ಹೊಸದಿಲ್ಲಿ: ಮುಂದಿನ 2024ರ ಲೋಕಸಭೆ ಚುನಾವಣೆ ವೇಳೆಗೆ ‘ರಿಮೋಟ್ ವೋಟಿಂಗ್’ ಪರಿಕಲ್ಪನೆ ಅನುಷ್ಠಾನಗೊಳಿಸುವ ಬಗ್ಗೆ ಮುಖ್ಯ ಚುನಾವಣಾ ಆಯುಕ್ತ ಸುನೀಲ್ ಅರೋರ ಭರವಸೆ ವ್ಯಕ್ತಪಡಿಸಿದ್ದು, ಇನ್ನು ಎರಡು ಮೂರು ತಿಂಗಳಲ್ಲಿ ಸಿದ್ಧತಾ ಕಾರ್ಯ ಆರಂಭಗೊಳಿಸುವುದಾಗಿ ತಿಳಿಸಿದ್ದಾರೆ. ‘ರಿಮೋಟ್ ವೋಟಿಂಗ್ ಅತ್ಯುತ್ತಮ ವ್ಯವಸ್ಥೆಯಾಗಿದೆ. ಇದನ್ನು ಅಭಿವೃದ್ಧಿ ಪಡಿಸುವ ದಿಸೆಯಲ್ಲಿ ಈ ವರ್ಷ ಆರಂಭದಿಂದಲೇ ಸಂಶೋಧನಾ ಕಾರ್ಯ ಶುರುವಾಗಿದೆ. ಐಐಟಿ ಮದ್ರಾಸ್ ಮತ್ತು ಇತರೆ ಐಐಟಿಗಳ ತಂತ್ರಜ್ಞಾನ ಪರಿಣಿತರನ್ನು ಸಂಪರ್ಕಿಸಿ, ಸಮಾಲೋಚನೆ ನಡೆಸಲಾಗುತ್ತಿದೆ’ ಎಂದು ಶನಿವಾರ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡ ಅರೋರಾ ತಿಳಿಸಿದರು. ‘ರಾಜಕೀಯ ಪಕ್ಷಗಳು ಮತ್ತು ಇತರ ಸಹವರ್ತಿಗಳ ಜತೆ ರಿಮೋಟ್ ವೋಟಿಂಗ್ ಕುರಿತು ವಿಸ್ತೃತ ಚರ್ಚೆ ನಡೆಸಲಾಗುವುದು. ಎಲ್ಲರ ಸಹಮತ ಪಡೆದ ಬಳಿಕವೇ ಈ ವ್ಯವಸ್ಥೆ ಜಾರಿಗೆ ತರಲಾಗುವುದು’ ಎಂದು ತಿಳಿಸಿದರು. ಕಾರ್ಯನಿರ್ವಹಣೆ ಹೇಗೆ?: ‘ಬ್ಲಾಕ್ಚೈನ್ ತಂತ್ರಜ್ಞಾನವನ್ನು ಇಲ್ಲಿ ಬಳಸಿಕೊಳ್ಳಲಾಗುತ್ತದೆ. ಇದರಲ್ಲಿ ದ್ವಿಮುಖ ವಿದ್ಯುನ್ಮಾನ ವೋಟಿಂಗ್ ವ್ಯವಸ್ಥೆ ಕೆಲಸ ಮಾಡುತ್ತದೆ. ಪ್ರತ್ಯೇಕ ಇಂಟರ್ನೆಟ್ ಲೈನ್ ಬಳಸಿಕೊಂಡು ವೈಟ್ ಲಿಸ್ಟೆಡ್ ಐಪಿ ಡಿವೈಸ್ ಮೂಲಕ ಇದು ಕಾರ್ಯನಿರ್ವಹಿಸುತ್ತದೆ. ಇಂಟರ್ನೆಟ್ ಆಧಾರಿತ ಬಯೊಮೆಟ್ರಿಕ್ ಉಪಕರಣಗಳು ಮತ್ತು ವೆಬ್ ಕ್ಯಾಮೆರಾ ಮೂಲಕ ಮತದಾರರ ಗುರುತನ್ನು ಖಾತ್ರಿಪಡಿಸಿಕೊಳ್ಳಲಾಗುತ್ತದೆ. ಇದರಲ್ಲಿ ಯಾವುದೇ ಅಕ್ರಮಕ್ಕೆ ಅವಕಾಶ ಇರುವುದಿಲ್ಲ’ ಎಂದು ನಿವೃತ್ತ ಉಪ ಚುನಾವಣಾ ಆಯುಕ್ತ ಸಂದೀಪ್ ಸಕ್ಸೆನಾ ತಿಳಿಸಿದರು. ‘ಮತದಾರರು ತಮ್ಮ ಮನೆಯಿಂದಲೇ ಮತ ಚಲಾಯಿಸಲು ಅವಕಾಶ ಇರುವುದಿಲ್ಲ. ರಿಮೋಟ್ ವೋಟಿಂಗ್ಗಾಗಿ ನಿರ್ದಿಷ್ಟ ಕೇಂದ್ರಗಳನ್ನು ಗುರುತಿಸಲಾಗುತ್ತದೆ. ಮತದಾರರು ಮೊದಲೇ ಮತದಾನದ ಸಮಯ ನಿಗದಿಪಡಿಸಿಕೊಂಡು, ಈ ಕೇಂದ್ರಗಳಿಗೆ ತೆರಳಿ ಮತದಾನ ಮಾಡಬೇಕು’ ಎಂದು ಸಕ್ಸೇನಾ ವಿವರಿಸಿದರು.
from India & World News in Kannada | VK Polls https://ift.tt/3tDtdmA
