ಮೈಸೂರು: ನಗರದ ಸುತ್ತಲಿನ ರಿಂಗ್‌ ರಸ್ತೆಯ ದೇವೇಗೌಡ ವೃತ್ತದಿಂದ ನಂಜನಗೂಡು ಜಂಕ್ಷನ್‌ವರೆಗೆ ಸರ್ವೀಸ್ ರಸ್ತೆ ವಿಸ್ತರಣೆಗೆ 537 ಮರಗಳ ಬುಡಕ್ಕೆ ಕತ್ತರಿ ಪ್ರಯೋಗ ಪ್ರಸ್ತಾಪಕ್ಕೆ ಪರಿಸರವಾದಿಗಳಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. ಬಂಡಿಪಾಳ್ಯ ಬಳಿಯ ರಿಂಗ್‌ ರಸ್ತೆಯ ಒಂದು ಬದಿಯಲ್ಲಿ ಅರಣ್ಯ ಇಲಾಖೆ ಶನಿವಾರ ಆಯೋಜಿಸಿದ್ದ ಸಾರ್ವಜನಿಕ ಅಹವಾಲು ಸಭೆಯಲ್ಲಿ ಭಾಗವಹಿಸಿದ್ದವರಲ್ಲಿ ಶೇ.90ರಷ್ಟು ಮಂದಿ ಕಡಿಯುವುದನ್ನು ತೀವ್ರವಾಗಿ ವಿರೋಧಿಸಿದರು. ಸಭೆಯಲ್ಲಿ ಭಾಗವಹಿಸಿದ್ದ 50-60 ಮಂದಿಗೆ ಅರ್ಜಿ ವಿತರಿಸಿ ಮರ ಕಡಿಯುವುದರ ಬಗ್ಗೆ ಪರ-ವಿರೋಧದ ಅಭಿಪ್ರಾಯ ಬರೆಯಲು ತಿಳಿಸಲಾಯಿತು. ಭರ್ತಿಯಾದ ಅರ್ಜಿಗಳ ಪೈಕಿ 26 ಅರ್ಜಿಗಳು ಮರ ಕಡಿಯುವ ಪರವಾಗಿ, 22 ಅರ್ಜಿಗಳು ವಿರೋಧವಾಗಿ ಬಂದಿವೆ ಎಂದು ಅಧಿಕಾರಿಗಳು ತಿಳಿಸಿದರು. ಇದರಿಂದ ಗೊಂದಲಕ್ಕೀಡಾದ ಪರಿಸರವಾದಿಗಳು 26 ಅರ್ಜಿ ನಕಲಿ ಎಂದು ಆರೋಪಿಸಿ ಗಲಾಟೆ ಮಾಡಿದರು. ಕಡಿಯಬಹುದು ಎಂದವರ ಸಹಿ ಇತ್ತು, ಅವರಿರಲಿಲ್ಲ! ಅರ್ಜಿಗೆ ಸಹಿ ಹಾಕಿದ 26 ಮಂದಿಯನ್ನು ಸ್ಥಳಕ್ಕೆ ಕರೆಯಿಸಿ ಎಂದು ಪರಿಸರವಾದಿಗಳು ಪಟ್ಟಹಿಡಿದರು. ಆ ಅರ್ಜಿಗಳನ್ನು ಪಡೆದು ಅರ್ಜಿಯಲ್ಲಿ ನಮೂದಿತ ಹೆಸರು ಮತ್ತು ವಿಳಾಸವನ್ನು ಕೂಗಿದರೂ ಯಾರು ಮುಂದೆ ಬರಲಿಲ್ಲ, ಕೈ ಎತ್ತಲಿಲ್ಲ. ಅರಣ್ಯ ಇಲಾಖೆ ಅಧಿಕಾರಿಗಳು ಕಾನೂನಿಗೆ ವಿರುದ್ಧವಾಗಿ ನಕಲಿ ಅರ್ಜಿ ತಯಾರಿಸಿದ್ದಾರೆ. ಸಾರ್ವಜನಿಕ ಸಭೆಯಲ್ಲೇ ಜನರ ಕಣ್ಣಿಗೆ ಸುಲಭವಾಗಿ ಮಣ್ಣು ಎರಚಿದ್ದಾರೆ. ಇದು ಸಾರ್ವಜನಿಕ ಅಹವಾಲು ಸಭೆಗೆ ಮಾಡಿದ ಅಪಮಾನ ಎಂದು ಆ 26 ಅರ್ಜಿಗಳನ್ನು ಹರಿದು ಹಾಕಿ ಆಕ್ರೋಶ ವ್ಯಕ್ತಪಡಿಸಿದರು. ಎರಡೂವರೆ ಗಂಟೆಗೂ ಹೆಚ್ಚು ಕಾಲ ನಡೆದ ಸಭೆಯಲ್ಲಿ ಮರ ಕಡಿಯುವುದಕ್ಕೆ ವಿರೋಧ ವ್ಯಕ್ತವಾಯಿತು. ಇದರಿಂದ ಯಾವುದೇ ತೀರ್ಮಾನವಿಲ್ಲದೆ ಸಭೆ ಮುಕ್ತಾಯವಾಯಿತು. ಸಭೆಯಲ್ಲಿ ಆಲಿಸಿದ ವಿಚಾರಗಳನ್ನು ತಮ್ಮ ಮೇಲಧಿಕಾರಿಗಳ ಗಮನಕ್ಕೆ ತಂದು ಮುಂದಿನ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ಅರಣ್ಯ ಇಲಾಖೆಯ ಅಧಿಕಾರಿಗಳು ತಿಳಿಸಿ ಸಭೆ ಮುಕ್ತಾಯಗೊಳಿಸಿದರು. ಮರ ಸ್ಥಳಾಂತರಕ್ಕೆ ಸಲಹೆ ಸಭೆಯಲ್ಲಿ ಭಾಗವಹಿಸಿದ್ದ ಶೇ.90ರಷ್ಟು ಮಂದಿ ಮರಗಳ ಹನನಕ್ಕೆ ಆಕ್ಷೇಪ ವ್ಯಕ್ತಪಡಿಸಿದರು. ಬಹುತೇಕರು 5-6 ವರ್ಷದ ಮರಗಳನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಬೇಕೆಂದು ಅಭಿಪ್ರಾಯ ಮಂಡಿಸಿದರು. ಈ ವೇಳೆ ಮಾತನಾಡಿದ ಎಸಿಎಫ್‌ ರಂಗಸ್ವಾಮಿ, ಈಗಾಗಲೇ ರಿಂಗ್‌ ರಸ್ತೆಯಲ್ಲಿದ್ದ 80 ಮರಗಳನ್ನು ಚಾಮುಂಡಿ ಬೆಟ್ಟದ ತಪ್ಪಲಿನ ದೇವಿ ವನಕ್ಕೆ ಸುರಕ್ಷಿತವಾಗಿ ಸ್ಥಳಾಂತರಿಸಲಾಗಿದೆ ಎಂದು ಮಾಹಿತಿ ನೀಡಿದರು. ಇದಕ್ಕೆ ದಾಖಲೆ ತೋರಿಸಿ, ಸ್ಥಳಾಂತರಕ್ಕೆ ಎಷ್ಟು ಮರಗಳನ್ನು ಗುರುತಿಸಿದ್ದೀರಿ ಎಂದು ಪಟ್ಟು ಹಿಡಿದ ಪರಿಸರವಾದಿಗಳು ಅಧಿಕಾರಿಗಳನ್ನು ತರಾಟೆಗೆ ತೆಗದುಕೊಂಡರು. ಎಸಿಎಫ್‌ ರಂಗಸ್ವಾಮಿ, ಆರ್‌ಎಫ್‌ಒ ಪ್ರಶಾಂತ್‌, ರಾಷ್ಟ್ರೀಯ ಪ್ರಾಧಿಕಾರದ ಎಂಜಿನಿಯರ್‌ ಇತರರು ಇದ್ದರು. ಪರಿಸರವಾದಿಗಳಾದ ಪರಶುರಾಮೇಗೌಡ, ಭಾನು ಮೋಹನ್‌, ತನುಜಾ, ವೆಂಕಟೇಶ್‌, ಲೀಲಾ ವೆಂಕಟೇಶ್‌, ಎಪಿಎಂಸಿ ಸದಸ್ಯ ಜವರಪ್ಪ , ಅಮ್‌ ಆದ್ಮಿ ಮಾಳವಿಕಾ ಗುಬ್ಬಿವಾಣಿ, ಅರ್ಚನಾ ಭಾಗವಹಿಸಿದ್ದರು. ಪ್ರಮುಖ ಅಧಿಕಾರಿಗಳ ಗೈರು ಸಭೆಗೆ ಶಿಷ್ಟಾಚಾರದ ಪ್ರಕಾರ ಎಂಟು ಇಲಾಖೆ ಅಧಿಕಾರಿಗಳು ಹಾಜರಿರಬೇಕು. ಆದರೆ ಅರಣ್ಯ ಇಲಾಖೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳು ಮಾತ್ರ ಹಾಜರಾಗಿದ್ದಾರೆ ಎಂಬ ಆಕ್ಷೇಪವೂ ಕೇಳಿಬಂತು. ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ರಸ್ತೆ ಅಗಲೀಕರಣಕ್ಕೆ ಮರ ಕತ್ತರಿಸಿದರೆ, ಪಾಲಿಕೆ, ಮುಡಾ, ಕೆಇಬಿ, ಜಲ ಮಂಡಳಿ ಸೇರಿದಂತೆ ಹಲವು ಇಲಾಖೆಗಳು ಸಹ ಬೇರೆ ಉದ್ದೇಶಕ್ಕೆ ಮರ ಕಡಿಯುತ್ತಾರೆ. ಆ ಅಧಿಕಾರಿಗಳೂ ಸಭೆಯಲ್ಲಿ ಹಾಜರಿರಬೇಕು. ಮತ್ತೊಮ್ಮೆ ಸಭೆ ಕರೆಯಬೇಕೆಂದು ಭಾನುಮೋಹನ್‌ ಮತ್ತು ಎಪಿಎಂಸಿ ಸದಸ್ಯ ಜವರಪ್ಪ ಒತ್ತಾಯಿಸಿದರು. ಸರ್ವಿಸ್‌ ರಸ್ತೆ ಬರುತ್ತದೆ ಎಂದು ತಿಳಿದಿದ್ದರೂ ಏಕೆ ಗಿಡ ನೆಟ್ಟರು ಗೊತ್ತಿಲ್ಲ. 5-6 ವರ್ಷಗಳಿಂದ ಉತ್ತಮವಾಗಿ ಬೆಳೆದಿರುವ ಮರವನ್ನು ಕಡಿಯುತ್ತೇವೆ ಎನ್ನುವುದರಲ್ಲಿ ಅರ್ಥವಿಲ್ಲ. ಕಟುಕರಾಗಿ ವರ್ತಿಸಬೇಡಿ. ಜೀವನಾಡಿಯಾಗಿರುವ ಮರಗಳನ್ನು ಉಳಿಸಿಕೊಂಡು ಕೆಲಸ ಮಾಡಿ. ಪರಶುರಾಮೇಗೌಡ, ಪರಿಸರವಾದಿ ರಸ್ತೆ ಬದಿ ನೆಡುವ ಗಿಡಗಳ ನಿರ್ವಹಣೆ ಹೊಣೆಯನ್ನು ಯಾರೂ ಹೊತ್ತುಕೊಳ್ಳುವುದಿಲ್ಲ. ಮರ ಕಡಿಯಲು ಸಾರ್ವಜನಿಕ ಅಹವಾಲು ಆಲಿಸುವುದೇ ಅಪರೂಪ. ಅರಣ್ಯ ಇಲಾಖೆಯವರು ಆಗಾಗ್ಗೆ ಇಂಥ ಸಭೆಗಳನ್ನು ಕರೆದು ಗಿಡಗಳ ಲಾಲನೆ ಮತ್ತು ಪಾಲನೆ ಬಗ್ಗೆಯೂ ಚರ್ಚಿಸಬೇಕು. ಜವರಪ್ಪ ಎಪಿಎಂಸಿ ಸದಸ್ಯ ಸರ್ವೀಸ್ ರಸ್ತೆ ನಿರ್ಮಾಣ ಉದ್ದೇಶಿತ ಜಾಗದಲ್ಲಿ ಗಿಡಗಳು ಈಗ ಯೌವನಾವಸ್ಥೆಯಲ್ಲಿವೆ. ಅವುಗಳನ್ನು ಕಡಿಯದೇ ಸುರಕ್ಷಿತವಾಗಿ ಸ್ಥಳಾಂತರಿಸಿ ಪೋಷಿಸಬೇಕು. ದೊಡ್ಡ ಮರಗಳಿದ್ದರೆ ಹೊಂದಾಣಿಕೆ ಮಾಡಿಕೊಂಡು ಅವುಗಳನ್ನು ಹಾಗೇ ಉಳಿಸಿಕೊಂಡು ರಸ್ತೆ ನಿರ್ಮಿಸಬೇಕು. ಭಾನು ಮೋಹನ್‌, ಪರಿಸರವಾದಿ
from India & World News in Kannada | VK Polls https://ift.tt/3w0UeTg
