ಹೊಸದಿಲ್ಲಿ: ಸಿಎಎ/ಎನ್‌ಆರ್‌ಸಿ ಗಲಭೆಯಿಂದ ನೆಟ್‌ವರ್ಕ್‌ ಕಂಪನಿಗಳಿಗೆ ತಮ್ಮ ಆದಾಯದಲ್ಲಿ ಭಾರಿ ಪ್ರಮಾಣದ ನಷ್ಟ ಉಂಟಾಗುತ್ತಿದೆ. ಗಲಭೆಯಲ್ಲಿ ಸಾಕಷ್ಟು ಸಾರ್ವಜನಿಕ ಆಸ್ತಿ ನಷ್ಟವಾಗಿರುವುದು ಒಂದೆಡೆಯಾದರೆ, ಜೀವ ಹಾನಿ ಮತ್ತೊಂದೆಡೆ. ಗಲಭೆ ನಿಯಂತ್ರಣಕ್ಕಾಗಿ ಕೇಂದ್ರ ಸರಕಾರ ಇಂಟರ್ನೆಟ್‌ ಸೇವೆಗಳನ್ನು ಕಡಿತಗೊಳಿಸಿದ್ದರಿಂದ ಭಾರತೀಯ ನೆಟ್‌ವರ್ಕ್‌ ಕಂಪನಿಗಳಿಗೆ ಪ್ರತಿ ಗಂಟೆಗೆ ಸರಿಸುಮಾರು 2.45 ಕೋಟಿ ರೂ. ನಷ್ಟ ಅನುಭವಿಸುತ್ತಿದೆ. ಪೌರತ್ವ ತಿದ್ದುಪಡಿ ಕಾಯ್ದೆ ಹಾಗೂ ರಾಷ್ಟ್ರೀಯ ಪೌರತ್ವ ನೋಂದಣಿ ಕಾಯ್ದೆಗಳನ್ನು ಜಾರಿಗೊಳಿಸಿದ್ದು ದೇಶಾದ್ಯಂತ ಪ್ರತಿಭಟನೆ, ಗಲಭೆಗೆ ಕಾರಣವಾಗಿತ್ತು. ಸಾಮಾಜಿಕ ತಾಣಗಳಲ್ಲಿ ಸುಳ್ಳು ಸುದ್ದಿ, ವದಂತಿಗಳನ್ನು ನಿಯಂತ್ರಿಸಿ, ಕಾನೂನು ಸುವ್ಯವಸ್ಥೆ ಕಾಪಾಡುವ ನಿಟ್ಟಿನಲ್ಲಿ ಉತ್ತರ ಪ್ರದೇಶ, ಅಸ್ಸಾಂ, ದಕ್ಷಿಣ ಕನ್ನಡ ಸೇರಿದಂತೆ ಅನೇಕ ಭಾಗಗಳಲ್ಲಿ ಗಲಭೆ ವೇಳೆ ಇಂಟರ್ನೆಟ್‌ ಸೇವೆಗಳನ್ನು ಕಡಿತಗೊಳಿಸಲು ಕಂಪನಿಗಳಿಗೆ ಸೂಚನೆ ನೀಡಲಾಗಿತ್ತು. ವಿಶ್ವದಲ್ಲೇ ಅತಿಹೆಚ್ಚು ಇಂಟರ್ನೆಟ್‌ ಬಳಕೆ ಮಾಡುವ ರಾಷ್ಟ್ರವಾಗಿರುವ ಭಾರತ, ಪ್ರತಿ ತಿಂಗಳಿಗೆ ಸರಾಸರೊ 9.8 ಜಿಬಿ ಡೇಟಾವನ್ನು ಸ್ಮಾರ್ಟ್‌ಫೋನ್‌ ಮೂಲಕ ಬಳಸಿಕೊಳ್ಳುತ್ತಿದೆ. ವಾಟ್ಸ್‌ಆ್ಯಪ್‌, ಫೇಸ್‌ಬುಕ್‌ ಹಾಗೂ ಫೇಸ್‌ಬುಕ್‌ ಇದರಲ್ಲಿ ಅತಿ ಹೆಚ್ಚು ಇಂಟರ್ನೆಟ್‌ ಬಳಸುವ ಆ್ಯಪ್‌ ಎಂದು ಸ್ವೀಡಿಷ್‌ ಟಿಲಿಕಾಂ ಸಂಸ್ಥೆ ಎರಿಕ್ಸನ್‌ ಮಾಹಿತಿ ನೀಡಿತ್ತು. ಸರಕಾರದ ಈ ನಿರ್ಧಾರಕ್ಕೆ ಸಂಬಂಧಿಸಿದಂತೆ ಸೆಲ್ಯುಲರ್‌ ಆಪರೇಟರ್ಸ್‌ ಅಸೋಸಿಯೇಷನ್‌ ಅಸಮಾಧಾನ ವ್ಯಕ್ತಪಡಿಸಿದ್ದು, ಅಂತರ್ಜಾಲವನ್ನು ಕಡಿತಗೊಳಿಸುವುದು ಗಲಭೆ, ಪ್ರತಿಭಟನೆ, ಸಮುದಾಯವನ್ನು ನಿಯಂತ್ರಿಸುವ ಮೊದಲ ಅಸ್ತ್ರವಾಗಿಸುವುದು ಸರಿಯಲ್ಲ ಎಂದಿದೆ. ಏರ್‌ಟೆಲ್‌, ವೊಡಾಫೋನ್‌ ಐಡಿಯಾ ಹಾಗೂ ರಿಲಾಯನ್ಸ್‌ ಇಂಡಸ್ಟ್ರೀಸ್‌ ಜಿಯೋ ಸಂಸ್ಥೆಗಳು ಅಸೋಸಿಯೇಷನ್‌ ಸದಸ್ಯರಾಗಿದ್ದಾರೆ. ಇಂಟರ್ನೆಟ್‌ ಸ್ಥಗಿತದಿಂದ ಪ್ರತಿ ಗಂಟೆಗೆ ಅಂದಾಜು 2.45 ಕೋಟಿ ರೂ.ಗಳಷ್ಟು ಆದಾಯದಲ್ಲಿ ನಷ್ಟ ಉಂಟಾಗುತ್ತಿದೆ. ಈ ವಿಚಾರವನ್ನು ಮನದಟ್ಟು ಮಾಡಿಕೊಡಲಾಗಿದೆ ಎಂದು ಅಸೋಸಿಯೇಷನ್‌ ಮಹಾನಿರ್ದೇಶಕ ರಾಜನ್‌ ಮಾಥ್ಯೂಸ್‌ ರಾಯಿಟರ್ಸ್‌ ಸುದ್ದಿ ಸಂಸ್ಥೆಗೆ ಮಾಹಿತಿ ನೀಡಿದ್ದಾರೆ.
ಇನ್‌ಸ್ಟಾಗ್ರಾಂ, ವಾಟ್ಸ್‌ಆ್ಯಪ್‌, ಫೇಸ್‌ಬುಕ್‌, ಟಿಕ್‌ಟಾಕ್‌ಗಳ ಮೂಲಕ ವಿವಿಧ ರೀತಿಯ ಸುಳ್ಳು ಮಾಹಿತಿ, ವದಂತಿಗಳು ಹಬ್ಬದಂತೆ ಪೊಲೀಸ್‌ ಇಲಾಖೆ ಮುನ್ನಚ್ಚರಿಕೆ ಕ್ರಮವಾಗಿ ಇಂಟರ್ನೆಟ್‌ ಸೇವೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸುವಂತೆ ಸಂಸ್ಥೆಗಳಿಗೆ ಆದೇಶ ನೀಡಿತ್ತು. ಶುಕ್ರವಾರ (ಡಿ.27) ಉತ್ತರ ಪ್ರದೇಶದ ಕನಿಷ್ಠ 18 ಜಿಲ್ಲೆಗಳಲ್ಲಿ ಅಂತರ್ಜಾಲ ಸೇವೆ ಸ್ಥಗಿತಗೊಳಿಸಲು ಆದೇಶಿಸಲಾಗಿದೆ. ದಿಲ್ಲಿ ಹೊರವಲಯ ಸೇರಿದಂತೆ ಪ್ರತಿಭಟನೆಯ ಕಾವು ಹೆಚ್ಚಿರುವ ಭಾಗಗಳಲ್ಲಿ ಡಿ.28ರ ವರೆಗೆ ಇಂಟರ್ನೆಟ್‌ ಸೇವೆಗಳಿರುವುದಿಲ್ಲ. ಮನೆಯ ಬ್ರಾಡ್‌ಬ್ಯಾಂಡ್‌ ಸೇವೆಗಳನ್ನೂ ಕಡಿತಗೊಳಿಸಿ ಆದೇಶಿಸಲಾಗಿದೆ. ಕಳೆದ 140ಕ್ಕೂ ಹೆಚ್ಚು ದಿನಗಳಿಂದ ಜಮ್ಮು ಕಾಶ್ಮೀರದ ಅನೇಕ ಭಾಗಗಳಲ್ಲಿ ಇಂಟರ್ನೆಟ್‌ ಸೇವೆ ಸ್ಥಗಿತಗೊಳಿಸಲಾಗಿದೆ.
from India & World News in Kannada | VK Polls https://ift.tt/2SzZEmC
