ಹೊಸದಿಲ್ಲಿ: ಆರ್ಥಿಕ ಮುಗ್ಗಟ್ಟನ್ನು ಎದುರಿಸುತ್ತಿದ್ದು, ಸದ್ಯದಲ್ಲೇ ಮಾಡಲು ಸಿದ್ದತೆ ನಡೆಸಿದೆ. ಈ ಸಂಬಂಧ ಗುರುವಾರ ಹೇಳಿಕೆ ನೀಡಿರುವ ರೈಲ್ವೇ ಮಂಡಳಿ ಅಧ್ಯಕ್ಷ ವಿಕೆ ಯಾದವ್‌, ರೈಲ್ವೆ ತನ್ನ ಪ್ರಯಾಣಿಕರು ಮತ್ತು ಶುಲ್ಕವನ್ನು "ತರ್ಕಬದ್ಧಗೊಳಿಸುವ" ಪ್ರಕ್ರಿಯೆಯಲ್ಲಿದೆ ಎಂದು ಹೇಳಿದ್ದಾರೆ. ಸರಕು ಸಾಗಣೆ ದರ ಈಗಾಗಲೇ ಹೆಚ್ಚಾಗಿದೆ ಎಂದು ಅವರು ತಿಳಿಸಿದ್ದಾರೆ. “ನಾವು ಪ್ರಯಾಣ ದರಗಳು ಮತ್ತು ಸರಕು ದರಗಳನ್ನು ತರ್ಕಬದ್ಧಗೊಳಿಸಲಿದ್ದೇವೆ. ಈ ಬಗ್ಗೆ ಚರ್ಚೆ ನಡೆಸಲಾಗುತ್ತಿದೆ. ಈ ಬಗೆಗಿನ ಮಾಹಿತಿಯನ್ನು ನಾನು ಹೆಚ್ಚು ಬಹಿರಂಗಪಡಿಸಲು ಸಾಧ್ಯವಿಲ್ಲ. ಇದು ಸೂಕ್ಷ್ಮ ವಿಷಯ. ಸರಕು ಸಾಗಣೆ ದರಗಳು ಈಗಾಗಲೇ ಹೆಚ್ಚಾಗಿದ್ದರೂ, ಈ ನಿಟ್ಟಿನಲ್ಲಿ ರಸ್ತೆಯಿಂದ ರೈಲ್ವೆಗೆ ಹೆಚ್ಚಿನ ದಟ್ಟಣೆಯನ್ನು ಸೆಳೆಯುವುದು ನಮ್ಮ ಗುರಿಯಾಗಿದೆ, ”ಎಂದು ಅವರು ಹೇಳಿದ್ದಾರೆ. ಸಾಗಣೆಗಾಗಿ ಹೆಚ್ಚಿನ ಸರಕುಗಳನ್ನು ಪಡೆಯುವುದು ಆರ್ಥಿಕ ಬಿಕ್ಕಟ್ಟಿನಿಂದ ಹೊರಬರಲು ರೈಲ್ವೆಗೆ ಇರುವ ಮಾರ್ಗವಾಗಿತ್ತು ಎಂಬುದನ್ನು ಅಧಿಕಾರಿಗಳು ಒಪ್ಪಿಕೊಂಡಿದ್ದಾರೆ. ಆದರೆ ಹೆಚ್ಚಿನ ಸರಕು ಸೇವೆಗಳು ಸಿಗದೇ ಇರುವುದರಿಂದ ಪ್ರಯಾಣ ದರವನ್ನು ಏರಿಕೆ ಮಾಡುವುದೊಂದೇ ರೈಲ್ವೆ ಮುಂದಿರುವ ಮಾರ್ಗ ಎಂಬುದಾಗಿ ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.
ಆದರೆ ಗುರುವಾರ ರಾತ್ರಿ ಪ್ರತಿಕ್ರಿಯೆ ನೀಡಿರುವ ರೈಲ್ವೇ ವಕ್ತಾರರು, ರೈಲ್ವೇ ಪ್ರಯಾಣ ದರ ಏರಿಕೆ ಮಾಡುವ ಯಾವುದೇ ಪ್ರಸ್ತಾವನೆಗಳಿಲ್ಲ. ಪ್ರಯಾಣ ದರವನ್ನು ತರ್ಕಬದ್ಧಗೊಳಿಸುವುದಷ್ಟೇ ಉದ್ದೇಶ, ಇದರಿಂದ ದರ ಇಳಿಕೆಯೂ ಆಗಬಹುದು,” ಎಂದಿದ್ದಾರೆ. ಈ ಹಿಂದೆ ಅಕ್ಟೋಬರ್‌ 23ರಂದು ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಪ್ರಧಾನ ಮಂತ್ರಿ ಕಚೇರಿ ಪ್ರಯಾಣ ದರಗಳನ್ನು ಹಂತ ಹಂತವಾಗಿ ಏರಿಕೆ ಮಾಡಲು ಇರುವ ಆಯ್ಕೆಗಳ ಬಗ್ಗೆ ಗಮನ ಹರಿಸುವಂತೆ ಸೂಚನೆ ನೀಡಿತ್ತು. ಯಾದವ್‌ ಪ್ರಕಾರ ಸದ್ಯ ರೈಲ್ವೆ ಇಲಾಖೆಯ ವಾರ್ಷಿಕ ಖರ್ಚು 2.18 ಲಕ್ಷ ಕೋಟಿ ರೂಪಾಯಿ ಇದ್ದರೆ, ಆದಾಯ 2 ಲಕ್ಷ ಕೋಟಿ ರೂಪಾಯಿ ಮಾತ್ರ ಇದೆ. ಆದಾಯದಲ್ಲಿ 50 ಸಾವಿರ ಕೋಟಿ ರೂಪಾಯಿ ಕೇವಲ ಪಿಂಚಣಿಗೆ ಹೋಗುತ್ತಿದೆ. ಒಂದೊಮ್ಮೆ ಹಣಕಾಸು ಇಲಾಖೆ ಇದರ ಜವಾಬ್ದಾರಿ ವಹಿಸಿಕೊಂಡರೆ ನಮಗೆ ಹೆಚ್ಚಿನ ಅನುಕೂಲವಾಗಲಿದೆ ಎಂದಿದ್ದಾರೆ. ಆದರೆ ಸದ್ಯಕ್ಕೆ ಹಣಕಾಸು ಇಲಾಖೆ ಈ ಹೊರೆಯನ್ನು ಹೊರಲೂ ಸಿದ್ದವಿಲ್ಲ.
ಇದೇ ವೇಳೆ ಅವರು ರೈಲ್ವೆಯ ಮಿತಿಗಳ ಬಗ್ಗೆಯೂ ಗಮನ ಸೆಳೆದಿದ್ದಾರೆ. ರೈಲ್ವೆಯ ಶೇ. 96 ಪ್ರಯಾಣವನ್ನು ಒಳಗೊಂಡ 34,000 ಕಿಲೋ ಮೀಟರ್‌ ಮಾರ್ಗ ಅರ್ಧಕರ್ಧ ಏಕಮುಖ ಸಂಚಾರದ ದಾರಿಯಾಗಿದೆ. ಇವುಗಳನ್ನು ಡಬಲ್‌ ಲೈನ್‌ ಮಾಡುವುದು ಸದ್ಯದ ತುರ್ತು ಅಗತ್ಯವಾಗಿದೆ. “ಸರಕು ಸಾಗಣೆ ಹೆಚ್ಚಳದ ದೃಷ್ಟಿಯಿಂದ ಅಗತ್ಯವಾಗುರಯವ 58 ಯೋಜನೆಗಳನ್ನು ನಾವು ಗುರುತಿಸಿದ್ದೇವೆ. ಆದರೆ ಇದನ್ನು ಪೂರ್ಣಗೊಳಿಸಲು 8,000 ಕೋಟಿ ರೂ. ಅಗತ್ಯವಿದೆ. ಇದಕ್ಕಾಗಿ ರೈಲ್ವೇ ಸೇವೆಗಳನ್ನು ಮರು ಪರಿಷ್ಕರಿಸಬೇಕಾಗಿದೆ,” ಎಂದು ಅವರು ತಿಳಿಸಿದ್ದಾರೆ. ಸರಕು ಸಾಗಣೆ ಹೆಚ್ಚಿಸಲು, ಖಾಸಗಿಯವರು ಹೆಚ್ಚಿನ ರೈಲ್ವೆ ಗಾಡಿಯನ್ನು ಓಡಿಸುವಂತಾಗಲು ಮತ್ತು ರೈಲ್ವೆ ನಿಲ್ದಾಣಗಳ ಮೇಲೆ ಹಣ ಹೂಡಿಕೆ ಪಡೆಯಲು ಇಲಾಖೆ ಹೆಚ್ಚಿನ ಗಮನ ಹರಿಸುತ್ತಿದ್ದು ಇದಕ್ಕಾಗಿ ಒಬ್ಬರು ಸದಸ್ಯರನ್ನು ಮೀಸಲಿಟ್ಟಿದೆ. ನವೆಂಬರ್‌ ಅಂತ್ಯಕ್ಕೆ ಸರಕು ಸಾಗಣೆಯಿಂದ ಇಲಾಖೆ ಗಳಿಸಬೇಕಾದ ಆದಾಯದಲ್ಲಿ ಸುಮಾರು 14,600 ಕೋಟಿ ರೂಪಾಯಿಯಷ್ಟು ಕೊರತೆ ಉಂಟಾಗಿದ್ದು, ಸದ್ಯಕ್ಕೆ ರೈಲ್ವೆಗೆ ಚಿಂತೆಯ ವಿಷಯವಾಗಿದೆ.
from India & World News in Kannada | VK Polls https://ift.tt/2PZBuAa
