ರೋಮ್‌: ಇಟಲಿ ಮತ್ತು ಬ್ರಿಟನ್‌ ಪ್ರವಾಸ ಆರಂಭಿಸಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಶುಕ್ರವಾರ ರೋಮ್‌ನಲ್ಲಿ ಐರೋಪ್ಯ ಒಕ್ಕೂಟದ ಭಾಗವಾದ ಐರೋಪ್ಯ ಮಂಡಳಿಯ ಅಧ್ಯಕ್ಷೆ ಉರ್ಸುಲ ವೊನ್‌ ಲಿಯೆನ್‌ ಹಾಗೂ ಐರೋಪ್ಯ ಸಮಿತಿಯ ಅಧ್ಯಕ್ಷ ಚಾರ್ಲ್ಸ್ ಮೈಕೆಲ್‌ ಅವರೊಂದಿಗೆ ದ್ವಿಪ್ಷಕೀಯ ಸಭೆ ನಡೆಸಿದರು. ಈ ವೇಳೆ ಇಂಡೋ - ಪೆಸಿಫಿಕ್‌ ಸಾಗರ ಪ್ರಾಂತ್ಯದಲ್ಲಿ ಮುಕ್ತ ವ್ಯಾಪಾರ ಅಗತ್ಯ ಮತ್ತು ಪೂರಕ ಮೂಲ ಸೌಕರ್ಯ ಅಭಿವೃದ್ಧಿಗಳ ಬಗ್ಗೆ ನಾಯಕರು ರೂಪುರೇಷೆ ಸಿದ್ಧಪಡಿಸಿಕೊಂಡು ಮುಂದುವರಿಯಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ. ಇದೇ ವೇಳೆ ಐರೋಪ್ಯ ಒಕ್ಕೂಟದ ಪ್ರತಿನಿಧಿಗಳು ಭಾರತದಲ್ಲಿ ಕೊರೊನಾ ತಡೆ ಲಸಿಕೆಯ 100 ಕೋಟಿ ಪೂರೈಕೆ ಸಾಧನೆ, ಇತರ ದೇಶಗಳಿಗೂ ಲಸಿಕೆಗಳನ್ನು ರಫ್ತುಮಾಡಿ ಭಾರತ ನೀಡಿದ ನೆರವಿಗೆ ಮುಕ್ತ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ. ಮತ್ತು ಭಾರತದ ನಡುವಿನ ದ್ವಿಪಕ್ಷೀಯ ಬಾಂಧವ್ಯವನ್ನು ಹೊಸ ಎತ್ತರಕ್ಕೆ ಒಯ್ಯಲು ಎಲ್ಲ ರೀತಿಯ ಸಹಕಾರವನ್ನು ನೀಡಲು ಸಿದ್ಧ ಎಂದು ಐರೋಪ್ಯ ಒಕ್ಕೂಟದ ನಾಯಕರು ಅವರಿಗೆ ಭರವಸೆ ಕೊಟ್ಟಿದ್ದಾರೆ. ಉಳಿದಂತೆ, ಅಫ್ಘಾನಿಸ್ತಾನದಲ್ಲಿ ರಾಜಕೀಯ ಸ್ಥಿತಿಗತಿಗಳ ಬದಲಾವಣೆ, ಹವಾಮಾನ ವೈಪರೀತ್ಯ ನಿಯಂತ್ರಣ, ಹೂಡಿಕೆಗೆ ಉತ್ತೇಜನ ವಿಚಾರಗಳು ಸಭೆಯಲ್ಲಿ ಚರ್ಚಿಸಲಾಗಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ವಕ್ತಾರ ಅರಿಂದಮ್‌ ಬಾಗ್ಚಿ ಹೇಳಿದ್ದಾರೆ. ಶನಿವಾರದಿಂದ ಆರಂಭಗೊಳ್ಳಲಿರುವ ಜಿ-20 ಶೃಂಗಸಭೆಯಲ್ಲಿ ಭಾಗಿಯಾಗುವ ಪ್ರಧಾನಿ ಮೋದಿ ಅವರು ನವೆಂಬರ್ 1 - 2 ರಂದು ಬ್ರಿಟನ್‌ನ ಗ್ಲಾಸ್ಲೋದಲ್ಲಿನ ಹವಾಮಾನ ಶೃಂಗದಲ್ಲಿ (ಸಿಒಪಿ26) ಪಾಲ್ಗೊಳ್ಳಲಿದ್ದಾರೆ. ಭಾರತೀಯರ ಸ್ವಾಗತ: ರೋಮ್‌ಗೆ ಶುಕ್ರವಾರ ಆಗಮಿಸಿದ ಪ್ರಧಾನಿ ಮೋದಿ ಅವರನ್ನು ಭಾರತೀಯ ಮೂಲದ ಇಟಲಿ ನಿವಾಸಿಗರು 'ಜೈಕಾರ' ಹಾಕುತ್ತಾ ಸ್ವಾಗತಿಸಿದರು. ಏರ್‌ಪೋರ್ಟ್‌ನಲ್ಲಿ ಮೋದಿ ಅವರ ಸ್ವಾಗತಕ್ಕೆ ದೊಡ್ಡ ತಂಡವೇ ಸೇರಿತ್ತು. ಅಲ್ಲಿಂದ ಮೋದಿ ಅವರು ಪಿಯಾಜ್ಜಾ ಗಾಂಧಿ ಉದ್ಯಾನದಲ್ಲಿರುವ ಮಹಾತ್ಮ ಗಾಂಧೀಜಿ ಅವರ ಪುತ್ಥಳಿಗೆ ಪುಷ್ಪ ನಮನ ಸಲ್ಲಿಸಿದರು. ಈ ವೇಳೆ ಉದ್ಯಾನದಲ್ಲಿ ನೆರೆದಿದ್ದ ಭಾರತೀಯರು, ಎನ್‌ಆರ್‌ಗಳೊಂದಿಗೆ ಕೆಲ ಕಾಲ ಮೋದಿ ಅವರು ಆತ್ಮೀಯ ಚರ್ಚೆ ನಡೆಸಿದರು. ಪೋಪ್‌ ಫ್ರಾನ್ಸಿಸ್‌ ಭೇಟಿ ಶನಿವಾರ ಬೆಳಗ್ಗೆ ವ್ಯಾಟಿಕನ್‌ ಸಿಟಿಗೆ ಭೇಟಿ ಕೊಡಲಿರುವ ಪ್ರಧಾನಿ ಮೋದಿ ಅವರು ಕ್ರಿಶ್ಚಿಯನ್ನರ ಪರಮೋಚ್ಚ ಧರ್ಮ ಗುರು ಪೋಪ್‌ ಫ್ರಾನ್ಸಿಸ್‌ ಅವರನ್ನು ಭೇಟಿ ಮಾಡಲಿದ್ದಾರೆ. ಬೆಳಗ್ಗೆ 8.30 ರಿಂದ 30 ನಿಮಿಷಗಳ ಭೇಟಿ ನಿಗದಿಯಾಗಿದೆ. ಈ ವೇಳೆ ಕ್ಯಾಥೊಲಿಕ್‌ ಚರ್ಚ್‌ನ ಮುಖ್ಯಸ್ಥರಾದ ಕಾರ್ಡಿನಲ್‌ ಪೀಟ್ರೋ ಪರೊಲಿನ್‌ ಸಹ ಉಪಸ್ಥಿತರಿರಲಿದ್ದಾರೆ.
from India & World News in Kannada | VK Polls https://ift.tt/318QELz
