- ಮಹೇಶ್‌ ವಿಜಯಪುರ, ರಸ್ತೆ ಅಪಘಾತದಲ್ಲಿ ಮೃತಪಟ್ಟ ಕಾರ್ಮಿಕನ ಕುಟುಂಬಕ್ಕೆ ಬೆಳಗಾವಿ ಜಿಲ್ಲಾ ನ್ಯಾಯಾಲಯ 22 ಲಕ್ಷ ರೂ. ಗಳಿಗೂ ಅಧಿಕ ಮೊತ್ತದ ಪರಿಹಾರ ನೀಡಲು ಆದೇಶಿಸಿದೆ. ಮೃತ ವ್ಯಕ್ತಿ ಪಡೆಯುತ್ತಿದ್ದ ಕೂಲಿಗೆ ಸಂಬಂಧಿಸಿ ಯಾವುದೇ ದಾಖಲೆ ಇಲ್ಲದಿದ್ದರೂ ಕೋರ್ಟ್‌ ಮೊದಲ ಬಾರಿಗೆ ಇಷ್ಟೊಂದು ಗರಿಷ್ಠ ಮೊತ್ತ ನೀಡುವಂತೆ ಸೂಚಿರುವುದು ಹೊಸ ಮಾರ್ಗದರ್ಶಿಯಾಗುವ ಸಾಧ್ಯತೆ ಇದೆ. ಮತ್ತು ನಾನಾ ಕಾರಣಗಳಿಂದ ಅಪಘಾತಗಳಲ್ಲಿ ಪ್ರಾಣ ಕಳೆದುಕೊಳ್ಳುವ ಅಸಂಘಟಿತ ಕಾರ್ಮಿಕರ ಪರಿಹಾರ ವಿತರಣೆಗೆ ಇದು ಮಾದರಿಯಾಗಲಿದೆ. ಏನಿದು ಪ್ರಕರಣ?: ಬೆಳಗಾವಿಯ ಆಂಜನೇಯ ನಗರ ನಿವಾಸಿ, ಗೌಂಡಿ ಕೆಲಸ ನಿರ್ವಹಿಸುತ್ತಿದ್ದ ಅಂಕಲೇಶ್‌ ಅರ್ಜುನ್‌ ಖೋತ (21) 2018ರ ಮೇ 31ರಂದು ಬೆಳಗ್ಗೆ ಅಥಣಿ ತಾಲೂಕಿಗೆ ಹೊಂದಿಕೊಂಡಿರುವ ಮಹಾರಾಷ್ಟ್ರದ ತನಂಗ್‌ ಗ್ರಾಮ ಬಳಿ ಅಪಘಾತಲ್ಲಿ ಮೃತಪಟ್ಟಿದ್ದರು. ಸ್ನೇಹಿತನ ಜತೆ ಹಿಂಬದಿ ಸವಾರನಾಗಿ ಬೈಕ್‌ನಲ್ಲಿ ಹೋಗುತ್ತಿದ್ದಾಗ ಖಾಸಗಿ ಬಸ್‌ ಡಿಕ್ಕಿಯಾಗಿತ್ತು. ಅಂಕಲೇಶ್‌ ಮರುದಿನ ಮೃತಪಟ್ಟಿದ್ದರು. ಮೃತರ ಹೆತ್ತವರು ಪರಿಹಾರ ಕೋರಿ ಬೆಳಗಾವಿಯ 9ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದಲ್ಲಿ ದೂರು ದಾಖಲಿಸಿದ್ದರು. ಅಂಕಲೇಶ್‌ ಕೂಲಿ ಕಾರ್ಮಿಕರಾಗಿ ಪಡೆಯುತ್ತಿರುವ ವೇತನಕ್ಕೆ ಯಾವುದೇ ದಾಖಲಾತಿಗಳು ಇರಲಿಲ್ಲ. ಹೀಗಾಗಿ, ಅವರ ವಾದ ಬಿದ್ದು ಹೋಗುವ ಅಪಾಯವಿತ್ತು. ಆದರೆ, ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಾಲಯ ಇದೇ ಮೊದಲ ಬಾರಿಗೆ ದಾಖಲಾತಿ ಹೊರತಾಗಿ ಕೂಲಿ ಕಾರ್ಮಿಕರ ಕನಿಷ್ಠ ವೇತನವನ್ನು ಪರಿಗಣಿಸಿ ಪರಿಹಾರದ ತೀರ್ಪು ಪ್ರಕಟಿಸಿದೆ. ಕನಿಷ್ಠ ವೇತನದ ಲೆಕ್ಕರಾಜ್ಯ ಸರಕಾರ 2019-20ನೇ ಸಾಲಿಗೆ ಅಕುಶಲ ಕಾರ್ಮಿಕರಿಗೆ 11,500 ರೂ. ಕನಿಷ್ಠ ವೇತನ ನಿಗದಿ ಮಾಡಿದೆ. ಇದನ್ನು ಪರಿಗಣಿಸಿ 18.84 ಲಕ್ಷ ರೂ. ಪರಿಹಾರ ಮತ್ತು ಶೇ. 9 ಬಡ್ಡಿ ಸೇರಿಸಿ ಒಟ್ಟು 22.23 ಲಕ್ಷ ರೂ. ಮೊತ್ತದ ಪರಿಹಾರ ಪಾವತಿಸುವಂತೆ ಖಾಸಗಿ ಬಸ್‌ ಮೇಲೆ ವಿಮೆ ಹೊಂದಿರುವ ಕಂಪನಿಗೆ ನ್ಯಾಯಾಧೀಶರಾದ ಸಂಧ್ಯಾ ರಾವ್‌ ಪಿ. ಆದೇಶಿಸಿದರು. 7 ಲಕ್ಷ ರೂ. ಮೀರಿರಲಿಲ್ಲ ಕೂಲಿ ಕಾರ್ಮಿಕರಿಗೆ ಅದರಲ್ಲೂ ಅಸಂಘಟಿತ ವಲಯದ ಕಾರ್ಮಿಕರಿಗೆ ನೀಡುವ ವೇತನದ ಕುರಿತು ಯಾವುದೇ ದಾಖಲೆಗಳಿರುವುದಿಲ್ಲ. ಅಲ್ಲದೆ, ಅಸಂಘಟಿತ ವಲಯದ ಕಾರ್ಮಿಕರಿಗೆ ವರ್ಷ ಪೂರ್ತಿ ಕೆಲಸವಿರುವುದಿಲ್ಲ. ಮಳೆ, ಚಳಿಯಲ್ಲೂ ಕೆಲಸ ಮಾಡುವುದಿಲ್ಲ ಎನ್ನುವ ನಾನಾ ಕಾರಣಗಳನ್ನು ಮುಂದಿಟ್ಟು ವಾದ ಮಂಡಿಸುತ್ತ ಬರಲಾಗಿದೆ. ಇದೇ ಕಾರಣದಿಂದ ಬಹುತೇಕ ಪ್ರಕರಣಗಳಲ್ಲಿ ಕೂಲಿ ಕಾರ್ಮಿಕರ ಕನಿಷ್ಠ ವೇತನ ಪರಿಗಣನೆಯೇ ಆಗದೆ ಮೃತ ಕಾರ್ಮಿಕರ ಪರಿಹಾರ ಗರಿಷ್ಠ 7 ಲಕ್ಷ ರೂ. ಮೀರುತ್ತಿರಲಿಲ್ಲ ಎನ್ನುತ್ತಾರೆ ಅಸಂಘಟಿತ ಕಾರ್ಮಿಕರ ಒಕ್ಕೂಟ ಸದಸ್ಯರು. ಶೇ.40ರಷ್ಟು ಪ್ರಕರಣ ಬೆಳಗಾವಿ ಜಿಲ್ಲಾ ನ್ಯಾಯಾಲಯಗಳಲ್ಲಿ ವಾರ್ಷಿಕ ದಾಖಲಾಗುವ 3ರಿಂದ 4 ಸಾವಿರ ಅಪಘಾತ ಪ್ರಕರಣಗಳಲ್ಲಿ ಶೇ.40ರಷ್ಟು ಅಸಂಘಟಿತ ಕಾರ್ಮಿಕರ ಪ್ರಕರಣಗಳಿರುತ್ತವೆ. ಅದರಲ್ಲೂ ಅಪಘಾತ ಪ್ರಕರಣಗಳಲ್ಲಿ 20 ರಿಂದ 30 ವರ್ಷ ವಯಸ್ಸಿನ ವ್ಯಕ್ತಿ ಮೃತಪಟ್ಟಿದ್ದರೆ ಆ ವ್ಯಕ್ತಿ ಕಟ್ಟಡ ಕಾರ್ಮಿಕನೇ ಆಗಿರುತ್ತಾನೆ. ಇಂತಹ ಕಾರ್ಮಿಕರ ಕನಿಷ್ಠ ವೇತನ ಪರಿಗಣಿಸದಿರುವುದರಿಂದ ಈವರೆಗೆ ಬಹಳಷ್ಟು ಕಾರ್ಮಿಕರಿಗೆ ಸೂಕ್ತ ಪರಿಹಾರ ಸಿಕ್ಕಿರಲಿಲ್ಲ. ಈ ತೀರ್ಪು ಕಾರ್ಮಿಕರಿಗೆ ಆಶಾದಾಯಕವಾಗಿದೆ,’’ ಎಂದು ಕಕ್ಷಿದಾರರ ಪರ ವಕಾಲತ್ತು ವಹಿಸಿದ್ದ ವಕೀಲ ಎನ್‌.ಆರ್‌.ಲಾತೂರ್‌ ಹೇಳುತ್ತಾರೆ.
from India & World News in Kannada | VK Polls https://ift.tt/2sd7gRr
