು. ತಿಮಿಂಗಲದ ಉದರದಲ್ಲಿ ಉತ್ಪನ್ನ ಆ್ಯಂಬರ್‌ಗ್ರೀಸ್‌ ತಿಮಿಂಗಲದ ಜೀರ್ಣಾಂಗದಲ್ಲಿ ರಚನೆಯಾಗುವ ವಸ್ತು. ಮೇಣದಂತಿರುತ್ತದೆ. ಇವು ಸ್ಪರ್ಮವೇಲ್‌ ಪ್ರಭೇದದ ತಿಮಿಂಗಲಗಳಿಂದ ಮಾತ್ರ ಹೊರ ಹಾಕಲ್ಪಡುತ್ತದೆ. ಕಪ್ಪೆ ಬೊಂಡಾಸ್‌ ಮೀನುಗಳನ್ನು ತಿನ್ನುವುದರಿಂದ ಅವುಗಳ ಗಟ್ಟಿಯಾದ ಎಲುಬು ಸಂಪೂರ್ಣ ಜೀರ್ಣವಾಗದೆ ಹಾಗೆಯೇ ಉಳಿದುಬಿಡುತ್ತದೆ. ಇವುಗಳು ಕಿರಿಕಿರಿಯಾಗಲಾರಂಭವಾದಾಗ ವಾಂತಿ ರೂಪದಲ್ಲಿ ಹೊರ ಹಾಕುತ್ತದೆ. ಕೆಲವೊಮ್ಮೆ ಮಲ ವಿಸರ್ಜನೆಯಂತೆಯೂ ಹೊರಹಾಕುತ್ತದೆ. ಡಾ. ಶಿವಕುಮಾರ ಹರಗಿ, ಸಹಾಯಕ ಪ್ರಾಧ್ಯಾಪಕ, ಕಾರವಾರ ಕಡಲಜೀವ ವಿಜ್ಞಾನ ಅಧ್ಯಯನ ಕೇಂದ್ರ ಬಳಕೆ ನಿಷೇಧ ಆ್ಯಂಬರ್‌ಗ್ರೀಸ್‌ ಬಳಕೆ ಅರಣ್ಯ ಕಾಯಿದೆಯಡಿ ನಿಷೇಧ. ಸಂಶೋಧನೆಯ ಸಲುವಾಗಿ ಇದರ ಬಳಕೆಯಾಗುತ್ತಿದೆ. ಪಾಶ್ಚಾತ್ಯ ದೇಶಗಳಲ್ಲಿ ಸುಗಂಧದ್ರವ್ಯ, ಖಾದ್ಯಗಳಿಗೆ ಬಳಕೆಯಾಗುತ್ತಿದೆ. ಇದಕ್ಕಾಗಿ ತಿಮಿಂಗಲ ಬೇಟೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಿಮಿಂಗಲ ಬೇಟೆ ನಿಷೇಧಿಸಲಾಗಿದೆ. ಪ್ರಭಾಕರ ಕುಲಾಲ್‌, ಕುಂದಾಪುರ ವಲಯ ಅರಣ್ಯ ಸಂರಕ್ಷಣಾಧಿಕಾರಿ ತಿಮಿಂಗಲ ಸಂತತಿ ಉಳಿಸಿ ಸಮುದ್ರದ ಸಮತೋಲನದಲ್ಲಿ ತಿಮಿಂಗಲದಂತಹ ಜೀವಿಗಳ ಪಾತ್ರ ದೊಡ್ಡದು. ತಿಮಿಂಗಲದ ಹೊಟ್ಟೆಯಿಂದ ಚಿಕ್ಕಪುಟ್ಟ ಮೀನುಗಳ ರಾಶಿ ಹೊರಬೀಳುತ್ತದೆ ಎಂಬ ನಂಬಿಕೆ ನಮ್ಮದಾಗಿತ್ತು. ಆದರೆ ಬೆಲೆಬಾಳುವ ವಸ್ತು ಸಹ ಹೊರಬರುತ್ತದೆ ಎಂಬುದನ್ನು ಕೇಳಿ ಬೆಚ್ಚಿ ಬಿದ್ದಿದ್ದೇವೆ. ಗೋಳಿ, ತೊರ್ಕೆಯಂತಹ ಮೀನುಗಳು ಔಷಧೀಯ ವಿಜ್ಞಾನಕ್ಕೆ ಬಳಕೆಯಾಗುತ್ತದೆ ಎಂಬುದು ಗೊತ್ತಿದೆ. ಆದರೆ ತಿಮಿಂಗಲದ ಹೊಟ್ಟೆಯಿಂದ ಬರುವ ವಸ್ತುವೊಂದು ಕೋಟ್ಯಂತರ ರೂ. ಕಳ್ಳವಹಿವಾಟಿಗೆ ಸಾಕ್ಷಿಯಾಗಿರುವುದು ಆತಂಕಕಾರಿ ವಿಚಾರ. ರಾಮಪ್ಪ ಖಾರ್ವಿ, ಮೀನುಗಾರ ಮುಖಂಡ, ಗಂಗೊಳ್ಳಿ ತಿಮಿಂಗಲ ವಾಂತಿಯ ಹಿನ್ನೋಟ ಆ್ಯಂಬರ್‌ಗ್ರೀಸ್‌ ತಿಮಿಂಗಲದ ಜೀರ್ಣಕ್ರಿಯೆಯಲ್ಲಿ ಉತ್ಪತ್ತಿಯಾಗುವ ಮಂದ ಬೂದು ಅಥವಾ ಕಪ್ಪು ಬಣ್ಣದ ಘನ, ಮೇಣದಂತಹ ಸುಡುವ ವಸ್ತು. ಆರಂಭಿಕ ಹಂತದಲ್ಲಿ ಮಲದ ವಾಸನೆ ಹೊಂದಿರುತ್ತದೆ. ಗಟ್ಟಿಯಾದಂತೆ ಮಣ್ಣಿನ ಪರಿಮಳ ಹೊಂದುತ್ತದೆ. ಸುಗಂಧದ್ರವ್ಯ ತಯಾರಕರು ಇದಕ್ಕೆ ಮೌಲ್ಯ ಹೆಚ್ಚಿಸಿದವರು. ಇದನ್ನು ಸಿಂಥೆಟಿಕ್‌ ಆಂಬ್ರಾಕ್ರೈಡ್‌ನಿಂದ ಬದಲಾಯಿಸಲಾಗುತ್ತದೆ. ನಾಯಿಗಳು ಇದರ ವಾಸನೆಗೆ ಹೆಚ್ಚು ಆಕರ್ಷಿತವಾಗುತ್ತವೆ. ಆ್ಯಂಬರ್‌ಗ್ರೀಸ್‌ ಪದ ಫ್ರೆಂಚ್‌ನ ಅಂಬ್ರೆ ಗ್ರೀಸ್‌ ಅಥವಾ ಗ್ರೇ ಆ್ಯಂಬರ್‌ನಿಂದ ಬಂದಿದೆ. ತಿಮಿಂಗಲದ ಕರುಳಿನಲ್ಲಿರುವ ಪಿತ್ತರಸದ ನಾಳದ ಸ್ರವಿಸುವಿಕೆಯಿಂದ ಆ್ಯಂಬರ್‌ಗ್ರೀಸ್‌ ರೂಪುಗೊಳ್ಳುತ್ತದೆ ಎಂಬುದು ಸಂಶೋಧನೆಯಿಂದ ಕಂಡುಬಂದ ಅಂಶ. ಹಿಸ್ಟರಿ ಆಫ್‌ ಆ್ಯಂಬರ್‌ಗ್ರೀಸ್‌ನ ಲೇಖಕ ಕ್ರಿಸ್ಟೋಫರ್‌ ಕೆಂಪ್‌ನ ಪ್ರಕಾರ ಸ್ಪರ್ಮ್ ತಿಮಿಂಗಲಗಳಿಂದ ಮಾತ್ರ ಉತ್ಪತ್ತಿಯಾಗುತ್ತದೆ. ಅವುಗಳಲ್ಲಿ ಕೇವಲ ಒಂದು ಪ್ರತಿಶತದಷ್ಟು ಮಾತ್ರ ಉತ್ಪತ್ತಿಯಾಗುತ್ತದೆ. ಒಮ್ಮೆ ಹೊರ ಹಾಕಿದರೆ ಅದು ಶಾಶ್ವತವಾಗಿ ಉಳಿದುಕೊಂಡು ಬಿಡುತ್ತದೆ. ಅಟ್ಲಾಂಟಿಕ್‌ ಸಾಗರ, ದಕ್ಷಿಣ ಆಫ್ರಿಕಾದ ಕರಾವಳಿ, ಬ್ರೆಜಿಲ್‌, ಮಡಗಾಸ್ಕರ್‌, ಈಸ್ಟ್‌ ಇಂಡೀಸ್‌, ಮಾಲ್ಡೀವ್ಸ್, ಚೀನಾ, ಜಪಾನ್‌, ಭಾರತ, ಆಸ್ಪ್ರೇಲಿಯಾ, ನ್ಯೂಜಿಲೆಂಡ್‌, ಮೊಲುಕ್ಕಾ ದ್ವೀಪಗಳಲ್ಲಿ ಹೆಚ್ಚಾಗಿ ಕಂಡುಬರುತ್ತವೆ. 2021ರಲ್ಲಿ ಯೆಮೆನ್‌ ಕರಾವಳಿಯಲ್ಲಿ 280 ಪೌಂಡ್‌ ಆ್ಯಂಬರ್‌ಗ್ರೀಸ್‌ ಪತ್ತೆಯಾಗಿದೆ. ಇದರ ಮೌಲ್ಯ ಯುಎಸ್‌ ಡಾಲರ್‌ನಲ್ಲಿ 1.5 ಮಿಲಿಯನ್‌. 1.75 ಮಿಲಿಯನ್‌ ವರ್ಷಗಳ ಹಿಂದಿನ ಪಳೆಯುಳಿಕೆಯಾಗಿರುವ ಆ್ಯಂಬರ್‌ಗ್ರೀಸ್‌ ಗೋಚರಿಸಿದೆ. ಆಲ್ಕೋಹಾಲ್‌ನಲ್ಲಿ ಬಿಸಿ ಮಾಡುವ ಮೂಲಕ ಆ್ಯಂಬರ್‌ಗ್ರೀಸ್‌ ಬೇರ್ಪಡಿಸಬಹುದು. ಅದರಲ್ಲಿನ ಆಂಬ್ರೋಕ್ಸನ್‌ ಮತ್ತು ಅಂಬ್ರಿನಾಲ್‌ ಸುವಾಸನೆ ಬೀರುತ್ತವೆ. ತಿಮಿಂಗಲದಿಂದ ಹೊರಹಾಕುವ ವೇಳೆ ತೆಳು ಬಿಳಿ ಅಥವಾ ಕಪ್ಪು ವರ್ಣದಿಂದ ಕೂಡಿರುತ್ತದೆ. ಆಹಾರ ಮತ್ತು ಪಾನೀಯಗಳಲ್ಲೂ ಬಳಕೆ ಮಾಡುತ್ತಾರೆ. ಇಂಗ್ಲೆಂಡ್‌, ಆಸ್ಪ್ರೇಲಿಯಾದಲ್ಲಿ ಆ್ಯಂಬರ್‌ಗ್ರೀಸ್‌ ಖಾದ್ಯ ಬಳಸುತ್ತಾರೆ. ಯುರೋಪ್‌ನಲ್ಲಿ 18ನೇ ಶತಮಾನದಲ್ಲಿ ಚಾಕೊಲೇಟ್‌ನಲ್ಲಿ ಸುವಾಸನೆಗಾಗಿ ಇದರ ಬಳಕೆ ಮಾಡಲಾಗಿದೆ. ಈಜಿಪ್ಟ್‌ ದೇಶದಲ್ಲಿ ಧೂಪ ದ್ರವ್ಯ, ಸಿಗರೇಟ್‌ಗೆ ಬಳಕೆ ಮಾಡುತ್ತಾರೆ. ಮಧ್ಯಯುಗದಲ್ಲಿ ಯುರೋಪಿಯನ್ನರು ತಲೆನೋವು, ಶೀತ, ಅಪಸ್ಮಾರ, ಇತರ ಕಾಯಿಲೆಗೆ ಔಷಧವಾಗಿಯೂ ಬಳಕೆ ಮಾಡಿದ್ದರು. ಆ್ಯಂಬರ್‌ಗ್ರೀಸ್‌ಗೋಸ್ಕರ ಪಾಶ್ಚಾತ್ಯ ದೇಶದಲ್ಲಿ ತಿಮಿಂಗಲಗಳು ಬಲಿಯಾಗುತ್ತಿವೆ. 1982ರಲ್ಲಿ ಅಂತಾರಾಷ್ಟ್ರೀಯ ತಿಮಿಂಗಲ ಆಯೋಗವು ವಾಣಿಜ್ಯ ಉದ್ದೇಶಕ್ಕಾಗಿ ತಿಮಿಂಗಲ ಬೇಟೆ ನಿಷೇಧಿಸಿದೆ.
from India & World News in Kannada | VK Polls https://ift.tt/3Bwutvy
