ವಾಷಿಂಗ್ಟನ್: ಜಗತ್ತಿನ ಯಾವುದೇ ದೇಶದ ಯಾವುದೇ ನಗರದಲ್ಲೂ ನೋಡಿದರೂ ಹೊಗೆಯುಗುಳುತ್ತಾ, ಧೂಳೆಬ್ಬಿಸುತ್ತಾ ಸಂಚರಿಸುವ ವಾಹನಗಳ ದಂಡೇ ಕಣ್ಣಿಗೆ ಕಾಣುತ್ತವೆ. ಆಧುನಿಕ ಸಮಾಜದ ಭಸ್ಮಾಸುರ ಎಂದೇ ಕುಖ್ಯಾತಿ ಪಡೆದಿರುವ ಈ ವಾಹನಗಳಿಂದಾಗುತ್ತಿದ್ದ ಅನಾಹುತಗಳು ಒಂದೆರಡಲ್ಲ. ವಾಹನ ಸಂಚಾರದಿಂದ ವಾಯುಮಾಲಿನ್ಯ ವಿಪರೀತಗೊಂಡು ವಿಶ್ವದ ಪರಿಸರವಾದಿಗಳನ್ನೆಲ್ಲಾ ಆತಂಕಕ್ಕೆ ದೂಡಿತ್ತು. ದಿನಬೆಳಗಾದರೆ ಈ ವಾಹನಗಳು ಉಗುಳುವ ವಿಷಯುಕ್ತ ಹೊಗೆ ಕುಡಿದು ಭೂ ತಾಯಿ ಕೂಡ ರೋಸಿ ಹೋಗಿದ್ದಳು. ಆದರೆ ಕೊರೊನಾ ವೈರಸ್ ಎಂಬ ಮಾರಕ ವೈರಾಣುವಿನಿಂದಾಗಿ ವಸುಧೆಗೆ ಸಿಗುತ್ತಿದೆ ಎಂದರೆ ನೀವು ನಂಬಲೇಬೇಕು. ಅರೆ! ಕೊರೊನಾ ವೈರಸ್ಗೂ, ಶುದ್ಧಗಾಳಿಗೂ ಏನು ಸಂಬಂಧ ಅಂತೀರಾ?. ಏನು ಸಂಬಂಧ ಅನ್ನೋದು ತಿಳಿಯಲು ಮುಂದೆ ಓದಿ.. ಕೊರೊನಾ ವೈರಸ್ ಹರಡುವಿಕೆಗೆ ಬೆದರಿರುವ ವಿಶ್ವದ ಎಲ್ಲಾ ರಾಷ್ಟ್ರಗಳೂ, ಲಾಕ್ಡೌನ್ ಘೋಷಿಸಿವೆ. ನಿರ್ದಿಷ್ಟ ದಿನಾಂಕದವರೆಗೆ ಇಡೀ ದೇಶವನ್ನೇ ಬಂದ್ ಮಾಡಿ ಆಯಾ ದೇಶಗಳ ಸರ್ಕಾರಗಳು ಆದೇಶ ಹೊರಡಿಸಿವೆ. ಭಾರತದಲ್ಲೂ ಇಂದು ಒಂದು ದಿನದ ಜನತಾ ಕರ್ಫ್ಯೂ ಆಚರಿಸಲಾಗುತ್ತಿದೆ. ಲಾಕ್ಡೌನ್ ಪರಿಣಾಮ ಈ ಎಲ್ಲಾ ದೇಶಗಳಲ್ಲಿ ವಾಹನ ಸಂಚಾರ ದಟ್ಟಣೆ ಭಾರೀ ಪ್ರಮಾಣದಲ್ಲಿ ಕಡಿಮೆಯಾಗಿದೆ. ಜನರು ಮನೆಯಿಂದ ಹೊರಗೆ ಬರುತ್ತಿಲ್ಲವಾದ್ದರಿಂದ ಸರ್ಕಾರಿ ಸಾರಿಗೆ ಹಾಗೂ ಖಾಸಗಿ ವಾಹನಗಳ ಓಡಾಟಕ್ಕೆ ಬ್ರೇಕ್ ಬಿದ್ದಿದೆ. ಈ ಹಿನ್ನೆಲೆಯಲ್ಲಿ ಭೂಮಿಯ ವಾತಾವರಣದಲ್ಲಿ ತುಸು ಚೇತರಿಕೆ ಕಂಡು ಬಂದಿದ್ದು, ಶುದ್ಧಗಾಳಿಯ ಪ್ರಮಾಣದಲ್ಲಿ ಏರಿಕೆಯಾಗಿದೆ ಎನ್ನಲಾಗಿದೆ. ಈ ಕುರಿತು ಅಮೆರಿಕದ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಸಂಸ್ಥೆ ಮಾಹಿತಿ ನೀಡಿದೆ. ಜಗತ್ತಿನ ಎಲ್ಲಾ ದೇಶಗಳಲ್ಲಿ ವಾಹನ ಸಂಚಾರ ದಟ್ಟಣೆ ಭಾರೀ ಪ್ರಮಾಣದಲ್ಲಿ ಕಡಿಮೆಯಾಗಿದ್ದು, ಇದರಿಂದಾಗಿ ವಾಹನಗಳು ಉಗುಳುವ ನೈಟ್ರೋಜನ್ ಡೈಆಕ್ಸೈಡ್(NO2) ಗಣನೀಯ ಪ್ರಮಾಣದಲ್ಲಿ ಇಳಿಕೆಯಾಗಿದೆ ಎಂದು ನಾಸಾ ಹೇಳಿದೆ. ಭೂ ವಾತಾವರಣದಲ್ಲಿ NO2 ಬೆರೆಯುವ ಪ್ರಮಾಣ ಕಡಿಮೆಯಾಗಿರುವುದರಿಂದ ಕೆಲವೇ ದಿನಗಳಲ್ಲಿ ಭೂಮಿಯ ಮೇಲ್ಮೈ ವಾತಾವರಣದಲ್ಲಿ ಸಕಾರಾತ್ಮಕ ಬೆಳವಣಿಗೆ ಕಂಡು ಬಂದಿದೆ ಎಂದು ನಾಸಾ ಹೇಳಿದೆ. NO2 ಬೆರೆಯುವಿಕೆ ಕಡಿಮೆಯಾಗುತ್ತಿದ್ದಂತೇ ಶುದ್ಧಗಾಳಿಯ ಪ್ರಮಾಣ ಏರಿಕೆಯಾಗಿದ್ದು, ಇದನ್ನು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಿಂದ ಸ್ಪಷ್ಟವಾಗಿ ಗುರುತಿಸಬಹುದು ಎಂದು ನಾಸಾ ಸ್ಪಷ್ಟಪಡಿಸಿದೆ.
from India & World News in Kannada | VK Polls https://ift.tt/39eEwH7
