ಶಿವಾನಂದ ಹಿರೇಮಠ ಬೆಂಗಳೂರು ಬೆಂಗಳೂರು: 2018ರ ಬೆಳಗಾವಿಯ ಪಿಎಲ್‌ಡಿ ಬ್ಯಾಂಕಿನ ಅಧ್ಯಕ್ಷ, ಉಪಾಧ್ಯಕ್ಷರ ಆಯ್ಕೆ ವಿಚಾರದಲ್ಲಿ ಜಿದ್ದಿನ ರಾಜಕಾರಣ ಮಾಡಿ ರಾಜಕೀಯ ಬದ್ಧ ವಿರೋಧಿಗಳಾಗಿದ್ದ ಮಾಜಿ ಸಚಿವ ಮತ್ತು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ. ಶಿವಕುಮಾರ್‌ ಮಧ್ಯೆ ಅಶ್ಲೀಲ 'ಸಿ.ಡಿ' ವಿಚಾರವಾಗಿ ಮತ್ತೊಂದು ಸುತ್ತಿನ ಜಿದ್ದಾಜಿದ್ದಿನ ಕಣ ರೂಪುಗೊಂಡಿದೆ. ದಿಕ್ಕು ಬದಲಿಸುತ್ತಿರುವ ಈ 'ಸಿ.ಡಿ' ವಿಷಯವಾಗಿ ಕೆಸರೆರಚಾಟದಲ್ಲಿ ಮಗ್ನರಾಗಿರುವ ಈ ನಾಯಕರು ಒಬ್ಬರ ವಿರುದ್ಧ ಮತ್ತೊಬ್ಬರು ಬೊಟ್ಟು ಮಾಡುವ ಸನ್ನಿವೇಶ ಸೃಷ್ಟಿಸಿದೆ. ಉತ್ತರದ ಗೋಕಾಕ್‌ನಿಂದ ದಕ್ಷಿಣದ ಕನಕಪುರದವರೆಗೂ ಕಲುಷಿತ ರಾಜಕಾರಣಕ್ಕೆ ಸಿ.ಡಿ ಮುನ್ನುಡಿ ಬರೆದಿದೆ. ಪಿಎಲ್‌ಡಿ ಬ್ಯಾಂಕ್‌ನ ಬಣದ ರಾಜಕಾರಣ: ಮರಾಠಿ ಮತದ ಮೇಲೆ ಕಣ್ಣಿಟ್ಟಿದ್ದ ಶಾಸಕಿ ಲಕ್ಷ್ಮೇ ಹೆಬ್ಬಾಳ್ಕರ್‌ ಪಿಎಲ್‌ಡಿ ಬ್ಯಾಂಕ್‌ ಅಧ್ಯಕ್ಷರನ್ನಾಗಿ ಮರಾಠಿಗರನ್ನೇ ಮಾಡುವುದಕ್ಕೆ ಮುಂದಾಗಿದ್ದರು. ಇದಕ್ಕೆ ರಮೇಶ್‌ ಜಾರಕಿಹೊಳಿ ಅವರಿಂದ ಬೆಂಬಲ ಸಿಗಲಿಲ್ಲ. ಗುಂಪು ರಾಜಕಾರಣ ಇಲ್ಲಿಂದಲೇ ಆರಂಭವಾಯಿತು. ತದನಂತರ ರಮೇಶ್‌ ಜಾರಕಿಹೊಳಿ ತಮ್ಮ ರಾಜಕೀಯ ಪ್ರಭಾವ ಬಳಸಿ ಬ್ಯಾಂಕಿನ ಚುನಾವಣೆ ಮುಂದೂಡಿಸಿದ್ದರು. ಇದರ ಬೆನ್ನಲ್ಲೇ ಬ್ಯಾಂಕಿನ ಎದುರು ಲಕ್ಷ್ಮಿ ಹೆಬ್ಬಾಳ್ಕರ್‌ ಉಪವಾಸ ನಿರಶನ ನಡೆಸಿದ್ದರು. ಬಿರುಸಾಗುತ್ತಿದ್ದ ಲಕ್ಷ್ಮಿ ಮತ್ತು ರಮೇಶ್‌ ಗುಂಪು ರಾಜಕಾರಣಕ್ಕೆ ಕೆಪಿಸಿಸಿ ಕಾರ್ಯಾಧ್ಯಕ್ಷ ಈಶ್ವರ ಖಂಡ್ರೆ ತೇಪೆ ಹಚ್ಚುವ ಕೆಲಸ ಮಾಡಿದ್ದರು. ಅಧ್ಯಕ್ಷ ಮತ್ತು ಉಪಾಧ್ಯಕ್ಷ ಸ್ಥಾನವನ್ನು ಹಂಚಿಕೊಳ್ಳುವಂತೆ ಸಲಹೆ ನೀಡಿದ್ದರು. ಆಗ ಡಿಕೆಶಿ ಬೆಂಬಲ ಕೋರಿದ್ದ ಹೆಬ್ಬಾಳ್ಕರ್‌ ಒಂದೇ ವಾರದಲ್ಲಿ ಪಿಎಲ್‌ಡಿ ಬ್ಯಾಂಕಿನ ಚುನಾವಣೆ ಘೋಷಿಸುವುದಕ್ಕೆ ಒತ್ತಡ ತಂದು ಯಶಸ್ವಿಯೂ ಆದರು. ಚುನಾವಣೆಯಲ್ಲಿ ರಮೇಶ್‌ ಬಣದ ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸದೆ ಹಿಂದೆ ಸರಿದ ಪರಿಣಾಮ ಲಕ್ಷ್ಮಿ ಬೆಂಬಲಿಗರು ಅವಿರೋಧ ಆಯ್ಕೆಯಾಗಿದ್ದರು. ದಶಕಗಳ ಕಾಲ ಬೆಳಗಾವಿ, ಯಮಕನಮರಡಿ, ಗೋಕಾಕ್‌ ಭಾಗದಲ್ಲಿ ಪ್ರಭಾವಿಯಾಗಿದ್ದ ಜಾರಕಿಹೊಳಿ ಕುಟುಂಬಕ್ಕೆ 2018ರಲ್ಲಿ ಬೆಳಗಾವಿಯ ಪಿಎಲ್‌ಡಿ ಬ್ಯಾಂಕಿನ ಅಧ್ಯಕ್ಷ/ಉಪಾಧ್ಯಕ್ಷ ಸ್ಥಾನದ ಸೋಲು ಆಘಾತ ನೀಡಿತ್ತು. ಡಿಕೆಶಿ ಪ್ರವೇಶ ಮಾಡಿದ್ದನ್ನು ರಮೇಶ್‌ ಜಾರಕಿಹೊಳಿ ಪ್ರತಿಷ್ಠೆಯಾಗಿ ತೆಗೆದುಕೊಂಡಿದ್ದರು. ತಮ್ಮದೇ ರಾಜಕೀಯ ಗರಡಿಯಲ್ಲಿ ಬೆಳೆದಿದ್ದ ಲಕ್ಷ್ಮಿ ಬೆಂಬಲಿಸುವ ಮೂಲಕ ಬೆಳಗಾವಿಯಲ್ಲಿ ಪ್ರಭಾವ ಸಾಧಿಸುವ ಡಿಕೆಶಿ ಪ್ರಯತ್ನ ರಮೇಶ್‌ ಅವರಿಗೆ ನುಂಗಲಾರದ ತುತ್ತಾಗಿತ್ತು. ಡಿಕೆಶಿ ವಿರುದ್ಧದ ಮುನಿಸು ದೋಸ್ತಿ ಸರಕಾರ ಕೆಡವಲು ಮೂಲ ಕಾರಣವಾಯುತು. ಹಠಕ್ಕೆ ಬಿದ್ದು ಡಿಕೆಶಿ ಹೊಂದಿದ್ದ ಜಲಸಂಪನ್ಮೂಲ ಖಾತೆ, ವಿಧಾನಸೌಧದಲ್ಲಿ ಬಳಸುತ್ತಿದ್ದ ಕೊಠಡಿಯನ್ನೂ ತಮ್ಮದಾಗಿಸಿಕೊಂಡಿದ್ದರು. ಸದಾಶಿವನಗರದಲ್ಲಿ ಡಿಕೆಶಿ ಮನೆ ಬಳಿಯೇ ಮನೆ ಖರೀದಿಸಿದ್ದು ಈಗ ಇತಿಹಾಸ. ಅಲ್ಲಿಂದ ಶುರುವಾದ ರಾಜಕೀಯ ವೈಷಮ್ಯ ಅಶ್ಲೀಲ 'ಸಿ.ಡಿ' ಮೂಲಕ ಕಲುಷಿತ ರಾಜಕಾರಣಕ್ಕೆ ನಾಂದಿಯಾಗಿದೆ.
from India & World News in Kannada | VK Polls https://ift.tt/3fjyonX
