ಕೆಲವು ದಿನಗಳ ಹಿಂದೆ ಸ್ನೇಹಿತರೊಬ್ಬರು ತಮ್ಮ ಚಿತ್ರ ವೃತ್ತ ಪತ್ರಿಕೆಯಲ್ಲಿ ಬಂದಿದೆ ಅಂತ ಸಂತಸದ ಸುದ್ದಿ ಹಂಚಿಕೊಂಡಿದ್ದೇ ಈ ಬರಹಕ್ಕೆ ಕಾರಣ. ಹಾಗಾಗಿ ಕ್ರೆಡಿಟ್ ಅನ್ನು ಅವರ ತಲೆಗೆ ವೃತ್ತಾಕಾರವಾಗಿ ಈ ಕಿರೀಟ ತೊಡಿಸಿಬಿಡೋಣ ಅಲ್ಲವೇ? ಈಗ ಮೊದಲ ವಿಷಯ ಈ ಕಿರೀಟದಿಂದಲೇ ಆರಂಭಿಸೋಣ. ತಲೆ.. ನಮ್ಮ ತಲೆ ಪೂರ್ಣ ವೃತ್ತವೇ? ಕೆಲವೊಮ್ಮೆ ಭೂಮಿಯಂತೆ oval ಆಗಿರುತ್ತದೆ ಕೂಡ. ಕೆಲವೊಮ್ಮೆ ಪಚ್ಚು ಬಿದ್ದ ತಾಮ್ರದ ಕೊಡದಂತೆಯೂ ಇರುತ್ತದೆ. ಹೀಗೆ ಹಲವು ಶೇಪುಗಳಲ್ಲಿ ತಲೆಗಳ ಡಿಸೈನ್ ಇರುವಾಗ, ಅಂದಿನ ದೊರೆಗಳು ಕಿರೀಟವನ್ನು ಹೇಗೆ ಮಾಡಿಸಿಕೊಳ್ಳುತ್ತಿದ್ದರು? ಅದು ಸರಿಯಾಗಿ ಕೂಡುತ್ತಿತ್ತೇ? ಕೈ ಬೆರಳ ಉಂಗುರದಂತೆ ಕೊಂಚ ಅಲ್ಲಲ್ಲೇ ಗ್ಯಾಪ್ ಇರುತ್ತಿತ್ತೇ? ಅಕಸ್ಮಾತ್ ಗ್ಯಾಪ್ ಬಿಟ್ಟಿದ್ದರೆ, ಒಡ್ಡೋಲಗ ನಡೆಸುವಾಗ ರಾಜ ಆ ಕಡೆ ಈ ಕಡೆ ನೋಡುವಾಗ ಕಿರೀಟ ಜರುಗಿ ಮುಖ ಸರಿದು ಗೊಂದಲ ಮಾಡುತ್ತಿತ್ತೇ? ನನಗಂತೂ ನಾನು ಧರಿಸುತ್ತಿದ್ದ ಕಿರೀಟ ಸ್ವಲ್ಪ ತೊಂದರೆಯನ್ನೇ ಕೊಡುತ್ತಿತ್ತು. ನನ್ನದು ಪುಟ್ಟ ತಲೆ. ನನಗಿಷ್ಟವಾದ ಹೆಲ್ಮೆಟ್ಗಳ ಸೈಜು ಕೊಂಚ ದೊಡ್ಡದಿರುತ್ತಿತ್ತು. ಹೆಲ್ಮೆಟ್ ಕೊಳ್ಳಲು ಹೋದಾಗ ನಿಮ್ಮ ತಲೆಗೆಂದೇ ಮಾಡಿರೋದು ತೊಗೊಳ್ಳಿ ಅಂತ ಅದರ ಮೇಲಿನ ಪ್ಲಾಸ್ಟಿಕ್ ಕವರ್ ಸಮೇತ ಹಾಕಿ ತೋರಿಸಿದ್ದ. ಎಲ್ಲಾ ಸರಿ ಇದೆ ಅಂತ ಮನೆಗೆ ಬಂದು ಪ್ಲಾಸ್ಟಿಕ್ ಕವರ್ ತೆಗೆದು ಹಾಕಿಕೊಂಡು ನೋಡಿದರೆ, ಎರಡು ತಲೆ ಇದರ ಒಳಗೆ ಹೋಗಬಹುದು ಅಷ್ಟು ದೊಡ್ಡದಾಗಿತ್ತು. ಅವನು ನನ್ನ ತಲೆಗೆ ಟೋಪಿ ಹಾಕಿದನೋ? ಹೆಲ್ಮೆಟ್ ಹಾಕಿದನೋ? ಈಗಿನ ಹಲವಾರು ಸಮಾರಂಭಗಳಲ್ಲಿ ಸನ್ಮಾನಿತರಿಗೆ ಪೇಟವನ್ನು ಕಟ್ಟುವುದರಿಂದ ಕಿರೀಟದ ಸಮಸ್ಯೆಯಿಲ್ಲ ಸದ್ಯ. ಒಂದು ವಿಧದಲ್ಲಿ ಬಹಳ ಒಳ್ಳೆಯದು. ಕಿರೀಟ ಹಾಕಿಬಿಟ್ಟರೆ, ಆ ಕಡೆ ಈ ಕಡೆ ತಿರುಗಿದಾಗ ಕಿರೀಟವು ಮುಖವನ್ನೇ ಮುಚ್ಚಿಬಿಟ್ಟರೆ ಆಭಾಸವಾಗುತ್ತದೆ. ಅದರಲ್ಲೂ ಆ ಸಮಯದಲ್ಲಿ ಫೋಟೋ ತೆಗೆದು ಸಾಮಾಜಿಕ ತಾಣದಲ್ಲಿ ಹರಿಬಿಟ್ಟರೆ ಜನ Iron man ಅಥವಾ ನಡೆದಾಡುವ ಭೂತ phantomನಂತೆ ಕಂಡರೆ ಚೆನ್ನಾಗಿರೋದಿಲ್ಲ ನೋಡಿ. ಹೊಸ ಫ್ಯಾಷನ್ ಆದರೆ ಸನ್ಮಾನಿತರಿಗೆ ಅದರಿಂದ royalty ಅಂತೂ ಸಿಗೋದಿಲ್ಲ. ಈಗ ಆರಂಭದಲ್ಲಿ ಹೇಳಿದ ವಿಷಯಕ್ಕೆ ಬರೋಣ ಅರ್ಥಾತ್ ವೃತ್ತ ಪತ್ರಿಕೆ. ಪ್ರಶ್ನೆ ಪತ್ರಿಕೆ ಎಂದರೆ ಪ್ರಶ್ನೆ ಇರುತ್ತದೆ. ಉತ್ತರ ಪತ್ರಿಕೆ ಎಂದರೆ ಉತ್ತರವಿರುತ್ತದೆ. ಅಂದ್ರೆ ವೃತ್ತ ಪತ್ರಿಕೆಯಲ್ಲಿ ವೃತ್ತ ಇರುತ್ತದೆಯೇ? ಆಕಾರದಲ್ಲಂತೂ ಈವರೆಗೂ ನಾನು ವೃತ್ತಾಕಾರವಾಗಿ ಇರುವ ಯಾವ ಪತ್ರಿಕೆಯನ್ನೂ ನೋಡಿಲ್ಲ. ಬೆಳಿಗ್ಗೆ ಮನೆಗೆ ಬಂದು ಬೀಳುವ ಅಥವಾ ಅಂಗಡಿಯಲ್ಲಿ ತೂಗಿಹಾಕಿರುವ ಯಾವುದೇ ಪತ್ರಿಕೆಯೂ ವೃತ್ತಾಕಾರವಾಗಿ ಇರುವುದಿಲ್ಲ. ಎಲ್ಲವೂ ಆಯತಾಕಾರವಾಗಿ ಇರುತ್ತದೆ. ಹೀಗಿದ್ದ ಮೇಲೆ ಅದು ಆಯತ ಪತ್ರಿಕೆ ಆಗಬೇಕೇ ಹೊರತು ಅಂತ ಆಗುವುದಿಲ್ಲ ಅಲ್ಲವೇ? ವೃತ್ತ ಎಂದರೆ circle . . . ಪತ್ರಿಕೆಗಳು ಸರ್ಕ್ಯುಲೇಶನ್ನಲ್ಲಿ ಇರುತ್ತದೆ ಎಂಬ ವಿಷಯ ಇದೆ. ಚಲಾವಣೆಯಲ್ಲಿರುವ ಒಂದು ಕರೆನ್ಸಿ ನೋಟು ಸರ್ಕ್ಯುಲೇಶನ್ನಲ್ಲಿ ಇದೆ ಎಂದರೆ ಇಂದು ಒಬ್ಬರ ಕೈಲಿರುವುದು, ನಾಳೆ ಮತ್ತೊಬ್ಬರ ಕೈ ಸೇರಬಹುದು, ಆನಂತರ ಮಗದೊಬ್ಬರ ಕೈಲಿ. ನೋಟು ಹರಿಯಿತು ಅಥವಾ ಸಲ್ಲದು ಅಂತಾದರೆ, ಕೊನೆಗೆ ಅದು ಗಮ್ಯ ಅಂತ ತಲುಪೋದು ಎಲ್ಲಿ ಆರಂಭವಾಯ್ತೋ ಅಲ್ಲಿಗೆ. ಮಣ್ಣಲ್ಲೇ ಹುಟ್ಟಿ ಮಣ್ಣನ್ನು ಸೇರುವ ಕಾಯದಂತೆ, ರಿಸರ್ವ್ ಬ್ಯಾಂಕಿನಲ್ಲಿ ಹುಟ್ಟಿ ಮತ್ತೆ ಅಲ್ಲಿಗೆ ಹೋಗುತ್ತದೆ. ಬೇರೆ ಬೇರೆ ಡಿಪಾರ್ಟ್ಮೆಂಟ್ ಇರಬಹುದು ಆದರೆ ಅದೇ ಬ್ಯಾಂಕ್ ಅನ್ನೋದು ಸತ್ಯ. ಆದರೆ ವೃತ್ತಪತ್ರಿಕೆಯ ಸರ್ಕ್ಯುಲೇಶನ್ ಅಂದ್ರೆ ಏನು? ಟ್ರೈನಿನಲ್ಲಿ ಪಯಣಿಸುತ್ತಿದ್ದೀರಿ ಅಂದರೆ, ಬೆಳಿಗ್ಗೆ ನೀವು ಕೊಂಡ ಪತ್ರಿಕೆ ಓದಿದ ನಂತರ, ಮತ್ತೊಬ್ಬರು ಕೇಳಿ ತೆಗೆದುಕೊಂಡು ಅಥವಾ ಕಸಿದುಕೊಂಡು ಓದಬಹುದು. ಒಂದೊಂದು ಹಾಳೆ ಒಂದೊಂದು ಕಡೆ ಹೋಗಬಹುದು, ಅಥವಾ ಇಡೀ ಪತ್ರಿಕೆ ಮತ್ತೊಬ್ಬರು ಒಯ್ಯಬಹುದು ಅಥವಾ ನೀವೇ ಖುದ್ದಾಗಿ ತಿಪ್ಪೆಗೂ ಹಾಕಬಹುದು. ಬೆಳಗಿನ ಪತ್ರಿಕೆ ಸಂಜೆಗೆ ರದ್ದಿ ಎಂದ ಮೇಲೆ ಸರ್ಕ್ಯುಲೇಶನ್ ಎಲ್ಲಿಂದಾ ಬಂತು? ನಾವು ಓದಿ ಮುಗಿಸಿದ ಯಾವುದೇ ಪತ್ರಿಕೆ ಅಥವಾ ಮ್ಯಾಗಜಿನ್ ವಾಪಸ್ ಮುದ್ರಣಾಲಯಕ್ಕಂತೂ ಹೋಗೋದಿಲ್ಲ. ಹಾಗಾಗಿ ಈ ಸರ್ಕ್ಯುಲೇಶನ್ ಅಂದರೆ ಬೇರೇನೋ ಅರ್ಥವಿದೆ. ಏನದು ಅಂತ ನೀವೇ ಹೇಳಿ ಆಯ್ತಾ?
from India & World News in Kannada | VK Polls https://ift.tt/3tOO7iS
