ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರಕ್ಕೆ ಇದ್ದ ವಿಶೇಷ ಸ್ಥಾನಮಾನ ಆರ್ಟಿಕಲ್‌ 370 ಮತ್ತು 35ಎ ತೆರವುಗೊಳಿಸಿದ ನಂತರ ಇದೇ ಮೊದಲ ಬಾರಿಗೆ ಕಣಿವೆ ರಾಜ್ಯದಲ್ಲಿ ಹೊರಗಿನವರಿಗೆ ಉದ್ಯೋಗಾವಕಾಶ ಕಲ್ಸಿಸಿದೆ. ಖಾಲಿಯಿರುವ 33 ಸರಕಾರಿ ಹುದ್ದೆಗಳಿಗೆ (ಗೆಜೆಟೆಡ್‌ ಅಲ್ಲದ) ಆಹ್ವಾನಿಸಿದ್ದು, ಕಾಶ್ಮೀರ ಮತ್ತು ಲಡಾಖ್‌ನ ಶಾಶ್ವತ ನಿವಾಸಿಗಳಿಗೆ ಮಾತ್ರವಲ್ಲದೆ ಹೊರ ರಾಜ್ಯದವರಿಗೂ ಅರ್ಜಿ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ. ಸ್ಟೆನೋಗ್ರಾಫರ್‌ಗಳು, ಬೆರಳಚ್ಚು ತಜ್ಞರು ಮತ್ತು ಚಾಲಕರು ಹುದ್ದೆಗಳಿಗೆ ಅರ್ಜಿ ಆಹ್ವಾನಿಸಲಾಗಿದ್ದು, ಆಯ್ಕೆ ಪ್ರಕ್ರಿಯೆಯು ಮೀಸಲು ನೀತಿ, 2005ರ ಪ್ರಕಾರ ನಡೆಯಲಿದೆ. ಶಾಶ್ವತ ನಿವಾಸಿಗಳಿಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಬೇಕು ಎಂದು ಈ ನೀತಿ ಹೇಳುತ್ತದೆ. 33 ಹುದ್ದೆಗಳ ಪೈಕಿ 17 ಓಪನ್‌ ಮೆರಿಟ್‌ ಕೆಟಗರಿಗೆ ಸೇರ್ಪಡೆಗೊಂಡಿದ್ದು ಜಮ್ಮು ಮತ್ತು ಕಾಶ್ಮೀರದ ಹೊರಗಿನವರು ಅರ್ಜಿ ಸಲ್ಲಿಸಬಹುದು. ಕಾಶ್ಮೀರದ ನಿವಾಸಿಗಳಿಗೆ ಕೆಲವು ವಿನಾಯಿತಿ ನೀಡಬೇಕು ಎಂದು ಸ್ಥಳೀಯ ಬಿಜೆಪಿ ಹೈಕಮಾಂಡ್‌ಗೆ ಮನವಿ ಮಾಡಿದೆ. 15 ರಿಂದ 20 ವರ್ಷಗಳಿಂದ ಜಮ್ಮು ಮತ್ತು ಕಾಶ್ಮೀರದಲ್ಲಿ ನೆಲೆಸಿದವರಿಗೆ ಶಾಶ್ವತ ನಿವಾಸಿ ಎಂಬ ಸಾಮಾಜಿಕ ಸ್ಥಾನ ನೀಡಬೇಕು ಎಂದು ಒತ್ತಾಯ ಮಾಡಿದ್ದಾರೆ. ಕೇಂದ್ರ ಸರಕಾರ ಎಸ್‌ಸಿ, ಎಸ್‌ಟಿ ಮತ್ತು ಒಬಿಸಿ ವರ್ಗಕ್ಕೆ ನೀಡಲಾಗಿರುವ ಮೀಸಲಾತಿ ಜೊತೆಗೆ ಶಾಶ್ವತ ಕಾಶ್ಮೀರಿಗರಿಗೂ ಮೀಸಲಾತಿ ಕಲ್ಪಿಸುವ ಭರವಸೆ ಇದೆ ಎಂದು ಜಮ್ಮುವಿನ ಬಿಜೆಪಿ ಯೂನಿಟ್‌ ತಿಳಿಸಿದೆ.
from India & World News in Kannada | VK Polls https://ift.tt/39lgxaG
