ಹೊಸದಿಲ್ಲಿ: ಯುಎಇ ಹಾಗೂ ಒಮಾನ್‌ನಲ್ಲಿ 2021ರ ಐಸಿಸಿ ಟಿ20 ವಿಶ್ವಕಪ್ ಟೂರ್ನಿ ನಡೆಯುತ್ತಿದ್ದು, ಹಲವು ಮಾಜಿ ಕ್ರಿಕೆಟಿಗರು ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡಗಳ ಬಗ್ಗೆ ಚರ್ಚೆ ನಡೆಸುತ್ತಿದ್ದಾರೆ. ಇದೀಗ ಈ ಪಟ್ಟಿಗೆ ಮಾಜಿ ನಾಯಕ ಕೆವಿನ್ ಪೀಟರ್ಸನ್‌ ಸೇರ್ಪಡೆಯಾಗಿದ್ದು, ಟಿ20 ವಿಶ್ವಕಪ್ ಗೆಲ್ಲುವ ಬಗ್ಗೆ ತಮ್ಮದೇ ಅಭಿಪ್ರಾಯವನ್ನು ಹೊರಹಾಕಿದ್ದಾರೆ. ವಿರಾಟ್‌ ಕೊಹ್ಲಿ ನಾಯಕತ್ವದ ಹಾಗೂ ಐಯಾನ್‌ ಮಾರ್ಗನ್‌ ನಾಯಕತ್ವದ ಇಂಗ್ಲೆಂಡ್‌ ಈ ಬಾರಿ ಐಸಿಸಿ ಟಿ20 ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡಗಳಾಗಿವೆ ಎಂದು ಆಂಗ್ಲರ ಮಾಜಿ ಬ್ಯಾಟ್ಸ್‌ಮನ್‌ ಕೆವಿನ್ ಪೀಟರ್ಸನ್‌ ಭವಿಷ್ಯ ನುಡಿದಿದ್ದಾರೆ. ಭಾರತ ತಂಡ ಉದ್ಘಾಟನಾ ಆವೃತ್ತಿಯ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಚಾಂಪಿಯನ್ಸ್ ಆಗಿ ಹೊರಹೊಮ್ಮಿತ್ತು. ಇದರ ಜತೆಗೆ 1983 ಮತ್ತು 2011ರ ಏಕದಿನ ವಿಶ್ವಕಪ್ ಟೂರ್ನಿಗಳಲ್ಲಿಯೂ ಭಾರತ ಪ್ರಶಸ್ತಿ ಮುಡಿಗೇರಿಸಿಕೊಂಡಿದೆ. ಆದರೆ, ಇಂಗ್ಲೆಂಡ್‌ 2019ರ ಏಕದಿನ ವಿಶ್ವಕಪ್ ಗೆದ್ದಿದ್ದು, ಅದೇ ಲಯವನ್ನು ಚುಟುಕು ವಿಶ್ವಕಪ್ ಟೂರ್ನಿಯಲ್ಲಿಯೂ ಮುಂದುವರಿಸುತ್ತಿದೆ. "ಭಾರತ ಹಾಗೂ ಇಂಗ್ಲೆಂಡ್‌ ತಂಡಗಳ ನಡುವೆ ಚಾಂಪಿಯನ್ಸ್ ಪಟ್ಟ ನಿರ್ಧಾರವಾಗಲಿದೆ ಎಂದು ನಾನು ಭಾವಿಸುತ್ತೇನೆ. ಟಿ20 ಸ್ವರೂಪದಲ್ಲಿ ಈ ಎರಡೂ ತಂಡಗಳ ನಡುವೆ ಆಯ್ಕೆ ಕಠಿಣ ಕರೆ. ಆದರೆ, ಈ ಬಾರಿ ಐಯಾನ್‌ ಮಾರ್ಗನ್‌ ನಾಯಕತ್ವದ ಇಂಗ್ಲೆಂಡ್‌ಗೆ ಅತ್ಯುತ್ತಮ ಅವಕಾಶವಿದೆ. ಪ್ರತಿಯೊಂದು ತಂಡಕ್ಕೂ ಇಂಗ್ಲೆಂಡ್‌ ಎಂದರೆ ಭಯವಿದೆ. ಇತರೆ ತಂಡಗಳಿಗೆ ಹೋಲಿಸಿದರೆ ಇಂಗ್ಲೆಂಡ್‌ನಲ್ಲಿ ಬ್ಯಾಟಿಂಗ್‌ ಲೈನ್‌ ಅಪ್‌ ಶಕ್ತಿಯುತವಾಗಿದೆ," ಎಂದು ಪೀಟರ್ಸನ್‌ ಬೆಟ್ವೇ ಇನ್‌ಸೈಡರ್ ಬ್ಲಾಗ್‌ನಲ್ಲಿ ಬರೆದಿದ್ದಾರೆ. "ಅವರು ಯಾವುದೇ ಭಯವಿಲ್ಲದೆ, ಯಾವುದೇ ಪರಿಣಾಮವಿಲ್ಲದೆ ಆಡುತ್ತಾರೆ ಹಾಗೂ ನಾಯಕ ಡ್ರೆಸ್ಸಿಂಗ್‌ ಕೊಠಡಿಯಲ್ಲಿ ಎಲ್ಲರ ಬೆಂಬಲ ಪಡೆದುಕೊಂಡಿದ್ದಾರೆ. ಇಂಥಾ ವಾತಾವರಣವಿದ್ದರೆ ನೀವು ನಿರೀಕ್ಷೆ ಮಾಡಿದ ಫಲಿತಾಂಶವನ್ನು ಪಡೆದುಕೊಳ್ಳಬಹುದು. ಅದರಲ್ಲೂ ಟಿಮ್ನಲ್‌ ಮಿಲ್ಸ್ ಆಯ್ಕೆ ಅಂದುಕೊಂಡ ಹಾದಿಯಲ್ಲಿ ಸಾಗುತ್ತಿದೆ," ಎಂದು ಹೇಳಿದರು. ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಶೂನ್ಯಕ್ಕೆ ವಿಕೆಟ್‌ ಒಪ್ಪಿಸಿದ್ದ ಟೀಮ್‌ ಇಂಡಿಯಾ ಆರಂಭಿಕ ಅವರನ್ನು ಬೆಂಬಲಿಸಿದ ಪೀಟರ್ಸನ್‌, ಪ್ರಸ್ತುತ ನಡೆಯುತ್ತಿರುವ ಐಸಿಸಿ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಅತಿ ಹೆಚ್ಚು ರನ್‌ ಕಲೆ ಹಾಕಲಿದ್ದಾರೆಂದು ಭವಿಷ್ಯ ಅವರು ನುಡಿದಿದ್ದಾರೆ. "ಎಲ್ಲಾ ಸ್ವರೂಪ ಮತ್ತು ಎಲ್ಲಾ ಪರಿಸ್ಥಿತಿಗಳಲ್ಲಿ ರೋಹಿತ್‌ ಶರ್ಮಾ ಕ್ಲಾಸ್‌ ಆಟಗಾರ. ಈ ಟೂರ್ನಿಯಲ್ಲಿ ಅವರು ಫಾರ್ಮ್‌ಗಾಗಿ ಹೋರಾಡುವ ಸಾಧ್ಯತೆ ತುಂಬಾ ಕಡಿಮೆ ಇದೆ. ಪ್ರಸ್ತುತ ಸಮಯದಲ್ಲಿ ಅವರು ಸ್ಥಿರತೆ ಮತ್ತು ಬ್ಯಾಟಿಂಗ್‌ನ ಅಗ್ರಸ್ಥಾನವನ್ನು ಕಾಯ್ದುಕೊಂಡಿದ್ದಾರೆ. ಹಾಗಾಗಿ, ಅವರು ಈ ಟೂರ್ನಿಯಲ್ಲಿ ಅತಿ ಹೆಚ್ಚು ರನ್‌ ಗಳಿಸಲಿದ್ದಾರೆಂಬ ಬಗ್ಗೆ ನನಗೆ ವಿಶ್ವಾಸವಿದೆ," ಎಂದಿದ್ದಾರೆ. "ಪಾಕಿಸ್ತಾನ ಟೂರ್ನಿಯಲ್ಲಿ ಯಶಸ್ವಿಯಾಗುತ್ತಿರುವುದಕ್ಕೆ ಶಾಹೀನ್‌ ಅಫ್ರಿದಿ ಕೂಡ ಒಂದು ಕಾರಣವಾಗಿದೆ. ಅವರು ಹೊಸ ಚೆಂಡಿನಲ್ಲಿ ಬುದ್ದಿವಂತಿಕೆಯಿಂದ ದಾಳಿ ನಡೆಸುತ್ತಿದ್ದಾರೆ. ಇನ್ನಷ್ಟು ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳನ್ನು ಅವರು ಔಟ್‌ ಮಾಡುವ ಸಾಧ್ಯತೆ ಇದೆ," ಎಂದು ಇಂಗ್ಲೆಂಡ್‌ ಮಾಜಿ ನಾಯಕ ಹೇಳಿದ್ದಾರೆ. ಪ್ರಸ್ತುತ ಟೂರ್ನಿಯಲ್ಲಿ ಮತ್ತೊಬ್ಬ ಗಮನಾರ್ಹ ಆಟಗಾರನಾಗಿ ಆಸ್ಟ್ರೇಲಿಯಾದ ಗ್ಲೆನ್‌ ಮ್ಯಾಕ್ಸ್‌ವೆಲ್‌ ಅವರನ್ನು ಕೆವಿನ್ ಪೀಟರ್ಸನ್‌ ಆಯ್ಕೆ ಮಾಡಿದ್ದಾರೆ. ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ಪರ 2021ರ ಐಪಿಎಲ್ ಟೂರ್ನಿಯಲ್ಲಿ ಮ್ಯಾಕ್ಸ್‌ವೆಲ್‌ 6 ಅರ್ಧಶತಕಗಳೊಂದಿಗೆ 513 ರನ್‌ ಸಿಡಿಸಿದ್ದರು. ಆ ಮೂಲಕ ಅದ್ಭುತ ಫಾರ್ಮ್‌ ಮೂಲಕ ಆಸ್ಟ್ರೇಲಿಯಾ ತಂಡಕ್ಕೆ ಆಗಮಿಸಿದ್ದಾರೆ. ಇದು ತಂಡದ ಗೆಲುವಿಗೆ ನೆರವಾಗಲಿದೆ ಎಂದು ಅವರು ಅನಿಸಿಕೆ ವ್ಯಕ್ತಪಡಿಸಿದ್ದಾರೆ. "ಪಾಕಿಸ್ತಾನ ಮತ್ತು ಆಸ್ಟ್ರೇಲಿಯಾ ದಂತಹ ತಂಡಗಳಲ್ಲಿ ಅದ್ಭುತ ವೇಗದ ಬೌಲಿಂಗ್‌ ಆಯ್ಕೆಗಳಿವೆ. ಇದರ ಜೊತೆಗೆ ಐಸಿಸಿ ಶ್ರೇಯಾಂಕದ ಭಯಾನಕ ಟಿ20 ಆಟಗಾರರಿದ್ದಾರೆ. ಇತ್ತೀಚೆಗೆ ಮುಕ್ತಾಯವಾಗಿದ್ದ ಐಪಿಎಲ್ ಟೂರ್ನಿಯಲ್ಲಿ ಆರ್‌ಸಿಬಿ ಪರ ಮ್ಯಾಕ್ಸ್‌ವೆಲ್‌ ಅದ್ಭುತ ಫಾರ್ಮ್‌ನಲ್ಲಿದ್ದರು. ಅವರು ಕೊನೆಯ ಐದು ಇನಿಂಗ್ಸ್‌ಗಳಲ್ಲಿ 4 ಅರ್ಧಶತಕ ಸಿಡಿಸಿದ್ದರು. ಇದೀಗ ಆಸ್ಟ್ರೇಲಿಯಾ ಪರ ಅದೇ ಲಯವನ್ನು ಮುಂದುವರಿಸಿ ಗೆಲುವು ತಂದುಕೊಡಬಲ್ಲರು," ಎಂದು ಪೀಟರ್ಸನ್‌ ಹೇಳಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3Gw8mJa
