ಮುಂಬಯಿ: ಖ್ಯಾತಿಯ ಬಲಗೈ ಆರಂಭಿಕ ಬ್ಯಾಟ್ಸ್‌ಮನ್ ಕಳೆದೊಂದು ದಶಕದಲ್ಲಿ ಅತಿ ಹೆಚ್ಚಿನ ಯಶಸ್ಸನ್ನು ಕಂಡಿದ್ದಾರೆ. 2013ರಲ್ಲಿ ಅಂದಿನ ನಾಯಕ ಮಹೇಂದ್ರ ಸಿಂಗ್ ಧೋನಿ, ರೋಹಿತ್‌ರನ್ನು ಆರಂಭಿಕನಾಗಿ ಕಣಕ್ಕಿಳಿಸಲು ನಿರ್ಧರಿಸಿದ್ದರು. ಇದುವೇ ರೋಹಿತ್ ವೃತ್ತಿ ಜೀವನದಲ್ಲಿ ಹೊಸ ತಿರುವನ್ನು ನೀಡಿತ್ತು. ಅಲ್ಲಿಂದ ಬಳಿಕ ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ರೋಹಿತ್ ಶರ್ಮಾ ಅನೇಕ ದಾಖಲೆಗಳನ್ನು ಬರೆದಿದ್ದಾರೆ. ವರ್ಷಾಂತ್ಯದಲ್ಲಿ ಟೆಸ್ಟ್ ಆರಂಭಿಕನಾಗಿಯೂ ತಮ್ಮ ಛಾಪನ್ನು ಮೂಡಿಸಿದ್ದಾರೆ. 32ರ ಹರೆಯದ ರೋಹಿತ್ ಶರ್ಮಾ 2019ನೇ ಸಾಲಿನಲ್ಲಿ ಟೆಸ್ಟ್ ದ್ವಿಶತಕವೂ ಸೇರಿದಂತೆ ಒಟ್ಟು 10 ಶತಕಗಳನ್ನು ಬಾರಿಸಿದ್ದಾರೆ. ಇದರಲ್ಲಿ ಏಕದಿನ ವಿಶ್ವಕಪ್‌ನಲ್ಲಿ ದಾಖಲೆಯ ಐದು ಶತಕಗಳು ಸೇರಿವೆ. ಬಹಳ ಸಲೀಸಾಗಿ ರೋಹಿತ್ ಶರ್ಮಾ ಚೆಂಡನ್ನು ಬೌಂಡರಿ ಗೆರೆ ದಾಟಿಸುತ್ತಾರೆ. ಈ ಬಗ್ಗೆ ಕೇಳಿದಾಗ, ಗಾಳಿಯಲ್ಲಿ ದೊಡ್ಡ ಹೊಡೆತ ಹೊಡೆಯುವುದು ತಪ್ಪಲ್ಲ. ಓರ್ವ ಕ್ರಿಕೆಟಿಗನಾಗಿ ಬೆಳೆಯುವಾಗ ಅಭ್ಯಾಸದ ವೇಳೆಯಲ್ಲಿ ಬ್ಯಾಟ್ ಬೀಸಿದರೆ ನೆಟ್ಸ್‌ನಿಂದ ಹೊರಹಾಕುತ್ತೇವೆ. ಇದು ಉತ್ತಮವಾದ ಪ್ರವೃತ್ತಿಯಲ್ಲ ಎಂದರು. "ದೊಡ್ಡ ಹೊಡೆತದ ಮೂಲಕ ಉತ್ತಮ ಫಲಿತಾಂಶ ನೀಡಲು ಸಾಧ್ಯವಾದರೆ ಅದರಿಂದ ಯಾವುದೇ ತಪ್ಪಿಲ್ಲ. ಈ ಪೀಳಿಗೆಯ ಯುವ ಆಟಗಾರರು ದೊಡ್ಡ ಹೊಡೆತ ಆಡಲು ಇಷ್ಟಪಡುತ್ತಾರೆ. ಆದರೆ ಇಲ್ಲಿ ತಮ್ಮ ಆಟವನ್ನು ಸರಿಯಾಗಿ ಗ್ರಹಿಸುವುದು ಅತಿ ಮುಖ್ಯ" ಎಂದು ರೋಹಿತ್ ಸೇರಿಸಿದರು. "ಯಾವುದೇ ಓರ್ವ ಆಟಗಾರ ಪದೇ ಪದೇ ಅದೇ ತಪ್ಪನ್ನು ಮಾಡಿದರೆ ಅವರ ಬಳಿ ಹೋಗಿ ಸಲಹೆಗಳನ್ನು ನೀಡಬೇಕು. ಗಾಳಿಯಲ್ಲಿ ಹೊಡೆಯುವುದು ಅಪರಾಧವಲ್ಲ" ಎಂದು ತಿಳಿಸಿದರು. ಏತನ್ಮಧ್ಯೆ ಯುವ ಕ್ರಿಕೆಟಿಗನನ್ನು ಬೆಂಬಲಿಸುವುದು ಅತಿ ಮುಖ್ಯ ಎಂದರು. "ಯಾವುದೇ ಯುವ ಆಟಗಾರ ಗಾಳಿಯಲ್ಲಿ ಹೊಡೆಯಲು ಬಯಸಿದರೆ ನಾನವರನ್ನು ಬೆಂಬಲಿಸಲಿದ್ದೇನೆ. ಅದೇ ಹೊತ್ತಿಗೆ ಫಲಿತಾಂಶ ಹೊರಹೊಮ್ಮೆಬೇಕು ಎಂಬುದನ್ನು ಖಾತ್ರಿಪಡಿಸಬೇಕು. ನಾನು ಹೇಳಿದರ ಅರ್ಥವೆಂದರೆ ಆಟಗಾರನೊಬ್ಬ ತಮ್ಮ ಕೌಶಲ್ಯದ ಮೇಲೆ ವಿಶ್ವಾಸವನ್ನಿರಿಸಿದರೆ ನಾನು ಅದನ್ನು ಬೆಂಬಲಿಸಲಿದ್ದೇನೆ. ಆಟಗಾರನೊಬ್ಬ ಹೇಗೆ ಬ್ಯಾಟಿಂಗ್ ಮಾಡಬೇಕು ಎಂಬುದರ ಬಗ್ಗೆ ಯಾವುದೇ ಅಡೆತಡೆಗಳಿರಬಾರದು. ಸ್ವತಂತ್ರವಾಗಿ ಆಡಲು ಬಿಡಬೇಕು. ಈ ಮೂಲಕ ಫಲಿತಾಂಶ ಹೊರಹೊಮ್ಮಬಹುದಾಗಿದೆ" ಎಂದರು. ಈ ನಡುವೆ ಭಾರತದ ಕಿರಿಯರ ತಂಡ ಅಂಡರ್ 19 ವಿಶ್ವಕಪ್ ಗೆಲ್ಲುವ ನೆಚ್ಚಿನ ತಂಡವೆನಿಸಿದೆ ಎಂದು ರೋಹಿತ್ ಶರ್ಮಾ ಹೇಳಿದರು. "ಎಂದಿನಂತೆ ನಮ್ಮ ತಂಡ ಪ್ರಬಲವಾಗಿದೆ. ಈ ಬಾರಿ ಕಪ್ ಗೆಲ್ಲಲಿದೆ ಎಂದು ಹೇಳಲ್ಲ. ಆದರೆ ಕಠಿಣ ಕ್ರಿಕೆಟ್ ಅಂತೂ ಆಡಲಿದೆ ಎಂಬುದು ತಿಳಿದಿದೆ. ನಮ್ಮ ಯುವ ಪಡೆ ಶ್ರೇಷ್ಠ ತರಬೇತುದಾರರನ್ನು ಪಡೆದಿದೆ. ನಿಸ್ಸಂಶಯವಾಗಿಯೂ ಇದೊಂದು ದೊಡ್ಡ ವೇದಿಕೆ. ಭಾರತ ವಿಶ್ವಕಪ್ ಗೆಲ್ಲಲಿ" ಎಂದು ಆಶಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Q1XpXD
