ಹೊಸದಿಲ್ಲಿ: ಟೀಮ್‌ ಇಂಡಿಯಾದ ಮಾಜಿ ಆಟಗಾರ ಮತ್ತು ಕಾಮೆಂಟೇಟರ್‌ ಸಂಜಯ್‌ ಮಂಜ್ರೇಕರ್‌, 2019ರಲ್ಲಿ ತಾವು ಕ್ರಿಕೆಟ್ ವೀಕ್ಷಕ ವಿವರಣೆಗಾರನಾಗಿ ಹಾಗೂ ಕ್ರಿಕೆಟ್ ಪರಿಣತನಾಗಿ ಮಾಡಿಕೊಂಡ ಎಡವಟ್ಟುಗಳಕುರಿತಾಗಿ ಮಾತನಾಡಿದ್ದಾರೆ. ಇಂಗ್ಲೆಂಡ್‌ ಮತ್ತು ವೇಲ್ಸ್‌ ಕ್ರಿಕೆಟ್ ಮಂಡಳಿ ಆಶ್ರಯದಲ್ಲಿ ನಡೆದ ಐಸಿಸಿ ವಿಶ್ವಕಪ್‌ ಟೂರ್ನಿಯಲ್ಲಿ ಭಾರತ ತಂಡದ ಆಲ್‌ರೌಂಡರ್‌ ಅವರನ್ನು 'ಚೂರು ಪಾರು' ಕ್ರಿಕೆಟಿಗ ಎಂದು ಕರೆದದ್ದು ಮತ್ತು ಸಹ ಕಾಮೆಂಟೇಟರ್‌ ಅವರೊಟ್ಟಿಗೆ ನಡೆದುಕೊಂಡ ರೀತಿ ವೃತ್ತಿ ಪರವಾದುದ್ದಲ್ಲ ಎಂದು ಇಎಸ್‌ಪಿಎನ್‌ ಕ್ರಿಕ್ಇನ್ಫೋಗೆ ನೀಡಿರುವ ಸಂದರ್ಶನದಲ್ಲಿ ಒಪ್ಪಿಕೊಂಡಿದ್ದಾರೆ. ಕಳೆದ ಜುಲೈನಲ್ಲಿ ನಡೆದ ವಿಶ್ವಕಪ್‌ ವೇಳೆ ನ್ಯೂಜಿಲೆಂಡ್‌ ವಿರುದ್ಧದ ಸೆಮಿಫೈನಲ್ಸ್‌ಗೂ ಮುನ್ನ ರವೀಂದ್ರ ಜಡೇಜಾ ಒಬ್ಬ ಚೂರು ಪಾರು ಆಟಗಾರನಾಗಿದ್ದು, ಪ್ಲೇಯಿಂಗ್‌ 11ನಿಂದ ಅವರನ್ನು ಕೈಬಿಡುವುದು ವಾಸಿ ಎಂದು ಕಾಮೆಂಟ್‌ ಮಾಡಿದ್ದರು. ಇದಕ್ಕೆ ವಿರುದ್ಧ ಸೋಷಿಯಲ್‌ ಮೀಡಿಯಾದಲ್ಲಿ ಭಾರಿ ಟ್ರೋಲ್‌ ಆಗಿತ್ತು. ರವೀಂದ್ರ ಜಡೇಜಾ ಕೂಡ ತಮ್ಮ ಟ್ವಿಟರ್‌ ಖಾತೆ ಮೂಲಕ ಮಾಂಜ್ರೇಕರ್‌ ಅವರನ್ನು ಜಾಡಿಸಿದ್ದರು. "1997-1998ರಲ್ಲಿ ಈ ವೃತ್ತಿ ಆರಂಭಿಸಿದೆ. ಇದೀಗ 20-21 ವರ್ಷ ಕಾಲ ಈ ವೃತ್ತಿಯಲ್ಲಿ ಸಾಗಿಬಂದಿದ್ದೇನೆ. ಇದರಲ್ಲಿ 2019 ನನ್ನ ಪಾಲಿಗೆ ಒಬ್ಬ ಕ್ರಿಕೆಟ್ ಕಾಮೆಂಟೇಟರ್‌ ಆಗಿಯೂ ಕ್ರಿಕೆಟ್ ಪರಿಣತನಾಗಿಯೂ ಅತ್ಯಂತ ಕೆಟ್ಟ ವರ್ಷ," ಎಂದು ಸಂಜಯ್‌ ಹೇಳಿಕೊಂಡಿದ್ದಾರೆ. ಜಡೇಜಾ ವಿರುದ್ಧ ನೀಡಿದ ಕಾಮೆಂಟ್‌ ಬಳಿಕ ತಾವೆಂದೂ ಅವರನ್ನು ಭೇಟಿಯಾಗಿಲ್ಲ ಎಂದು ಸಂಜಯ್‌ ಹೇಳಿಕೊಂಡಿದ್ದಾರೆ. "ಇಲ್ಲಿ ಯಾವುದೇ ರೀತಿಯ ತಪ್ಪು ತಿಳುವಳಿಕೆ ಇಲ್ಲ. ಜಡೇಜಾ ಬಗ್ಗೆ ನಾನು ಹೇಳಿದ್ದು ಸರಿ ಇದೆ. ಚೂರು ಪಾರು ಆಟಗಾರ ಎಂಬುದು ಕ್ರಿಕೆಟ್‌ನಲ್ಲಿ ಸಾಮಾನ್ಯವಾಗಿ ಬಳಕೆ ಮಾಡಲಾಗುವ ಪದ. ಇದರ ಬಗ್ಗೆ ಯಾವುದೇ ರೀತಿಯ ಪಶ್ಚಾತಾಪವಿಲ್ಲ," ಎಂದಿದ್ದಾರೆ. ಸಂಜಯ್‌ ಅವರ ಅಸಮಂಜಸ ಹೇಳಿಕೆಗೆ ಪ್ರತಿಕ್ರಿಯೆ ನೀಡಿದ್ದ ಜಡೇಜಾ, "ನಾನು ನಿಮಗಿಂತಲೂ ದುಪ್ಪಟ್ಟು ಪ್ರಮಾಣದಲ್ಲಿ ಪಂದ್ಯಗಳನ್ನಾಡಿದ್ದೇನೆ. ಈಗಲೂ ಆಡುತ್ತಿದ್ದೇನೆ ಕೂಡ. ಸಾಧಕರಿಗೆ ಗೌರವ ಕೊಡುವುದನ್ನು ಮೊದಲು ಕಲಿಯಿರಿ. ನಿಮ್ಮ ಮಾತಿನ ವಾಂತಿ ಕಂಡು ಸಾಕಾಗಿದೆ," ಎಂದು ಟ್ವೀಟ್‌ ಮೂಲಕ ಜಾಡಿಸಿದ್ದರು. ಇದೇ ವೇಳೆ ಕಾಮೆಂಟರಿ ವೇಳೆ ಹರ್ಷ ಭೋಗ್ಲೆ ಅವರನ್ನು ತುಚ್ಚವಾಗಿ ಕಂಡಿದ್ದಕ್ಕೆ ತಮಗೆ ಪಶ್ಚಾತಾಪವಿದೆ ಎಂದು ಸಂಜಯ್‌ ಒಪ್ಪಿಕೊಂಡಿದ್ದಾರೆ. ಭಾರತ ಮತ್ತು ಬಾಂಗ್ಲಾದೇಶ ನಡುವಣ ಪಿಂಕ್‌ ಬಾಲ್‌ ಟೆಸ್ಟ್‌ ಪಂದ್ಯಕ್ಕೆ ವೀಕ್ಷಕ ವಿವರಣೆ ನೀಡುತ್ತಿದ್ದ ವೇಳೆ ಈ ಘಟನೆ ನಡೆದಿತ್ತು. ಪಂದ್ಯದ ಕುರಿತಾಗಿ ಮಾತನಾಡಿದ ಹರ್ಷ ಭೋಗ್ಲೆ, ಪಿಂಕ್‌ ಬಾಲ್‌ ಟೆಸ್ಟ್‌ ಬಳಿಕ ಕೂಲಂಕಶ ಪರೀಕ್ಷೆಯಾಗಬೇಕಿದೆ. ಆಟಗಾರರಿಗೆ ಚೆಂಡು ಸರಿಯಾಗಿ ಕಾಣುತ್ತಿದೆಯೇ ಇಲ್ಲವೇ ಎಂದು ನೈಜ ಉತ್ತರ ಕೇಳಿ ಪಡೆಯುವ ಅಗತ್ಯವಿದೆ ಎಂದು ಹೇಳಿದ್ದರು. ಇದಕ್ಕೆ ಉತ್ತರಿಸಿದ್ದ ಸಂಜಯ್‌, "ಕೇವಲ ನೀವಷ್ಟೇ ಕೇಳಬೇಕು. ಏಕೆಂದರೆ ನಾವೆಲ್ಲಾ ಸಾಕಷ್ಟು ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ ಅನುಭವ ಹೊಂದಿದ್ದೇವೆ," ಎಂದಿದ್ದರು. ಈ ಮೂಲಕ ಹರ್ಷ ಭೋಗ್ಲೆ ಯಾವುದೇ ಹಂತದ ಕ್ರಿಕೆಟ್ ಆಡಿಲ್ಲ ಎಂದು ಇಲ್ಲಿ ಪರೋಕ್ಷವಾಗಿ ಅಣಕಿಸಿದ್ದರು. "ಈ ವಿಚಾರ ಗಂಭೀರವಾದದ್ದು. ಈ ಸಂದರ್ಭದಲ್ಲಿ ನಾನು ಒಬ್ಬ ವೃತ್ತಿಪರನಾಗಿ ನಡೆದುಕೊಳ್ಳಲಿಲ್ಲ. ಅದು ನಿಜಕ್ಕೂ ತಪ್ಪು. ಇದಕ್ಕೆ ಪಶ್ಚಾತಾಪ ಖಂಡಿತವಾಗಿಯೂ ಇದೆ. ಈ ಬಗ್ಗೆ ಕೂಡಲೇ ಕಾರ್ಯಕ್ರಮದ ನಿರ್ಮಾಪಕರ ಬಳಿ ಕ್ಷಮೆಯಾಚಿಸಿದೆ. ಏಕೆಂದರೆ ನನ್ನ ತಪ್ಪಿನ ಅರಿವು ನನಗಾಗಿತ್ತು," ಎಂದು ಸಂಜಯ್‌ ಹೇಳಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/39rS5Vi
