ಬೆಂಗಳೂರು: "ಯೋಗ ಯಾರೋ ಒಬ್ಬರಿಗೆ, ಅಥವಾ ಅನಾರೋಗ್ಯ ಪೀಡಿತರಿಗೆ ಸೀಮಿತವಾದುದಲ್ಲ. ಇದು ಅತ್ಯಂತ ದೊಡ್ಡ ತಪ್ಪು ಕಲ್ಪನೆ. ಜಗತ್ತಿನ ಸಕಲರೂ ಅನುಸರಿಸಬೇಕಾದ ಒಂದು ಮಾರ್ಗ." ಯತಿ ಶ್ರೇಷ್ಠ ಶ್ರೀ ಪೇಜಾವರ ವಿಶ್ವೇಶತೀರ್ಥ ಸ್ವಾಮೀಜಿ ಮಾತುಗಳಿವು. ಸದಾ ಚಟುವಟಿಕೆಯಿಂದಲೇ ಇರುತ್ತಿದ್ದ ಸ್ವಾಮೀಜಿ, ದಿನ ನಿತ್ಯ ಬೆಳಗ್ಗೆ ಯೋಗಾಭ್ಯಾಸ ಮಾಡುವುದನ್ನು ಎಂದೂ ಬಿಟ್ಟವರಲ್ಲ. ಜಳಕ, ಅನುಷ್ಠಾನಗಳ ಜತೆಗೆ ಸರಳ ಆಸನ, ಪ್ರಾಣಾಯಾಮಗಳನ್ನು ಮಾಡುತ್ತಿದ್ದರು. ಸಮಾಜಿಕ ಕೈಂಕರ್ಯಕ್ಕಾಗಿ ಜೀವನವನ್ನೇ ಮುಡಿಪಾಗಿಟ್ಟ ಪೇಜಾವರ ಶ್ರೀ, ಇತ್ತೀಚೆಗೆ ಗುರುಪೂರ್ಣಿಮೆಯ ದಿನದಂದು ದಿಲ್ಲಿಗೆ ತೆರಳಿದ್ದರು. ಅನಾರೋಗ್ಯಕ್ಕೆ ತುತ್ತಾಗುವ ವರೆಗೂ ಅವರು ದಿನ ನಿತ್ಯ ಯೋಗಾಭ್ಯಾಸ ಮಾಡುತ್ತಿದ್ದರು. ಐತಿಹಾಸಿಕ ಪರ್ಯಾಯದಲ್ಲೂ ದಿನ ನಿತ್ಯ ಯೋಗಾಭ್ಯಾಸ2017ರಲ್ಲಿ ಪೇಜಾವರ ಶ್ರೀ ಐತಿಹಾಸಿಕ ತಮ್ಮ ಐದನೇ ಪರ್ಯಾಯ ನಡೆಸುವ ವೇಳೆಯೂ ಒಂದು ದಿನವೂ ಯೋಗಭ್ಯಾಸ ಬಿಟ್ಟವರಲ್ಲ. ಆಧ್ಯಾತ್ಮಿಕ, ಶಾರೀರಿಕ ದೃಷ್ಟಿಯಿಂದ ಯೋಗಾಭ್ಯಾಸ ಮುಖ್ಯ. ದೇಹದಲ್ಲಿನ ಆರೋಗ್ಯ ಕಾಪಾಡಿಕೊಳ್ಳುವುದು, ಸದಾ ಲವಲವಿಕೆಯಿಂದಿರಲು ಯೋಗಾಭ್ಯಾಸ ಸಹಕಾರಿ ಎಂಬುದು ಶ್ರೀಗಳ ನಂಬಿಕೆಯಾಗಿತ್ತು. ಹೀಗಾಗಿಯೇ ಪರ್ಯಾಯದ ವೇಳೆ ಯತಿಗಳು ಮಾಡಬೇಕಾದ ಹಲವಾರು ಅನುಷ್ಠಾನಗಳಿರುತ್ತದೆ. ರಾತ್ರಿ ಎಷ್ಟೇ ತಡವಾಗಿ ಮಲಗಿದರೂ, ಮರುದಿನ ಬೆಳಗ್ಗೆ ಯೋಗಾಭ್ಯಾಸ ನಿತ್ಯ ಅನುಷ್ಠಾನದ ಒಂದು ಭಾಗವಾಗಿತ್ತು. ಯೋಗ ಯಾವುದೇ ಒಂದು ಧರ್ಮಕ್ಕೆ ಸೀಮಿತವಾದುದಲ್ಲ. ಪ್ರತಿಯೊಬ್ಬರಿಗೂ ಯೋಗಭ್ಯಾಸದಿಂದ ಅತ್ಯುತ್ತಮ ಆರೋಗ್ಯ ಲಭ್ಯವಾಗುತ್ತದೆ ಎಂದು ಶ್ರೀಗಳು ಆಗಾಗ್ಗೆ ಮಠದ ಭಕ್ತರಲ್ಲಿ ಹೇಳಿಕೊಳ್ಳುತ್ತಿದ್ದರು.
ಮಠದ ಯುವ ಶಿಷ್ಯರಿಗೆ ಪ್ರೇರಣಾಮಯಿಪೇಜಾವರ ಶ್ರೀಗಳು ಎಲ್ಲರ ಮುಂದೆ ಯೋಗಾಭ್ಯಾಸ ಮಾಡುತ್ತಿರಲಿಲ್ಲ. ಮುಂಜಾನೆ 3.30ರ ಸುಮಾರಿಗೇ ಎದ್ದು, ನಿತ್ಯ ಅನುಷ್ಠಾನಗಳಲ್ಲಿ ತೊಡಗಿಕೊಳ್ಳುತ್ತಿದ್ದ ಅವರು, ತಮ್ಮ ಕೊಠಡಿಯಲ್ಲಿ ಹದಿನೈದು-ಇಪ್ಪತ್ತು ನಿಮಿಷ ಯೋಗಾಭ್ಯಾಸ, ಧ್ಯಾನದಲ್ಲಿ ತಲ್ಲೀನರಾಗುತ್ತಿದ್ದರು. ಇದು ಮಠದ ಎಲ್ಲ ಶಿಷ್ಯರಿಗೆ ತಿಳಿದಿರುವ ವಿಚಾರವೇ! 88 ಹರೆಯದ ಪೇಜಾವರ ಶ್ರೀಗಳು ವಿವಿಧ ಬಗೆಯ ಆಸನಗಳನ್ನು ಮಾಡುವುದು ಮಠದ ಯುವ ಶಿಷ್ಯರೆಲ್ಲರಿಗೆ ಪ್ರೇರಣಾದಾಯಕವಾಗಿತ್ತು. ಒಂದು ಧರ್ಮಕ್ಕೆ ಸೀಮಿತವಲ್ಲ ಅನ್ನುತ್ತಿದ್ದರು...ಎಲ್ಲ ಭಾರತೀಯರು ಯೋಗಾಭ್ಯಾಸದಲ್ಲಿ ತೊಡಗಬೇಕು. ಯೋಗ ಯಾವುದೇ ಒಂದು ಧರ್ಮಕ್ಕೆ ಸೀಮಿತವಾದುದಲ್ಲ. ಯೋಗಾಸನದ ವೇಳೆ ಓಂ ಹೇಳಲೇಬೇಕೆಂದೂ ಇಲ್ಲ. ಅದರ ಬದಲು ಅವರವರ ಧರ್ಮದ ಮಂತ್ರವನ್ನೂ ಜಪಿಸಬಹುದು. ಯೋಗಾಭ್ಯಾಸ ಒಂದು ದಿನಕ್ಕೆ ಸೀಮಿತವೂ ಆಗಬಾರದು. ಮನಸ್ಸು, ಶರೀರ ಸದೃಢಗೊಳ್ಳಲು ಯೋಗ ಸಹಕಾರಿ ಎನ್ನುತ್ತಿದ್ದರು ಪೇಜಾವರ ಶ್ರೀ.
from India & World News in Kannada | VK Polls https://ift.tt/2Q5Cym7
