ಕೃಷ್ಣರಾಜನಗರ: ಮದುವೆಗೆ ಜನರನ್ನು ಕರೆದೊಯ್ಯುತ್ತಿದ್ದ ಗೂಡ್ಸ್‌ ಮಿನಿ ವ್ಯಾನ್‌ವೊಂದು ಆಯತಪ್ಪಿ ಕಾಲುವೆಗೆ ಬಿದ್ದ ಪರಿಣಾಮ ಇಬ್ಬರು ಬಾಲಕಿಯರು ಸ್ಥಳದಲ್ಲೇ ಮೃತಪಟ್ಟು, ವಧು ಸೇರಿದಂತೆ 25ಕ್ಕೂ ಹೆಚ್ಚು ಮಂದಿ ತೀವ್ರ ಗಾಯಗೊಂಡಿದ್ದಾರೆ. ತಾಲೂಕಿನ ಕುಪ್ಪೆ ಗ್ರಾಮದ ಕೃಷ್ಣಯ್ಯ ಎಂಬುವವರ ಮಕ್ಕಳಾದ ಪುಷ್ಪಲತಾ (10), ಪಲ್ಲವಿ (8) ಮೃತಪಟ್ಟ ಬಾಲಕಿಯರು. ತಾಲೂಕಿನ ಹಳೆಯೂರು ಬಳಿ ಭಾನುವಾರ ರಾತ್ರಿ 9 ಗಂಟೆ ಸುಮಾರಿಗೆ ಘಟನೆ ನಡೆದಿದ್ದು, ಗಾಯಾಳುಗಳನ್ನು ತಾಲೂಕು ಆಸ್ಪತ್ರೆಗೆ ದಾಖಲಿಸಲಾಗಿದೆ. ತೀವ್ರ ಗಾಯಗೊಂಡವರನ್ನು ಆಸ್ಪತ್ರೆಗೆ ರವಾನಿಸಲಾಗಿದೆ. ತಾಲೂಕಿನ ಕುಪ್ಪೆ ಗ್ರಾಮದ ವಧು ಧನಲಕ್ಷ್ಮೀ ಹಾಗೂ ಆಕಾಶ್‌, ರಾಮಚಂದ್ರ, ಚಂದ್ರಯ್ಯ, ಗೀತಾ, ಶಿವಯ್ಯ, ಮಂಜುಳಾ, ಕುಮಾರಿ, ಯಶವಂತ್‌, ಗಾನವಿ, ವಸಂತಕುಮಾರ್‌, ರೇವಣ್ಣ, ಸಾತ್ವಿಕ್‌, ತಮ್ಮಣ್ಣ, ಸುನೀಲ್‌, ನೇತ್ರಾವತಿ, ಅನಿಲ್‌, ಕಾಳಮ್ಮ, ತಿಮ್ಮಮ್ಮ, ಪ್ರೀತಂ, ರಾಜಮ್ಮ, ರಾಮಯ್ಯ, ಪುಟ್ಟಮ್ಮ ಸೇರಿದಂತೆ 25ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ತಾಲೂಕಿನ ಕುಪ್ಪೆ ಗ್ರಾಮದ ರಾಮಯ್ಯ ಮತ್ತು ಪುಟ್ಟಮ್ಮ ಅವರ ಪುತ್ರಿ ಧನಲಕ್ಷ್ಮೀ ಹಾಗೂ ಹುಣಸೂರು ತಾಲೂಕು ಕಟ್ಟೆಮಳಲವಾಡಿಯ ವರನೊಂದಿಗೆ ಮದುವೆ ನಿಶ್ಚಯಿಸಲಾಗಿತ್ತು. ಇದಕ್ಕಾಗಿ ಶ್ರೀರಾಮಪುರದ ಕಲ್ಯಾಣಮಂಟಪಕ್ಕೆ ಬರುವ ಸಂದರ್ಭದಲ್ಲಿಈ ಘಟನೆ ನಡೆದಿದೆ. ವಿಚಾರ ತಿಳಿದ ಕೂಡಲೆ ಪೊಲೀಸರು ಸ್ಥಳಕ್ಕೆ ಧಾವಿಸಿ ಗೂಡ್ಸ್‌ ವ್ಯಾನನ್ನು ಕಾಲುವೆಯಿಂದ ಮೇಲೆತ್ತಿ ಗಾಯಾಳುಗಳನ್ನು ಆಸ್ಪತ್ರೆಗೆ ಕಳುಹಿಸಲು ನೆರವಾದರು. ಪಟ್ಟಣ ಹಾಗೂ ವಿವಿಧೆಡೆಯ ಹಲವಾರು ಖಾಸಗಿ ಆಂಬ್ಯುಲೆನ್ಸ್‌ಗಳು ಹಾಗೂ ಸ್ಥಳೀಯ ಗ್ರಾಮಸ್ಥರು ಗಾಯಾಳುಗಳನ್ನು ಆಸ್ಪತ್ರೆಗೆ ಸಾಗಿಸಲು ನೆರವಾಗಿ ಮಾನವೀಯತೆ ಮೆರೆದರು. ಇಬ್ಬರು ಬಾಲಕಿಯರ ಮೃತದೇಹವನ್ನು ಪಟ್ಟಣದ ತಾಲೂಕು ಆಸ್ಪತ್ರೆಯ ಶವಾಗಾರದಲ್ಲಿಇಡಲಾಗಿದ್ದು, ಘಟನೆ ಸಂಬಂಧ ಪೊಲೀಸರು ದೂರು ದಾಖಲಿಸಿಕೊಂಡು ಮುಂದಿನ ಕ್ರಮಕೈಗೊಂಡಿದ್ದಾರೆ.
from India & World News in Kannada | VK Polls https://ift.tt/3m3CnX8
