ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ 13ನೇ ಆವೃತ್ತಿಯ ಹರಾಜಿನಲ್ಲಿ ಎಂಟು ಪ್ರಮುಖ ಆಟಗಾರರನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಖರೀದಿಸಿದೆ. ಇದೀಗ ಅಧಿಕೃತ ಟ್ವಿಟರ್ ಪುಟದಲ್ಲಿ ತಮಗೆ ಬೇಕಾಗಿರುವ ಆಟಗಾರನನ್ನು ಖರೀದಿಸಲು ಹೇಗೆ ಯೋಜನೆ ರೂಪಿಸಿಕೊಂಡಿತ್ತು ಎಂಬುದನ್ನು ಸರಣಿ ವೀಡಿಯೋಗಳ ಮೂಲಕ ಬಹಿರಂಗಪಡಿಸುತ್ತಿದೆ. ಈ ಮಧ್ಯೆ ಶ್ರೀಲಂಕಾದ ಎಡಗೈ ವೇಗಿ ಖರೀದಿಸಲು ಬರೋಬ್ಬರಿ ಒಂಬತ್ತು ಕೋಟಿ ರೂ.ಗಳನ್ನು ಮೀಸಲಿರಿಸಿತ್ತು. ಹಾಗೊಂದು ವೇಳೆ ದಕ್ಷಿಣ ಆಫ್ರಿಕಾ ಆಲ್‌ರೌಂಡರ್ ಕ್ರಿಸ್ ಮೊರಿಸ್ ಖರೀದಿಸಲು ಸಾಧ್ಯವಾಗದಿದ್ದರೆ ಇಸುರು ಉದಾನರನ್ನು ತೆಕ್ಕೆಗೆ ಸೇರಿಸಲು ಯೋಜನೆ ಇರಿಸಿಕೊಂಡಿತ್ತು. ಅಷ್ಟೇ ಯಾಕೆ ಬಹುನಿರೀಕ್ಷಿತ ಹರಾಜಿನಲ್ಲಿ ಇಸುರು ಉದಾನ ಖರೀದಿಗಾಗಿ ಬರೋಬ್ಬರಿ 9 ಕೋಟಿ ರೂ.ಗಳ ವರೆಗೂ ಬಿಡ್ ಸಲ್ಲಿಸಲು ಮುಂದಾಗಿತ್ತು. ಇಲ್ಲಿ ಗಮನಾರ್ಹ ಅಂಶವೆಂದರೆ ಹರಾಜು ಪ್ರಕ್ರಿಯೆಯಲ್ಲಿ ಕೇವಲ 50 ಲಕ್ಷ ರೂ.ಗಳಿಗೆ ಉದಾನರನ್ನು ಆರ್‌ಸಿಬಿ ಖರೀದಿಸಿತ್ತು. ಡೆತ್ ಓವರ್‌ ಸ್ಪೆಷಲಿಸ್ಟ್ ಹಾಗೂ ಸ್ಲೋ ವೆರಿಯೇಷನ್ ಬೌಲಿಂಗ್ ಮೂಲಕ ಇಸುರು ಉದಾನ ಈಗಾಗಲೇ ಹೆಚ್ಚಿನ ಗಮನ ಸೆಳೆದಿದ್ದಾರೆ. ನೂತನ ನಿರ್ದೇಶಕ ಮೈಕ್ ಹೆಸ್ಸನ್ ಹಾಗೂ ಮುಖ್ಯ ಕೋಚ್ ಸೈಮನ್ ಕ್ಯಾಟಿಚ್ ನೇತೃತ್ವದಲ್ಲಿ ಆರ್‌ಸಿಬಿ ಸಂಪೂರ್ಣ ಪೂರ್ಣ ತಯಾರಿಯೊಂದಿಗೆ ಈ ಬಾರಿ ಹರಾಜು ರಂಗಕ್ಕಿಳಿದಿತ್ತು. ಅಲ್ಲದೆ ತಂಡವು ಬಯಸಿದಂತೆ ಆಟಗಾರರ ಮಿಶ್ರಣವನ್ನು ಪಡೆದಿದ್ದೇವೆ ಎಂದು ಹೆಸ್ಸನ್ ಸಂತೃಪ್ತಿಯನ್ನು ವ್ಯಕ್ತಪಡಿಸಿದ್ದಾರೆ. ಐಪಿಎಲ್ ಹರಾಜಿನಲ್ಲಿ ಬರೋಬ್ಬರಿ 10 ಕೋಟಿ ರೂ.ಗಳನ್ನು ತೆತ್ತು ದಕ್ಷಿಣ ಆಫ್ರಿಕಾ ವೇಗಿ ಕ್ರಿಸ್ ಮೊರಿಸ್‌ರನ್ನು ಖರೀದಿಸಿತ್ತು. ಹಾಗೆಯೇ ಆಸ್ಟ್ರೇಲಿಯಾ ನಾಯಕ ಆ್ಯರೋನ್ ಫಿಂಚ್‌ರನ್ನು 4.4 ಕೋಟಿ ರೂ.ಗಳಿಗೆ ಬಗಲಿಗೇರಿಸಿಕೊಂಡಿತ್ತು. ಒಟ್ಟಾರೆಯಾಗಿ 13ನೇ ಆವೃತ್ತಿಗೆ ಕಾಲಿಡುತ್ತಿರುವಂತೆಯೇ ವಿರಾಟ್ ಕೊಹ್ಲಿ ಮುಂದಾಳತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಚೊಚ್ಚಲ ಕಿರೀಟದ ಹುಡುಕಾಟದಲ್ಲಿದೆ. ಅಭಿಮಾನಿಗಳು ಈ ಸಲವಾದರೂ ಕಪ್ ಗೆಲ್ಲಬಹುದು ಎಂಬ ನಿರೀಕ್ಷೆಯಲ್ಲಿದ್ದಾರೆ. ಐಪಿಎಲ್ 13 ಹರಾಜಿನಲ್ಲಿ ಆರ್‌ಸಿಬಿ ಖರೀದಿಸಿದ ಆಟಗಾರರ ಪಟ್ಟಿ ಇಂತಿದೆ: ಕ್ರಿಸ್ ಮೊರಿಸ್: 10 ಕೋಟಿ ರೂ. ಆ್ಯರೋನ್ ಫಿಂಚ್: 4.4 ಕೋಟಿ ರೂ. ಕೇನ್ ರಿಚರ್ಡ್ಸನ್: 4 ಕೋಟಿ ರೂ. ಡೇಲ್ ಸ್ಟೇಯ್ನ್: 2 ಕೋಟಿ ರೂ. ಇಸುರು ಉದಾನ: 50 ಲಕ್ಷ ಶಹಬಾಜ್ ಅಹಮದ್: 20 ಲಕ್ಷ ಜೋಷುವಾ ಫಿಲಿಪ್: 20 ಲಕ್ಷ ಪವನ್ ದೇಶಪಾಂಡೆ: 20 ಲಕ್ಷ ಆರ್‌ಸಿಬಿ 2020 ತಂಡ ಇಂತಿದೆ: ಭಾರತೀಯ ಆಟಗಾರರು: ವಿರಾಟ್ ಕೊಹ್ಲಿ (ನಾಯಕ), ಗುರ್‌ಕೀರಾತ್ ಮನ್, ದೇವದತ್ ಪಡಿಕ್ಕಲ್, ಯುಜ್ವೇಂದ್ರ ಚಹಲ್, ಮೊಹಮ್ಮದ್ ಸಿರಾಜ್, ಉಮೇಶ್ ಯಾದವ್, ನವದೀಪ್ ಸೈನಿ, ಪವನ್ ನೇಗಿ, ಶಿವಂ ದುಬೆ, ವಾಷಿಂಗ್ಟನ್ ಸುಂದರ್, ಪವನ್ ದೇಶಪಾಂಡೆ, ಪಾರ್ಥಿವ್ ಪಟೇಲ್. ವಿದೇಶಿ ಆಟಗಾರರು: ಎಬಿಡಿ ವಿಲಿಯರ್ಸ್, ಮೊಯಿನ್ ಅಲಿ, ಆ್ಯರೋನ್ ಫಿಂಚ್, ಕೇನ್ ರಿಚರ್ಡ್ಸನ್, ಡೇಲ್ ಸ್ಟೇನ್, ಇಸುರು ಉದಾನ, ಕ್ರಿಸ್ ಮೊರಿಸ್, ಜೋಷುವಾ ಫಿಲಿಪ್.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2MvUXX8
