ಹ್ಯಾಮಿಲ್ಟನ್‌: ಆತಿಥೇಯ ಮತ್ತು ಪ್ರವಾಸಿ ಬಾಂಗ್ಲಾದೇಶ ನಡುವಣೆ ಮೂರು ಪಂದ್ಯಗಳ ಟಿ20 ಕ್ರಿಕೆಟ್ ಸರಣಿ ಆರಂಭವಾಗಿದ್ದು, ಪ್ರಥಮ ಹಣಾಹಣಿಯಲ್ಲಿ ಕಿವೀಸ್‌ ಪಡೆ 66 ರನ್‌ಗಳ ಭರ್ಜರಿ ಜಯ ದಾಖಲಿಸಿದೆ. ಪಂದ್ಯದಲ್ಲಿ ನ್ಯೂಜಿಲೆಂಡ್ ತಂಡದ ಪರ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಎಡಗೈ ಬ್ಯಾಟ್ಸ್‌ಮನ್‌ ಡೆವೋನ್‌ ಕಾನ್ವೇ, ಕೇವಲ 52 ಎಸೆತಗಳಲ್ಲಿ ಅಜೇಯ 92 ರನ್‌ಗಳನ್ನು ಚೆಚ್ಚಿ ಪಂದ್ಯ ಶ್ರೇಷ್ಠ ಗೌರವಕ್ಕೆ ಭಾಜನರಾದರು. ಅವರ ಮನಮೋಹಕ ಬ್ಯಾಟಿಂಗ್ ಪ್ರದರ್ಶನದಲ್ಲಿ 11 ಫೋರ್‌ ಮತ್ತು 3 ಸಿಕ್ಸರ್‌ಗಳು ಸಿಡಿದವು. ಎಲ್ಲಕ್ಕಿಂತಲೂ ಮಿಗಿಲಾಗಿ ಟಿ20 ಸ್ಪೆಷಲಿಸ್ಟ್‌ ಬೌಲರ್‌ ಎಂದೇ ಖ್ಯಾತಿ ಪಡೆದಿರುವ ಬಾಂಗ್ಲಾದೇಶ ತಂಡದ ಎಡಗೈ ವೇಗಿ ಮುಸ್ತಾಫಿಝುರ್‌ ರೆಹಮಾನ್‌ ಎದುರು ಕಾನ್ವೇ ರಿವರ್ಸ್‌ ಸ್ಕೂಪ್ ಮೂಲಕ ಸಿಕ್ಸರ್‌ ಸಿಡಿಸಿದ್ದು, ಕ್ರಿಕೆಟ್ ಪ್ರಿಯರ ಮೆಚ್ಚುಗೆಗೆ ಪಾತ್ರವಾಗಿದೆ. ಟೀಮ್ ಇಂಡಿಯಾದ ವಿಕೆಟ್‌ಕೀಪರ್ ಬ್ಯಾಟ್ಸ್‌ಮನ್‌ ರಿಷಭ್ ಪಂತ್‌ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಇತ್ತೀಚೆಗೆ ಈ ಹೊಡೆತವನ್ನು ಪರಿಚಯ ಮಾಡಿದ್ದರು. ಇದನ್ನು ಅಚ್ಚುಕಟ್ಟಾಗಿ ಕಾಪಿ ಹೊಡೆದ ಕಾನ್ವೇ ಬಾಂಗ್ಲಾ ಬೌಲರ್‌ ಎದುರು ಸಿಕ್ಸರ್‌ ಬಾರಿಸಿದರು. ಇಂಗ್ಲೆಂಡ್‌ ವಿರುದ್ದದ ಟಿ20 ಸರಣಿಯಲ್ಲಿ ವೇಗಿ ಜೋಫ್ರ ಆರ್ಚರ್‌ ಮತ್ತು ಟೆಸ್ಟ್‌ ಸರಣಿಯಲ್ಲಿ ಜೇಮ್ಸ್‌ ಆಂಡರ್ಸನ್‌ ಅವರಂತಹ ಅಪ್ರತಿಮ ಬೌಲರ್‌ಗಳ ಎದುರು ರಿಷಭ್ ಪಂತ್‌ ರಿವರ್ಸ್‌ ಸ್ಕೂಪ್ ಹೊಡೆತವನ್ನಾಡಿದ್ದರು. ಮುಸ್ತಾಫಿಝುರ್‌ ಎದುರು ಕಾನ್ವೇ ಹೊಡೆದ ರಿವರ್ಸ್‌ ಸ್ಕೂಪ್ ಶಾಟ್‌ನ ವಿಡಿಯೋ ಈ ನಲ್ಲಿ ವೀಕ್ಷಿಸಬಹುದಾಗಿದೆ. ಇನ್ನು ಭಾನುವಾರ ನಡೆದ ಪಂದ್ಯದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ನ್ಯೂಜಿಲೆಂಡ್ 20 ಓವರ್‌ಗಳಲ್ಲಿ 3 ವಿಕೆಟ್‌ಗಳ ನಷ್ಟಕ್ಕೆ 210 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು. ಬಾಂಗ್ಲಾ ಪರ ಶ್ರೇಷ್ಠ ಬೌಲರ್‌ ಎನಿಸಿದ ನಸುಮ್ ಅಹ್ಮದ್ ತಮ್ಮ 4 ಓವರ್‌ಗಳಲ್ಲಿ 30 ರನ್ ನೀಡಿ 2 ವಿಕೆಟ್ ಪಡೆದರು. ಬಳಿಕ ಗುರಿ ಬೆನ್ನತ್ತಿದ ಬಾಂಗ್ಲಾದೇಶ ತಂಡ 20 ಓವರ್‌ಗಳಲ್ಲಿ 8 ವಿಕೆಟ್‌ಗಳ ನಷ್ಟಕ್ಕೆ 140 ರನ್ ಮಾತ್ರವೇ ಗಳಿಸಲು ಶಕ್ತವಾಗಿ 66 ರನ್‌ಗಳ ಹೀನಾಯ ಸೋಲುಂಡಿತು. ಕಿವೀಸ್‌ ಪರ ಇಶ್‌ ಸೋಢಿ 28ಕ್ಕೆ 4 ವಿಕೆಟ್ ಪಡೆದು ಮಿಂಚಿದರೆ, ವೇಗಿ ಲಾಕಿ ಫರ್ಗ್ಯೂಸನ್ 25ಕ್ಕೆ 2 ವಿಕೆಟ್ ಸಂಪಾದಿಸಿದರು. ಇದರೊಂದಿಗೆ 3 ಪಂದ್ಯಗಳ ಟಿ20 ಸರಣಿಯಲ್ಲಿ ನ್ಯೂಜಿಲೆಂಡ್ 1-0 ಅಂತರದ ಮೇಲುಗೈ ಪಡೆದಿದೆ. ಸಂಕ್ಷಿಪ್ತ ಸ್ಕೋರ್‌ ನ್ಯೂಜಿಲೆಂಡ್: 20 ಓವರ್‌ಗಳಲ್ಲಿ 3 ವಿಕೆಟ್‌ಗಳ ನಷ್ಟಕ್ಕೆ 210 ರನ್ (ಮಾರ್ಟಿನ್ ಗಪ್ಟಿಲ್ 35, ಡೆವೋನ್‌ ಕಾನ್ವೇ ಅಜೇಯ 92, ವಿಲ್‌ ಯಂಗ್ 53, ಗ್ಲೆನ್‌ ಫಿಲಿಪ್ಸ್‌ ಅಜೇಯ 24, ನಸುಮ್ ಅಹ್ಮದ್ 30ಕ್ಕೆ 2, ಮೆಹ್ದಿ ಹಸನ್ 37ಕ್ಕೆ 1). ಬಾಂಗ್ಲಾದೇಶ: 20 ಓವರ್‌ಗಳಲ್ಲಿ 8 ವಿಕೆಟ್‌ಗಳ ನಷ್ಟಕ್ಕೆ 140 ರನ್ (ಮೊಹಮ್ಮದ್‌ ನೈಮ್ 27, ಮಹ್ಮೂದುಲ್ಲ 11, ಅಫೀಫ್ ಹೊಸೇನ್ 45, ಮೊಹಮ್ಮದ್‌ ಸೈಫುದ್ದೀನ್‌ ಔಟಾಗದೆ 34; ಇಶ್‌ ಸೋಢಿ 28ಕ್ಕೆ 4, ಲಾಕಿ ಫರ್ಗ್ಯೂಸನ್ 25ಕ್ಕೆ 2, ಟಿಮ್‌ ಸೌಥೀ 34ಕ್ಕೆ 1, ಹ್ಯಾಮಿಶ್‌ ಬೆನೆಟ್ 20ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3dacTmU
