ಮಂಗಳೂರು: ದ.ಕ. ಜಿಲ್ಲೆಯ ಬಂಟ್ವಾಳ ತಾಲೂಕಿನ ಕಕ್ಕೆಪದವು ಉಳಿಯಲ್ಲಿ ನಡೆದ ಸತ್ಯ-ಧರ್ಮ ಜೋಡುಕರೆ ಕಂಬಳದಲ್ಲಿ ಮೂಡುಬಿದಿರೆಯ ಮಿಜಾರು ಅಶ್ವತ್ಥಪುರದ ಶ್ರೀನಿವಾಸ್‌ ಗೌಡ ಓಡಿಸಿದ ಕೋಣಗಳು ಕೊನೆಯ 100 ಮೀ. ದೂರವನ್ನು 8.78 ಸೆಕೆಂಡ್‌ಗಳಲ್ಲಿ ತಲುಪುವ ಮೂಲಕ ವೇಗದಲ್ಲಿ ಉತ್ತಮ ಸಾಧನೆ ಮಾಡಿದೆ. ಆದರೆ ಈ ಬಗ್ಗೆ ಇದೀಗ ಪರ-ವಿರೋಧ ಚರ್ಚೆಯೂ ಆರಂಭವಾಗಿದೆ. ‘ಕಂಬಳದ ಉಸೇನ್‌ ಬೋಲ್ಟ್‌’ ಖ್ಯಾತಿಯ ಶ್ರೀನಿವಾಸ ಗೌಡ ಅವರು ವೇಣೂರಿನ ಪೆರ್ಮುಡದಲ್ಲಿ ಮಾ.20ರಂದು ನಡೆದ ಸೂರ್ಯ-ಚಂದ್ರ ಜೋಡುಕರೆ ಕಂಬಳದಲ್ಲಿ 100 ಮೀ. ಓಟವನ್ನು 8.96 ಸೆಕೆಂಡ್‌ಗಳಲ್ಲಿ ಕ್ರಮಿಸುವ ಮೂಲಕ ಹೊಸ ದಾಖಲೆ ಮಾಡಿದ್ದರು. ಮಾ.28ರಂದು ಕಕ್ಕೆಪದವಿನಲ್ಲಿ ನಡೆದ ಕಂಬಳದಲ್ಲಿ ಕೊನೆಯ 100 ಮೀ. ದೂರವನ್ನು 8.78 ಸೆಕೆಂಡ್‌ಗಳಲ್ಲಿ ತಲುಪುವ ಮೂಲಕ ಸಾಧನೆ ಮಾಡಿದ್ದಾರೆ. ಆದರೆ ಇದನ್ನು ದಾಖಲೆಯಾಗಿ ಪರಿಗಣಿಸಲು ಸಾಧ್ಯವಿಲ್ಲ ಎನ್ನುತ್ತಾರೆ ಕಂಬಳ ಕ್ಷೇತ್ರದ ತಜ್ಞರು. ದಾಖಲೆಗಾಗಿ ಸೆನ್ಸಾರ್‌ ಕಟ್‌?: ಕಂಬಳ ಕ್ರೀಡೆಯಲ್ಲಿ ಓಟದ ವೇಗವನ್ನು ಅಥ್ಲೆಟಿಕ್ಸ್‌ ಮಾದರಿಯಲ್ಲೇ ಸೆನ್ಸಾರ್‌ ಮೂಲಕ ಅಳೆಯಲಾಗುತ್ತದೆ. ಸಾಮಾನ್ಯವಾಗಿ ಪ್ರತಿ ಕಂಬಳದಲ್ಲೂ ಮಂಜೊಟ್ಟಿಯಿಂದ 125-135 ಮೀ.ದೂರದವರೆಗೆ ಸೆನ್ಸಾರ್‌ ಅಳವಡಿಸಿ, ಈ ವೇಗವನ್ನು 100 ಮೀ.ಗೆ ಹೋಲಿಕೆ ಮಾಡಿ ದಾಖಲೆ ಪರಿಗಣಿಸಲಾಗುತ್ತದೆ. ಆದರೆ ಕಕ್ಕೆಪದವಿನಲ್ಲಿ ನಡೆದ ಕಂಬಳದಲ್ಲಿ ಕರೆ 151 ಮೀ. ಉದ್ದವಿದ್ದರೂ, ಮಂಜೊಟ್ಟಿಯಿಂದ 100 ಮೀ.ವರೆಗೆ ಮಾತ್ರ ಸೆನ್ಸಾರ್‌ ಅಳವಡಿಸಲಾಗಿದೆ. ಇದರಿಂದ ಸ್ಪರ್ಧೆಯಲ್ಲಿ ಗಂತ್‌ ಕಡೆಯಿಂದ ಬಿಟ್ಟ ಕೋಣಗಳು 51 ಮೀ. ದಾಟಿದ ಬಳಿಕ ವೇಗವನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳುವುದು ಸಾಮಾನ್ಯ. ಅದನ್ನು 100 ಮೀ.ಗೆ ಪರಿಗಣಿಸುವುದು ಅಷ್ಟು ಸಮಂಜಸವಲ್ಲ ಎಂಬ ವಾದ ಕಂಬಳ ತಜ್ಞರಿಂದ ವ್ಯಕ್ತವಾಗಿದೆ. ಕಕ್ಕೆಪದವು ಕಂಬಳದ ಹಗ್ಗ ಹಿರಿಯ ವಿಭಾಗದಲ್ಲಿ ಮಿಜಾರು ಪ್ರಸಾದ್‌ ನಿಲಯ ಶಕ್ತಿಪ್ರಸಾದ್‌ ಶೆಟ್ಟಿಯವರ ಎ ಮತ್ತು ಬಿ ಕೋಣಗಳು ಫೈನಲ್‌ಗೆ ಬಂದಿದ್ದವು. ಈ ವೇಳೆ ಶ್ರೀನಿವಾಸ್‌ ಗೌಡ ಓಡಿಸಿದ ‘ಎ’ ಕೋಣ 8.78 ಸೆಕೆಂಡ್‌ಗಳಲ್ಲಿ ಕೊನೆಯ 100 ಮೀ. ಗುರಿ ತಲುಪಿವೆ. ಒಂದೇ ಕಂಬಳದಲ್ಲಿ 6 ಪದಕ!ಎರಡು ದಿನಗಳ ಕಾಲ ನಡೆದ ಕಕ್ಕೆಪದವು ಜೋಡುಕರೆ ಕಂಬಳದಲ್ಲಿ ಶ್ರೀನಿವಾಸ್‌ ಗೌಡ 6 ಪದಕಗಳನ್ನು ಪಡೆದು ಮತ್ತೊಂದು ಸಾಧನೆ ಪಡೆದಿದ್ದಾರೆ. ಹಗ್ಗ ಹಿರಿಯ ವಿಭಾಗದಲ್ಲಿ ಮಿಜಾರು ಪ್ರಸಾದ್‌ ನಿಲಯ ಶಕ್ತಿಪ್ರಸಾದ್‌ ಶೆಟ್ಟಿಯವರ ಎ ಮತ್ತು ಬಿ ಕೋಣಗಳನ್ನು ಓಡಿಸಿ ಫೈನಲ್‌ನಲ್ಲಿ ಪ್ರಥಮ, ದ್ವಿತೀಯ ಬಹುಮಾನ ಪಡೆದಿದ್ದಾರೆ. ನೇಗಿಲು ಹಿರಿಯ ವಿಭಾಗದಲ್ಲಿ ಪಡ್ಡಾಯೂರುಗುತ್ತು ಮಿಹಿರ್‌ ಸತ್ಯನಾರಾಯಣ ಶೆಟ್ಟಿ ಹಾಗೂ ಸರಪಾಡಿ ಕೆಳಗಿನಬಳ್ಳಿ ಲಿಯೋ ಫರ್ನಾಂಡಿಸ್‌ ಅವರ ಕೋಣಗಳನ್ನು ಓಡಿಸಿ ಪ್ರಥಮ, ದ್ವಿತೀಯ ಬಹುಮಾನ, ಜೂನಿಯರ್‌ ಹಗ್ಗ, ನೇಗಿಲು ಕಿರಿಯ ವಿಭಾಗದಲ್ಲಿ ಮೂಡುಬಿದಿರೆ ನ್ಯೂ ಪಡಿವಾಳ್ಸ್ ಹಾರ್ದಿಕ್‌ ಹರ್ಷವರ್ಧನ್‌ ಪಡಿವಾಳ್ಸ್ ಕೋಣಗಳನ್ನು ಓಡಿಸಿ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಈ ಮೂಲಕ ಒಂದೇ ಕಂಬಳದಲ್ಲಿ 6 ಪದಕ ಪಡೆದ ಸಾಧನೆಯನ್ನು ಶ್ರೀನಿವಾಸ ಗೌಡ ಮಾಡಿದ್ದಾರೆ.
from India & World News in Kannada | VK Polls https://ift.tt/39nNvJj
