ಹೊಸದಿಲ್ಲಿ: ವಿಶ್ವಾದ್ಯಂತ ವಿಜ್ಞಾನಿಗಳು, ಬಾಹ್ಯಾಕಾಶ ತಜ್ಞರು ಕಳೆದ ಮೂರು ತಿಂಗಳಿನಿಂದ ನಡೆಸಿದ್ದ ಹುಡುಕಾಟಕ್ಕೆ ತಾರ್ಕಿಕ ಅಂತ್ಯ ಸಿಕ್ಕಂತಾಗಿದೆ. ಇಸ್ರೋನ ಚಂದ್ರಯಾನ 2 ವಿಕ್ರಮ್ ಲ್ಯಾಂಡರ್ನ ಅವಶೇಷಗಳನ್ನು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ನಾಸಾದ ಲೂನಾರ್ ರೆಕೊನೈಸೆನ್ಸ್ ಆರ್ಬಿಟರ್(ಎಲ್ಆರ್ಒ) ಪತ್ತೆ ಮಾಡಿದ್ದು, ಇದರ ಕೀ-ರೋಲ್ ಚೆನ್ನೈನ ಟೆಕ್ಕಿ ಎಂಬುದು ವಿಶೇಷ. ನಾಸಾದ ಎಲ್ಒರ್ಒ ಕ್ಲಿಕ್ಕಿಸಿದ್ದ ಚಂದ್ರನ ದಕ್ಷಿಣ ಧೃವದ ಚಿತ್ರದ ಮೇಲೆ ಆಳವಾದ ಅಧ್ಯಯನ ನಡೆಸಿ ವಿಕ್ರಮ್ ಲ್ಯಾಂಡರ್ನ ಅವಶೇಷಗಳು ಅದರಲ್ಲಿ ಇರುವ ಬಗ್ಗೆ ಗಮನ ಸೆಳೆದಿದ್ದರು. ನಾಸಾದ ಎಲ್ಒರ್ಒ ಸಂಪರ್ಕಿಸಿ ವಿಕ್ರಮ್ ಲ್ಯಾಂಡರ್ ಆ ಪ್ರದೇಶದಲ್ಲಿ ಇರುವ ಬಗ್ಗೆ ಹಿಂಟ್ ನೀಡಿದ್ದರು. ಚೆನ್ನೈನ ಲೆನಾಕ್ಸ್ ಇಂಡಿಯಾ ತಂತ್ರಜ್ಞಾನ ಕೇಂದ್ರದಲ್ಲಿ ಟೆಕ್ನಿಕಲ್ ಆರ್ಕಿಟೆಕ್ಟ್ ಆಗಿ ಕೆಲಸ ಮಾಡುತ್ತಿರುವ ಮ್ಯಾಕಾನಿಕಲ್ ಇಂಜಿನಿಯರ್ ಮತ್ತು ಕಂಪ್ಯೂಟರ್ ಪ್ರೊಗ್ರಾಮರ್ ಶಣ್ಮುಗ ಸುಬ್ರಮಣಿಯನ್(ಶಾನ್) ವಿಕ್ರಮ್ ಲ್ಯಾಂಡರ್ ಅವಶೇಷಗಳನ್ನು ಪತ್ತೆ ಹಚ್ಚುವ ಕೆಲಸದ ಪ್ರಮುಖ ರೂವಾರಿ. ಸೆಪ್ಟಂಬರ್ 7ರಂದು ಚಂದ್ರನ ಮೇಲೆ ಇಳಿಯುವ ಸಂದರ್ಭ ವೇಗವಾಗಿ ಪತನಗೊಂಡಿತ್ತು. ಮಧುರೈನಲ್ಲಿ ಜನಿಸಿದ ಸುಬ್ರಮಣಿಯನ್, ಬಿಡುಗಡೆ ಮಾಡಿದ್ದ ಚಂದ್ರನ ವಿವಿಧ ಚಿತ್ರಗಳ ಮೇಲೆ ಸೂಕ್ಷ್ಮವಾಗಿ ಕಣ್ಣಾಡಿಸಿದ್ದರು. ಸೆಪ್ಟಂಬರ್ 17, ಅಕ್ಟೋಬರ್ 14, 15 ಮತ್ತು ನವೆಂಬರ್ 11 ರಂದು ಎಲ್ಆರ್ಒ ಕ್ಲಿಕ್ ಮಾಡಿದ್ದ ಚಂದ್ರನ ದಕ್ಷಿಣ ಧೃವದ ಚಿತ್ರಗಳ ಮೇಲೆ ಅತಿಸೂಕ್ಷ್ಮವಾಗಿ ಅಧ್ಯಯನ ನಡೆಸಿದ್ದರು. ಈ ಸಂದರ್ಭ ವಿಕ್ರಮ್ ಲ್ಯಾಂಡರ್ನ ಅವಶೇಷಗಳು ಇರುವ ಬಗ್ಗೆ ಸುಳಿವನ್ನು ಕಂಡುಕೊಂಡಿದ್ದರು. ತಕ್ಷಣ ನಾಸಾಗೆ ಮಾಹಿತಿಯನ್ನು ರವಾನಿಸಿ ಈ ಬಗ್ಗೆ ಖಚಿತತೆಯನ್ನು ನೀಡುವಂತೆ ವಿನಂತಿ ಮಾಡಿದ್ದರು. ವಿಕ್ರಮ್ ಲ್ಯಾಂಡರ್ ಅವಶೇಷಗಳು ಪತ್ತೆಯಾಗಿರುವ ಬಗ್ಗೆ ಖಚಿತ ಪಡಿಸಿದ ನಾಸಾ ವಿಜ್ಞಾನಿ ಜಾನ್ ಕೆಲ್ಲರ್, ವಿಕ್ರಮ್ ಲ್ಯಾಂಡರ್ ಅವಶೇಷಗಳ ಬಗ್ಗೆ ಸುಳಿವು ನೀಡಿದ್ದಕ್ಕೆ ಧನ್ಯವಾದಗಳು. ಲ್ಯಾಂಡರ್ನ ಅವಶೇಷಗಳಿವ ಜಾಗವನ್ನು ಎಲ್ಒಆರ್ಸಿ ತಂಡ ಖಚಿತ ಪಡಿಸಿದೆ. ವಿಕ್ರಮ್ ಲ್ಯಾಂಡರ್ ಪತನಗೊಳ್ಳುವ ಮೊದಲು ಸೆರೆ ಹಿಡಿದಿದ್ದ ಚಂದ್ರನ ಚಿತ್ರಗಳಿಗೂ ಮತ್ತು ಈಗ ತೆಗೆದಿರುವ ಚಿತ್ರಗಳಿಗೂ ಸೂಕ್ಷ್ಮ ವ್ಯತ್ಯಾಸಗಳು ಕಂಡುಬಂದಿವೆ. ಈ ಸುಳಿವನ್ನು ಆಧರಿಸಿ ನಮ್ಮ ತಂಡ ಹೆಚ್ಚಿನ ಅಧ್ಯಯನ ನಡೆಸಿತು. ವಿಕ್ರಮ್ ಲ್ಯಾಂಡರ್ನ ಅವಶೇಷಗಳು ಮತ್ತು ಅದು ಬಿದ್ದುದರಿಂದ ಚಂದ್ರನ ನೆಲದ ಮೇಲೆ ಉಂಟಾದ ಪರಿಣಾಮಗಳು ಕಂಡು ಬಂದವು. ಈ ಸಂಶೋಧನೆಯ ಮೂಲ ಕ್ರೆಡಿಟ್ ಸುಬ್ರಮಣಿಯನ್ ಅವರಿಗೆ ಸಲ್ಲುತ್ತದೆ ಎಂದು ತಿಳಿಸಿದ್ದಾರೆ. ಶಣ್ಮುಗ ಸುಬ್ರಮಣಿಯನ್ ಅವರಿಗೆ ಅಭಿನಂದನೆಗಳನ್ನು ಸಲ್ಲಿಸಿದ ಜಾನ್ ಕೆಲ್ಲರ್, ವಿಕ್ರಮ್ ಲ್ಯಾಂಡರ್ ಅವಶೇಷಗಳನ್ನು ಪತ್ತೆ ಮಾಡಲು ನಿಮ್ಮ ಶ್ರಮ ಮತ್ತು ವ್ಯಯಿಸಿದ ಸಮಯ ತುಂಬಾ ಅಮೂಲ್ಯ. ಇದಕ್ಕಾಗಿ ನಿಮಗೆ ಅಭಿನಂದನೆಗಳನ್ನು ತಂಡದ ಪರವಾಗಿ ಸಲ್ಲಿಸುತ್ತಿದ್ದೇನೆ. ತಡವಾಗಿ ಪ್ರತಿಕ್ರಿಯಿಸುತ್ತಿರುವುದಕ್ಕೆ ಕ್ಷಮೆ ಕೇಳುತ್ತೇವೆ ಎಂದಿದ್ದಾರೆ. ವಿಕ್ರಮ್ ಲ್ಯಾಂಡರ್ನ ಅವಶೇಷಗಳು ಪತ್ತೆಯಾದ ಖಚಿತ ಮಾಹಿತಿಯನ್ನು ನಾಸಾದ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಡಿಸೆಂಬರ್ 3ರಂದು ಘೋಷಿಸಿತು.
from India & World News in Kannada | VK Polls https://ift.tt/2DBHQ1M
