ತೇಲಪಂಡ ಕವನ್‌ ಕಾರ್ಯಪ್ಪ ಸೋಮವಾರಪೇಟೆ ಮಡಿಕೇರಿ: ಕಳೆದ ತಿಂಗಳು ಸುರಿದ ಅಕಾಲಿಕ ಮಳೆಯಿಂದ ಬೆಳೆಗಾರರಿಗೆ ಅನುಕೂಲವೇ ಆಗಿದೆ. ಜಿಲ್ಲೆಯ ಬಹುತೇಕ ಕಡೆಗಳಲ್ಲಿ ಈ ಮಳೆಯಿಂದಾಗಿ ಅರೆಬಿಕಾ ಕಾಫಿ ಸೊಗಸಾಗಿ ಹೂವು ಬಿಟ್ಟಿದ್ದು, ಬೆಳೆಗಾರರ ಮುಖದಲ್ಲಿ ನಗು ಕಾಣಿಸಿಕೊಂಡಿದೆ. ಕೊಡಗಿನಲ್ಲಿ ಅರೆಬಿಕಾ ಕಾಫಿ ಗಿಡಗಳು ಇರುವ ಕಡೆಗಳಲ್ಲಿ ಈಗ ಎಲ್ಲಿ ನೋಡಿದರೂ ಮಲ್ಲಿಗೆ ಹೂ ಹರಡಿದಂತೆ ಕಾಫಿಯ ಹೂವು ಅರಳಿ ನಗುತ್ತಿದೆ. ಘಮ ಘಮ ಸುವಾಸನೆಯ ಜೊತೆಗೆ ಜೇನ್ನೊಣ, ದುಂಬಿಗಳ ಝೇಂಕಾರವೂ ಆಕರ್ಷಿಸುತ್ತಿದೆ. ಅಕಾಲಿಕ ಮಳೆಯಿಂದ ಕಾಫಿ ಕೊಯ್ಲು ಮತ್ತು ಕೊಯ್ಲು ಮಾಡಿದ ಕಾಫಿ ಒಣಗಿಸಲು ತೊಂದರೆಯಾದರೂ ಈಗ ಅರಳಿರುವ ಹೂವು ಬೆಳೆಗಾರರಲ್ಲಿ ಹೊಸ ಭರವಸೆ ಮೂಡಿಸಿದೆ. ಪ್ರತಿ ವರ್ಷ ಅಕಾಲಿಕ ಮಳೆಯಿಂದ ಫಸಲು ನಷ್ಟ ಅನುಭವಿಸುತ್ತಿದ್ದ ಬೆಳೆಗಾರರು, ಪ್ರಸಕ್ತ ವರ್ಷ ಉತ್ತಮ ಹೂ ಬಿಟ್ಟಿರುವುದರಿಂದ ಬಂಪರ್‌ ಫಸಲಿನ ನಿರೀಕ್ಷೆಯಲ್ಲಿದ್ದಾರೆ. ಹೂವು ಅರಳಿದ ನಂತರದ ಎರಡು ವಾರದಲ್ಲಿ ಬ್ಯಾಕಿಂಗ್‌ ಮಳೆ ಅವಶ್ಯಕತೆಯಿದ್ದು, ಒಂದು ಇಂಚಿನಷ್ಟು ಮಳೆ ಸುರಿದರೆ, ಬೆಳೆಗಾರರು ಹೆಚ್ಚಿನ ಫಸಲು ನಿರೀಕ್ಷೆ ಮಾಡಬಹುದು. ಆದರೆ ಈ ತಿಂಗಳು ಮಳೆ ಬರದೆ ಹೋದರೆ ಬೆಳೆಗಾರನ ಉತ್ಸಾಹಕ್ಕೆ ತಣ್ಣೀರು ಎರಚಿದಂತಾಗುತ್ತದೆ. ಉತ್ತಮ ಹೂ ಮಳೆಯಾದ ನಂತರ ಕಾಫಿ ತೋಟದ ನಿರ್ವಹಣೆಗೆ ಬೆಳೆಗಾರರು ಹೆಚ್ಚಿನ ಆಸಕ್ತಿ ತೋರಿಸುತ್ತಿದ್ದಾರೆ. ಕಾರ್ಮಿಕರ ಕೊರತೆಯ ಹಿನ್ನೆಲೆ ದುಪ್ಪಟ್ಟು ಕೂಲಿ ಕೊಟ್ಟು ಕೆಲಸ ಮಾಡಿಸಬೇಕಾದ ಅನಿವಾರ್ಯತೆ ಒದಗಿದೆ. ನೆರಳು ನಿರ್ವಹಣೆಗಾಗಿ ಶೀಘ್ರ ಮರ ಕಪಾತು ಮಾಡಬೇಕಾಗಿದ್ದು, ಮರ ಹತ್ತಿ ರೆಂಬೆ ಕಡಿಯುವವರಿಗೆ 600ರಿಂದ 700 ರೂ.ಗಳ ಕೂಲಿ ಕೊಡಬೇಕಾಗಿದೆ. ಸೌದೆ ಕಡಿಯುವವರಿಗೂ 300ರಿಂದ 400ರೂ. ಕೂಲಿ ನೀಡಬೇಕಾಗಿದೆ. ಆದರೆ ಈಗ ಕಾಫಿ ಬೆಲೆ, ಕಾಳುಮೆಣಸು ಬೆಲೆ ಕಡಿಮೆಯಾಗಿದ್ದು, ಕಾಫಿ ತೋಟ ನಿರ್ವಹಣೆ ಕಷ್ಟವಾಗುತ್ತಿದೆ ಎಂದು ಬೆಳೆಗಾರರು ಹೇಳುತ್ತಾರೆ. ಚೆನ್ನಾಗಿ ಹೂ ಅರಳಿದರೂ ಕಾಫಿ ಗಿಡ ಕಪಾತು, ರಾಸಾಯನಿಕ ಗೊಬ್ಬರ ಹಾಕುವುದು, ಬಿಳಿಕಾಂಡ ಕೊರಕದ ಹತೋಟಿಗೆ ಕ್ರಮ ಕೈಗೊಳ್ಳುವುದು, ಇವೆಲ್ಲವನ್ನು ನಿಗದಿತ ಸಮಯದಲ್ಲಿ ಮಾಡಬೇಕಾಗಿದೆ.
from India & World News in Kannada | VK Polls https://ift.tt/3sDI5AN
