ಆರ್‌.ಶ್ರೀಧರ್‌ ರಾಮನಗರ: ಹಚ್ಚಹಸುರಿನ ಮೈಸಿರಿಯಿಂದ ಪ್ರವಾಸಿಗರನ್ನು ಕೈಬೀಸಿ ಕರೆಯುತ್ತಿರುವ ಕೂಟಗಲ್‌ ತಿಮ್ಮಪ್ಪ ಬೆಟ್ಟದಲ್ಲಿ ದೇವರ ಹೆಸರಿನಲ್ಲಿ ಅಕ್ರಮವಾಗಿ ಪಾರ್ಕಿಂಗ್‌ ಶುಲ್ಕ ವಸೂಲಿ ಮಾಡಲಾಗುತ್ತಿದೆ. ನಯನ ಮನೋಹರ ಬೆಟ್ಟಗಳ ತಾಣದಲ್ಲಿ ಚಾರಣ, ಪಿಕ್ನಿಕ್‌ ಸೇರಿದಂತೆ ಸಂತೋಷವಾಗಿ ಕಾಲ ಕಳೆಯಲು ವಾರಾಂತ್ಯದಲ್ಲಿ ತಿಮ್ಮಪ್ಪನ ಬೆಟ್ಟಕ್ಕೆ ಸಾವಿರಾರು ಪ್ರವಾಸಿಗರು ಭೇಟಿ ನೀಡುತ್ತಾರೆ. ಇವರನ್ನೇ ಗುರಿಯಾಗಿಸಿಕೊಂಡು ಹಣ ವಸೂಲಿ ಮಾಡಲಾಗುತ್ತಿದೆ. ಪಾರ್ಕಿಂಗ್‌ ಹೆಸರಿನಲ್ಲಿ ಜನರಿಂದ ಹಣ ಸುಲಿಯಲು ಟ್ರಸ್ಟ್‌ ಒಂದನ್ನು ರಚಿಸಿಕೊಂಡಿರುವುದು ಇನ್ನೂ ವಿಶೇಷ. ಪ್ರತಿ ಬೈಕ್‌ಗೆ 20, ಕಾರಿಗೆ 50 ರೂ. ಸುಲಿಗೆ ಮಾಡಲಾಗುತ್ತಿದೆ. ಈ ರೀತಿ ಪಾರ್ಕಿಂಗ್‌ ಶುಲ್ಕ ವಸೂಲಿಗೆ ಸರಕಾರದಿಂದ ಪರವಾನಗಿ ಪಡೆದಿಲ್ಲ ಎಂಬುದು ಇನ್ನೂ ಗಮನಾರ್ಹ. ಕಣ್ಣು ಮುಚ್ಚಿ ಕುಳಿತ ತಿಮ್ಮಪ್ಪ ಸ್ವಾಮಿ ದೇಗುಲ ಹಾಗೂ ಅದರ ಸುತ್ತಮುತ್ತಲಿನ ಪ್ರದೇಶ ಅರಣ್ಯ ಇಲಾಖೆಗೆ ಸೇರುತ್ತದೆ. ಕಿರು ಹಾಗೂ ಮೀಸಲು ಅರಣ್ಯಕ್ಕೆ ಇದು ಸೇರಿದೆ. ದೇಗುಲ ಬರುವವರಿಗಿಂತ ಹೆಚ್ಚಾಗಿ ಚಾರಣ ಹಾಗೂ ಪಿಕ್ನಿಕ್‌ಗೆ ಬರುವವರೇ ಹೆಚ್ಚು. ಈ ರೀತಿ ಬರುವ ಜನರಿಂದ ಅಕ್ರಮವಾಗಿ ಹಣ ಸುಲಿಗೆ ಮಾಡುತ್ತಿದ್ದರೂ, ಇತ್ತ ಗಮನ ಹರಿಸಬೇಕಾದ ಅರಣ್ಯ ಇಲಾಖೆ ಮಾತ್ರ ಸುಮ್ಮನೆ ಕುಳಿತಿದೆ. ದೇವರ ಹೆಸರಿನಲ್ಲಿ ಅಕ್ರಮ ಟ್ರಸ್ಟ್‌ ಪಾರ್ಕಿಂಗ್‌ ಶುಲ್ಕ ಪಡೆಯಬೇಕಿದ್ದರೆ ಗ್ರಾಪಂ ಅಥವಾ ಭೂಮಿ ಯಾವ ಇಲಾಖೆ ವ್ಯಾಪ್ತಿಗೆ ಬರುತ್ತದೋ ಆ ಇಲಾಖೆಯಿಂದ ಟೆಂಡರ್‌ ಕರೆದು ಗುತ್ತಿಗೆ ನೀಡಬೇಕು. ಜನರಿಂದ ಸಂಗ್ರಹಿಸಿದ ಹಣ ಸರಕಾರದ ಖಜಾನೆಗೆ ಸೇರಬೇಕು. ಆದರೆ, ಇಲ್ಲಿ ಆ ಯಾವ ರೀತಿಯ ಕಾನೂನನ್ನು ಪಾಲಿಸುತ್ತಿಲ್ಲ. ದೇವಸ್ಥಾನದ ಹೆಸರಿನಲ್ಲಿ ಕೆಲವರು ಟ್ರಸ್ಟ್‌ ಸ್ಥಾಪಿಸಿಕೊಂಡು ಹಣ ಸುಲಿಗೆ ಮಾಡುತ್ತಿದ್ದಾರೆ. ಈ ಸಂಗ್ರಹವಾದ ಹಣಕ್ಕೆ ಲೆಕ್ಕವೂ ಇಲ್ಲ ಪತ್ರವೂ ಇಲ್ಲ. ಕೋರ್ಟ್‌ ಆದೇಶ ಉಲ್ಲಂಘನೆ ಗ್ರಾಪಂಗಳು ಈ ರೀತಿ ಹಣ ವಸೂಲಿ ಮಾಡುವಂತಿಲ್ಲ ಎಂದು ಹೈಕೋರ್ಟ್‌ ಆದೇಶ ನೀಡಿದೆ. ಹೀಗಿದ್ದರೂ ಸಹ ದೇವಾಲಯದ ಅಭಿವೃದ್ಧಿ ನೆಪದಲ್ಲಿ ಪ್ರವಾಸಿಗರಿಂದಲೂ ಹಣ ದೋಚಲಾಗುತ್ತಿದೆ. ಮುತ್ತತ್ತಿ, ರಾಮದೇವರ ಬೆಟ್ಟದಲ್ಲಿ ಇಲ್ಲದ ಪಾರ್ಕಿಂಗ್‌ ಶುಲ್ಕ ವಸೂಲಿ ಇಲ್ಲೇಕೆ ಎಂಬ ಜನರ ಪ್ರಶ್ನೆಗೆ ಉತ್ತರಿಸುವವರೇ ಇಲ್ಲ. ಅರಣ್ಯ ಇಲಾಖೆ ಹೊಣೆ ದೇಗುಲ ಅರಣ್ಯ ಇಲಾಖೆಗೆ ಸೇರಿದ್ದೆ ಆಗಿದೆ. ಹೀಗಾಗಿ ಯಾವುದೇ ರೀತಿಯ ಶುಲ್ಕವನ್ನು ಅರಣ್ಯ ಇಲಾಖೆಯೇ ಮಾಡಬೇಕು. ಆದರೆ, ಟ್ರಸ್ಟ್‌ ಹೆಸರಿನಲ್ಲಿ ಬೇಕಾಬಿಟ್ಟು ಹಣ ಸುಲಿಯುತ್ತಿರುವುದು ಅಧಿಕಾರಿಗಳ ಕಣ್ಣಿಗೆ ಕಾಣದಿರುವುದು ವಿಶೇಷ. ಕಾನೂನು ಹೇಳುವುದೇನು? ಕಾನೂನಿನ ಪ್ರಕಾರ ಮುಜರಾಯಿ ದೇಗುಲಗಳಲ್ಲಿ ಟೆಂಡರ್‌ ಕರೆದು ಪಾರ್ಕಿಂಗ್‌ ಶುಲ್ಕ ವಸೂಲಿ ಗುತ್ತಿಗೆ ನೀಡಬೇಕು. ಜತೆಗೆ, ಕೆಲವೊಂದು ರಿಯಾಯಿತಿಗಳನ್ನು ನೀಡಬೇಕು. ಪಾರ್ಕಿಂಗ್‌ ಮಾಡಿದ ವಾಹನಗಳ ಸುರಕ್ಷತೆ ಪಾರ್ಕಿಂಗ್‌ ನಿರ್ವಹಣೆ ಹೊಣೆ ಹೊತ್ತವರ ಜವಾಬ್ದಾರಿ. ಪಾರ್ಕಿಂಗ್‌ ಮಾಡಿದ ವಾಹನಗಳನ್ನು ಕಾಯಲು ಕಾವಲುಗಾರರನ್ನು ನೇಮಿಸಬೇಕು. ಇನ್ನು ಅರಣ್ಯ ಇಲಾಖೆಯ ಜಾಗದಲ್ಲಿ ಇತರರು ಹಣ ಸಂಗ್ರಹಿಸುವಂತಿಲ್ಲ. ಆದರೆ, ಕೂಟ್‌ಗಲ್‌ನಲ್ಲಿ ಇದೆಲ್ಲದಕ್ಕೂ ಎಳ್ಳುನೀರು ಬಿಡಲಾಗಿದೆ. ಅರಣ್ಯ ಪ್ರದೇಶಕ್ಕೆ ಸೇರಿದ ಜಾಗದಲ್ಲಿ ಟ್ರಸ್ಟ್‌ ಹೆಸರಿನಲ್ಲಿ ವಸೂಲಿ ಮಾಡುವಂತಿಲ್ಲ. ಇದು ಕಾನೂನು ಬಾಹಿರ ಕೆಲಸ. ಎರಡು ಮೂರು ಬಾರಿ ಎಚ್ಚರಿಕೆ ನೀಡಲಾಗಿದೆ. ಎಚ್ಚರಿಕೆ ನೀಡಿ ಎರಡು ಮೂರು ದಿನ ಸುಮ್ಮನಿರುತ್ತಾರೆ ನಂತರ ಹಳೆ ಚಾಳಿ ಮುಂದುವರಿಸುತ್ತಾರೆ. ಇವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಪ್ರಭಾವಿ ರಾಜಕೀಯ ಮುಖಂಡರು ಅಡ್ಡಿಬರುತ್ತಾರೆ. ಹೀಗಾಗಿ ನಾವು ಅಸಹಾಯಕರಾಗಿದ್ದೇವೆ. ಕಿರಣ್‌, ಆರ್‌ಎಫ್‌ಒ ಅರಣ್ಯ ಇಲಾಖೆ, ರಾಮನಗರ ಸರಕಾರಿ ರೂಲ್ಸ್‌ ಇಲ್ಲ. ಆದರೆ, ಟ್ರಸ್ಟ್‌ ನೊಂದಾಯಿಸಿಕೊಳ್ಳಲಾಗಿದೆ. ದೇವಸ್ಥಾನದ ಅಭಿವೃದ್ಧಿಗಾಗಿ ಪಾರ್ಕಿಂಗ್‌ ಶುಲ್ಕದ ನೆಪದಲ್ಲಿ ಹಣ ಪಡೆಯುತ್ತಿದ್ದೇವೆ. ಕುಡುಕರ ಹಾವಳಿ ನಿಯಂತ್ರಿಸಿದ್ದೇವೆ. ಕೆಲವೆಡೆ ಸಿಸಿಟಿವಿ ಕ್ಯಾಮಾರ ಅಳವಡಿಸಿದ್ದೇವೆ. ದೇವರಾಜು, ಅಧ್ಯಕ್ಷಶ್ರೀ ಬೆಟ್ಟದ ತಿಮ್ಮಪ್ಪ ಸ್ವಾಮಿ ದೇವಸ್ಥಾನದ ಟ್ರಸ್ಟ್‌
from India & World News in Kannada | VK Polls https://ift.tt/312Nvgg
