- ಯಳನಾಡು ಮಂಜು, ದಾವಣಗೆರೆ ರಾಜ್ಯದ ಹೆಚ್ಚಿನ ಎಲ್ಲಾ ಚೆಕ್‌ ಪೋಸ್ಟ್‌ಗಳಲ್ಲಿ ತಪಾಸಣೆ ಕಡ್ಡಾಯವಾಗಿದೆಯಾದರೂ ಸೂಕ್ತ ಸೌಲಭ್ಯಗಳಿಲ್ಲದೆ ಕಟ್ಟೆಚ್ಚರ ವಹಿಸಲಾಗುತ್ತಿಲ್ಲ ಎನ್ನುವುದು ದಾವಣಗೆರೆ ಸೇರಿದಂತೆ ಹಲವು ಜಿಲ್ಲೆಗಳ ಸಾಮಾನ್ಯ 'ನೋಟ'. ಇದು ವಿಕ ನಡೆಸಿದ ರಿಯಾಲಿಟಿ ಚೆಕ್‌ನಲ್ಲಿ ಈ ಅವ್ಯವಸ್ಥೆಗಳು ಬಯಲಾಗಿದೆ. ಚೆಕ್‌ಪೋಸ್ಟ್‌ಗಳಲ್ಲಿ ಸೂಕ್ತ ಸೌಲಭ್ಯಗಳಿಲ್ಲ: ಆರೋಗ್ಯ, ಪೊಲೀಸ್‌ ಸೇರಿ ಆರು ಇಲಾಖೆಯಿಂದ ತಲಾ ಒಬ್ಬರು ಸೇರಿ ಆರು ಮಂದಿ ನೌಕರರ ತಂಡ ಎಂಟು ತಾಸು ಚೆಕ್‌ ಪೋಸ್ಟ್‌ಗಳಲ್ಲಿ ಕೆಲಸ ಮಾಡುತ್ತದೆ. ಸೌಲಭ್ಯವೇ ಇಲ್ಲ: ಇಲ್ಲಿ ಕೆಲಸ ಮಾಡುವ ಸಿಬ್ಬಂದಿಗೆ ಕನಿಷ್ಠ ಕುಡಿವ ನೀರಿನ ವ್ಯವಸ್ಥೆಯೂ ಇಲ್ಲದೆ ಕೆಲಸ ಮಾಡುತ್ತಿದ್ದಾರೆ. ಜತೆಗೆ ಮಾಸ್ಕ್‌, ಸ್ಯಾನಿಟೈಸರ್‌, ಗ್ಲೌಸ್‌ಗಳನ್ನೂ ಪರಿಕರ ಒದಗಿಸಿಲ್ಲ. ಇದರಿಂದ ಕಟ್ಟುನಿಟ್ಟಿನ ತಪಾಸಣೆ ಸಾಧ್ಯವಾಗುತ್ತಿಲ್ಲ ಎಂದು ಅಲ್ಲಿನ ಸಿಬ್ಬಂದಿ ಹೇಳುತ್ತಾರೆ. ಸೋಪು ನೀರು ಇಲ್ಲಒಂದು ಬ್ಯಾಚ್‌ಗೆ ಆರು ಮಾಸ್ಕ್‌, 180 ಮಿಲೀ ಸ್ಯಾನಿಟೈಸರ್‌ ನೀಡುತ್ತಿದ್ದಾರೆ. ಸೋಪು, ನೀರಿನ ವ್ಯವಸ್ಥೆಯಿಲ್ಲ. ನಾಲ್ಕು ತಾಸಿಗೆ ಒಮ್ಮೆ ಮಾಸ್ಕ್‌ ಬದಲಿಸಲು ಸಾಧ್ಯವೇ ? ಗಂಟೆಗೊಮ್ಮೆ ಕೈ ತೊಳೆದು ಎಲ್ಲರೂ ಎರಡು ಬಾರಿ ಸ್ಯಾನಿಟೈಸರ್‌ ಬಳಿಸಿದರೆ ಎಲ್ಲ ಖಾಲಿಯಾಗುತ್ತದೆ ಎನ್ನುತ್ತಾರೆ ಚೆಕ್‌ಪೋಸ್ಟ್‌ ಸಿಬ್ಬಂದಿ. ರಕ್ಷಣಾ ಪರಿಕರ ಇಲ್ಲದಿದ್ದಾಗ ಸಹಜವಾಗಿ ಸಿಬ್ಬಂದಿ ತಪಾಸಣೆಗೆ ಹಿಂದೇಟು ಹಾಕುತ್ತಿದ್ದಾರೆ. ದಾವಣಗೆರೆಯಲ್ಲಿ ಗೂಡ್ಸ್‌ ಗಾಡಿಗಳ ಓಡಾಟ ಅನಿವಾರ್ಯ, ಇದನ್ನು ನಿಲ್ಲಿಸಲು ಸಾಧ್ಯವಿಲ್ಲ. ಹಾಗಾಗಿ ಚೆಕ್‌ ಪೋಸ್ಟ್‌ಗಳಲ್ಲಿ ತಪಾಸಣೆ ಬಿಗಿಗೊಳ್ಳಬೇಕಿದೆ. ಆದರೆ ಇಲ್ಲಿನ ಸಿಬ್ಬಂದಿಗೆ ಈವರೆಗೂ ರಕ್ಷಣಾ ಪರಿಕರವನ್ನೇ ಒದಗಿಸಿರಲಿಲ್ಲ. ಜಿಲ್ಲಾಡಳಿತದ ಮೊರೆ ಹೋದ ನಂತರ ಶುಕ್ರವಾರದಿಂದ ಸಿಬ್ಬಂದಿಗೆ ಪರಿಕರ ನೀಡಿದ್ದಾರೆ. 3 ತಿಂಗಳು ಸಂಬಳ ಇಲ್ಲ ಇದು ಒಂದೆಡೆಯಾದರೆ ಆರೋಗ್ಯ ಸಹಾಯಕರಿಗೆ ಡಿಸೆಂಬರ್‌ನಿಂದ ಇಲ್ಲಿಯವರೆಗೂ ಮೂರು ತಿಂಗಳ ಸಂಬಳವೇ ಆಗಿಲ್ಲ, ಈಗ ಒಂದು ತಿಂಗಳ ಸಂಬಳ ಬಿಡುಗಡೆ ಆಗಿದ್ದರೂ ಅದಿನ್ನೂ ಅವರ ಖಾತೆಗೆ ಜಮೆ ಆಗಿಲ್ಲ. ಇಂತಹ ಸಂಕಷ್ಟದ ಸ್ಥಿತಿಯಲ್ಲಿಯೂ ಚೆಕ್‌ ಪೋಸ್ಟ್‌ಗಳಲ್ಲಿ ಸಿಬ್ಬಂದಿ ದುಡಿಯುತ್ತಿದ್ದಾರೆ. ನೆರಳಿನ ವ್ಯವಸ್ಥೆಗೆ ಶಾಮಿಯಾನದ ಜತೆ ಎಲ್ಲ ಪರಿಕರ ಒದಗಿಸಲಾಗಿದೆ. ಚೆಕ್‌ಪೋಸ್ಟ್‌ ಸಿಬ್ಬಂದಿ ಪ್ರತಿ ವಾಹನಗಳನ್ನು ಕಟ್ಟುನಿಟ್ಟಿನ ತಪಾಸಣೆಗೆ ಒಳಪಡಿಸಬೇಕು. ಮಾರು ವೇಷದಲ್ಲಿ ಭೇಟಿ ನೀಡಿ ಪರಿಶೀಲಿಸಲಾಗುವುದು. - ಮಹಾಂತೇಶ್‌ ಬೀಳಗಿ, ಜಿಲ್ಲಾಧಿಕಾರಿ ಎಲ್ಲೆಲ್ಲಿ ಅವ್ಯವಸ್ಥೆ?
- ರಾಯಚೂರು, ಕೊಪ್ಪಳ ಜಿಲ್ಲಾ ಪ್ರವೇಶದ ವೇಳೆ ಬಿಗಿ ತಪಾಸಣೆ ಇಲ್ಲ. ಪಾಸ್‌ ಇದ್ದರೆ ವಾಹನ ಪಾಸ್‌!
- ಗದಗ, ಧಾರವಾಡ ಜಿಲ್ಲೆಗಳಲ್ಲಿ ವಾಹನಗಳ ಸ್ಯಾನಿಟೈಸೇಷನ್‌ ನಡೆಯುತ್ತಿಲ್ಲ.
- ಶಿರಾಡಿ ಗಡಿಯಲ್ಲಿ ವಾಹನ ತಪಾಸಣೆ ಇದೆ, ಅದರಲ್ಲಿರುವ ವ್ಯಕ್ತಿಗಳ ಮಾಹಿತಿ ಸಂಗ್ರಹದ ಗೋಜಿಗೆ ಹೋಗುತ್ತಿಲ್ಲ.
- ರಾಮನಗರದಲ್ಲಿ ಚೆಕ್ಕಿಂಗ್‌ ಇಲ್ಲವೇ ಇಲ್ಲ. ಸ್ಯಾನಿಟೈಸೇಷನ್‌, ಚಾಲಕರ ಮೇಲೆ ನಿಗಾ ಇಲ್ಲ.
- ಬಳ್ಳಾರಿ ಜಿಲ್ಲೆಯಲ್ಲಿ ಸರಕು ಸಾಗಣೆ ವಾಹನಗಳ ತಪಾಸಣೆಯನ್ನು ಕಟ್ಟುನಿಟ್ಟಾಗಿ ನಡೆಸಲಾಗುತ್ತಿದೆ. ಆದರೆ ಸ್ಯಾನಿಟೈಸೇಷನ್‌ ನಡೆಯುತ್ತಿಲ್ಲ.
from India & World News in Kannada | VK Polls https://ift.tt/2VPVqY5
