ಬೆಂಗಳೂರು: ಬಿಟ್ ಕಾಯಿನ್ ಹಗರಣಕ್ಕೆ ಸಂಬಂಧಿಸಿದಂತೆ ವಿರೋಧ ಪಕ್ಷದ ನಾಯಕ ಸಾಕ್ಷಿ ಸಮೇತ ಆರೋಪ ಮಾಡಬೇಕು ಎಂದು ಸಿಎಂ ಹೇಳಿದರು. ಬೆಂಗಳೂರಿನಲ್ಲಿ ಶುಕ್ರವಾರ ಮಾತನಾಡಿದ ಬಸವರಾಜ ಬೊಮ್ಮಾಯಿ ಅವರು, ಏನೋ ಒಂದು ಮುಂದಿಟ್ಟುಕೊಂಡು ಹೇಳೋದು ಸರಿಯಲ್ಲ. ಇಲ್ಲಿ ಜನ ಯಾರೂ ದಡ್ಡರಲ್ಲ ಎಂದರು. ಎಲ್ಲಿಂದ ಯಾರ ಅಕೌಂಟ್‌ಗೆ ರವಾನೆಯಾಗಿದೆ ಅನ್ನೋದನ್ನು ಮಾಹಿತಿ ಕೊಡಬೇಕು. ಸೂತ್ರವಿಲ್ಲದೆ ಪಟ ಹಾರಿಸಬಾರದು. ನಾವು ಯಾರನ್ನೂ ರಕ್ಷಣೆ ಮಾಡೋದಿಲ್ಲ. ಹ್ಯಾಕರ್ ಶ್ರೀಕಿದ್ದು ಇನ್ನೊಂದು ಕೇಸ್ ಇತ್ತು. 2019ರಲ್ಲಿ ಈ ಪೋರ್ಟಲ್ ಹ್ಯಾಕ್ ಮಾಡಿದ್ದು. ಈ ಕೇಸ್‌ನಲ್ಲಿ ಕೇವಲ ಇ.ಡಿಗೆ ಅಷ್ಟೆ ಅಲ್ಲ ಸಿಬಿಐ ಇಂಟರ್ ಪೋಲ್‌ಗೆ ಶಿಫಾರಸ್ಸು ಮಾಡಿದ್ದೇವೆ ಎಂದು ತಿಳಿಸಿದರು. 2021 ಏಪ್ರಿಲ್ 27ರಂದು ಸಿಬಿಐ ಇಂಟರ್ ಪೋಲ್‌ಗೆ ಶಿಫಾರಸ್ಸು ಮಾಡಿದ್ದೇವೆ. ಆತನನ್ನು ಪ್ರ‍‍ಾಮ್ಟ್ ಆಗಿ ಅರೆಸ್ಟ್ ಮಾಡಿದ್ದೇವೆ. ಡ್ರಗ್ಸ್, ಮನಿ ಲ್ಯಾಂಡರಿಂಗ್, ಬಿಟ್ ಕಾಯಿನ್ ವಿಚಾರವಾಗಿ ಕೇಸ್ ದಾಖಲಿಸಿದ್ದೇವೆ. ಅತ್ಯಂತ ಪ್ರ‍ಾಮಾಣಿಕವಾಗಿ ನಾವು ಈ ಕೆಲಸವನ್ನು ಮಾಡಿದ್ದೇವೆ. ಯಾರನ್ನು ಮುಚ್ಚಿಡುವಂತಹ ಪ್ರಶ್ನೇಯೇ ಇಲ್ಲ ಎಂದು ಸ್ಪಷ್ಟಪಡಿಸಿದರು. ಬಿಟ್ ಕಾಯಿನ್ ತನಿಖೆಯಲ್ಲಿ ಯಾರನ್ನೋ ರಕ್ಷಣೆ ಮಾಡ್ತಿದ್ದಾರೆ ಅಂತ ಕಾಂಗ್ರೆಸ್‌ನವರು ಆರೋಪ ಮಾಡ್ತಿದ್ದಾರೆ. ನಾನು ಡ್ರಗ್ಸ್ ವಿರುದ್ಧ ಶುರು ಮಾಡಿದ್ದೇನೆ. ಎನ್ ಡಿ ಪಿ ಎಸ್ ಕಾಯ್ದೆಯಡಿ ಶಿಕ್ಷೆ ಕೊಡಿಸುವ ಕೆಲಸ ಆಗ್ತಿದೆ. ಇಡೀ ದೇಶದಲ್ಲಿ ಡ್ರಗ್ಸ್ ಪತ್ತೆ ಹಚ್ಚಿ ವಶಕ್ಕೆ ಪಡೆದವರಲ್ಲಿ ಕರ್ನಾಟಕ ಮುಂಚೂಣಿಯಲ್ಲಿದೆ ಎಂದರು. ಅಲ್ಲದೇ, ಇವತ್ತು ಸುಮಾರು 50 ಪರ್ಸೆಂಟ್ ಡ್ರಗ್ಸ್ ಸುಟ್ಟು ಹಾಕಿದ್ದಾರೆ ಎಂದ ಅವರು, 2018 ಫೆಬ್ರವರಿಯಲ್ಲಿ ಡ್ರಗ್ಸ್ ನಲ್ಲಿ ಕೆಲವರು ಅರೆಸ್ಟ್ ಆಗ್ತಾರೆ. ಅವನೊಬ್ಬ ಅರೆಸ್ಟ್ ಆಗಲ್ಲ. ಅವತ್ತು ಅವನನ್ನು ಅರೆಸ್ಟ್ ಮಾಡಿ ತನಿಖೆಗೆ ಒಳಪಡಿಸಿಲ್ಲ. ಯುಬಿಸಿಟಿ ದಾಂಧಲೆ ಕೇಸ್ ನಲ್ಲಿ ಅವನನ್ನ ಅರೆಸ್ಟ್ ಮಾಡಿದ್ರೆ ಎಲ್ಲವೂ ಬಯಲಿಗೆ ಬರುತ್ತಿತ್ತು. ಡ್ರಗ್ಸ್, ಬಿಟ್ ಕಾಯಿನ್ ಪ್ರತಿಯೊಂದು ಗೊತ್ತಾಗಿರೋದು. ಯಾಕೆ ಅವತ್ತು ಅರೆಸ್ಟ್ ಮಾಡಿಲ್ಲ? ಎಂದು ಪ್ರಶ್ನಿಸಿದರು. ಇನ್ನು 2018 ರಲ್ಲಿ ಆ ಪ್ರಭಾವಿತನನ್ನು 2020 ರ ಕೇಸ್‌ನಲ್ಲಿ ಬಂಧಿಸಿದ್ವಿ. ಅವನ ಸಹಚರನನ್ನು ಕೂಡ ಬಂಧಿಸಿದ್ವಿ. ತನಿಖೆ ವೇಳೆ ಈ ಹ್ಯಾಕರ್ ಅನ್ನೋದು ಗೊತ್ತಾಗಿದೆ. ಹ್ಯಾಕರ್ ಅನ್ನೋದು ಗೊತ್ತಾಗಿ ಮೂರು ಕೇಸ್ ದಾಖಲು ಮಾಡಿದ್ವಿ. ಮನಿ ಲ್ಯಾಂಡರಿಂಗ್ ಕೇಸ್ ನಲ್ಲಿ ಚಾರ್ಜ್ ಶೀಟ್ ಕೂಡ ಹಾಕಲಾಗಿದೆ ಎಂದು ಹ್ಯಾಕರ್ ಶ್ರೀಕಿ ಬಂಧನದ ಬಗ್ಗೆ ತಿಳಿಸಿದರು.
from India & World News in Kannada | VK Polls https://ift.tt/2ZsZmDE
