ವಾಷಿಂಗ್ಟನ್: ಅಮೆರಿಕ ಭಾರತಮಯವಾಆಗುವತ್ತ ಹೆಜ್ಜೆ ಇಟ್ಟು ಕಾಲಗಳೇ ಉರುಳಿವೆ. ಅಮೆರಿಕ ಸಮಾಜದ ಎಲ್ಲಾ ಕ್ಷೇತ್ರಗಳಲ್ಲೂ ಭಾರತ ಮತ್ತು ಭಾರತೀಯರ ಛಾಪು ಎದ್ದು ಕಾಣುತ್ತಿದೆ. ಬಾಹ್ಯಾಕಾಶ, ಐಟಿ ಅಷ್ಟೇ ಏಕೆ ಅಮೆರಿಕದ ಸರ್ಕಾರದಲ್ಲೂ ಈಗ ಭಾರತೀಯರ ಪಾಲು ಹೆಚ್ಚಿದೆ. ಅದರಲ್ಲೂ ಭಾರತೀಯ ಚಿತ್ರರಂಗದ ತಾರೆಗಳು ಮತ್ತು ಬಾಲಿವುಡ್ ಹಾಡುಗಳೆಂದರೆ ಅಮೆರಿಕನ್ನರಿಗೆ ಎಲ್ಲಿಲ್ಲದ ಪ್ರೀತಿ. ಭಾರತೀಯ ಸಂಗೀತ ಲೋಕದಲ್ಲಿ ವಿಹರಿಸಲು ಬಯಸುವ ಅಮೆರಿಕನ್ನರು, ಬಾಲಿವುಡ್ ಗೀತೆಗಳನ್ನು ಹಾಡುವುದು ಸಾಮಾನ್ಯ. ಆದರೆ ಅಮೆರಿಕದ ನೌಕಾಸೇನೆಯಲ್ಲೂ ಭಾರತೀಯ ಸಂಗೀತಕ್ಕೆ ಗೌರವದ ಸ್ಥಾನವಿದೆ ಎಂಬುದು ಬಹುತೇಕರಿಗೆ ಗೊತ್ತಿರಲಿಕ್ಕಿಲ್ಲ. ಇದಕ್ಕೆ ಪುಷ್ಠಿ ಎಂಬಂತೆ ಅಮೆರಿಕದ ನೌಕಾಸೇನೆಯ ಅಧಿಕಾರಿಗಳು, ಬಾಲಿವುಡ್ ಬಾದ್‌ಶಾಹ್ ಶಾರೂಖ್ ಖಾನ್ ನಟಿಸಿರುವ 2004ರಲ್ಲಿ ತೆರೆಕಂಡ ಪ್ರಸಿದ್ಧ ಹಿಂದಿ ಚಿತ್ರ 'ಸ್ವದೇಶ್' ಚಿತ್ರದ ಹಾಡೊಂದನ್ನು ಹಾಡಿದ್ದಾರೆ. ಅಮೆರಿಕದ ನೌಕಾಸೇನಾ ಕಾರ್ಯಾಚರಣೆಯ ಮುಖ್ಯಸ್ಥ(CNO)ಮೈಕೆಲ್ ಎಂ ಗಿಲ್ಡೆ ಹಾಗೂ ಅಮೆರಿಕಕ್ಕೆ ಭಾರತದ ರಾಯಭಾರಿ ತರಣಜೀತ್ ಸಿಂಗ್ ಸಂಧು ಭಾಗವಹಿಸಿದ್ದ ಭೋಜನಕೂಟ ಸಮಾರಂಭದಲ್ಲಿ, ನೌಕಾಸೇನೆ ಅಧಿಕಾರಿಗಳು ಸ್ವದೇಶ್ ಚಿತ್ರದ 'ಏ ಜೋ ದೇಶ್ ಹೈ ತೇರಾ' ಗೀತೆಯನ್ನು ಹಾಡಿದ್ದಾರೆ. ಅಮೆರಿಕದ ನೌಕಾಸೇನೆ ಅಧಿಕಾರಿಗಳು 'ಏ ಜೋ ದೇಶ್ ಹೈ ತೇರಾ' ಗೀತೆಯನ್ನು ಹಾಡುವ ವಿಡಿಯೋವನ್ನು ಖುದ್ದು ರಾಯಭಾರಿ ತರಣಜೀತ್ ಸಿಂಗ್ ಸಂಧು ಟ್ವೀಟ್ ಮೂಲಕ ಹಂಚಿಕೊಂಡಿದ್ದು, ಭಾರತ-ಾಮೆರಿಕ ನಡುವಿನ ಸಂಬಂಧ ಎಂದಿಗೂ ಮುರಿಯಲಾರದು ಎಂದು ಹೆಮ್ಮೆ ವ್ಯಕ್ತಪಡಿಸಿದ್ದಾರೆ. ಅಮೆರಿಕದ ನೌಕಾಸೇನೆ ಕೂಡ ಈ ವಿಡಿಯೋವನ್ನು ಟ್ವೀಟ್ ಮಾಡಿದ್ದು, ಇದವುವರೆಗೂ ಸುಮಾರು 196 ಲಕ್ಷ ಜನ ವೀಕ್ಷಣೆ ಮಾಡಿದ್ದಾರೆ . ಅಲ್ಲದೇ ಈ ವಿಡಿಯೋವನ್ನು 14.9 ಲಕ್ಷ ಜನ ಲೈಕ್ ಮಾಡಿದ್ದಾರೆ. ಇನ್ನು ಭೋಜನಕೂಟದಲ್ಲಿ ಇಂಡೋ-ಪೆಸಿಫಿಕ್ ಭಾಗದಲ್ಲಿ ಮುಕ್ತ ವ್ಯಾಪಾರ ಮತ್ತು ರಕ್ಷಣಾ ಸಹಕಾರದ ಕುರಿತು, ಅಮೆರಿಕದ ನೌಕಾಸೇನಾ ಕಾರ್ಯಾಚರಣೆಯ ಮುಖ್ಯಸ್ಥ(CNO)ಮೈಕೆಲ್ ಎಂ ಗಿಲ್ಡೆ ಹಾಗೂ ಅಮೆರಿಕಕ್ಕೆ ಭಾರತದ ರಾಯಭಾರಿ ತರಣಜೀತ್ ಸಿಂಗ್ ಸಂಧು ನಡುವೆ ಮಾತುಕತೆ ನಡೆದಿದೆ ಎನ್ನಲಾಗಿದೆ.
from India & World News in Kannada | VK Polls https://ift.tt/3w5vo4p
