ಮುಂಬಯಿ: ಉದ್ಯಮಿ ಮುಕೇಶ್‌ ಅಂಬಾನಿ ನಿವಾಸದ ಎದುರು ಸ್ಫೋಟಕ ತುಂಬಿದ ವಾಹನ ಪತ್ತೆಯಾದ ಪ್ರಕರಣಕ್ಕೆ ಸಂಬಂಧಿಸಿ ರಾಷ್ಟ್ರೀಯ ತನಿಖಾ ದಳ () ಅಧಿಕಾರಿಗಳು ಭಾನುವಾರ ನಗರದ ಮಿಥಿ ನದಿಯ ತಳದಿಂದ ಮಹತ್ವದ ಸಾಕ್ಷ್ಯಗಳನ್ನು ಸಂಗ್ರಹಿಸಿದ್ದಾರೆ. ಸಾಂದರ್ಭಿಕ ಸಾಕ್ಷ್ಯಗಳನ್ನು ಮುಂದಿಟ್ಟುಕೊಂಡು ತೀವ್ರ ವಿಚಾರಣೆಗೆ ಒಳಪಡಿಸಿದಾಗ ಬಂಧಿತ ಪೊಲೀಸ್‌ ಅಧಿಕಾರಿ ಅವರು ತಾವು ಕೆಲವು ಸಾಕ್ಷ್ಯಗಳನ್ನು ಬಾಂದ್ರಾ-ಕುರ್ಲಾ ಕಾಂಪ್ಲೆಕ್ಸ್‌ ಪ್ರದೇಶದ ಮಿಥಿ ನದಿಯಲ್ಲಿ ಬಿಸಾಡಿರುವುದಾಗಿ ತಿಳಿಸಿದ್ದಾರೆ. ಅದರಂತೆಯೇ ಅಧಿಕಾರಿಗಳ ತಂಡವು ಮುಳುಗು ತಜ್ಞರ ತಂಡದೊಂದಿಗೆ ನದಿ ತಟಕ್ಕೆ ತೆರಳಿತು. ಸಚಿನ್‌ ವಾಜೆ ಅವರನ್ನೂ ಕರೆದೊಯ್ಯಲಾಗಿತ್ತು. ವಾಜೆ ಸೂಚಿಸಿದ ಕೆಲವು ಸ್ಥಳಗಳಲ್ಲಿ ಮುಳುಗು ಹಾಕಿದ ಪರಿಣಿತರು ಎರಡು ಸಿಪಿಯು, ಒಂದು ಲ್ಯಾಪ್‌ ಟಾಪ್‌, ಸಿಸಿಟಿವಿ ಡಿವಿಆರ್‌ ಮತ್ತು ಒಂದೇ ಸಂಖ್ಯೆಯುಳ್ಳ ಎರಡು ನಂಬರ್‌ ಪ್ಲೇಟ್‌ಗಳನ್ನು ಪತ್ತೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಸಿಸಿಟಿವಿ ಡಿವಿಆರ್‌ ವಾಜೆ ಅವರ ಮನೆ ಇರುವ ಹೌಸಿಂಗ್‌ ಸೊಸೈಟಿಗೆ ಸೇರಿದ್ದು ಎಂದು ತನಿಖಾಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಅಂಬಾನಿ ನಿವಾಸದ ಬಳಿ ಪತ್ತೆಯಾದ ಸ್ಕಾರ್ಪಿಯೊ ಅನ್ನು ಫೆ.17ರಿಂದ 24ರವರೆಗೆ ವಾಜೆ ವಾಸವಿದ್ದ ಹೌಸಿಂಗ್‌ ಸೊಸೈಟಿ ಆವರಣದಲ್ಲಿಯೇ ನಿಲ್ಲಿಸಲಾಗಿತ್ತು. ವಾಹನ ನಂಬರ್‌ ಪ್ಲೇಟ್ ಅನ್ನು ಅವರು ಬದಲಿಸಿರುವ ದೃಶ್ಯಗಳು ಸಹ ಸೆರೆಯಾಗಿದ್ದವು. ಹೀಗಾಗಿ ಸಿಸಿಟಿವಿ ಡಿವಿಆರ್‌ ಅನ್ನು ಬಲವಂತದಿಂದ ವಶಕ್ಕೆ ಪಡೆದುಕೊಂಡಿದ್ದರು. ಸ್ಕಾರ್ಪಿಯೊ ಮಾಲೀಕ ಎನ್ನಲಾಗಿರುವ ಠಾಣೆ ಉದ್ಯಮಿ ಮನ್‌ಸುಖ್‌ ಹಿರೇನ್‌ ಸಾವಿನವರೆಗೂ ಈ ಎಲ್ಲ ಸಾಕ್ಷ್ಯಗಳನ್ನು ವಾಜೆ ತಮ್ಮ ಬಳಿಯೇ ಇರಿಸಿಕೊಂಡಿದ್ದರು. ನಂತರ ನದಿಗೆ ಬಿಸಾಡಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ವಾಜೆ ಅವರನ್ನು ಕೋರ್ಟ್‌ ಏ.3ರವರೆಗೆ ಎನ್‌ಐಎ ವಶಕ್ಕೆ ಒಪ್ಪಿಸಿದೆ. ಅಂಬಾನಿ ನಿವಾಸದ ಬಳಿ ಫೆ.25ರಂದು 20 ಜಿಲೆಟಿನ್‌ ಕಡ್ಡಿಗಳಿದ್ದ ವಾಹನ ಪತ್ತೆಯಾಗಿತ್ತು. ಅದಕ್ಕೆ ಎರಡು ದಿನ ಮುನ್ನ ಮನ್‌ಸುಖ್‌ ಹಿರೇನ್‌ ತಮ್ಮ ವಾಹನ ಕಳುವಾಗಿರುವ ಕುರಿತು ಪೊಲೀಸ್‌ ದೂರು ನೀಡಿದ್ದರು. ಮಾರ್ಚ್ 5ರಂದು ಠಾಣೆಯ ಕೊಲ್ಲಿಯಲ್ಲಿಅವರ ಶವ ಪತ್ತೆಯಾಗಿದೆ. ಸಾವಿಗೂ ಮುನ್ನ ಹಲ್ಲೆ ನಡೆಸಿ, ಕ್ಲೋರೊಫಾರಂ ಮೂಲಕ ಪ್ರಜ್ಞೆ ತಪ್ಪಿಸಿ, ಜೀವ ಇದ್ದಾಗಲೇ ನೀರಿಗೆ ಎಸೆಯಲಾಗಿದೆ ಎಂದು ಮರಣೋತ್ತರ ಪರೀಕ್ಷೆ ವರದಿ ತಿಳಿಸಿದೆ. ಸಚಿನ್‌ ವಾಜೆ ನಿರ್ದೇಶನದಂತೆಯೇ ಹಿರೇನ್‌ ಕೊಲೆ ನಡೆದಿದೆ ಎಂದು ಎನ್‌ಐಎ ಅಧಿಕಾರಿಗಳು ಶಂಕಿಸಿದ್ದಾರೆ. ಹಿರೇನ್‌ ಸಾವು ಸಂಭವಿಸಿದ ದಿನ ವಾಜೆ ರಜೆ ಪಡೆದಿರುವುದು ಈ ಅನುಮಾನವನ್ನು ಬಲಗೊಳಿಸಿದೆ. ವಾಜೆ ಜತೆ ನೋಡಿದ್ದು ನಿಜ! ಮೃತ ಉದ್ಯಮಿ ಮನ್‌ಸುಖ್‌ ಹಿರೇನ್‌ ಅವರನ್ನು ಸಚಿನ್‌ ವಾಜೆ ಜತೆ ಕ್ರೈಂ ಇಂಟಲಿಜೆನ್ಸ್‌ ಯುನಿಟ್‌ (ಸಿಐಯು) ಕಚೇರಿಯಲ್ಲಿಯೇ ನೋಡಿದ್ದಾಗಿ ಮುಂಬಯಿಯ ಹೋಟೆಲ್‌ ಮಾಲೀಕರೊಬ್ಬರು ಎನ್‌ಐಎಗೆ ಹೇಳಿಕೆ ನೀಡಿದ್ದಾರೆ. ''ಹಿರೇನ್‌ ಸಾಯುವುದಕ್ಕೆ ಎರಡು ದಿನ ಮೊದಲು ವಾಜೆ ಅವರಿಗೆ ಹಫ್ತಾ ನೀಡಲು ಅವರ ಸಿಐಯು ಕಚೇರಿಗೆ ಹೋಗಿದ್ದೆ. ಅಲ್ಲಿವಾಜೆ ಜತೆ ಮನ್‌ಸುಖ್‌ ಹಿರೇನ್‌ ಸಹ ಇದ್ದರು,'' ಅವರು ಹೇಳಿಕೆಯಲ್ಲಿತಿಳಿಸಿದ್ದಾರೆ. ಸ್ಫೋಟಕ ತುಂಬಿದ ವಾಹನ ಇರಿಸಿದ್ದು ತಾವೇ ಎಂದು ಒಪ್ಪಿಕೊಳ್ಳುವಂತೆ ಹಿರೇನ್‌ ಮೇಲೆ ವಾಜೆ ಒತ್ತಡ ಹೇರಿದ್ದಾರೆ. ಒಪ್ಪದೇ ಇದ್ದಾಗ ಹತ್ಯೆ ಮಾಡಿಸಿದ್ದಾರೆ ಎಂದು ಶಂಕಿಸಲಾಗಿದೆ. ಹಿರೇನ್‌ ಸಾವಿನ ಕುರಿತು ಮಹಾರಾಷ್ಟ್ರದ ಭಯೋತ್ಪಾದನಾ ನಿಗ್ರಹ ದಳ ತನಿಖೆ ನಡೆಸುತ್ತಿದೆ.
from India & World News in Kannada | VK Polls https://ift.tt/3w871Dm
