ಸಿರಾಜ್ ಅಹಮ್ಮದ್ ಕೆ.ಎ. ಕೊಡಿಗೇನಹಳ್ಳಿ ಬೆಂಗಳೂರು: ಬಹುತೇಕ ಗ್ರಾಪಂಗಳು ಮಾಹಿತಿ ಅಪ್ಡೇಟ್ ಮಾಡಲು ನಿರ್ಲಕ್ಷ್ಯ ತೋರಿರುವ ಹಿನ್ನೆಲೆಯಲ್ಲಿ, ಗ್ರಾಮೀಣ ಅಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಇಲಾಖೆ () ವೆಬ್‌ಸೈಟ್ ಯಾವುದೇ ಮಾಹಿತಿಯನ್ನು ಹೊಂದಿರದೇ ಖಾಲಿ ಖಾಲಿಯಾಗಿದೆ. ಗ್ರಾಪಂ ಫಲಿತಾಂಶ ಪ್ರಕಟವಾಗಿ 3 ತಿಂಗಳಾದರೂ, ನೂತನ ಗ್ರಾಪಂ ಸದಸ್ಯರ ಹೆಸರನ್ನೇ ಅಪ್ಡೇಟ್ ಮಾಡಿಲ್ಲ. ಆಡಳಿತದಲ್ಲಿ ಪಾರದರ್ಶಕತೆ ತರುವ ನಿಟ್ಟಿನಲ್ಲಿ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯಿತ್ ರಾಜ್ ಇಲಾಖೆ ವೆಬ್‌ಸೈಟ್ ಪರಿಚಯಿಸಿದೆ. ವೆಬ್‌ಸೈಟ್‌ನಲ್ಲಿ ಜಿಪಂ, ತಾಪಂ ಹಾಗೂ ಗ್ರಾಪಂಗಳ ಎಲ್ಲಾ ರೀತಿಯ ಮಾಹಿತಿಗಳು ಲಭ್ಯವಾಗಬೇಕು. ವೆಬ್‌ಸೈಟ್‌ನಲ್ಲಿರುವ ಪಂಚಾಯತ್ ರಾಜ್ ಪೋರ್ಟಲ್ ಆಯ್ಕೆಗೆ ಹೋದರೆ, ಅಲ್ಲಿ ಜಿಪಂ, ತಾಪಂ ಹಾಗೂ ಗ್ರಾಪಂಗಳ ಮಾಹಿತಿ ಪಡೆಯಲು ಸಾರ್ವಜನಿಕರಿಗೆ ಮುಕ್ತ ಅವಕಾಶವಿದೆ. ಉದಾಹರಣೆಗೆ ಗ್ರಾಪಂ ಆಯ್ಕೆ ಮಾಡಿಕೊಂಡು ಭೂಪಟ ಕಾಣಿಸಿಕೊಳ್ಳುತ್ತದೆ ಅಲ್ಲಿ ಜಿಲ್ಲೆಯನ್ನು ಕ್ಲಿಕ್ ಮಾಡಿ, ತಾಲೂಕು ಮತ್ತು ಗ್ರಾಪಂ ಆಯ್ಕೆ ಮಾಡಿದರೆ ಕೋರಿದ ಗ್ರಾಪಂನ ಟೆಂಡರ್, ಸದಸ್ಯರು, ಪಂಚಾಯಿತಿ ಆಸ್ತಿಗಳು, ವೋಚರ್ ವರದಿ, ಸಭಾನಡುವಳಿಗಳು ಸೇರಿದಂತೆ ನಾನಾ ಮಾಹಿತಿ ಲಭ್ಯವಾಗುವಂತೆ ವೆಬ್‌ಸೈಟ್ ವಿನ್ಯಾಸಗೊಳಿಸಲಾಗಿದೆ. ಆದರೆ ಆ ಆಯ್ಕೆಗಳನ್ನು ಕ್ಲಿಕ್ ಮಾಡಿದರೆ ಯಾವುದೇ ಮಾಹಿತಿ ತೋರಿಸುತ್ತಿಲ್ಲ. ತುಮಕೂರು, ಶಿವಮೊಗ್ಗ,ಬೆಳಗಾವಿ ಸೇರಿದಂತೆ ರಾಜ್ಯದ ನಾನಾ ಜಿಲ್ಲೆಗಳ ಬಹುತೇಕ ಗ್ರಾಪಂಗಳು ಮಾಹಿತಿ ಅಪ್ಡೇಟ್ ಮಾಡಿಲ್ಲ. ಕನಿಷ್ಠ ನೂತನ ಸದಸ್ಯರ ಹೆಸರು ಅಪ್ಡೇಟ್ ಮಾಡದೇ ಇರುವುದು ಇಲಾಖೆಯ ನಿರ್ಲಕ್ಷ್ಯಕ್ಕೆ ಸಾಕ್ಷಿ ಒದಗಿಸಿದೆ. ತುಮಕೂರು ಜಿಲ್ಲೆಯ ಬೆಳ್ಳಾವಿ ಗ್ರಾಪಂ, ತುಮಕೂರು ಜಿಲ್ಲೆಯ ಮಧುಗಿರಿ ತಾಲೂಕಿನ ಕೊಂಡವಾಡಿ ಗ್ರಾಪಂ, ಶಿವಮೊಗ್ಗ ಜಿಲ್ಲೆಯ ತೀರ್ಥಹಳ್ಳಿ ತಾಲೂಕಿನ ಆಗುಂಬೆ ಗ್ರಾಪಂ ಹಾಗೂ ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿ ತಾಲೂಕಿನ ಜೊಡಕುರಳಿ ಗ್ರಾಪಂಗಳ ನೂತನ ಸದಸ್ಯರ ಮಾಹಿತಿ ಅಪ್ಡೇಟ್ ಆಗದೇ ಇರುವುದು ಬಹುತೇಕ ಗ್ರಾಪಂಗಳ ನೈಜ ಸ್ಥಿತಿಯನ್ನು ತೋರಿಸುತ್ತಿದೆ. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಆರ್‌ಡಿಪಿಆರ್ ಪ್ರಧಾನ ಕಾರ್ಯದರ್ಶಿ ಅತೀಕ್ ಎಲ್. ಕೆ, ಮಾಹಿತಿ ಅಪ್ಡೇಟ್ ಕುರಿತು ಶೀಘ್ರದಲ್ಲೇ ಕ್ರಮ ಕೈಗೊಳ್ಳುವ ಭರವಸೆ ನೀಡಿದ್ದಾರೆ. ಆದರೆ ನೂತನ ಸದಸ್ಯರು ಚುನಾಯಿತರಾಗಿ ಮೂರು ತಿಂಗಳು ಕಳೆದರೂ ಈ ಕಾರ್ಯ ಆಗದಿರುವುದು ಏಕೆ ಎಂಬ ಪ್ರಶ್ನೆ ಕಾಡುತ್ತಿದೆ. ಜೊತೆಗೆ ಗ್ರಾಪಂಗಳ ಇತರ ಮಾಹಿತಿ ಕೂಡ ಅಪ್ಡೇಟ್ ಆಗದಿರುವುದು ಜನಸಾಮಾನ್ಯರ ಅಸಮಾಧಾನಕ್ಕೆ ಕಾರಣವಾಗಿದೆ.
from India & World News in Kannada | VK Polls https://ift.tt/2PJKR9q
