ಮೆಲ್ಬೋರ್ನ್: ಮತ್ತು ನ್ಯೂಜಿಲೆಂಡ್ ತಂಡಗಳು ಬರೋಬ್ಬರಿ 32 ವರ್ಷಗಳ ಬಳಿಕ ಇತಿಹಾಸ ಪ್ರಸಿದ್ಧ ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್‌(ಎಂಸಿಜಿ)ನಲ್ಲಿ ಬಾಕ್ಸಿಂಗ್‌ ಡೇ ಟೆಸ್ಟ್‌ ಪಂದ್ಯವನ್ನು ಆಡುತ್ತಿದ್ದು, ಈ ವಿಶೇಷ ಸಂದರ್ಭದಲ್ಲಿ ಆಸೀಸ್‌ನ ಬ್ಯಾಟ್ಸ್‌ಮನ್‌ ಮೈಕಲ್‌ ಜಾಕ್ಸನ್‌ ಅವರ ಸಿಗ್ನೇಚರ್‌ ಸ್ಟೆಪ್‌ ಹಾಕಿ ಸಂಭ್ರಮಿಸಿದ್ದಾರೆ. ಗುರುವಾರ ಆರಂಭಗೊಂಡ ಟೆಸ್ಟ್‌ ಸರಣಿಯ 2ನೇ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಆಸ್ಟ್ರೇಲಿಯಾ ತಂಡ, ಮೊದಲ ದಿನದ ಅಂತ್ಯಕ್ಕೆ 90 ಓವರ್‌ಗಳಲ್ಲಿ 4 ವಿಕೆಟ್‌ಗೆ 257 ರನ್‌ಗಳನ್ನು ಗಳಿಸಿ ಉತ್ತಮ ಸ್ಥಿತಿಯಲ್ಲಿದೆ. ಕಿವೀಸ್‌ ಬೌಲರ್‌ಗಳು ಆರಂಭಿಕ ಆಘಾತ ನೀಡಿದರೂ ಸ್ಟೀವ್ ಸ್ಮಿತ್ (77*) ಅವರ ಅಜೇಯ ಅರ್ಧಶತಕದೊಂದಿಗೆ ಚೇತರಿಸಿತು. ಈ ಮಧ್ಯೆ ತಂಡದ ಯುವ ಬ್ಯಾಟ್ಸ್‌ಮನ್‌ ಮಾರ್ನಸ್‌ ಲಾಬುಶೇನ್‌ 63 ರನ್‌ ಗಳಿಸಿದ್ದಾಗ ವೇಗಿ ಕಾಲಿನ್‌ ಡಿ'ಗ್ರ್ಯಾಂಡ್‌ಹೋಮ್‌ ಅವರ ಬೌಲಿಂಗ್‌ನಲ್ಲಿ ಇನ್‌ಸೈಡ್ ಎಡ್ಜ್‌ ಮೂಲಕ ಬೌಲ್ಡ್‌ ಔಟ್‌ ಆದರು. ಬಳಿಕ ಕ್ರೀಸ್‌ಗೆ ಬಂದ ಹೆಚ್ಚುವರಿ ವಿಕೆಟ್‌ಕೀಪರ್‌ ಬ್ಯಾಟ್ಸ್‌ಮನ್‌ ವೇಡ್‌ ಅವರನ್ನು ಕವೀಸ್‌ ಬೌಲರ್‌ಗಳು ಅದ್ಭುತ ಯಾರ್ಕರ್‌ನೊಂದಿಗೆ ಬರಮಾಡಿಕೊಂಡರು. ಆರಂಭದಲ್ಲೇ ಯಾರ್ಕರ್‌ ಎಸೆತವನ್ನು ಎದುರಿಸುವಲ್ಲಿ ಕಕ್ಕಾಬಿಕ್ಕಿಯಾದ ಎಡಗೈ ಬ್ಯಾಟ್ಸ್‌ಮನ್‌ ವಿಚಿತ್ರ ರೀತಿಯಲ್ಲಿ ಚೆಂಡನ್ನು ಡಿಫೆಂಡ್ ಮಾಡಿದರು. ಇದು ಒಂದು ನೋಟದಲ್ಲಿ ಅವರ ನೃತ್ಯದಂತಿತ್ತು. ಈ ಚಿತ್ರವನ್ನು ಆಸ್ಟ್ರೇಲಿಯಾ ಕ್ರಿಕೆಟ್ ಸಂಸ್ಥೆ ತನ್ನ ಅಧಿಕೃತ ಕ್ರಿಕೆಟ್ ವೆಬ್‌ಸೈಟ್‌ ಆಸ್ಟ್ರೇಲಿಯಾ ಡಾಟ್‌ಕಾಮ್‌ ಮೂಲಕ ಟ್ವೀಟ್‌ ಮಾಡಿದೆ. ವೇಡ್‌ ಮತ್ತು ಜಾಕ್ಸನ್‌ ಇಬ್ಬರ ಸ್ಟೆಪ್‌ ಪ್ರರ್ದಿಸುವ ಫೋಟೊ ಪ್ರಕಟಿಸಿ 'ವೇಡ್‌ ಎಲ್ಲವೂ ಸರಿಯಿದೆ ತಾನೆ?' ಎಂದು ಕಾಲೆಳೆದಿದೆ. ಏತನ್ಮಧ್ಯೆ, ಸ್ಟೀವ್ ಸ್ಮಿತ್ ಮೆಲ್ಬೋರ್ನ್ ಕ್ರಿಕೆಟ್ ಮೈದಾನದಲ್ಲಿನ ತಮ್ಮ ಯಶಸ್ಸನ್ನು ಮುಂದುವರೆಸಿದ್ದಾರೆ. ಅಜೇಯ ಅರ್ಧಶತಕದ ಮೂಲಕ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದರಲ್ಲದೆ ಮತ್ತೊಂದು ಶತಕದ ಕಡೆಗೆ ಮುನ್ನುಗ್ಗಿದ್ದಾರೆ. ಬೇಸಿಗೆ ದಿನದಲ್ಲೂ ಮೆಲ್ಬೋರ್ನ್ ಸ್ಟೇಡಿಯಂನಲ್ಲಿ ಸೇರಿದ್ದ 80,000 ಪ್ರೇಕ್ಷಕರ ಎದುರು ಅರ್ಧಶತಕ ಬಾರಿಸಿ ಆಸೀಸ್‌ ಪರ ಯಶಸ್ವಿ ಬ್ಯಾಟ್ಸ್‌ಮನ್‌ ಎನಿಸಿಕೊಂಡರು. ಸ್ಮಿತ್, ಎಂಸಿಜಿಯಲ್ಲಿ ಕಳೆದ 7 ಪಂದ್ಯಗಳಿಂದ 148.83ರ ಬ್ಯಾಟಿಂಗ್‌ ಸರಾಸರಿ ಹೊಂದಿದ್ದಾರೆ. ಸಂಕ್ಷಿಪ್ತ ಸ್ಕೋರ್‌ ಆಸ್ಟ್ರೇಲಿಯಾ: ಮೊದಲ ಇನಿಂಗ್ಸ್‌ 90 ಓವರ್‌ಗಳಲ್ಲಿ 4 ವಿಕೆಟ್‌ಗೆ 257 (ಜೋ ಬರ್ನ್ಸ್‌ 0, ಡೇವಿಡ್‌ ವಾರ್ನರ್‌ 41, ಮಾರ್ನಸ್‌ ಲಾಬುಶೇನ್‌ 63, ಸ್ಟೀವ್ ಸ್ಮಿತ್ 77*, ಮ್ಯಾಥ್ಯೂ ವೇಡ್‌ 38, ಟ್ರಾವಿಸ್‌ ಹೆಡ್‌ 25*; ಕಾಲಿನ್‌ ಡಿ'ಗ್ರ್ಯಾಂಡ್‌ ಹೋಮ್‌ 48ಕ್ಕೆ 2, ನೇಯ್ಲ್‌ ವ್ಯಾಗ್ನರ್‌ 40ಕ್ಕೆ 1, ಟ್ರೆಂಟ್‌ ಬೌಲ್ಟ್‌ 60ಕ್ಕೆ 1). ಕೊನೆಗೂ ಗ್ರ್ಯಾಂಡ್‌ಹೋಮ್‌ ಬೌಲಿಂಗ್‌ನಲ್ಲಿ ಮ್ಯಾಥ್ಯೂ ವೇಡ್‌ ಔಟ್‌ ಆಗಿದ್ದು ಹೀಗೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2MuDcYt
