ಹೊಸದಿಲ್ಲಿ: ಕೇಂದ್ರ ಸರಕಾರದ ರಾಷ್ಟ್ರೀಯ ಜನಸಂಖ್ಯಾ ನೋಂದಣಿ (ಎನ್‌ಪಿಆರ್‌) ಮತ್ತು ರಾಷ್ಟ್ರೀಯ ಪೌರತ್ವ ನೋಂದಣಿ (ಎನ್‌ಆರ್‌ಸಿ) ಕ್ರಮಗಳನ್ನು ಕಾಂಗ್ರೆಸ್‌ ನಾಯಕ ತೀವ್ರವಾಗಿ ವಿರೋಧಿಸಿದ್ದಾರೆ. ಇವೆರಡು ಕ್ರಮಗಳು 2016ರ ನವೆಂಬರ್‌ನಲ್ಲಿ ತೆಗೆದುಕೊಂಡ 500/1000 ರೂ. ಮುಖಬೆಲೆಯ ನೋಟುಗಳ ನಿಷೇಧದಿಂದ ಉಂಟಾದ ಹಾನಿಗಿಂತ ಹೆಚ್ಚಿನ ಹಾನಿ ಸಂಭವಿಸುತ್ತದೆ ಎಂದಿದ್ದಾರೆ. ಎಐಸಿಸಿ ಮುಖ್ಯ ಕಚೇರಿಯಲ್ಲಿ 135ನೇ ಸ್ಥಾಪನಾ ದಿನ ಕಾರ್ಯಕ್ರಮದ ನಂತರ ಸುದ್ದಿಗಾರರ ಜತೆ ಮಾತನಾಡಿದ ರಾಹುಲ್‌ ಗಾಂಧಿ, "ರಾಷ್ಟ್ರದ ಎಲ್ಲ ಬಡವರನ್ನು ನೀವು ಭಾರತೀಯರೇ ಅಥವಾ ಅಲ್ಲವೇ ಎಂಬುದನ್ನು ಪ್ರಶ್ನಿಸುವುದೇ ಎನ್‌ಪಿಆರ್‌/ಎನ್‌ಆರ್‌ಸಿ ಮೂಲ ಐಡಿಯಾ" ಎಂದು ವ್ಯಾಖ್ಯಾನಿಸಿದ್ದಾರೆ. ರಾಹುಲ್‌ ಗಾಂಧಿ ಸುಳ್ಳುಗಾರ ಎಂಬ ಬಿಜೆಪಿ ನಾಯಕರ ಹೇಳಿಕೆಗೆ, ''ನಾನು ಟ್ವೀಟ್‌ ಮಾಡಿರುವ ವಿಡಿಯೋದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಭಾರತದಲ್ಲಿ ಬಂಧನ ಕೇಂದ್ರಗಳು ಇಲ್ಲ ಎಂದು ಹೇಳುತ್ತಿರುವ ಭಾಷಣದ ದೃಶ್ಯಗಳಿರುವುದನ್ನು ನೀವು ನೋಡಿರುತ್ತೀರಿ. ಅದರಲ್ಲೇ ರಾಷ್ಟ್ರದಲ್ಲಿ ಅಸ್ತಿತ್ವದಲ್ಲಿರುವ ಬಂಧನ ಕೇಂದ್ರಗಳ ದೃಶ್ಯವೂ ಇದೆ. ಯಾರು ಸುಳ್ಳು ಹೇಳುತ್ತಿದ್ದಾರೆ ಎಂಬುದನ್ನು ನೀವೇ ನಿರ್ಧರಿಸಿ'' ಎಂದು ಸುದ್ದಿಗಾರರಿಗೆ ಪ್ರತಿಕ್ರಿಯಿಸಿದರು. ಆರ್‌ಎಸ್‌ಎಸ್‌ ಪ್ರಧಾನಿ ಭಾರತ ಮಾತೆಗೆ ಸುಳ್ಳು ಹೇಳುತ್ತಿದ್ದಾರೆ ಎಂದು ಟ್ವೀಟ್‌ ಮಾಡಿರುವ ರಾಹುಲ್‌ ಗಾಂಧಿ, ಮುಸ್ಲಿಮರನ್ನು ಬಂಧನ ಕೇಂದ್ರಕ್ಕೆ ಕಳುಹಿಸಲಾಗುತ್ತದೆ ಎಂಬ ಸುಳ್ಳುಗಳನ್ನು ನಗರ ನಕ್ಸಲರು ಹಬ್ಬಿಸುತ್ತಿದ್ದಾರೆ ಎಂದು ನರೇಂದ್ರ ಮೋದಿ ಹೇಳುತ್ತಿರುವ ದೃಶ್ಯವನ್ನು ಅಪ್‌ಲೋಡ್‌ ಮಾಡಿದ್ದಾರೆ. ಜೊತೆಗೆ ಜೂಟ್ ಜೂಟ್ ಜೂಟ್ ಎಂಬ ಹ್ಯಾಶ್‌ ಟ್ಯಾಗ್‌ ಹಾಕಿದ್ದಾರೆ. ಶುಕ್ರವಾರ ಛತ್ತೀಸಗಢದಲ್ಲಿ ಮಾತನಾಡಿದ ರಾಹುಲ್‌ ಗಾಂಧಿ ನವೆಂಬರ್‌ 2016ರಲ್ಲಿ ನೋಟು ನಿಷೇಧ ಸಂಭವಿಸಿದಾಗ ಬಡವರು ಹೇಗೆ ತೊಂದರೆ ಅನುಭವಿಸಿದರೋ ಹಾಗೆಯೇ ಎನ್‌ಪಿಆರ್‌ ಮತ್ತು ಎನ್‌ಸಿಆರ್‌ನಿಂದ ಅನುಭವಿಸುತ್ತಾರೆ ಎಂದರು. ಎನ್‌ಪಿಆರ್‌ ಇರಲಿ ಅಥವಾ ಎನ್‌ಆರ್‌ಸಿ ಇರಲಿ, ಇವೆರಡು ರಾಷ್ಟ್ರದ ಬಡವರ ಮೇಲಿನ ತೆರಿಗೆ. ನೀವು ನೋಟು ನಿಷೇಧವನ್ನು ಅರ್ಥೈಸಿಕೊಳ್ಳಬೇಕು. ಅದೂ ಬಡ ಜನರ ಮೇಲಿನ ತೆರಿಗೆ. ಬ್ಯಾಂಕ್‌ಗಳಿಗೆ ಹೋಗಿ ನಿಮ್ಮ ದುಡ್ಡನ್ನು ಕಟ್ಟಿ ಆದರೆ ನಿಮ್ಮ ಖಾತೆಯಿಂದ ದುಡ್ಡನ್ನು ವಾಪಾಸು ತೆಗೆದುಕೊಳ್ಳಬೇಡಿ. ನೀವು ಬ್ಯಾಂಕ್‌ಗೆ ಹಾಕಿದ ಎಲ್ಲ ದುಡ್ಡು 15-20 ಶ್ರೀಮಂತ ವ್ಯಕ್ತಿಗಳ ಜೇಬಿಗೆ ಸೇರುತ್ತದೆ. ಇದೇ ಎನ್‌ಪಿಆರ್‌ ಅಥವಾ ಎನ್‌ಆರ್‌ಸಿ ಎಂದು ರಾಹುಲ್‌ ಗಾಂಧಿ ಹೇಳಿದ್ದಾರೆ.
from India & World News in Kannada | VK Polls https://ift.tt/2MABC77
