ಕಾಬೂಲ್‌ (): ತಾಲಿಬಾನ್‌ ಉಗ್ರ ಸಂಘಟನೆ ನೇತೃತ್ವದ ಆಡಳಿತ ಇರುವ ಅಫ್ಘಾನಿಸ್ತಾನದಲ್ಲಿ ಪಾಕಿಸ್ತಾನದ ಐಎಸ್‌ಐ ಬೆಂಬಲಿತ ಉಗ್ರ ಸಂಘಟನೆಗಳೂ ಸೇರಿದಂತೆ ಹಲವು ಅಂತಾರಾಷ್ಟ್ರೀಯ ಭಯೋತ್ಪಾದಕ ಸಂಘಟನೆಗಳು ಸಂಘರ್ಷಕ್ಕೆ ಇಳಿದಿವೆ. ಇನ್ನೊಂದೆಡೆ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಮ್ಮ ಸರಕಾರಕ್ಕೆ ಮಾನ್ಯತೆ ಗಿಟ್ಟಿಸಿಕೊಳ್ಳಲು ತಾಲಿಬಾನಿಗಳು ಹಾತೊರೆಯುತ್ತಿದ್ದಾರೆ. ಇದೆಲ್ಲಕ್ಕೂ ಒಂದೇ ಬಾರಿ ಪರಿಹಾರ ಕಂಡುಕೊಳ್ಳಲು ಕಾರ್ಯತಂತ್ರವೊಂದನ್ನು ಹೆಣೆದಿರುವ ತಾಲಿಬಾನ್‌, ಕಾಬೂಲ್‌ನ ಉತ್ತರ ಭಾಗದಲ್ಲಿರುವ ತನ್ನ ಬಗ್ರಾಮ್‌ ವಾಯುನೆಲೆಯನ್ನು ಅಥವಾ ಚೀನಾಗೆ ಹಸ್ತಾಂತರಿಸಿ ಉಗ್ರ ನಿಗ್ರಹ ಕಾರ್ಯಾಚರಣೆಗೆ ಪೋಷಣೆ ನೀಡಲು ಸಿದ್ಧತೆ ನಡೆಸಿದೆ. ಇದರಿಂದಾಗಿ ತಾಲಿಬಾನ್‌ ಹೊರತಾಗಿ ಆಫ್ಘನ್‌ನಲ್ಲಿ ಬೇರೂರಲು ಯತ್ನಿಸುತ್ತಿರುವ ಪಾಕ್‌ ಪೋಷಿತ ಲಷ್ಕರೆ ತಯ್ಬಾ, ಜೈಷೆ ಮೊಹಮ್ಮದ್‌ ಉಗ್ರ ಸಂಘಟನೆಗಳು ಮತ್ತು ಹಕ್ಕಾನಿ ಜಾಲಗಳಿಗೆ ತಿರುಗೇಟು ನೀಡಿದಂತೆ ಆಗಲಿದೆ. ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐ ಹಸ್ತಕ್ಷೇಪಕ್ಕೂ ಕಡಿವಾಣ ಬೀಳಲಿದೆ. ಆ ನಂತರ ಅಮೆರಿಕ - ಬೆಂಬಲದಿಂದ ವಿಶ್ವಸಂಸ್ಥೆಯಲ್ಲಿ ಅಂತಾರಾಷ್ಟ್ರೀಯ ಮಾನ್ಯತೆ ಗಿಟ್ಟಿಸಿಕೊಳ್ಳಲು ಸಹಾಯವಾಗಲಿದೆ ಎನ್ನುವುದು ತಾಲಿಬಾನ್‌ ಲೆಕ್ಕಾಚಾರ. ತಿಕ್ಕಾಟಕ್ಕೆ ಲಗಾಮು: ತಾಲಿಬಾನ್‌ ನೇತೃತ್ವದ ಸರಕಾರದಲ್ಲಿ ರಕ್ಷಣಾ ಸಚಿವನಾಗಿರುವ ಪಾಕಿಸ್ತಾನ, ಐಎಸ್‌ಐ ಬೆಂಬಲಿತ ಉಗ್ರ ಮುಲ್ಲಾ ಯಾಕೂಬ್‌ ಮತ್ತು ವಿದೇಶಾಂಗ ಸಚಿವನಾಗಿರುವ ಹಕ್ಕಾನಿ ಉಗ್ರ ಜಾಲದ ಮುಖ್ಯಸ್ಥ ಸಿರಾಜುದ್ದೀನ್‌ ಹಕ್ಕಾನಿ ನಡುವೆ ತೀವ್ರ ಆಂತರಿಕ ಕಿತ್ತಾಟ ನಡೆಯುತ್ತಿದೆ. ಇದಕ್ಕೆ ಅಂತ್ಯ ಹಾಡಲು ಪ್ರಭಾವಿ ವಿದೇಶಿ ರಾಷ್ಟ್ರಕ್ಕೆ ವಾಯು ನೆಲೆಯೊಂದನ್ನು ಕಾಬೂಲ್‌ನಲ್ಲಿ ನೀಡುವ ಪ್ರತಿತಂತ್ರವನ್ನು ತಾಲಿಬಾನ್‌ ಮುಖಂಡರು ಹೆಣೆದಿದ್ದಾರೆ. ಐಸಿಸ್‌ ಆತಂಕ: ತಾಲಿಬಾನ್‌ ಸರಕಾರದಲ್ಲಿ ಅಲ್‌ ಕೈದಾ ಸಂಘಟನೆ ಮತ್ತು ಹಕ್ಕಾನಿ ಜಾಲದ ಉಗ್ರರ ಪ್ರಾಬಲ್ಯ ದಿನೇ ದಿನೇ ಹೆಚ್ಚುತ್ತಿದೆ. ಇದು ತಾಲಿಬಾನ್‌ ಪ್ರಾಬಲ್ಯ ಕುಗ್ಗಿಸಿ, ಭವಿಷ್ಯದಲ್ಲಿ ಸಿರಿಯಾದಲ್ಲಿನ ಐಸಿಸ್‌ ಮಾದರಿ ಸಾಮ್ರಾಜ್ಯ ಸ್ಥಾಪನೆಗೆ ನಾಂದಿಯಾಗಲಿದೆ. ಅದಕ್ಕೆ ನಿದರ್ಶನವೆಂಬಂತೆ 'ಐಸಿಸ್‌ - ಖೊರಾಸನ್‌ ಪ್ರಾಂತ್ಯ'ದ ಉಗ್ರರು ಅಫ್ಘಾನಿಸ್ತಾನದಲ್ಲಿ ಹೆಚ್ಚಾಗಿ ನೆಲೆಯೂರುತ್ತಿದ್ದಾರೆ. ಇದು ಅಮೆರಿಕದ ಗುಪ್ತಚರ ವರದಿಯಲ್ಲೂ ಉಲ್ಲೇಖವಾಗಿದ್ದು, ಬೈಡೆನ್‌ ನೇತೃತ್ವದ ಸರಕಾರಕ್ಕೆ ಇದು ಎಚ್ಚರಿಕೆಯಾಗಿ ರವಾನೆಯಾಗಿದೆ. ಈ ಬಗ್ಗೆ ಅಮೆರಿಕ ವಿದೇಶಾಂಗ ಸಚಿವ ಆ್ಯಂಟನಿ ಬ್ಲಿಂಕನ್‌ ಅವರು ಮಾತನಾಡಿ, ಅಮೆರಿಕ - ನ್ಯಾಟೊ ಪಡೆಗಳು ಆಫ್ಘನ್‌ ನೆಲ ತೊರೆದ ಬಳಿಕ ಅಲ್ಲಿನ ಸಾಮಾಜಿಕ ಸ್ಥಿತಿಗತಿಗಳ ಬದಲಾವಣೆಯ ಬಗ್ಗೆ ಆಂತರಿಕ ಸಮೀಕ್ಷೆ ನಡೆಸಲಾಗಿದೆ. ಶೀಘ್ರವೇ ಈ ಬಗ್ಗೆ ರಾಜತಾಂತ್ರಿಕ ಮಾರ್ಗದಲ್ಲಿ ಹೊಸ ಕ್ರಮ ಜಾರಿಗೆ ತರಲಾಗುವುದು ಎಂದಿದ್ದಾರೆ.
from India & World News in Kannada | VK Polls https://ift.tt/2Zwf68T
