ಸುನಿಲ್‌ ಪೊನ್ನೇಟಿ ಮಡಿಕೇರಿ ಮಡಿಕೇರಿ: ಕೊಡಗಿನ ದೇಗುಲಗಳಲ್ಲಿ ವಸ್ತ್ರ ಸಂಹಿತೆಯನ್ನು ಕಟ್ಟುನಿಟ್ಟಾಗಿ ಜಾರಿಗೆ ತರುವಂತೆ ಮತ್ತೆ ಒತ್ತಾಯ ಕೇಳಿಬರುತ್ತಿವೆ. ಸಭ್ಯ ಧಿರಿಸಿನಲ್ಲಿ ಬಾರದವರಿಗೆ ಯಾವುದೇ ಕಾರಣಕ್ಕೂ ಪ್ರವೇಶ ನೀಡಬಾರದು. ತುಂಡುಡುಗೆ, ಅಸಭ್ಯ ಧರಿಸಿ ಬರುವವರಿಂದ ದೇಗುಲಗಳ ಪಾವಿತ್ರ್ಯತೆಗೆ ಭಂಗ ಬರುತ್ತಿದೆ ಎನ್ನುವ ಆತಂಕ ಆಸ್ತಿಕರದು. ಕೊಡಗಿನ ಪವಿತ್ರ ತೀರ್ಥ ಕ್ಷೇತ್ರಗಳಾದ ಮತ್ತು ಭಾಗಮಂಡಲವನ್ನು ಪ್ರವಾಸಿತಾಣಗಳ ಪಟ್ಟಿಯಲ್ಲಿ ಸೇರಿಸಿರುವ ಪ್ರವಾಸೋದ್ಯಮ ಇಲಾಖೆ ಕ್ರಮಕ್ಕೆ ತೀವ್ರ ವಿರೋಧ ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ ದೇವಾಲಯಗಳಲ್ಲಿ ವಸ್ತ್ರ ಸಂಹಿತೆಯ ಕಡ್ಡಾಯ ಜಾರಿಗೆ ಒತ್ತಡಗಳು ಹೆಚ್ಚುತ್ತಿವೆ. ಕ್ಷೇತ್ರಗಳ ಪಾವಿತ್ರ್ಯತೆ ಮತ್ತು ಭಕ್ತರ ಭಾವನೆ ಬಗ್ಗೆ ಅರಿವು ಇರದ ಪ್ರವಾಸಿಗರ ವರ್ತನೆಗೆ ಟೀಕೆಗಳೂ ಕೇಳಿಬರುತ್ತಿವೆ. ತಲಕಾವೇರಿ ಮತ್ತು ತ್ರಿವೇಣಿ ಸಂಗಮ ಕ್ಷೇತ್ರ ಭಾಗಮಂಡಲಕ್ಕೆ ಕೊಡಗಿನಲ್ಲಿ ಮಾತ್ರವಲ್ಲದೆ ಪಕ್ಕದ ದಕ್ಷಿಣ ಕನ್ನಡ, ಉಡುಪಿ, ನೆರೆಯ ಕೇರಳ ತಮಿಳುನಾಡಿನಲ್ಲೂ ದೊಡ್ಡ ಸಂಖ್ಯೆಯಲ್ಲಿ ಭಕ್ತರಿದ್ದಾರೆ. ಇಲ್ಲಿ ಆಗಮಿಸುವ ಮೊದಲು ವಾರಗಳ ಕಾಲ ಮಾಂಸಾಹಾರ, ಮದ್ಯ ತ್ಯಜಿಸಿ ವ್ರತವನ್ನು ಪಾಲಿಸುವವರೂ ಇದ್ದಾರೆ. ಕ್ಷೇತ್ರಕ್ಕೆ ಆಗಮಿಸಿದಾಗಲೂ ಭಕ್ತಿಯಿಂದ ನಡೆದುಕೊಂಡು ಇಲ್ಲಿಯ ಗಾಂಭಿರ್ಯತೆ ವೃದ್ಧಿಸಲೂ ಕಾರಣರಾಗುತ್ತಾರೆ. ಆದರೆ, ಪ್ರವಾಸಿಗರು ನಡೆದುಕೊಳ್ಳುತ್ತಿರುವ ರೀತಿ ಬಗ್ಗೆ ಆಸ್ತಿಕರ ಅಸಮಾಧಾನ ಹೆಚ್ಚುತ್ತಿದೆ. ದಿನನಿತ್ಯದ ಒತ್ತಡದ ಬದುಕಿನಿಂದ ಬದಲಾವಣೆ ಬಯಸಿ ಜಿಲ್ಲೆಗೆ ಆಗಮಿಸುವ ಪ್ರವಾಸಿಗರಿಗೆ ಪುಣ್ಯಕ್ಷೇತ್ರ ಮತ್ತು ಪ್ರವಾಸಿ ತಾಣದ ನಡುವಿನ ವ್ಯತ್ಯಾಸದ ಅರಿವು ಇರುವುದು ಕಡಿಮೆ. ಅವರಿಗೆ ಸ್ಥಳೀಯವಾಗಿ ಅಶ್ರಯ ನೀಡುವವರು, ಪ್ರವಾಸ ಆಯೋಜಿಸುವವರೂ ಈ ಬಗ್ಗೆ ಮಾಹಿತಿಯನ್ನೂ ಕೊಡುತ್ತಿಲ್ಲ. ಇದರಿಂದಾಗಿಯೇ ದೇವಾಲಯಗಳಲ್ಲಿ ಭಕ್ತರ ನಂಬಿಕೆಗೆ ಘಾಸಿ ಆಗುವ ರೀತಿಯ ವರ್ತನೆಗಳು ಕಂಡು ಬರಲು ಕಾರಣವಾಗಿದೆ. 2012ರ ಅಕ್ಟೋಬರ್‌ಲ್ಲೇ ತಲಕಾವೇರಿ, ಭಾಗಮಂಡಲದಲ್ಲಿ ಅಂದಿನ ದೇವಾಲಯ ವ್ಯವಸ್ಥಾಪನಾ ಸಮಿತಿ ವಸ್ತ್ರ ಸಂಹಿತೆ ಜಾರಿಗೆ ತಂದಿದ್ದು, ಇದರ ಕಟ್ಟುನಿಟ್ಟಿನ ಪಾಲನೆ ಕೂಡ ನಡೆಯುತ್ತಿತ್ತು. ತುಂಡುಡುಗೆ ಮತ್ತು ಸಭ್ಯವಲ್ಲದ ರೀತಿಯ ಬಟ್ಟೆ ತೊಟ್ಟು ಬರುವವರಿಗೆ ದೇವಾಲಯಕ್ಕೆ ಪ್ರವೇಶ ಇರಲಿಲ್ಲ. ಸ್ಲೀವ್‌ಲೆಸ್‌, ಶಾರ್ಟ್ಸ್, ಬರ್ಮುಡಾದಂತಹ ವಸ್ತ್ರ ಧರಿಸಿದವರನ್ನು ದೇವಾಲಯ ದ್ವಾರದಲ್ಲೇ ತಡೆಯಲಾಗುತ್ತಿತ್ತು. ಈ ಹಿಂದೆ ಪ್ರವಾಸಿಗರಿಗೆ ಕ್ಷೇತ್ರದ ಮಹತ್ವ ಮತ್ತು ಭಕ್ತರ ಭಾವನೆಗಳ ಬಗ್ಗೆ ಅರಿವು ಮೂಡಿಸುವ ಕೆಲಸವೂ ಆಗುತ್ತಿತ್ತು. ಈ ಸಂದರ್ಭದಲ್ಲಿ ದೇವಾಲಯ ಪ್ರವೇಶಿಸಲು ಬಯಸುವವರಿಗೆ ನಿಗದಿತ ಶುಲ್ಕ ಪಡೆದುಕೊಂಡು ದೇವಾಲಯದಿಂದಲೇ ಸಾಂಪ್ರದಾಯಿಕ ವಸ್ತ್ರಗಳನ್ನೂ ಕೊಡಲಾಗುತ್ತಿತ್ತು. ಆದರೆ, ನಂತರದ ವರ್ಷಗಳಲ್ಲಿ ಕಡ್ಡಾಯ ಮಾಯವಾಗಿದೆ. 2 ವರ್ಷಗಳ ಹಿಂದೆ ಮಡಿಕೇರಿಯ ಓಂಕಾರೇಶ್ವರ ದೇವಾಲಯದಲ್ಲೂ ವಸ್ತ್ರ ಸಂಹಿತೆ ಜಾರಿಗೆ ತರಲಾಗಿತ್ತು. ದೇವಾಲಯದ ಆವರಣದಲ್ಲೇ ವಸ್ತ್ರ ಸಂಹಿತೆ ಪಾಲಿಸುವಂತೆ ದೊಡ್ಡ ಫಲಕವನ್ನೂ ಅಳವಡಿಸಲಾಗಿತ್ತು. ದೇವಾಲಯ ಸಂಸ್ಕೃತಿಗೆ ವಿರುದ್ಧವಾಗಿ ಬಟ್ಟೆ ತೊಟ್ಟು ಬರುವವರಿಗೆ ಸ್ಥಳದಲ್ಲೇ ಪಂಚೆ ಮತ್ತು ಶಲ್ಯ ನೀಡಿ ಒಳ ಪ್ರವೇಶಿಸಲು ಅವಕಾಶ ಮಾಡಿಕೊಡಲಾಗಿತ್ತು. ಈಗ ಇಲ್ಲಿಯೂ ನಿಯಮದ ಕಡ್ಡಾಯ ಪಾಲನೆ ಇಲ್ಲ. ಈ ಪುಣ್ಯ ಕ್ಷೇತ್ರಗಳಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗುತ್ತಿದ್ದಂತೆಯೇ ಮತ್ತೆ ಕಡ್ಡಾಯ ವಸ್ತ್ರ ಸಂಹಿತೆಯ ಮಾತುಗಳು ಕೇಳಿ ಬರುತ್ತಿವೆ. ಪ್ರವಾಸೋದ್ಯಮ ಇಲಾಖೆಯ ಪ್ರವಾಸಿ ತಾಣಗಳ ಪಟ್ಟಿಯಿಂದ ಮೊದಲು ಭಾಗಮಂಡಲ ಮತ್ತು ತಲಕಾವೇರಿ ಹೆಸರು ತೆಗೆಯಬೇಕು. ಅವುಗಳನ್ನು ಪುಣ್ಯ ಕ್ಷೇತ್ರಗಳು ಎಂದು ಗುರುತಿಸಬೇಕು ಎನ್ನುವ ಒತ್ತಾಯದ ಜೊತೆಯಲ್ಲೇ ವಸ್ತ್ರಸಂಹಿತೆ ಕಡ್ಡಾಯ ಮಾಡುವಂತೆ ಭಕ್ತರು ಆಗ್ರಹಿಸುತ್ತಿದ್ದಾರೆ. ಹೊರಗಿನವರು ಅಥವಾ ಸ್ಥಳೀಯರು ಯಾರೇ ಆಗಲಿ ಭಾಗಮಂಡಲ ಮತ್ತು ತಲಕಾವೇರಿಗೆ ಬರುವವರು ವಸ್ತ್ರ ಸಂಹಿತೆ ಕಡ್ಡಾಯವಾಗಿ ಪಾಲಿಸಬೇಕು. ಸಂಪ್ರದಾಯಿಕ ಉಡುಪಿನಲ್ಲೇ ದೇವಾಲಯಗಳಿಗೆ ಬರಬೇಕು. ಮೈಮಾಟದ ಪ್ರದರ್ಶನಕ್ಕೆ, ಚಡ್ಡಿ ಹಾಕಿಕೊಂಡು ಸುತ್ತುವುದಕ್ಕೆ ಬೇರೆಯದೇ ಜಾಗಗಳಿವೆ. ಚಮ್ಮಟ್ಟಿರ ಪ್ರವೀಣ್‌ ಉತ್ತಪ್ಪ, ಯುವ ಘಟಕ ಅಧ್ಯಕ್ಷ, ಅಖಿಲ ಕೊಡವ ಸಮಾಜ ದೇವಾಲಯದಲ್ಲಿ ವಸ್ತ್ರಸಂಹಿತೆ ಪಾಲಿಸುವಂತೆ ಸೂಚನಾಫಲಕ ಅಳವಡಿಸಲಾಗಿದೆ. ಒಪ್ಪಿತವಲ್ಲದ ಬಟ್ಟೆ ಹಾಕಿಕೊಂಡು ಬರುವವರು ಅಗತ್ಯಬಿದ್ದರೆ ಖಾಸಗಿಯಾಗಿ ಸಿಗುವ ಸಾಂಪ್ರದಾಯಿಕ ವಸ್ತ್ರಗಳನ್ನು ಪಡೆದುಕೊಂಡು ದೇವಾಲಯಕ್ಕೆ ತೆರಳಬಹುದಾಗಿದೆ. ಈ ಬಗ್ಗೆ ನಾವೂ ಅರಿವು ಮೂಡಿಸುವ ಪ್ರಯತ್ನ ನಡೆಸಿದ್ದೇವೆ. ಬಿ.ಎಂ. ಕೃಷ್ಣಪ್ಪ, ಕಾರ್ಯನಿರ್ವಹಣಾ ಅಧಿಕಾರಿ, ಭಾಗಮಂಡಲ-ತಲಕಾವೇರಿ ದೇವಾಲಯ ಸಮಿತಿ
from India & World News in Kannada | VK Polls https://ift.tt/3Cyw0lW
