: ಸೆಕ್ಯೂರಿಟಿ ಏಜೆನ್ಸಿ ಕಚೇರಿ ತೆರೆಯುವ ಸೋಗಿನಲ್ಲಿ ಕೊಠಡಿ ಬಾಡಿಗೆ ಪಡೆದು ಫೈನಾನ್ಸ್ ಕಂಪನಿಗೆ ಕನ್ನ ಹಾಕಿದ್ದ 10 ಮಂದಿ ಅಂತಾರಾಜ್ಯ ಕಳ್ಳರನ್ನು ಬಂಧಿಸಿರುವ ಎಚ್‌ಎಎಲ್‌ ಪೊಲೀಸರು, ಅವರಿಂದ 22.50 ಲಕ್ಷ ರೂ. ಮೌಲ್ಯದ 450 ಗ್ರಾಂ ಆಭರಣ ಜಪ್ತಿ ಮಾಡಿದ್ದಾರೆ. ಜಾರ್ಖಂಡ್‌ ಮೂಲದ ಮುರ್‌ ಸಲೀಂ ಶೇಖ್‌ (26), ನಜ್‌ರುಲ್‌ ಶೇಖ್‌ (42), ಕಮಲ್‌ ಪೌಜ್‌ದಾರ್‌ (44), ರಬಿವುಲ್‌ ಶೇಖ್‌ (23), ಜಮಿರುಲ್‌ ಶೇಕ್‌ (21), ಅಯಾಸ್‌ ಶೇಖ್‌ (37) ಸೇರಿ 10 ಮಂದಿಯನ್ನು ಬಂಧಿಸಲಾಗಿದೆ. ಮಾರತ್‌ಹಳ್ಳಿ ಬ್ರಿಡ್ಜ್‌ ಬಳಿಯ ಕಾಂಪ್ಲೆಕ್ಸ್‌ನಲ್ಲಿ ಯುನಿಮೋನಿ ಫೈನಾನ್ಷಿಯಲ್‌ ಸರ್ವಿಸಸ್‌ ಕಚೇರಿ ಇದ್ದು, ಆಭರಣ ಸಾಲ, ವಿದೇಶಿ ಹಣ ವಿನಿಮಯ ಮತ್ತು ವರ್ಗಾವಣೆ ವ್ಯವಹಾರ ನಡೆಸುತ್ತಿದೆ. 2020ರ ನವೆಂಬರ್‌ನಲ್ಲಿ ಸೆಕ್ಯೂರಿಟಿ ಏಜೆನ್ಸಿ ಕಚೇರಿ ತೆರೆಯಬೇಕೆಂದು ಕಾಂಪ್ಲೆಕ್ಸ್ ಮಾಲೀಕರಿಗೆ ಆರೋಪಿಯೊಬ್ಬ ತಿಳಿಸಿ ಫೈನಾನ್ಷಿಯಲ್‌ ಕಚೇರಿ ಪಕ್ಕದ ಕೊಠಡಿಯನ್ನೇ ಬಾಡಿಗೆಗೆ ಪಡೆದಿದ್ದ. ಕೊಠಡಿ ಕೀ ಪಡೆದು ಪೀಠೋಪಕರಣ ಮಾಡಿಸುವ ನೆಪದಲ್ಲಿ ಒಳಗೆ ಹೋಗಿದ್ದ. ಆನಂತರ ಜಾರ್ಖಂಡ್‌ನಿಂದ ತನ್ನ ಸಹಚರರನ್ನು ನಗರಕ್ಕೆ ಕರೆಸಿಕೊಂಡ. ಫೈನಾನ್ಷಿಯಲ್‌ ಕಂಪನಿಗೆ ಶನಿವಾರ ಮತ್ತು ಭಾನುವಾರ ರಜೆ ಇರುವುದನ್ನು ಖಾತರಿಪಡಿಸಿಕೊಂಡ. ನ.28ರ ರಾತ್ರಿ ವೇಳೆ ಬಾಡಿಗೆ ಕೊಠಡಿಗೆ ಹೋಗಿ ತಮ್ಮ ಅಂಗಡಿಗೂ ಮತ್ತು ಫೈನಾನ್ಷಿಯಲ್‌ ಕಚೇರಿಗಿದ್ದ ಗೋಡೆ ಕೊರೆದು ಒಳನುಗ್ಗಿ ಸಿಸಿ ಕ್ಯಾಮೆರಾ ಸ್ಥಗಿತಗೊಳಿಸಿದ್ದರು. ಗ್ಯಾಸ್‌ ಕಟರ್‌ ಬಳಸಿ ಬ್ಯಾಂಕಿನ ಲಾಕರ್‌ ಮುರಿದು ಚಿನ್ನಾಭರಣ ಮತ್ತು ನಗದು ದೋಚಿದ್ದರು ಎಂದು ಠಾಣೆ ಪೊಲೀಸರು ತಿಳಿಸಿದ್ದಾರೆ. ಈ ಕುರಿತು ಕಂಪನಿ ಅಧಿಕಾರಿ ರವೀಂದ್ರ ಶೆಟ್ಟಿ ನೀಡಿದ ದೂರಿನ ಮೇರೆಗೆ ಎಚ್‌ಎಎಲ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪೊಲೀಸರ ತಂಡ ಆರೋಪಿಗಳ ಬಂಧನಕ್ಕೆ ಬಲೆ ಬೀಸಿತ್ತು. ಆರೋಪಿಗಳು ಬಳಸಿದ್ದ ಮೊಬೈಲ್‌ ನಂಬರ್‌ ಆಧರಿಸಿ ಮುಂಬೈ ಮತ್ತು ದೆಹಲಿಯಲ್ಲಿ ಕಳ್ಳರನ್ನು ಬಂಧಿಸಿ ಪಶ್ಚಿಮ ಬಂಗಾಳದಲ್ಲಿ ಮಾರಾಟ ಮಾಡಿದ್ದ ಚಿನ್ನಾಭರಣ ಜಪ್ತಿ ಮಾಡಲಾಗಿದೆ ಎಂದು ಪೊಲೀಸ್‌ ಅಧಿಕಾರಿಗಳು ತಿಳಿಸಿದ್ದಾರೆ. ಮುಂಬೈನಲ್ಲಿ15 ಕೆಜಿ ಚಿನ್ನ, 85 ಲಕ್ಷ ಕಳವುಬಂಧಿತ ಆರೋಪಿಗಳು ಬೆಂಗಳೂರು, ದೆಹಲಿ, ಮುಂಬೈ ಮತ್ತು ಚೆನ್ನೈನ ಹಲವೆಡೆ ಕೃತ್ಯ ಎಸಗಿದ್ದಾರೆ. ಮಹಾನಗರಗಳನ್ನು ಸುತ್ತಾಡುತ್ತಿದ್ದ ಈ ತಂಡ, ಬ್ಯಾಂಕ್‌, ಫೈನಾಸ್ಸ್‌ ಕಂಪನಿ ಮತ್ತು ಚಿನ್ನಾಭರಣ ಮಳಿಗೆಗಳಿಗೆ ಕನ್ನ ಹಾಕಲು ಸಂಚು ಹಾಕಿ ತನ್ನ ಸಹಚರರ ಜತೆಗೂಡಿ ಕೃತ್ಯ ಎಸಗುತ್ತಿತ್ತು. ಎಚ್‌ಎಎಲ್‌ನಲ್ಲಿ ಕನ್ನ ಹಾಕಿದ್ದ ಆರೋಪಿಗಳು, ಮುಂಬೈಗೆ ಹೋಗಿ ಫೈನಾನ್ಸ್ ಕಂಪನಿಯಲ್ಲಿ15 ಕೆಜಿ ಚಿನ್ನ ಮತ್ತು 85 ಲಕ್ಷ ರೂ.ದೋಚಿದ್ದರು. ಮುಂಬೈ ಪೊಲೀಸರು ಮತ್ತು ಎಚ್‌ಎಎಲ್‌ ಪೊಲೀಸರು ಕಾರ್ಯಾಚರಣೆ ನಡೆಸುತ್ತಿದ್ದಾಗ ಎಚ್‌ಎಎಲ್‌ ಪೊಲೀಸರಿಗೆ 7 ಮಂದಿ ಮತ್ತು ಮುಂಬೈ ಪೊಲೀಸರಿಗೆ ಮೂವರು ಸೆರೆಸಿಕ್ಕಿದ್ದಾರೆ.
from India & World News in Kannada | VK Polls https://ift.tt/3fmRE3X
