ಆರ್‌.ಶ್ರೀಧರ್‌ ರಾಮನಗರ: ಚನ್ನಪಟ್ಟಣದಲ್ಲಿನ ಓವರ್‌ಹೆಡ್‌ ಟ್ಯಾಂಕ್‌ನಲ್ಲಿ ಮಹಿಳೆಯ ಶವ ಪತ್ತೆ ಪ್ರಕರಣ ಹತ್ಯೆಯೋ, ಆತ್ಮಹತ್ಯೆಯೋ ಎಂಬುದನ್ನು ಬೇಧಿಸುವುದು ಪೊಲೀಸ್‌ ಇಲಾಖೆಗೆ ಸವಾಲಿನ ಕೆಲಸವಾಗಿದೆ. ಈ ಪ್ರಕರಣದೊಂದಿಗೆ ಎದ್ದಿರುವ ಇನ್ನೊಂದು ಪ್ರಮುಖ ಪ್ರಶ್ನೆಯೆಂದರೆ ಓವರ್‌ಹೆಡ್‌ ಟ್ಯಾಂಕ್‌ಗಳ ಮೂಲಕ ಜಲಮಂಡಳಿ ಪೂರೈಸುವ ಕುಡಿಯುವ ನೀರು ಎಷ್ಟು ಸುರಕ್ಷಿತ ಎಂಬುದು. ಚನ್ನಪಟ್ಟಣದ ಓವರ್‌ಹೆಡ್‌ ಟ್ಯಾಂಕ್‌ನಿಂದ ಪೂರೈಕೆಯಾಗುತ್ತಿದ್ದ ನೀರು ಹಳದಿ ಬಣ್ಣಕ್ಕೆ ತಿರುಗಿ ದುರ್ವಾಸನೆ ಬರುತ್ತಿದ್ದ ಹಿನ್ನೆಲೆಯಲ್ಲಿ ಟ್ಯಾಂಕ್‌ ಮತ್ತು ಪೈಪ್‌ಲೈನ್‌ಗಳನ್ನು ಶೋಧಿಸಲಾಗಿತ್ತು. ಆಗ ವಾಲ್ವ್ ನಲ್ಲಿ ಮಹಿಳೆಯ ಕಾಲಿನ ಅವಶೇಷಗಳು ಪತ್ತೆಯಾಗಿದ್ದವು. ತಕ್ಷಣವೇ ಟ್ಯಾಂಕ್‌ನಿಂದ ನೀರು ಪೂರೈಕೆ ನಿಲ್ಲಿಸಿ, ಇಡೀ ಪೈಪ್‌ಲೈನ್‌ ಶೋಧ ಕಾರ‍್ಯ ನಡೆಸಲಾಗುತ್ತಿದೆ. ಎರಡು ದಿನಗಳ ಹಿಂದೆ ಮತ್ತೊಂದು ವಾಲ್ವ್ ನಲ್ಲಿ ಕೊಳೆತ ಮಾಂಸದ ಮುದ್ದೆ ಪತ್ತೆಯಾಗಿತ್ತು. ಶುಕ್ರವಾರ ಮತ್ತೊಂದು ವಾಲ್ವ್ ನಲ್ಲಿ ತಲೆ ಬರುಡೆಯ ಭಾಗಗಳು ಪತ್ತೆಯಾಗಿವೆ. ಇದರೊಂದಿಗೆ ಶವದ ಬಹಳಷ್ಟು ಭಾಗಗಳು ದೊರೆತಂತಾಗಿದೆ. 19 ದಿನ ಕಳೆದರೂ ಸಿಗದ ಸುಳಿವು ಕೊಳೆತ ಕಾಲಿನ ಭಾಗ ಪತ್ತೆಯಾಗಿ ಶುಕ್ರವಾರಕ್ಕೆ 19 ದಿನಗಳು ಕಳೆದಿವೆ. ಆದರೆ, ಇದು ಹತ್ಯೆಯೋ, ಆತ್ಮಹತ್ಯೆಯೋ ಎಂಬುದು ಗೊತ್ತಾಗಿಲ್ಲ. ಟ್ಯಾಂಕ್‌ಗೆ ಹಾರಿ ಮಹಿಳೆ ಆತ್ಮಹತ್ಯೆ ಮಾಡಿಕೊಂಡಳೇ ಅಥವಾ ಆಕೆಯನ್ನು ಕೊಂದು ಶವವನ್ನು ಯಾರಾದರೂ ತಂದು ಟ್ಯಾಂಕ್‌ಗೆ ಹಾಕಿದ್ದಾರೆಯೇ ಎಂಬುದು ತಿಳಿಯುತ್ತಿಲ್ಲ. ಈ ಕುರಿತ ಸಣ್ಣ ಸುಳಿವೂ ಪೊಲೀಸರಿಗೆ ಸಿಗುತ್ತಿಲ್ಲ. ಆತ್ಮಹತ್ಯೆ ಶಂಕೆ ಒಟ್ಟಾರೆ ಪ್ರಕರಣವನ್ನು ಅಳೆದು ತೂಗಿದ ಪೊಲೀಸರು ಇದೊಂದು ಆತ್ಮಹತ್ಯೆಯ ಪ್ರಕರಣ ಎಂಬ ನಿಲುವಿಗೆ ಬಂದಿದ್ದಾರೆ. ಮಹಿಳೆ ಟ್ಯಾಂಕ್‌ನೊಳಗೆ ಬಿದ್ದು ಸತ್ತಿದ್ದಾಳೆ. ಟ್ಯಾಂಕ್‌ನೊಳಗೆ ರಭಸದಿಂದ ನೀರು ಬೀಳುವುದರಿಂದ ಅದರ ರಭಸಕ್ಕೆ ಸಿಲುಕಿ ಕೊಳೆತ ಶವ ಛಿದ್ರಗೊಂಡು ಪೈಪ್‌ ಮೂಲಕ ಹರಿದು ಹೋಗಿದೆ. ಹೊರಗಿನಿಂದ ಬಂದು ಇಲ್ಲಿ ಆತ್ಮಹತ್ಯೆ ಮಾಡಿಕೊಂಡಿರುವ ಸಾಧ್ಯತೆ ಇಲ್ಲ. ಸ್ಥಳೀಯರೇ ಯಾರೋ ಆತ್ಮಹತ್ಯೆ ಮಾಡಿಕೊಂಡಿರುವ ಸಾಧ್ಯತೆ ಇದೆ. ಸ್ಥಳೀಯರು ಕುಟುಂಬದ ವ್ಯಕ್ತಿ ನಾಪತ್ತೆಯಾಗಿರುವುದನ್ನು ಮುಚ್ಚಿಟ್ಟಿರುವ ಸಾಧ್ಯತೆ ಹೆಚ್ಚು ಎಂಬುದು ಪೊಲೀಸ್‌ ಅಧಿಕಾರಿಗಳ ವಾದ. ನಂಬಿ ಕುಡಿಯುವುದೆಂತು? ಜಲಮಂಡಳಿಯನ್ನು ನಂಬಿ ಜನರು ಅದು ಪೂರೈಸುವ ನೀರನ್ನು ಕಣ್ಣು ಮುಚ್ಚಿ ಕುಡಿಯುತ್ತಾರೆ. ಆದರೆ, ಜನರ ನಂಬಿಕೆ ಉಳಿಸಿಕೊಳ್ಳುವಂತಹ ಹೊಣೆಗಾರಿಕೆಯನ್ನು ಅಧಿಕಾರಿಗಳು ತೋರಿಸುತ್ತಿಲ್ಲ. 30ರಿಂಧ 35 ಅಡಿ ಎತ್ತರದಲ್ಲಿರುವ ಓವರ್‌ಹೆಡ್‌ ಟ್ಯಾಂಕ್‌ಗಳಿಗೆ ಬಲವಾದ ಮುಚ್ಚಳ ಇರುವುದು ಅಪರೂಪ. ಇನ್ನು ಟ್ಯಾಂಕ್‌ಗಳಿಗೆ ಅಳವಡಿಸಿರುವ ಏಣಿಯನ್ನು ಯಾರು ಬೇಕಾದರೂ ಹತ್ತಿ ಹೋಗುವಂತಿರುತ್ತದೆ. ಇದಕ್ಕೆ ಹತ್ತಲಾರದಂತೆ ಭದ್ರತಾ ವ್ಯವಸ್ಥೆ ಮಾಡಿರುವುದಿಲ್ಲ. ಮುಚ್ಚಳವಿಲ್ಲದ ಟ್ಯಾಂಕ್‌ನೊಳಗೆ ಹಲವು ಬಾರಿ ಪಕ್ಷಿಗಳು, ಇಲಿ ಹೆಗ್ಗಣಗಳು ಬಿದ್ದು ಕೊಳತು ನೀರಿನೊಂದಿಗೆ ಜನರ ಮನೆ ಸೇರಿರುತ್ತವೆ. ಪ್ರಾಣಿ ಪಕ್ಷಿಗಳ ಮಲಮೂತ್ರಕ್ಕಂತೂ ಲೆಕ್ಕವೇ ಇಲ್ಲ ಎನ್ನುವಂತಾಗಿದೆ. ಟ್ಯಾಂಕ್‌ಗೆ ಬಲವಾದ ಮುಚ್ಚಳ ಹಾಕಬೇಕು. ಆಗಾಗ ಸ್ವಚ್ಛಪಡಿಸಬೇಕು ಎಂಬ ಪರಿಕಲ್ಪನೆಯೇ ಅಧಿಕಾರಿ ವರ್ಗದಲ್ಲಿ ಇಲ್ಲ. ನೀರು ಪೂರೈಸುವುದೇ ಜನರಿಗೆ ಮಾಡುವ ಮಹಾನ್‌ ಉಪಕಾರ ಎಂಬಂತಿರುತ್ತದೆ ಅವರ ವರ್ತನೆ. ಪೊಲೀಸ್‌ ಭದ್ರತೆಗೆ ಮನವಿಓವರ್‌ಹೆಡ್‌ ಟ್ಯಾಂಕ್‌ನಲ್ಲಿ ಶವಪತ್ತೆ ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆ ರಾಮನಗರ ನಗರಸಭೆ ಕಂಗಾಲಾಗಿದೆ. ಯಾರು, ಯಾವಾಗ ಬೇಕಿದ್ದರೂ ಏನನ್ನು ಬೇಕಾದರೂ ಟ್ಯಾಂಕ್‌ಗೆ ತಂದು ಸುರಿಯಬಹುದು. ಅಷ್ಟೊಂದು ಅಧ್ವಾನ ಪರಿಸ್ಥಿತಿ ಇದೆ ಎಂಬುದು ಅರಿವಿಗೆ ಬರುತ್ತಿದ್ದಂತೆ ಕಂಗಾಲಾಗಿರುವ ನಗರಸಭೆ ಆಯುಕ್ತ ನಂದಕುಮಾರ್‌, ಓವರ್‌ಹೆಡ್‌ ಟ್ಯಾಂಕ್‌ಗಳಿಗೆ ಭದ್ರತೆ ಒದಗಿಸುವಂತೆ ಜಲಮಂಡಳಿ ಸಹಾಯಕ ಕಾರ‍್ಯಪಾಲಕ ಅಭಿಯಂತರಿಗೆ ಪತ್ರ ಬರೆದಿದ್ದಾರೆ. ರಾಮನಗರ ನಗರಸಭಾ ವ್ಯಾಪ್ತಿಯಲ್ಲಿರುವ ಕುಡಿಯುವ ನೀರಿನ ಸ್ಥಾವರಗಳಿಗೆ ಸೂಕ್ತ ಭದ್ರತಾ ಕ್ರಮಗಳನ್ನು ಕೈಗೊಂಡು ಸಿಸಿ ಕ್ಯಾಮೆಗಳನ್ನು ಅಳವಡಿಸಬೇಕು. ಸುತ್ತಲೂ ಕಾಂಪೌಂಡ್‌ ನಿರ್ಮಾಣ ಮಾಡಿ ನಿಷಿದ್ಧ ಪ್ರದೇಶವೆಂದು ನಾಮ ಫಲಕ ಅಳವಡಿಸಲು ಅಗತ್ಯ ಕ್ರಮ ವಹಿಸುವಂತೆ ಕೋರಿದ್ದಾರೆ. ಟ್ಯಾಂಕ್‌ನಿಂದ ನೀರು ಪೂರೈಸುವುದನ್ನು ಈಗಾಗಲೇ ನಿಲ್ಲಿಸಲಾಗಿದೆ. ಪೈಪ್‌ಲೈನ್‌ನಲ್ಲಿ ಶವದ ಅವಶೇಷಗಳು ಸಿಲುಕಿರುವ ಸಾಧ್ಯತೆ ಇರುವುದರಿಂದ ಇಡೀ ಪೈಪ್‌ಲೈನ್‌ ಬದಲಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದೇನೆ. ಶೀಘ್ರದಲ್ಲೆ ಈ ಕಾಮಗಾರಿಗೆ ಚಾಲನೆ ನೀಡಲಾಗುತ್ತದೆ. ಎಚ್‌.ಡಿ.ಕುಮಾರಸ್ವಾಮಿ, ಶಾಸಕ ಕ್ಷೇತ್ರ ಓವರ್‌ ಹೆಡ್‌ ಟ್ಯಾಂಕ್‌ಗಳಿಗೆ ಸೂಕ್ತ ಭದ್ರತೆ ನೀಡುವಂತೆ ಜಲಮಂಡಳಿಗೆ ಪತ್ರ ಮುಖೇನ ಮನವಿ ಮಾಡಿದ್ದೇನೆ ಎಲ್ಲ ಟ್ಯಾಂಕ್‌ಗಳ ಸ್ವಚ್ಚತೆಗೂ ಕೋರಿದ್ದೇನೆ. ನಂದಕುಮಾರ್‌, ಆಯುಕ್ತರಾಮನಗರ ನಗರಸಭೆ ಪ್ರಕರಣದ ತನಿಖೆ ನಡೆಯುತ್ತಿದೆ. ಯಾರೊಬ್ಬರು ಕಾಣೆಗಾದ ದೂರು ಇದುವರೆಗೆ ಬಂದಿಲ್ಲ. ಪ್ರಕರಣ ಬೇಧಿಸುವುದು ಸವಾಲಿನ ಕೆಲಸವಾಗಿದೆ. ಆದಷ್ಟು ಶೀಘ್ರದಲ್ಲೇ ಪ್ರಕರಣ ಬೇಧಿಸಲಾಗುವುದು. ಎಸ್‌.ಗಿರೀಶ್‌, ಜಿಲ್ಲಾಪೊಲೀಸ್‌ ವರಿಷ್ಠಾಧಿಕಾರಿರಾಮನಗರ
from India & World News in Kannada | VK Polls https://ift.tt/2ZvWfLc
