ಕೋಲ್ಕೊತಾ: ವಿಧಾನಸಭೆ ಚುನಾವಣೆಯ ತೀವ್ರ ಪ್ರಚಾರ ಪೈಪೋಟಿಗೆ ಸಾಕ್ಷಿಯಾಗಿರುವ ಪಶ್ಚಿಮ ಬಂಗಾಳದ ನಂದಿಗ್ರಾಮದಲ್ಲಿ ಸೋಮವಾರ ಮುಖ್ಯಮಂತ್ರಿ ಗಾಲಿ ಕುರ್ಚಿಯಲ್ಲಿ ಕುಳಿತುಕೊಂಡೇ 8 ಕಿ.ಮೀ ರೋಡ್‌ ಶೋ ನಡೆಸಿ ಮತಯಾಚನೆ ಮಾಡಿದರು. ಈ ಕ್ಷೇತ್ರದಲ್ಲಿ ಏಪ್ರಿಲ್‌ 1ರಂದು ಮತದಾನ ನಡೆಯಲಿದೆ. ನಾಮಪತ್ರ ಸಲ್ಲಿಸಿದ ದಿನ ನಡೆದ ಕಾರ್ಯಕರ್ತರ ನೂಕಾಟದಲ್ಲಿ ಮಮತಾ ಅವರ ಕಾಲಿಗೆ ಪೆಟ್ಟಾಗಿತ್ತು. ನಂತರ ಬ್ಯಾಂಡೇಜ್‌ ಕಟ್ಟಿಕೊಂಡು ಗಾಲಿಕುರ್ಚಿ ಏರಿ ಪ್ರಚಾರ ಮುಂದುವರಿಸಿದ್ದರು. ಈಗ ನಂದಿಗ್ರಾಮದಲ್ಲಿ ದೀದಿಗೆ ಸತ್ವ ಪರೀಕ್ಷೆ ಎದುರಾಗಿದೆ. ಮಾಜಿ ಆಪ್ತ ಹಾಗೂ ನಂದಿಗ್ರಾಮದ ಪ್ರಭಾವಿ ಮುಖಂಡ ಸುವೇಂದು ಅಧಿಕಾರಿ ಇಲ್ಲಿ ಬಿಜೆಪಿ ಹುರಿಯಾಳಾಗಿ ಮಮತಾ ವಿರುದ್ಧ ಸ್ಪರ್ಧಿಸಿದ್ದು, ಭಾರಿ ಕುತೂಹಲ ಕೆರಳಿಸಿದೆ. ಸೋಮವಾರ ದೀದಿ ವೀಲ್‌ಚೇರ್‌ನಲ್ಲಿ ಕುಳಿತುಕೊಂಡು, ಉರಿಬಿಸಿಲು ಲೆಕ್ಕಿಸದೇ ರೋಡ್‌ ಶೋ ನಡೆಸಿದರು. ರೋಡ್‌ ಶೋ ಉದ್ದಕ್ಕೂ ಮುಗಿದ ಕೈ ಕೆಳಗಿಳಿಸದ ದೀದಿ, ‘ನಿಮ್ಮ ಮನೆ ಮಗಳು ನಾನು, ಆಶೀರ್ವದಿಸಿ’ ಎಂದು ಮತದಾರರಲ್ಲಿ ಮನವಿ ಮಾಡಿದರು. ರಸ್ತೆಯ ಇಕ್ಕೆಲಗಳಲ್ಲಿ ಸೇರಿದ್ದ ಜನ ಪಕ್ಷದ ಧ್ವಜಗಳನ್ನು ಬೀಸಿ ಬೆಂಬಲ ಸೂಚಿಸಿದರು. ಸುವೇಂದು ಅಧಿಕಾರಿಗೆ ತಕ್ಕ ಪಾಠ ಕಲಿಸುವುದಾಗಿ ಗುಡುಗಿರುವ ದೀದಿ, ಸಾಂಪ್ರದಾಯಿಕ ಕ್ಷೇತ್ರ ತೊರೆದು ನಂದಿಗ್ರಾಮಕ್ಕೆ ಬಂದು ಸ್ಪರ್ಧಿಸಿದ್ದಾರೆ. ಇಲ್ಲಿ ಮಮತಾ ಸೋತರೆ ರಾಜ್ಯ ರಾಜಕಾರಣದಲ್ಲಿಅಧಿಕಾರಿ ಕುಟುಂಬ ಪ್ರಾಬಲ್ಯ ಹೆಚ್ಚಲಿದೆ. ಮಮತಾರಿಗೆ ದೊಡ್ಡ ಮುಖಭಂಗವಾಗಲಿದೆ. ಬಿಜೆಪಿ ಕೂಡ ಈ ಬಾರಿ ಮಮತಾ ಅವರಿಗೆ ಪಾಠ ಕಲಿಸಿಯೇ ಸಿದ್ಧ ಎಂದು ಪಣ ತೊಟ್ಟಿದೆ.
from India & World News in Kannada | VK Polls https://ift.tt/3fmA2oN
