ಪುಣೆ: ಭಾರತ ವಿರುದ್ಧ ಮೂರನೇ ಓಡಿಐ ಪಂದ್ಯದಲ್ಲಿ 7 ರನ್‌ಗಳ ಸೋಲು ಅನುಭವಿಸಿದ ಬಳಿಕ ಮಾತನಾಡಿದ ತಂಡದ ಸ್ಟ್ಯಾಂಡ್‌-ಇನ್‌ ಕ್ಯಾಪ್ಟನ್‌ , ಭಾನುವಾರ ಕಠಿಣ ಹೋರಾಟ ನಡೆಸಿದ ಪ್ರದರ್ಶನವನ್ನು ಮುಕ್ತಕಂಠದಿಂದ ಗುಣಗಾನ ಮಾಡಿದರು. 330 ರನ್‌ ಗುರಿ ಹಿಂಬಾಲಿಸಿದ ಇಂಗ್ಲೆಂಡ್‌ ತಂಡ ಒಂದು ಹಂತದಲ್ಲಿ 168 ರನ್‌ಗಳಿಗೆ 6 ವಿಕೆಟ್‌ ಕಳೆದುಕೊಂಡಿತ್ತು. ಈ ವೇಳೆ ಭಾರತ ಸುಲಭವಾಗಿ ಗೆಲುವು ಪಡೆಯಲಿದೆ ಎಂದು ಭಾವಿಸಲಾಗಿತ್ತು. ಆದರೆ, ಇಂಗ್ಲೆಂಡ್‌ ಯುವ ಆಲ್‌ರೌಂಡರ್‌ ಸ್ಯಾಮ್ ಕರ್ರನ್ ಎಲ್ಲರ ನಿರೀಕ್ಷೆಯನ್ನು ಹುಸಿ ಮಾಡಿದರು. ಅದ್ಭುತವಾಗಿ ಬ್ಯಾಟ್‌ ಮಾಡಿದ ಕರ್ರನ್ 83 ಎಸೆತಗಳಲ್ಲಿ ಅಜೇಯ 95 ರನ್‌ ಗಳಿಸಿದರು. ಅಲ್ಲದೆ, 9ನೇ ಕ್ರಮಾಂಕದ ಆದಿಲ್‌ ರಶೀದ್‌ ಹಾಗೂ 10ನೇ ಕ್ರಮಾಂಕದ ಮಾರ್ಕ್‌ವುಡ್‌ ಅವರೊಂದಿಗೆ ಎರಡು ಅರ್ಧಶತಕಗಳ ಜತೆಯಾಟವನ್ನೂ ಅವರು ಆಡಿದ್ದರು. ಆ ಮೂಲಕ ಇಂಗ್ಲೆಂಡ್‌ ತಂಡವನ್ನು ಗೆಲುವಿನ ಸನಿಹ ತಂದಿದ್ದರು. ಆದರೂ, ಅಂತಿಮವಾಗಿ 7 ರನ್‌ಗಳಿಂದ ಇಂಗ್ಲೆಂಡ್‌ ಸೋಲು ಅನುಭವಿಸಬೇಕಾಯಿತು. ಆ ಮೂಲಕ ಭಾರತ 2-1 ಅಂತರದಲ್ಲಿ ಓಡಿಐ ಸರಣಿ ಮುಡಿಗೇರಿಸಿಕೊಂಡಿತು. ಸ್ಟಾರ್‌ ಸ್ಪೋರ್ಟ್ಸ್ ಜೊತೆ ಮಾತನಾಡಿದ ಬಟ್ಲರ್, "ಎರಡೂ ತಂಡಗಳು ಕೆಲ ತಪ್ಪಗಳನ್ನು ಮಾಡಿದ ಹೊರತಾಗಿಯೂ ಪಂದ್ಯ ಅದ್ಭುತವಾಗಿತ್ತು. ಒಂದು ಹಂತದಲ್ಲಿ ಅಪಾಯಕ್ಕೆ ಸಿಲುಕಿದ್ದ ತಮಗೆ ಸ್ಯಾಮ್ ಕರ್ರನ್ ಗೆಲುವಿನ ಭರವೆಸೆ ಮೂಡಿಸಿದರು. ಆದರೆ, ಸರಣಿ ಗೆದ್ದ ಭಾರತಕ್ಕೆ ಅಭಿನಂದನೆ ಸಲ್ಲಿಸುತ್ತೇನೆ. ಈ ಸರಣಿಯಲ್ಲಿ ಸಾಕಷ್ಟು ಕಲಿತಿದ್ದೇವೆ ಹಾಗೂ ನಮ್ಮಲ್ಲಿ ಹಲವರು ಮುಂದೆ ಬಂದು ತಂಡವನ್ನು ಮುನ್ನಡೆಸಿರುವುದು ಖುಷಿ ವಿಚಾರ. ಒಟ್ಟಾರೆ ಸೀಮಿತ ಓವರ್‌ಗಳ ಸರಣಿಯಲ್ಲಿ ನಂಬಲಾಗದಷ್ಟು ಸ್ಪರ್ಧೆ ಇದೆ," ಎಂದು ಹೇಳಿದರು. "ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ ನಾವು ಮತ್ತೆ ಇದೇ ವಾತಾವರಣದಲ್ಲಿ ಆಡುತ್ತೇವೆ. ವಿಶ್ವದ ಅಗ್ರ ಕ್ರಮಾಂಕದ ತಂಡದ ವಿರುದ್ಧ ನಮ್ಮ ಯುವ ಆಟಗಾರರು ಅದ್ಭುತ ಅನುಭವವನ್ನು ಪಡೆದಿದ್ದಾರೆ ಹಾಗೂ ಭವಿಷ್ಯದಲ್ಲಿ ಅತ್ಯುತ್ತಮ ಕ್ರಿಕೆಟಿಗರಾಗಲು ಇದು ನೆರವಾಗಲಿದೆ. ಭಾರತದ ಇನಿಂಗ್ಸ್‌ನಲ್ಲಿ ನಾವು ಸುಲಭವಾಗಿ ಬೌಂಡರಿಗಳನ್ನು ನೀಡಿದ್ದೇವೆ. ರಿಷಭ್‌ ಪಂತ್‌ ಹಾಗೂ ಹಾರ್ದಿಕ್‌ ಪಾಂಡ್ಯ ಜೋಡಿ ನಮ್ಮ ಮೇಲೆ ಒತ್ತಡ ಹೇರಿತ್ತು. ಈ ಜೋಡಿಯ ರೀತಿ ನಮ್ಮ ತಂಡದಲ್ಲಿ ಪಾಲುದಾರಿಕೆ ಮೂಡಿಬರಲಿಲ್ಲ," ಎಂದು ನಾಯಕ ಬೆಸರ ವ್ಯಕ್ತಪಡಿಸಿದರು. ಸ್ಯಾಮ್ ಕರ್ರನ್ ಬ್ಯಾಟಿಂಗ್‌ ಬಗ್ಗೆ ಪ್ರತಿಕ್ರಿಯಿಸಿ, "ಕಳೆದ ಹಲವು ವರ್ಷಗಳಿಂದ ನಾವು ಅತ್ಯುತ್ತಮ ಕ್ರಿಕೆಟ್ ಆಡುತ್ತಿದ್ದೇವೆ. ಅದರಲ್ಲೂ ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ನಮ್ಮಲ್ಲಿ ಅದ್ಭುತ ಪ್ರತಭೆಗಳಿದ್ದು, ತಂಡದಲ್ಲಿಯೇ ತೀವ್ರ ಸ್ಪರ್ಧೆ ಇದೆ. ಇದರಿಂದ ತಂಡ ದಿನದಿಂದ ದಿನಕ್ಕೆ ಬಲಿಷ್ಠವಾಗುತ್ತಿದೆ. ನಮ್ಮಲ್ಲಿ ಡೆಪ್ತ್‌ ಬ್ಯಾಟಿಂಗ್‌ ಇದೆ. ವಿಶೇಷವಾಗಿ ಭಾನುವಾರದ ಪಂದ್ಯದಲ್ಲಿ ತಂಡದ ಜವಾಬ್ದಾರಿಯನ್ನು ಸ್ಯಾಮ್ ಕರ್ರನ್ ವಹಿಸಿಕೊಂಡಿದ್ದರು ಹಾಗೂ ತಂಡದ ಗೆಲುವಿಗೆ ಏಕಾಗಿ ಹೋರಾಟ ನಡೆಸಿದ್ದರು. ಆದರೂ, ಕೊನೆಯ ಹಂತದಲ್ಲಿ ನಾವು ಎಡವಿದ್ದೇವೆ. ಆದರೂ ಪರವಾಗಿಲ್ಲ, ಸ್ಯಾಮ್ ಕರ್ರನ್ ಅವರಿಂದ ನಾವು ಹೆಮ್ಮೆ ಪಡುತ್ತೇವೆ," ಎಂದು ಜೋಸ್‌ ಬಟ್ಲರ್ ಯುವ ಪ್ರತಿಭೆಯನ್ನು ಶ್ಲಾಘಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2PDHP6E
