ಕರಾಚಿ: ಧರ್ಮ ತಾರತಮ್ಯ ಹೇಳಿಕೆ ಬಳಿಕ ಕ್ರಿಕೆಟ್ ತಂಡದ ಮಾಜಿ ಸ್ಪಿನ್ನರ್‌ ದನೀಶ್ ಕನೇರಿಯಾಗೆ ಪಾಕಿಸ್ತಾನದಲ್ಲಿ ಹಲವರಿಂದ ವಿರೋಧ ವ್ಯಕ್ತವಾಗಿದೆ. ಕನೇರಿಯಾ ವಿರುದ್ಧ ಇದೀಗ ನಾನಾ ರೀತಿಯ ಆರೋಪಗಳು ಕೇಳಿ ಬರತೊಡಗಿವೆ. ಈ ಹಿನ್ನೆಲೆಯಲ್ಲಿ ಭಾನುವಾರ ಯೂ ಟ್ಯೂಬ್‌ ಚಾನೆಲ್‌ನಲ್ಲಿ ಮಾತನಾಡಿದ ಅವರು, ''ನಾನು ದೇಶಕ್ಕಾಗಿ ಸಾಕಷ್ಟು ತ್ಯಾಗ ಮಾಡಿದ್ದೇನೆ. ಬೆರಳಿಗೆ ಗಾಯವಾಗಿ ರಕ್ತ ಸುರಿಯುತ್ತಿರುವುದನ್ನೂ ಲೆಕ್ಕಿಸದೇ ಬೌಲಿಂಗ್‌ ಮಾಡಿದ್ದೇನೆ. ಆದರೆ, ಕೆಲವರು ದೇಶದ ಮರ್ಯಾದೆಯನ್ನು ಹರಾಜು ಹಾಕಿದರೂ ಅವರನ್ನು ಮತ್ತೆ ತಂಡಕ್ಕೆ ಸೇರಿಸಿಕೊಳ್ಳಲಾಗಿದೆ. ನಾನು ಯಾವತ್ತೂ ದೇಶವನ್ನು ಮಾರಾಟ ಮಾಡಲು ಯತ್ನಿಸಿಲ್ಲ,'' ಎಂದು ಹೆಸರು ಹೇಳದೆ ಕನೇರಿಯಾ ಆರೋಪಿಸಿದ್ದಾರೆ. ಕೆಲವೇ ಆಟಗಾರರಿಂದ ತಾರತಮ್ಯ ದನೀಶ್ ಕನೇರಿಯಾ ಪ್ರಕರಣದ ಬಗ್ಗೆ ಭಾನುವಾರ ಮತ್ತೊಮ್ಮೆ ಮಾತನಾಡಿದ ಶೋಯೆಬ್‌ ಅಖ್ತರ್‌, ''ತಂಡದಲ್ಲಿದ್ದ ಒಂದಿಬ್ಬರು ಆಟಗಾರರು ಮಾತ್ರ ಕನೇರಿಯಾ ವಿರುದ್ಧ ಧಾರ್ಮಿಕ ತಾರತಮ್ಯ ಎಸಗುತ್ತಿದ್ದರು. ಆ ಬಗ್ಗೆ ನಾನು ಆಕ್ಷೇಪ ಎತ್ತಿದ್ದೆ. ಸಾಮಾಜಿಕ ಜೀವನದಲ್ಲಿಈ ರೀತಿಯ ವರ್ತನೆ ನಮ್ಮ ಸಂಸ್ಕೃತಿಯಲ್ಲ,'' ಎಂದು ಹೇಳಿದ್ದಾರೆ. ಕನೇರಿಯಾಗೆ ನಾನು ಅನ್ಯಾಯವೆಸಗಿಲ್ಲ ಕನೇರಿಯಾ ಹಿಂದೂ ಎಂಬ ಕಾರಣಕ್ಕೆ ಅವರ ವಿರುದ್ಧ ಪ್ರತ್ಯೇಕತಾ ಮನೋಭಾವ ತೋರಲಾಗುತ್ತಿತ್ತು ಎಂದು ಶೋಯೆಬ್‌ ಅಖ್ತರ್‌ ಇತ್ತೀಚೆಗೆ ನೀಡಿದ ಹೇಳಿಕೆಯ ಹಿನ್ನೆಲೆಯಲ್ಲಿ ಭಾನುವಾರ ತಮ್ಮ ಯೂ ಟ್ಯೂಬ್‌ ಚಾನೆಲ್‌ 'ಇಂಜಮಮ್‌ ಉಲ್‌ ಹಕ್‌ - ದಿ ಮ್ಯಾಚ್‌ ವಿನ್ನರ್‌'ನಲ್ಲಿ ಮಾತನಾಡಿದ ಇಂಜಮಮ್‌, ''ಕನೇರಿಯಾ ನನ್ನ ನಾಯಕತ್ವದಲ್ಲೇ ಹೆಚ್ಚಿನ ಪಂದ್ಯಗಳನ್ನು ಆಡಿದ್ದಾರೆ. ಅದೇ ಸಂದರ್ಭದಲ್ಲಿ ಸಕ್ಲೇನ್‌ ಮುಷ್ತಾಕ್‌ ಕೂಡ ಪಾಕ್‌ ತಂಡದಲ್ಲಿದ್ದರು. ಆದರೆ, ನಾನು ಕನೇರಿಯಾಗೆ ಹೆಚ್ಚಿನ ಅವಕಾಶಗಳನ್ನು ನೀಡುತ್ತಿದ್ದೆ. ಸಕ್ಲೇನ್‌ ನನ್ನ ಬಾಲ್ಯದ ಗೆಳೆಯನಾಗಿದ್ದರೂ, ದನೀಶ್ ಅವರ ಕ್ರಿಕೆಟ್ ಸಾಮರ್ಥ್ಯವನ್ನು ಪರಿಗಣಿಸುತ್ತಿದ್ದೆ,'' ಎಂದು ಹೇಳಿದ್ದಾರೆ. ''2005ರಲ್ಲಿ ಭಾರತ ತಂಡ ಪಾಕಿಸ್ತಾನಕ್ಕೆ ಬಂದಿದ್ದಾಗ ನಮ್ಮ ಜನರು ಅವರನ್ನು ಆತ್ಮೀಯವಾಗಿ ಸ್ವಾಗತಿಸಿದ್ದಾರೆ. ನಾನು ಭಾರತಕ್ಕೆ ಹೋಗಿದ್ದಾಗ ಅಲ್ಲಿನ ಜನರು ಪ್ರೀತಿಯಿಂದ ಸತ್ಕರಿಸಿದ್ದಾರೆ. ಆ ಅವಧಿಯಲ್ಲಿ ಭಾರತ ತಂಡದ ನಾಯಕರಾಗಿದ್ದ ಸೌರವ್‌ ಗಂಗೂಲಿ ನೂತನವಾಗಿ ತೆರೆದಿದ್ದ ರೆಸ್ಟೋರೆಂಟ್‌ ಒಂದನ್ನು ನಾನು ಹಾಗೂ ಸಚಿನ್‌ ಸೇರಿ ಉದ್ಘಾಟಿಸಿದ್ದೆವು,'' ಎಂದು ಇಂಜಮಮ್‌ ಸ್ಮರಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2SD8W16
