ರಾಂಚಿ: ವಿಧಾನಸಭೆ ಚುನಾವಣೆಯಲ್ಲಿ ಮತ್ತು ಎಜೆಎಸ್ಯು ಮೈತ್ರಿ ಮುಂದುವರಿದಿದ್ದರೆ ಅಧಿಕಾರ ಉಳಿಸಿಕೊಳ್ಳುವ ಸಾಧ್ಯತೆ ಇತ್ತು ಎಂದು ರಾಜಕೀಯ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ದೀರ್ಘಕಾಲದ ಮೈತ್ರಿ ಹೊಂದಿದ್ದ ಈ ಪಕ್ಷಗಳು ಜತೆಯಾಗಿ ಸ್ಪರ್ಧಿಸಿದ್ದರೆ ಜೆಎಂಎಂ-ಕಾಂಗ್ರೆಸ್-ಆರ್ಜೆಡಿ ಬಲವನ್ನು 47ರ ಬದಲಾಗಿ 34ಕ್ಕೆ ನಿಯಂತ್ರಿಸಲು ಸಾಧ್ಯವಿತ್ತು. ಬಿಜೆಪಿ-ಎಜೆಎಸ್ಯು 40 ಸ್ಥಾನಗಳಲ್ಲಿ ಗೆಲುವು ಸಾಧಿಸುವ ಸಾಧ್ಯತೆ ಇತ್ತು. ಜೆಎಂಎಂನ 9 ಮತ್ತು ಕಾಂಗ್ರೆಸ್ನ 4 ಸ್ಥಾನಗಳನ್ನು ಬಿಜೆಪಿ-ಎಜೆಎಸ್ಯು ಕಸಿಯುವ ಸಂಭವವಿತ್ತು ಎಂದು ಚುನಾವಣಾ ಅಂಕಿ-ಅಂಶಗಳನ್ನು ಆಧರಿಸಿ ವಿಶ್ಲೇಷಣೆ ನಡೆಸಲಾಗಿದೆ. ಬಿಜೆಪಿ-ಎಜೆಎಸ್ಯು ಪ್ರತ್ಯೇಕವಾಗಿ ಸ್ಪರ್ಧಿಸಿದ್ದರೂ ಅವುಗಳ ಒಟ್ಟಾರೆ ಮತ ಗಳಿಕೆ ಪ್ರಮಾಣ ಶೇ.41.5ರಷ್ಟಿದೆ. ಜೆಎಂಎಂ, ಕಾಂಗ್ರೆಸ್, ಆರ್ಜೆಡಿ ಮೈತ್ರಿಕೂಟದ ಮತ ಗಳಿಕೆ ಪ್ರಮಾಣ ಶೇ.35.4ರಷ್ಟಿದೆ. ಇದನ್ನು ಗಣನೆಗೆ ತೆಗೆದುಕೊಂಡರೂ ಬಿಜೆಪಿ-ಎಜೆಎಸ್ಯು ಮುನ್ನಡೆ ಗಳಿಸುವ ಸಾಧ್ಯತೆ ಇತ್ತು. ಬಿಜೆಪಿ-ಎಜೆಎಸ್ಯು ಜತೆಯಾಗಿ ಸ್ಪರ್ಧೆ ಮಾಡಿದ್ದರೆ ಅದರ ಪರಿಣಾಮ ಜೆಎಂಎಂ, ಕಾಂಗ್ರೆಸ್ ಮೇಲೆ ಆಗುತ್ತಿತ್ತೇ ಹೊರತು ಬಾಬುಲಾಲ್ ಮರಾಂಡಿ ಅವರ ಜಾರ್ಖಂಡ್ ವಿಕಾಸ್ ಮೋರ್ಚಾ (ಪ್ರಜಾತಾಂತ್ರಿಕ) ಸೇರಿ ಇತರ ಯಾವುದೇ ಪಕ್ಷಗಳ ಮೇಲೆ ಆಗುತ್ತಿರಲಿಲ್ಲ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಪ್ರತ್ಯೇಕವಾಗಿ ಸ್ಪರ್ಧಿಸಿದ್ದ ಬಿಜೆಪಿ 25 (2014ರಲ್ಲಿ37) ಹಾಗೂ ಎಜೆಎಸ್ಯು 2 (2014ರಲ್ಲಿ5) ಸ್ಥಾನಗಳಲ್ಲಿ ಗೆಲುವು ಸಾಧಿಸಿವೆ. ಎರಡನೇ ವ್ಯಕ್ತಿ ರಾಯ್: ಜೆಮ್ಷೆಡ್ಪುರ ಪೂರ್ವ ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿ ರಘುಬರ ದಾಸ್ ಅವರನ್ನು ಸೋಲಿಸಿದ ಸರಯೂ ರಾಯ್ ಅವರು ಹಾಲಿ ಮುಖ್ಯಮಂತ್ರಿಯನ್ನು ಪರಾಭವಗೊಳಿಸಿದ ಜಾರ್ಖಂಡ್ನ ಎರಡನೇ ನಾಯಕ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. 2009ರಲ್ಲಿ ನಡೆದ ಉಪ ಚುನಾವಣೆಯಲ್ಲಿ ಅಂದಿನ ಮುಖ್ಯಮಂತ್ರಿಯಾಗಿದ್ದ ಶಿಬು ಸೊರೇನ್ ಅವರನ್ನು ತಾಮರ್ ಕ್ಷೇತ್ರದಲ್ಲಿ ಜಾರ್ಖಂಡ್ ಪಾರ್ಟಿಯ ಗೋಪಾಲಕೃಷ್ಣ ಪಾತಾರ್ ಅವರು 9,000 ಮತಗಳ ಅಂತರದಿಂದ ಸೋಲಿಸಿದ್ದರು. ಆದರೆ ರಾಯ್ ವಿಶೇಷ ಎಂದರೆ ಅವರು ರಘುಬರ ದಾಸ್ ಸಂಪುಟದಲ್ಲಿಯೇ ಸಚಿವರಾಗಿದ್ದರು. ತಾವು ಎರಡು ಅವಧಿಗೆ ಪ್ರತಿನಿಧಿಸಿದ್ದ ಜೆಮ್ಷೆಡ್ಪುರ ಪಶ್ಚಿಮ ಕ್ಷೇತ್ರದ ಟಿಕೆಟ್ ನಿರಾಕರಿಸಿದ್ದರಿಂದ ಮುಖ್ಯಮಂತ್ರಿ ವಿರುದ್ಧವೇ ಸ್ಪರ್ಧಿಸಿ 12,000 ಮತಗಳ ಅಂತರದಿಂದ ಗೆದ್ದರು. ಹೇಮಂತ್ಗೆ ಆಹ್ವಾನ: ರಾಜ್ಯಪಾಲರಾದ ದ್ರೌಪದಿ ಮುರ್ಮು ಅವರು ಜಾರ್ಖಂಡ್ ಮುಕ್ತಿ ಮೋರ್ಚಾ ಶಾಸಕಾಂಗ ಪಕ್ಷದ ನಾಯಕ ಹೇಮಂತ್ ಸೊರೇನ್ ಅವರಿಗೆ ಸರಕಾರ ರಚಿಸಲು ಆಹ್ವಾನ ನೀಡಿದ್ದಾರೆ. ಹೇಮಂತ್ ಅವರು ಮಂಗಳವಾರ ರಾತ್ರಿ ರಾಜ್ಯಪಾಲರನ್ನು ಭೇಟಿ ಮಾಡಿ 50 ಶಾಸಕರ ಬೆಂಬಲ ಪತ್ರ ನೀಡಿ ಸರಕಾರ ರಚನೆ ಹಕ್ಕು ಮಂಡಿಸಿದ್ದರು. 81 ಸದಸ್ಯ ಬಲದ ವಿಧಾನಸಭೆಯಲ್ಲಿ ಜೆಎಂಎಂನ 30, ಕಾಂಗ್ರೆಸ್ನ 16, ಆರ್ಜೆಡಿಯ 1 ಹಾಗೂ ಜೆವಿಎಂ (ಪಿ)ಯ ಮೂವರು ಶಾಸಕರ ಬೆಂಬಲ ಸೊರೇನ್ ಅವರಿಗಿದೆ. ಹೇಮಂತ್ ಡಿ.29 ರಂದು ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ. ಹೇಮಂತ್ ಬುಧವಾರ ಹೊಸದಿಲ್ಲಿಯಲ್ಲಿ ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಹಾಗೂ ಸಂಸದ ರಾಹುಲ್ ಗಾಂಧಿ ಅವರನ್ನು ಭೇಟಿ ಮಾಡಿ ಸರಕಾರ ರಚನೆ ಸಂಬಂಧ ಮಾತುಕತೆ ನಡೆಸಿದರು.
from India & World News in Kannada | VK Polls https://ift.tt/39fLddh
