ಸುನಿಲ್‌ ಪೊನ್ನೇಟಿ ಕುಶಾಲನಗರ: ಕಾಡಿನ ಹೆಣ್ಣಾನೆಗಳ ಮೋಹದ ಬಲೆಗೆ ಬಿದ್ದು ಅರಣ್ಯದಲ್ಲಿ ಮಾವುತರ ಜೊತೆ ಕಣ್ಣಾಮುಚ್ಚಾಲೆ ಆಡುತ್ತಿದ್ದ ಕುಶ ಕೊನೆಗೂ ಸಿಕ್ಕಿಬಿದ್ದಿದ್ದಾನೆ. ದುಬಾರೆ ಸಾಕಾನೆ ಶಿಬಿರದಿಂದ ತಪ್ಪಿಸಿಕೊಂಡು ಸುಮಾರು ಒಂದು ವರ್ಷಕ್ಕೂ ಹೆಚ್ಚು ಕಾಲ ಸಂಗಾತಿಗಳ ಜೊತೆಗೆ ಕಾಡೊಳಗೆಯೇ ಅಲೆದಾಡಿ ಕಾಡಾನೆಯಂತೆಯೇ ಆಗಿ ಹೋಗಿದ್ದ ಈ ರಸಿಕ, ಈಗ ಅರಣ್ಯ ಇಲಾಖೆ ಸಿಬ್ಬಂದಿ ಮುಂದೆ ಮಂಡಿಯೂರಿದ್ದಾನೆ. ಕಾವೇರಿ ನದಿಯ ತಣ್ಣನೆ ಸ್ನಾನ, ಬಿಸಿ ಬಿಸಿ ಹುರುಳಿಸಾಂಬಾರ್‌ ಮದ್ದೆಯೂಟ ನಂತರ ದುಬಾರೆ ಸಾಕಾನೆ ಶಿಬಿರದ ಆನೆಗಳನ್ನು ಮೇವಿಗಾಗಿ ಕಾಡಿಗಟ್ಟುವುದು ಸಾಮಾನ್ಯ. ಹೀಗೆ ಅರಣ್ಯದೊಳಗೆ ಹೋಗುತ್ತಿದ್ದ ಶಿಬಿರದ ಸಾಕಾನೆ ಕುಶನಿಗೆ ಕಾಡಿನ ಹೆಣ್ಣಾನೆಗಳ ಜೊತೆ ಗೆಳೆತನ ಶುರುವಾಯಿತು. ಗೆಳೆತನ ಪ್ರೀತಿಗೆ ತಿರುಗಿ ಪ್ರಣಯದ ಹಂತಕ್ಕೆ ಬಂದಾಗ 2019ರ ನವೆಂಬರ್‌ನ ಒಂದು ದಿನ ಶಿಬಿರದಿಂದ ಎಸ್ಕೇಪ್‌ ಆಗಿಬಿಟ್ಟಿದ್ದ. ಮೇವು ಮಾಡಲು ಹೋದವನಲ್ವಾ.. ಇವತ್ತಲ್ಲಾ, ನಾಳೆ ಬರ್ತಾನೆ.. ಎಂದು ಅರಣ್ಯ ಇಲಾಖೆ ಸಿಬ್ಬಂದಿ, ಕುಶನ ಮಾವುತರು, ಕಾವಾಡಿಗಳು ಕಾದಿದ್ದೇ ಕಾದಿದ್ದು, ಮೋಹಕ್ಕೆ ಬಿದ್ದವನಿಗೆ ಶಿಬಿರದ ನೆನಪಾಗಲೇ ಇಲ್ಲ. ಪ್ರಿಯತಮೆಯರಿಗೆ ಶಿಬಿರ ತೋರಿಸಲು ಕರೆದುಕೊಂಡು ಬಂದಂತೆ ಆರಂಭದಲ್ಲಿ ಒಂದೆರಡು ಬಾರಿ ಸಂಗಾತಿಗಳ ಜೊತೆಯಲ್ಲಿ ಶಿಬಿರದ ಬಳಿ ಸುಳಿದಾಡಿದ್ದ. ಆದರೆ ಅವರನ್ನು ಬಿಟ್ಟು ಬರುವ ಮನಸ್ಸು ಮಾಡಿರಲಿಲ್ಲ. ನಂತರದ ದಿನಗಳಲ್ಲಿ ಸಂಗಾತಿಗಳ ಜೊತೆಗೆ ಸೇರಿಕೊಂಡು ಕಾಡಾನೆಯಂತೆಯೇ ಆಗಿ ಹೋದ ಕುಶ ಮಾವುತರ ಕಣ್ಣಿಗೆ ಬೀಳುತ್ತಿದ್ದರೂ ಅವರ ಅಂಕೆಗೆ ಸಿಗುತ್ತಿರಲಿಲ್ಲ. ಕಣ್ಣಾಮುಚ್ಚಾಲೆ ಯಾಡಿ ತಪ್ಪಿಸಿಕೊಂಡು ಬಿಡುತ್ತಿದ್ದ. ಕಳೆದ ತಿಂಗಳು ಶ್ರೀಮಂಗಲ ಭಾಗದಲ್ಲಿ ಹುಲಿ ವಿರುದ್ಧದ ಕಾರ್ಯಾಚರಣೆಯಲ್ಲಿ ಸಿಬ್ಬಂದಿ ಪಾಲ್ಗೊಂಡಿದ್ದರಿಂದ ಕುಶನನ್ನು ಹಿಡಿಯುವುದು ಸ್ವಲ್ಪ ನಿಧಾನವಾಗಿತ್ತು. ಕಳೆದ ವಾರ ಈತ ಸಂಗಾತಿಗಳ ಜೊತೆಗೆ ಮೀನುಕೊಲ್ಲಿ ಅರಣ್ಯದಲ್ಲಿರುವ ಮಾಹಿತಿ ಸಿಕ್ಕಿತ್ತು. ದುಬಾರೆ ಶಿಬಿರದ ಸಾಕಾನೆಗಳಾದ ಪ್ರಶಾಂತ್‌, ಧನಂಜಯ, ಸುಗ್ರೀವ ಮತ್ತು ಲಕ್ಷ್ಮಣ ಸಹಾಯದಿಂದ ಮಂಗಳವಾರ ಬೆಳಗ್ಗೆ 5 ಗಂಟೆಗೆ ಕುಶಾಲನಗರ ವಲಯದ ಮೀನುಕೊಲ್ಲಿ ವ್ಯಾಪ್ತಿಯ ಅರಣ್ಯ ಪ್ರದೇಶದಲ್ಲಿ ಕಾಡಾನೆಗಳೊಂದಿಗೆ ಇದ್ದ ಕುಶನನ್ನು ಬೇರ್ಪಡಿಸಿ ಸೆರೆ ಹಿಡಿಯುವಲ್ಲಿ ಯಶಸ್ವಿಯಾಗಿದ್ದೇವೆ ಎಂದು ವಲಯ ಅರಣ್ಯಾಧಿಕಾರಿ ಅನನ್ಯ ಕುಮಾರ್‌ ತಿಳಿಸಿದ್ದಾರೆ. ಕಾರ್ಯಾಚರಣೆಯಲ್ಲಿ ಹುಣಸೂರು ವನ್ಯಜೀವಿ ವಿಭಾಗದ ವೈದ್ಯಾಧಿಕಾರಿ ಡಾ.ಮುಜೀಬ್‌, ಉಪ ವಲಯ ಅರಣ್ಯಾಧಿಕಾರಿ ಕೆ.ಪಿ.ರಂಜನ್‌, ಕೆ.ಎಸ್‌.ಸುಬ್ರಾಯ ನೇತೃತ್ವದಲ್ಲಿ ಸಾಕಾನೆ ಶಿಬಿರದ ಮಾವುತರು, ಕಾವಾಡಿಗರು ಹಾಗೂ ಮೀನುಕೊಲ್ಲಿ ಶಾಖೆಯ ಅರಣ್ಯ ಸಿಬ್ಬಂದಿ ಪಾಲ್ಗೊಂಡಿದ್ದರು. ನಾಲ್ಕು ವರ್ಷಗಳ ಹಿಂದೆ ಕಂಡೆಕೆರೆ ಭಾಗದಲ್ಲಿ ಉಪಟಳ ಮಾಡುತ್ತಿದ್ದ 2 ಕಾಡಾನೆಗಳನ್ನು ಸೆರೆಹಿಡಿದು ಲವ ಮತ್ತು ಕುಶ ಎಂದು ಹೆಸರಿಡಲಾಗಿತ್ತು. ಲವ ದುಬಾರೆ ಸಾಕಾನೆ ಶಿಬಿರದಲ್ಲೇ ಇದ್ದರೆ, ರಸಿಕ ಕುಶ ಮಾತ್ರ ತಪ್ಪಿಸಿಕೊಂಡುಬಿಟ್ಟಿದ್ದ.
from India & World News in Kannada | VK Polls https://ift.tt/3m4TRlX
