ಹೊಸದಿಲ್ಲಿ: ತಮ್ಮ ನಾಯಕತ್ವದಲ್ಲಿ ಅತಿ ಹೆಚ್ಚು ಟಿ20 ಪಂದ್ಯಗಳನ್ನು ಗೆಲ್ಲುವ ಮೂಲಕ ತಂಡದ ನಾಯಕ ಅಸ್ಘರ್ ಅಫ್ಘಾನ್ ಭಾರತದ ಮಹೇಂದ್ರ ಸಿಂಗ್ ಧೋನಿ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಜಿಂಬಾಂಬ್ವೆ ವಿರುದ್ಧ ಎರಡನೇ ಟಿ20 ಪಂದ್ಯ ಗೆಲ್ಲುವ ಮೂಲಕ ಅಫ್ಘನ್ ಈ ದಾಖಲೆಗೆ ಭಾಜನರಾಗಿದ್ದಾರೆ. ಟಿ20 ತಂಡದ ನಾಯಕತ್ಬದಲ್ಲಿ ಅದ್ಭುತ ದಾಖಲೆಯನ್ನು ಹೊಂದಿರುವ ಅಸ್ಘರ್ ಅಫ್ಘನ್, 51 ಪಂದ್ಯಗಳಲ್ಲಿ ಅಫಘಾನಿಸ್ತಾನ ತಂಡದ ಸಾರಥ್ಯ ವಹಿಸಿಕೊಂಡಿದ್ದು, ಇದರಲ್ಲಿ 41 ಹಣಾಹಣಿಗಳಲ್ಲಿ ಜಯ, 9 ಪಂದ್ಯಗಳಲ್ಲಿ ಸೋಲಿನ ಕಹಿ ಅನುಭವಿಸಿದ್ದಾರೆ ಹಾಗೂ ಇನ್ನೊಂದು ಪಂದ್ಯದ ಫಲಿತಾಂಶ ಮೂಡಿಬಂದಿಲ್ಲ. ಭಾರತ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ 72 ಪಂದ್ಯಗಳಲ್ಲಿ ಟಿ20 ತಂಡದ ನಾಯಕತ್ವವನ್ನು ವಹಿಸಿಕೊಂಡಿದ್ದರು. ಆ ಮೂಲಕ ಅಸ್ಘರ್ ಅವರಿಗಿಂತ ಹೆಚ್ಚಿನ ಪಂದ್ಯಗಳಲ್ಲಿ ನಾಯಕತ್ವವನ್ನು ವಹಿಸಿಕೊಂಡಿದ್ದಾರೆ. 9 ವರ್ಷಗಳ ಕಾಲ ತಂಡದ ಸಾರಥ್ಯ ವಹಿಸಿದ್ದ , 41ರಲ್ಲಿ ಜಯ, 28 ಹಣಾಹಣಿಗಳಲ್ಲಿ ಸೋಲು ಅನುಭವಿಸಿದ್ದಾರೆ. ಇನ್ನುಳಿದ ಎರಡು ಪಂದ್ಯಗಳಲ್ಲಿ ಫಲಿತಾಂಶ ಬಂದಿರಲಿಲ್ಲ. ಧೋನಿ ನಾಯಕತ್ವದಲ್ಲಿ ಭಾರತ 2007ರ ಉದ್ಘಾಟನಾ ಆವೃತ್ತಿಯ ಐಸಿಸಿ ಟಿ20 ವಿಶ್ವಕಪ್ ಗೆದ್ದಿತ್ತು. ಇಂಗ್ಲೆಂಡ್ ತಂಡದ ಇಯಾನ್ ಮಾರ್ಗನ್ ತಮ್ಮ ನಾಯಕತ್ವದಲ್ಲಿ 33 ಟಿ20 ಪಂದ್ಯಗಳನ್ನು ಗೆಲ್ಲುವ ಮೂಲಕ ಈ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಇವರ ನಂತರದ ಸ್ಥಾನಗಳಲ್ಲಿ ಕ್ರಮವಾಗಿ ಪಾಕಿಸ್ತಾನದ ಸರ್ಫರಾಝ್ ಅಹ್ಮದ್(29) ಹಾಗೂ ವೆಸ್ಟ್ ಇಂಡೀಸ್ನ ಡೆರೆನ್ ಸಾಮ್ಮಿ(27) ಇದ್ದಾರೆ. ಟಿ20 ಕ್ರಿಕೆಟ್ನಲ್ಲಿ ಶೇಕಡಾವಾರು ಅತಿ ಹೆಚ್ಚು ಟಿ20 ಪಂದ್ಯಗಳನ್ನು ಗೆದ್ದ ನಾಯಕ ಎಂಬ ಖ್ಯಾತಿಗೂ ಅಸ್ಘರ್ ಅಫ್ಘನ್(81.37) ಭಾಜನರಾಗಿದ್ದಾರೆ. ಸ್ಪೈನ್ನ ಕ್ರಿಸ್ಟಿಯನ್ ಮುನಾಝ್ ಮಿಲ್ಸ್(ಶೇ.81.81) 11 ಪಂದ್ಯಗಳಲ್ಲಿ 9ರಲ್ಲಿ ಗೆದ್ದು ಈ ಪಟ್ಟಿಯಲ್ಲಿ ಅಗ್ರ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ನಾಯಕತ್ವದಲ್ಲಿ ಅತಿ ಹೆಚ್ಚು ಟಿ20 ಪಂದ್ಯಗಳನ್ನು ಗೆದ್ದ ಆಟಗಾರರ ಪಟ್ಟಿ ಇಂತಿದೆ ಎಂಎಸ್ ಧೋನಿ(ಭಾರತ)/ಅಸ್ಘರ್ ಅಫ್ಘನ್ (ಅಫಘಾನಿಸ್ತಾನ)-41 ಇಯಾನ್ ಮಾರ್ಗನ್ (ಇಂಗ್ಲೆಂಡ್)-33 ಸರ್ಫರಾಝ್ ಅಹ್ಮದ್(ಪಾಕಿಸ್ತಾನ)-29 ಡೆರೆನ್ ಸಾಮ್ಮಿ (ವೆಸ್ಟ್ ಇಂಡೀಸ್)-27 ವಿರಾಟ್ ಕೊಹ್ಲಿ(ಭಾರತ) ವಿಲಿಯಮ್ ಪೋರ್ಟರ್ಫೀಲ್ಡ್(ಐರ್ಲೆಂಡ್)-26 ಫಾಫ್ ಡು ಪ್ಲೇಸಿಸ್(ದಕ್ಷಿಣ ಆಫ್ರಿಕಾ)-24 ಕೇನ್ ವಿಲಿಯಮ್ಸನ್ (ನ್ಯೂಜಿಲೆಂಡ್)-23 ಆರೋನ್ ಫಿಂಚ್(ಆಸ್ಟ್ರೇಲಿಯಾ)-22
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3vLdkMU
