ಶ್ರೀನಗರ: ಜಮ್ಮು-ಕಾಶ್ಮೀರದ ಪ್ರಮುಖ ಪ್ರಾದೇಶಿಕ ಪಕ್ಷವಾಗಿರುವ ಪಿಡಿಪಿಯ ಯುವ ಮುಖಂಡ ವಾಹೀದ್‌-ಉರ್‌-ರೆಹಮಾನ್‌ ಪರ್ರಾ ಉಗ್ರರಿಗೆ ಆರ್ಥಿಕ ನೆರವು ಹಾಗೂ ಪಿಸ್ತೂಲ್‌-ಗನ್‌ಗಳನ್ನು ಪೂರೈಸುವ ಜಾಲವನ್ನು ನಡೆಸುತ್ತಿದ್ದಾನೆ ಎಂದು ರಾಷ್ಟ್ರೀಯ ತನಿಖಾ ದಳ (ಎನ್‌ಐಎ)ಆರೋಪಿಸಿದೆ. ಜಮ್ಮು ಕೋರ್ಟ್‌ಗೆ ಈ ಸಂಬಂಧ ಪೂರಕ ಆರೋಪಪಟ್ಟಿಯನ್ನು ಕೂಡ ಎನ್‌ಐಎ ಅಧಿಕಾರಿಗಳು ಸಲ್ಲಿಸಿದ್ದಾರೆ. ವಾಹೀದ್‌ 2010ರಿಂದಲೂ ಪಾಕಿಸ್ತಾನದಿಂದ ಗಡಿ ನುಸುಳುವ ಉಗ್ರರಿಗೆ ಅಗತ್ಯ ನೆರವು ನೀಡುತ್ತಿದ್ದಾನೆ. ತನ್ನ ಪರಿಚಯದ 20-25 ಯುವಕರ ತಂಡ ಕಟ್ಟಿಕೊಂಡು ಅವರ ಮೂಲಕ ಭದ್ರತಾ ಪಡೆಗಳ ಕಾರ್ಯಾಚರಣೆ ವೇಳೆ ಸೈನಿಕರ ಮೇಲೆ ಕಲ್ಲುತೂರಾಟ ನಡೆಸುತ್ತಾನೆ. ರಾಜಕೀಯವಾಗಿ ಪ್ರಭಾವಿ ಎಂದು ಗುರುತಿಸಿಕೊಳ್ಳಲು ವಾಹೀದ್‌ ಇಂಥ ಕೃತ್ಯಗಳ ನೇತೃತ್ವ ವಹಿಸುತ್ತಿದ್ದಾನೆ ಎಂದು ಆರೋಪಿಸಲಾಗಿದೆ. ಅಲ್ಲದೇ 2010ರಲ್ಲಿ ಪ್ರತಿಪಕ್ಷವಾಗಿದ್ದ , ಸರಕಾರ ವಿರುದ್ಧ ಹಿಂಸಾಚಾರದ ಆರೋಪಗಳನ್ನು ಹೊರಿಸಲು ಕೂಡ ಈತನನ್ನು ಬಳಸಿಕೊಂಡಿದೆ ಎಂದು ಕೋರ್ಟ್‌ಗೆ ವಿವರಗಳನ್ನು ಸಲ್ಲಿಸಲಾಗಿದೆ. ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ಐಎಸ್‌ಐ ಪೋಷಿತ ಉಗ್ರ ಸಂಘಟನೆ ‘ಹಿಜ್ಬುಲ್‌ ಮುಜಾಹಿದ್ದೀನ್‌’ ಮುಖಂಡರು ಕೂಡ ವಾಹೀದ್‌ನನ್ನು ಆಗಾಗ್ಗೆ ಸಂಪರ್ಕಿಸಿ, ನೆರವು ಪಡೆಯುತ್ತಿದ್ದರು ಎಂದು ಎನ್‌ಐಎ ಆರೋಪಿಸಿದೆ. ಈ ಆರೋಪಗಳನ್ನು ಅಲ್ಲಗಳೆದಿರುವ ವಾಹೀದ್‌ ಮತ್ತು ಪಿಡಿಪಿಯ ಮುಖಂಡರು, ಬಿಜೆಪಿಗೆ ಸೇರಲು ಆತ ನಿರಾಕರಿಸಿದ್ದಕ್ಕಾಗಿ ಸುಳ್ಳು ಆರೋಪಗಳನ್ನು ಹೊರಿಸಲಾಗುತ್ತಿದೆ ಎಂದು ಪ್ರತಿಕ್ರಿಯಿಸಿದ್ದಾರೆ. ಸದ್ಯ ವಾಹೀದ್‌ ನ್ಯಾಯಾಂಗ ಬಂಧನದಲ್ಲಿದ್ದಾನೆ.
from India & World News in Kannada | VK Polls https://ift.tt/2O0b5UM
