ಪುಣೆ: ಮಹತ್ವದ ಬೆಳವಣಿಗೆಯೊಂದರಲ್ಲಿ ಬಾಲಿವುಡ್ ನಟ ಶಾರೂಕ್ ಖಾನ್ ಪುತ್ರ ಆರ್ಯನ್ ಖಾನ್ ಅವರ ಡ್ರಗ್ಸ್ ಪ್ರಕರಣದಲ್ಲ ಸಾಕ್ಷಿದಾರನಾಗಿದ್ದ ಕಿರಣ್ ಗೋಸಾವಿಯನ್ನು ಪುಣೆ ಪೊಲೀಸರು ಬಂಧಿಸಿದ್ದಾರೆ. ಬೆಳಕಿಗೆ ಬಂದ ದಿನದಿಂದ ಕಿರಣ್ ಗೋಸಾವಿ ಬಗ್ಗೆ ಚರ್ಚೆಗಳು ನಡೆಯುತ್ತಲೇ ಇವೆ. ಅದರಲ್ಲೂ ಆರ್ಯನ್ ಖಾನ್ ಬಂಧನದ ದಿನ ಆತನೊಂದಿಗೆ ಎನ್‌ಸಿಬಿ ಕಚೇರಿಯಲ್ಲಿ ಗೋಸಾವಿ ಕ್ಲಿಕ್ಕಿಸಿಕೊಂಡಿದ್ದ ಸೆಲ್ಫಿ ರಾಷ್ಟ್ರಾದ್ಯಂತ ಚರ್ಚೆ ಮಾಡಿತ್ತು. ಅಲ್ಲದೇ ಗೋಸಾವಿ ಎನ್‌ಸಿಬಿ ವಲಯ ನಿರ್ದೇಶಕ ಸಮೀರ್ ವಾಂಖೆಡೆ ಸೃಷ್ಟಿಸಿದ ನಕಲಿ ಸಾಕ್ಷಿದಾರ ಎಂಬ ಆರೋಪಗಳೂ ಕೇಳಿ ಬಂದಿದ್ದವು. ಇದೆಲ್ಲದರ ಮಧ್ಯೆ ಆರ್ಯನ್ ಖಾನ್ ಅವರೊಂದಿಗೆ ಸೆಲ್ಫಿ ಕ್ಲಿಕ್ಕಿಸಿಕೊಂಡ ಮರುದಿನದಿಂದಲೇ ಕಿರಣ್ ಗೋಸಾವಿ ನಾಪತ್ತೆಯಾಗಿದ್ದ. ಆತ ಎಲ್ಲಿದ್ದಾನೆ ಎಂಬುದರ ಬಗ್ಗೆ ಯಾರಿಗೂ ಮಾಹಿತಿ ಇರಲಿಲ್ಲ. ಎನ್‌ಸಿಬಿ ಅಧಿಕಾರಿ ಸಮೀರ್ ವಾಂಖೆಡೆ ಜೊತೆಗಿನ ಆತನ ಕೆಲವು ಫೋಟೋಗಳೂ ಕೂಡ ವೈರಲ್ ಆಗಿದ್ದವು. ಇದೀಗ ಪುಣೆಯಲ್ಲಿ ಗೋಸಾವಿ ಬಂಧನವಾಗಿದ್ದು, 2018ರ ವಂಚನೆ ಪ್ರಕರಣದಲ್ಲಿ ಪುಣೆ ಪೊಲೀಸರಿಗೆ ಬೇಕಾಗಿದ್ದ ವ್ಯಕ್ತಿ ಎಂದು ಘೋಷಿಸಲಾಗಿದೆ. ವಂಚನೆ ಪ್ರಕರಣವೊಂದರಲ್ಲಿ ಗೋಸಾವಿ ಪಾತ್ರ ಇದೆ ಎನ್ನಲಾಗಿದ್ದು, 2019ರಲ್ಲಿ ಪುಣೆ ಪೊಲೀಸರು ಈತನನ್ನು 'ವಾಂಟೆಡ್' ಲಿಸ್ಟ್‌ನಲ್ಲಿ ಸೇರಿಸಿದ್ದರು. ಈತನ ವಿರುದ್ಧದ ವಂಚನೆ ಪ್ರಕರಣವನ್ನು ತನಿಖೆ ನಡೆಸಲಾಗುವುದು ಎಂದು ಕಮಿಷನರ್ ಅಮಿತಾಬ್ ಗುಪ್ತಾ ಸ್ಪಷ್ಟಪಡಿಸಿದ್ದಾರೆ. ಮೂರು ದಿನಗಳ ಹಿಂದೆ ವಿಡಿಯೋ ಒಂದನ್ನು ಬಿಡುಗಡೆ ಮಾಡಿದ್ದ ಗೋಸಾವಿ, ಡ್ರಗ್ಸ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಉತ್ತರ ಪ್ರದೇಶದ ಲಕ್ನೋ ಪೊಲೀಸರ ಮುಂದೆ ಮಾತ್ರ ಶರಣಾಗುವುದಾಗಿ ಷರತ್ತು ಹಾಕಿದ್ದ. ಆದರೆ ಗೋಸಾವಿ ತಮ್ಮನ್ನು ಸಂಪರ್ಕಿಸಲು ಬಯಸಿದ್ದಾನೆ ಎಂಬ ವರದಿಗಳನ್ನು ಲಕ್ನೋ ಪೊಲೀಸರು ಸ್ಪಷ್ಟವಾಗಿ ತಳ್ಳಿ ಹಾಕಿದ್ದರು. ಡ್ರಗ್ಸ್ ಪ್ರಕರಣದ ಸಾಕ್ಷಿದಾರ ಕಿರಣ್ ಗೋಸಾವಿ ಹಾಗೂ ಶಾರೂಕ್ ಖಾನ್ ಮ್ಯಾನೇಜರ್ ನಡುವೆ ಒಪ್ಪಂದವಾಗಿದ್ದು, ಆರ್ಯನ್ ಖಾನ್ ಬಿಡುಗಡೆಗಾಗಿ ಒಟ್ಟು 18 ಕೋಟಿ ರೂ. ಡೀಲ್ ನಡೆದಿದೆ ಎಂದು ಗೋಸಾವಿ ಅಂಗರಕ್ಷಕ ಎಂದು ಹೇಳಿಕೊಂಡಿರುವ ಪ್ರಭಾಕರ್ ಸೈಲ್ ಎಂಬ ವ್ಯಕ್ತಿ ಗಂಭೀರ ಆರೋಪ ಮಾಡಿದ್ದ. ಅಲ್ಲದೇ ಈ ಪೈಕಿ 8 ಕೋಟಿ ರೂ. ಹಣವನ್ನು ಎನ್‌ಸಿಬಿ ಅಧಿಕಾರಿಯೊಬ್ಬರಿಗೆ ನೀಡುವ ಕುರಿತೂ ಮಾತುಕತೆ ನಡೆದಿತ್ತು ಎಂದು ಸೈಲ್ ಸ್ಪೋಟಕ ಹೇಳಿಕೆ ನೀಡಿದ್ದ. ಸೈಲ್ ಹೇಳಿಕೆ ಆಧಾರದ ಮೇಲೆ ಎನ್‌ಸಿಬಿ ತನ್ನ ವಲಯ ನಿರ್ದೇಶಕ ಸಮೀರ್ ವಾಂಖೆಡೆ ಅವರನ್ನು ವಿಚಾರಣೆಗೆ ಗುರಿಪಡಿಸಿದೆ. ಈ ಮಧ್ಯೆ ಅಜ್ಞಾತ ಸ್ಥಳದಿಂದ ವಿಡಿಯೋ ಬಿಡುಗಡೆ ಮಾಡಿದ್ದ ಗೋಸಾವಿ, ಇಂತಹ ಯಾವುದೇ ಡೀಲ್ ನಡೆದಿಲ್ಲ. ಸೈಲ್ ಯಾರದ್ದೋ ಒತ್ತಡಕ್ಕೆ ಸಿಲುಕಿ ಸುಳ್ಳು ಹೇಳುತ್ತಿದ್ದಾನೆ ಎಂದು ಆರೋಪಿಸಿದ್ದ. ಸದ್ಯ ಡ್ರಗ್ಸ್ ಪ್ರಕರಣ ಪ್ರಮುಖ ಸಾಕ್ಷಿದಾರ ಗೋಸಾವಿ ಬಂಧನವಾಗಿದ್ದು, ಆರ್ಯನ್ ಖಾನ್ ವಿರುದ್ಧದ ಡ್ರಗ್ಸ್ ಪ್ರಕರಣದ ತನಿಖೆಗೆ ರೋಚಕ ತಿರುವು ದೊರೆತಂತಾಗಿದೆ.
from India & World News in Kannada | VK Polls https://ift.tt/3mnWNvO
