ಈಸ್ಟ್‌ ಲಂಡನ್‌: ಮುಂದಿನ ತಿಂಗಳು ಆತೀತ್ಯದಲ್ಲಿ ನಡೆಯಲಿರುವ ಐಸಿಸಿ ಟೂರ್ನಿಗೆ ಭರ್ಜರಿ ತಯಾರಿ ನಡೆಸಿದ್ದು, ಇಲ್ಲಿ ನಡೆಯುತ್ತಿರುವ ಯೂತ್‌ ಕ್ರಿಕೆಟ್ ಸರಣಿಯಲ್ಲಿ ದಕ್ಷಿಣ ಆಫ್ರಿಕಾ ಎದುರು 9 ವಿಕೆಟ್‌ಗಳ ಭರ್ಜರಿ ಜಯ ದಾಖಲಿಸಿದೆ. ಇಲ್ಲಿನ ಬಫೆಲೊ ಪಾರ್ಕ್‌ ಕ್ರೀಡಾಂಗಣದಲ್ಲಿ ಮೊದಲಿಗೆ 19 ವರ್ಷದೊಳಗಿನವರ ದಕ್ಷಿಣ ಆಫ್ರಿಕಾ ತಂಡವನ್ನು 187 ರನ್‌ಗಳ ಅಲ್ಪ ಮೊತ್ತಕ್ಕೆ ಆಲ್‌ಔಟ್‌ ಮಾಡಿದ ಭಾರತ ಕಿರಿಯರ ತಂಡ, ಬಳಿಕ ಗುರಿ ಬೆನ್ನತ್ತಿ 42.3 ಓವರ್‌ಗಳಲ್ಲಿ ಕೇವಲ 1 ವಿಕೆಟ್‌ ನಷ್ಟಕ್ಕೆ 191 ರನ್‌ಗಳನ್ನು ಗಳಿಸಿ ಭರ್ಜರಿ ಜಯ ದಾಖಲಿಸಿತು. ಪಂದ್ಯದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ದುಕೊಂಡ ದಕ್ಷಿಣ ಆಫ್ರಿಕಾ, 48.3 ಓವರ್‌ಗಳಲ್ಲಿ 187ಕ್ಕೆ ಆಲ್‌ಔಟ್‌ ಆಯಿತು. ಯಂಗ್‌ ಇಂಡಿಯಾ ಪರ ಸ್ಪಿನ್ನರ್‌ಗಳಾದ ರವಿ ಬಿಷ್ಣೋಯ್‌ (36ಕ್ಕೆ 3), ಅಥರ್ವ ಅಂಕೊಲೇಕರ್‌ (35ಕ್ಕೆ 2) ಮತ್ತು ಕನ್ನಡಿಗ ಶುಭಾಂಗ್‌ ಹೆಗ್ಡೆ (32ಕ್ಕೆ 2) ಸ್ಪಿನ್‌ ಬಲೆ ಹೆಣೆದು ಯುವ ಹರಿಣ ಪಡೆಯ ಬ್ಯಾಟ್ಸ್‌ಮನ್‌ಗಳನ್ನು ಬೇಟೆಯಾಡಿದರು. ಇದಕ್ಕೂ ಮುನ್ನ ವೇಗಿ ಕಾರ್ತಿಕ್‌ ತ್ಯಾಗಿ (28ಕ್ಕೆ 2) ಉತ್ತಮ ಆರಂಭ ಒದಗಿಸಿಕೊಟ್ಟಿದ್ದರು. ದಕ್ಷಿಣ ಆಫ್ರಿಕಾ ಪರ ಲೂಕ್‌ ಬೆಯೂಫೋರ್ಟ್‌ 91 ಎಸೆತಗಳಲ್ಲಿ 64 ರನ್‌ಗಳನ್ನು ಗಳಿಸಿ ಕೊಂಚ ಹೋರಾಟ ಪ್ರದರ್ಶಿಸಿದರು. ಗುರಿ ಬೆನ್ನತ್ತಿದ ಭಾರತ ತಂಡದ ಪರ ಆರಂಭಕಾರರಾದ ದಿವ್ಯಾನ್ಷ್‌ ಸಕ್ಸೇನಾ (ಅಜೇಯ 86) ಮತ್ತು ತಿಲಕ್‌ ವರ್ಮಾ (95 ಎಸೆತಗಳಲ್ಲಿ 59 ರನ್‌) ಮೊದಲ ವಿಕೆಟ್‌ಗೆ 121 ರನ್‌ಗಳ ಭರ್ಜರಿ ಜೊತೆಯಾಟದ ಮೂಲಕ ತಂಡದ ಗೆಲುವಿನ ಹಾದಿಯನ್ನು ಸುಗಮವಾಗಿಸಿದರು. ಬಳಿಕ ಕುಮಾರ್‌ ಕುಶಾಗ್ರ 44 ಎಸೆತಗಳಲ್ಲಿ ಅಜೇಯ 43 ರನ್‌ಗಳನ್ನು ಗಳಿಸುವ ಮೂಲಮ ತಂಡವನ್ನು ಸುಲಭವಾಗಿ ಗುರಿ ಮುಟ್ಟಿಸಿದರು. ಇದರೊಂದಿಗೆ ಭಾರತ ತಂಡ 3 ಪಂದ್ಯಗಳ ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಪಡೆದಿದೆ. ಸಂಕ್ಷಿಪ್ತ ಸ್ಕೋರ್‌ ದಕ್ಷಿಣ ಆಫ್ರಿಕಾ ಕಿರಿಯರ ತಂಡ: 48.3 ಓವರ್‌ಗಳಲ್ಲಿ 187/10 (ಲೂಕ್‌ ಬೆಯೂಫೋರ್ಟ್‌ 64, ಆಂಡ್ರೂ ಲೋವ್‌ 26, ಜಾಕ್‌ ಲೀಸ್‌ 27; ರವಿ ಬಿಷ್ಣೋಯ್‌ 36ಕ್ಕೆ 3, ಶುಭಾಂಗ್‌ ಹೆಗ್ಡೆ 32ಕ್ಕೆ 5, ಅಥರ್ವ ಅಂಕೊಲೇಕರ್‌ 35ಕ್ಕೆ 2, ಕಾರ್ತಿಕ್‌ ತ್ಯಾಗಿ 28ಕ್ಕೆ 2). ಭಾರತ ಕಿರಿಯರ ತಂಡ: 42.3 ಓವರ್‌ಗಳಲ್ಲಿ 1 ವಿಕೆಟ್‌ ನಷ್ಟಕ್ಕೆ 191 (ದಿವ್ಯಾನ್ಷ್‌ ಸಕ್ಸೇನಾ 86*, ತಿಲಕ್‌ ವರ್ಮಾ 59, ಕುಮಾರ್‌ ಕುಶಾಗ್ರ 43*; ಅಖಿಲಿ ಕ್ಲೊಯೇಟ್‌ 42ಕ್ಕೆ 1). ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಣ ಪಂದ್ಯದ ಸಂಪೂಣ್ ವಿಡಿಯೋ ಇಲ್ಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2Mx3IAl
