ಹೊಸದಿಲ್ಲಿ: ಪೆಟ್ರೋಲ್‌ ಮತ್ತು ಡೀಸೆಲ್‌ ದರಗಳ ನಾಗಾಲೋಟ ಮುಂದುವರಿದಿದ್ದು, ಬಳಕೆದಾರರು ಕಂಗಾಲಾಗಿದ್ದಾರೆ. ತೈಲ ದರ ಏರಿಕೆಯಿಂದ ಸಾಗಾಟ ವೆಚ್ಚವೂ ಹೆಚ್ಚಾಗಿದ್ದು, ಇದರ ಪರಿಣಾಮ ಅನಿವಾರ್ಯವಾಗಿ ಇತರೇ ದಿನಬಳಕೆಯ ವಸ್ತುಗಳ ಬೆಲೆಯೂ ಆಕಾಶದತ್ತ ಮುಖ ಮಾಡಿದೆ. ಅಂತಾರಾಷ್ಟ್ರೀಯ ಕಚ್ಚಾ ತೈಲ ದರ ಜಿಗಿತದ ಬೆನ್ನಿಗೇ ಇಂಧನ ದರಗಳು ಗಗನಕ್ಕೇರಿವೆ. ಬೆಂಗಳೂರಿನಲ್ಲಿ ಪ್ರತಿ ಲೀಟರ್‌ ಪೆಟ್ರೋಲ್‌ ದರ ಶುಕ್ರವಾರ 112.43 ರೂ.ಗೆ ಏರಿದೆ. ಅಂದರೆ ಲೀಟರ್‌ಗೆ 37 ಪೈಸೆ ಹೆಚ್ಚಳವಾಗಿದೆ. ಡೀಸೆಲ್‌ ದರದಲ್ಲಿ 37 ಪೈಸೆ ವೃದ್ಧಿಸಿದ್ದು, 103.35 ರೂ.ಗೆ ಜಿಗಿದಿದೆ. ಮುಂಬಯಿನಲ್ಲಿ ಪೆಟ್ರೋಲ್‌ ದರ 114.47 ರೂ, ಚೆನ್ನೈನಲ್ಲಿ105.43 ರೂ.ಗೆ ಜಿಗಿದಿದೆ. ಪೆಟ್ರೋಲಿಯಂ ಸಚಿವಾಲಯವು ತೈಲ ರಫ್ತುದಾರ ರಾಷ್ಟ್ರಗಳೊಡನೆ ತೈಲೋತ್ಪಾದನೆಯನ್ನು ಹೆಚ್ಚಿಸುವಂತೆ ಮಾತುಕತೆ ನಡೆಸಿದೆ ಎಂದು ವರದಿಯಾಗಿದೆ. ಆದರೆ ತೈಲದ ಮೇಲಿನ ಭಾರಿ ತೆರಿಗೆ ಕೂಡ ಪ್ರಭಾವ ಬೀರಿದೆ. ಹಣದುಬ್ಬರ ಏರಿಕೆ ಭೀತಿ:ಕಳೆದ ಸೆಪ್ಟೆಂಬರ್‌ನಲ್ಲಿ ಚಿಲ್ಲರೆ ಹಣದುಬ್ಬರ ಶೇ.4.35ಕ್ಕೆ ಇಳಿದಿತ್ತು. ಹೀಗಿದ್ದರೂ ಕಳೆದ ಕೆಲ ತಿಂಗಳಿನಿಂದ ಒಟ್ಟಾರೆ ಹಣದುಬ್ಬರ ಶೇ.6ರ ಸನಿಹದಲ್ಲಿದೆ. ಭಾರತೀಯ ಉತ್ಪಾದಕರು ತಮ್ಮ ಹೆಚ್ಚುವರಿ ಖರ್ಚು ವೆಚ್ಚಗಳ ಹೊರೆಯನ್ನು ಗ್ರಾಹಕರಿಗೆ ವರ್ಗಾಯಿಸುತ್ತಿದ್ದಾರೆ. ಇದರ ಪರಿಣಾಮ ಬೇಡಿಕೆ ಕುಸಿಯಬಹುದು ಹಾಗೂ ಕೋವಿಡ್‌ ಬಿಕ್ಕಟ್ಟಿನ ನಂತರ ಆರ್ಥಿಕತೆಯೆ ಚೇತರಿಕೆಗೆ ಅಡ್ಡಿಯಾಗಿ ಪರಿಣಮಿಸಬಹುದು ಎಂದು ಆರ್ಥಿಕ ತಜ್ಞರು ಎಚ್ಚರಿಸಿದ್ದಾರೆ. ಚಹಾ, ಕಾಫಿ, ಬಿಸ್ಕತ್ ತುಟ್ಟಿ:ಕಳೆದ ಜುಲೈ- ಸೆಪ್ಟೆಂಬರ್‌ನಲ್ಲಿ ಚಹಾ, ಕಾಫಿ, ಬಿಸ್ಕತ್, ಟೂತ್‌ಪೇಸ್ಟ್‌ ಇತ್ಯಾದಿ ದಿನ ಬಳಕೆಯ ವಸ್ತುಗಳ ದರದಲ್ಲಿ ಶೇ.4 ರಿಂದ ಶೆ.10 ರ ತನಕ ಹೆಚ್ಚಳವಾಗಿದೆ. ಸಿಮೆಂಟ್‌ ದರ ಹೆಚ್ಚಳವಾಗಿದೆ. ಕಚ್ಚಾ ವಸ್ತುಗಳ ದರ ಹೆಚ್ಚಳವೇ ಇದಕ್ಕೆ ಕಾರಣ ಎಂದು ಹಿಂದೂಸ್ತಾನ್‌ ಯುನಿಲಿವರ್‌, ನೆಸ್ಲೆ, ಪ್ರಾಕ್ಟರ್‌ ಆ್ಯಂಡ್‌ ಗ್ಯಾಂಬಲ್‌, ಅಂಬುಜಾ ಸಿಮೆಂಟ್‌, ಕಜಾರಿಯಾ ಸಿರಾಮಿಕ್ಸ್‌ ತಿಳಿಸಿವೆ. ಸಾಗಣೆ ವೆಚ್ಚ ಶೇ.20 ಹೆಚ್ಚಳ:ಸರಕು ಸಾಗಣೆ ವೆಚ್ಚದಲ್ಲಿ ಶೇ. 20-30 ಹೆಚ್ಚಳವಾಗಿದ್ದು, ಇದು ಬೆಲೆ ಏರಿಕೆಗೆ ಮತ್ತೊಂದು ಕಾರಣವಾಗಲಿದೆ. ಹೀಗಾಗಿ ಸರಕಾರ ಇಂಧನ ದರ ಇಳಿಕೆಗೆ ಕೂಡಲೇ ಕ್ರಮ ವಹಿಸಬೇಕು ಎಂದು ಉದ್ಯಮ ವಲಯ ಒತ್ತಾಯಿಸಿದೆ. ಗ್ರಾಮೀಣ ಬೇಡಿಕೆ ಇಳಿಮುಖ:ಕಳೆದ ಎರಡು ತಿಂಗಳಿನಿಂದೀಚೆಗೆ ಗ್ರಾಮೀಣ ಪ್ರದೇಶಗಳಲ್ಲಿ ಬೇಡಿಕೆ ಇಳಿಮುಖವಾಗಿದ್ದು, ಹಣದುಬ್ಬರದ ಪರಿಣಾಮವನ್ನು ಬಿಂಬಿಸಿದೆ. ಜಿಡಿಪಿಗೆ ಶೇ. 55 ಕೊಡುಗೆಯನ್ನು ಗ್ರಾಹಕರ ವೆಚ್ಚಗಳು ನೀಡುತ್ತಿದ್ದು, ಬೆಲೆ ಏರಿಕೆಯಿಂದ ಇದಕ್ಕೆ ಹೊಡೆತ ಬೀಳಲಿದೆ ಎಂದು ಡಿಬಿಎಸ್‌ ಬ್ಯಾಂಕ್‌ನ ಹಿರಿಯ ಆರ್ಥಿಕ ತಜ್ಞರಾದ ರಾಧಿಕಾ ರಾವ್‌ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3vUtYKp
