ಹೊಸದಿಲ್ಲಿ: ಬಾಂಗ್ಲಾದೇಶ ಆತಿಥ್ಯದಲ್ಲಿ ಮುಂದಿನ ವರ್ಷ ನಡೆಯಲಿರುವ ಮತ್ತು ನಡುವಣ 2 ಅಧಿಕೃತ ಟಿ20 ಪಂದ್ಯಗಳಿಗೆ ಟೀಮ್‌ ಇಂಡಿಯಾದಿಂದ 5 ಆಟಗಾರರು ಪಾಲ್ಗೊಳ್ಳುವುದನ್ನು ಬಿಸಿಸಿಐನ ಜಂಟಿ ಕಾರ್ಯದರ್ಶಿ ಜಯೇಶ್‌ ಜಾರ್ಜ್‌ ಶುಕ್ರವಾರ ಖಾತ್ರಿ ಪಡಿಸಿದ್ದಾರೆ. ಬಾಂಗ್ಲಾದೇಶದ ರಾಷ್ಟ್ರಪಿತಾ ಬಾಂಗಬಂಧು ಶೇಖ್‌ ಮುಜಿಬುರ್‌ ರೆಹಮಾನ್‌ ಅವರ ಜನ್ಮಶತಮಾನೋತ್ವದ ಅಂಭ್ರಮಾಚರಣೆಯ ಅಂಗವಾಗಿ ಎರಡು ಪಂದ್ಯಗಳ ಸರಣಿಯನ್ನು ಮಾರ್ಚ್‌ನಲ್ಲಿ ನಡೆಸಲಾಗುತ್ತಿದೆ. ಆದರೆ, ಏಷ್ಯಾ ಇಲೆವೆನ್‌ ತಂಡದಲ್ಲಿ ಆಡಲಿರುವ ಭಾರತದ ಆ ಐದು ಆಟಗಾರರು ಯಾರು ಎಂಬುದನ್ನು ಬಹಿರಂಗ ಪಡಿಸಿಲ್ಲ. ಇದೇ ವೇಳೆ ಏಷ್ಯಾ ಇಲೆವೆನ್‌ ತಂಡದಲ್ಲಿ ಪಾಕಿಸ್ತಾನ ತಂಡ ಯಾವೊಬ್ಬ ಆಟಗಾರ ಕೂಡ ಪಾಲ್ಗೊಳ್ಳುತ್ತಿಲ್ಲ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಘೋಷಿಸಿದೆ. ಪಾಕಿಸ್ತಾನ ಸೂಪರ್‌ ಲೀಗ್‌ ಟೂರ್ನಿ ಅದೇ ವೇಳೆಯಲ್ಲಿ ನಡೆಯುತ್ತಿರುವ ಕಾರಣ ಪಾಕ್‌ ಆಟಗಾರರು ಈ ಪಂದ್ಯಗಳಲ್ಲಿ ಆಡುವುದು ಸಾಧ್ಯವಿಲ್ಲ ಎಂದು ಪಿಸಿಬಿ ಹೇಳಿದೆ. "ಕೋಲ್ಕತಾದಲ್ಲಿ ಕಳೆದ ತಿಂಗಳು ನಡೆದ ಭಾರತ ಮತ್ತು ಬಾಂಗ್ಲಾದೇಶ ನಡುವಣ ಪಿಂಕ್‌ ಬಾಲ್‌ ಟೆಸ್ಟ್‌ ವೇಳೆ ಈ ಬಗ್ಗೆ ಚರ್ಚೆಯಾಗಿದೆ. ಹೀಗಾಗಿ ಎಷ್ಯಾ ಇಲೆವೆನ್‌ ತಂಡದಲ್ಲಿ ಭಾರತ ಮತ್ತು ಪಾಕಿಸ್ತಾನ ತಂಡದ ಆಟಗಾರರು ಜೊತೆಯಾಗಿ ಆಡುವುದು ಅನುಮಾನವಾಗಿದೆ. ಈ ಬಗ್ಗೆ ಬಾಂಗ್ಲಾ ಕ್ರಿಕೆಟ್ ಬೋರ್ಡ್‌ ಜೊತೆಗೆ ಬಿಸಿಸಿಐ ಅಧ್ಯಕ್ಷ ಸೌರವ್‌ ಗಂಗೂಲಿ ಮಾತೂಕತೆ ನಡೆಸಲಿದ್ದಾರೆ," ಎಂದು ಜಯೇಶ್‌ ಜಾರ್ಜ್‌ ಹೇಳಿದ್ದಾರೆ. ಎರಡು ಟಿ20 ಪಂದ್ಯಗಳು ಮಾರ್ಚ್‌ 18ರಿಂದ 21ರ ಒಳಗೆ ಢಾಕಾದಲ್ಲಿ ನಡೆಯಲಿದೆ. ಈ ಸಂದರ್ಭದಲ್ಲಿ ದಕ್ಷಿಣ ಆಫ್ರಿಕಾ ತಂಡ ಏಕದಿನ ಕ್ರಿಕೆಟ್ ಸರಣಿ ಸಲುವಾಗಿ ಭಾರತ ಪ್ರವಾಸ ಕೈಗೊಂಡಿರಲಿದೆ. ಸರಣಿಯ ಮೂರನೇ ಪಂದ್ಯಕ್ಕೆ ಏಷ್ಯಾ 11 ಮತ್ತು ವಿಶ್ವ ಇಲೆವೆನ್‌ ನಡುವಣ ಮೊದಲ ಪಂದ್ಯದ ಜೊತೆಗೆ ಘರ್ಷಣೆಯಾಗಲಿದೆ. ಭಾರತ ಮತ್ತು ಪಾಕಿಸ್ತಾನ ನಡುವಣ ರಾಜಕೀಯ ಸ್ಥಿತಿ ಹದಗೆಟ್ಟಿರುವ ಹಿನ್ನೆಲೆಯಲ್ಲಿ ಈ ಎರಡೂ ರಾಷ್ಟ್ರಗಳ ನಡುವಣ ದ್ವಿಪಕ್ಷೀಯ ಸರಣಿಗಳು ನಿಂತು ಹೋಗಿದೆ. ಕೇವಲ ಆಯೋಜಿತ ಟೂರ್ನಿಗಳಲ್ಲಿ ಮಾತ್ರವೇ ಎರಡೂ ತಂಡಗಳು ಮುಖಾಮುಖಿಯಾಗುತ್ತಿವೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2SrEiI9
