ಅಹಮದಾಬಾದ್‌: ಎದೆಹಾಲನ್ನು ದಾನ ಮಾಡುತ್ತ ಅನಾಥ ಮಕ್ಕಳು ಮತ್ತು ತಾಯಿ ಹಾಲು ವಂಚಿತ ಮಕ್ಕಳ ಬದುಕಿಗೆ ಅಮೃತದ ಹನಿಗಳನ್ನು ಉಣಿಸುತ್ತಿರುವ 29 ವರ್ಷದ ರುಶಿನಾ ಡಾಕ್ಟರ್‌ ಮಾರ್ಫಿಶಿಯಾ ಮಹಾತಾಯಿಯಾಗಿ ಸ್ಪೂರ್ತಿಯಾಗಿದ್ದಾರೆ. ಕಳೆದ ಮೂರು ತಿಂಗಳಲ್ಲಿ 12 ಲೀಟರ್‌ ಮಾಡಿರುವ ರುಶಿನಾ, ಐಸಿಯುನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಐದು ಹಸುಗೂಸುಗಳಿಗೆ ಎದೆಹಾಲು ನೀಡಿ ಬದುಕಿಸಿದ್ದಾರೆ. ರುಶಿನಾ ಅವರ ಮಹಾತ್ಕಾರ್ಯ ಬೆಲೆ ಕಟ್ಟಲಾರದ್ದು. ಅತ್ಯಂತ ಸೂಕ್ಷ್ಮ ಹಂತದಲ್ಲಿರುವ 600 ಗ್ರಾಮ್‌ನಿಂದ 1.5 ಕೆಜಿ ತೂಗುವ ಹಸುಗೂಸಗಳ ಜೀವಕ್ಕೆ ರುಶಿನಾ ಅವರ ಎದೆಹಾಲು ರಾಮಬಾಣವಾಗಿದೆ ಎಂದು ಅರ್ಪಣಾ ನವಜಾತ ಶಿಶು ಆರೈಕೆ ಕೇಂದ್ರದ ಹಿರಿಯ ನಿಯೋನಾಟಾಲಜಿಸ್ಟ್ ಡಾ. ಆಶಿಶ್‌ ಮೆಹ್ತಾ ಹೇಳಿದ್ದಾರೆ. ತಾಯಿ ಎದೆಹಾಲು ವಂಚಿತ ಶಿಶುಗಳಿಗೆ ಎದೆಹಾಲುಣಿಸಲು ಆಶಿಶ್‌ ಮೆಹ್ತಾ ಅವರು ಮಾಮ್‌ ಬ್ಯಾಂಕ್ (MOM, Mother's Own Milk) ಅನ್ನು ಆರಂಭಸಿದ್ದಾರೆ. ಗಂಡು ಮಗುವಿನ ತಾಯಿಯಾಗಿರುವ ರುಶಿನಾ, ತನ್ನ ಮಗುವಿನ ಹೊಟ್ಟೆ ತುಂಬಿಸಿ ಮಿಕ್ಕುವಷ್ಟು ಹಾಲು ತನ್ನ ಸ್ತನಗಳಲ್ಲಿದೆ ಎಂಬುದನ್ನು ಅರ್ಥೈಸಿಕೊಂಡರು. ಈ ಸಂದರ್ಭ ಹೆಚ್ಚುವರಿ ಹಾಲನ್ನು ದಾನ ಮಾಡಬಹುದಲ್ವಾ ಎಂಬ ಚಿಂತನೆ ಮಾಡಿದ ರುಶಿನಾ ಮಾಮ್‌ ಬ್ಯಾಂಕ್‌ಗೆ ಹೆಚ್ಚುವರಿ ಎದೆಹಾಲನ್ನು ದಾನ ಮಾಡಲು ಆರಂಭಿಸಿದರು. 'ನನ್ನ ಎದೆಹಾಲನ್ನು ದಾನ ಮಾಡಬಹುದು ಎಂಬ ವಿಚಾರ ತಿಳಿದಾಗ ತುಂಬಾ ಖುಷಿಯಾಯಿತು. ತಾಯಿ ಎದೆಹಾಲು ವಂಚಿತ ಮತ್ತು ಅನಾಥ ಶಿಶುಗಳಿಗೆ ತನ್ನ ಎದೆಹಾಲು ಅಮೃತವಾಗುತ್ತದೆ ಎಂಬ ವಿಚಾರ ನನಗೆ ಪ್ರೇರಣೆ ನೀಡಿತು. ನನ್ನ ಮಗನಿಗೆ ಉಣಿಸಿ ಉಳಿದ ಎದೆಹಾಲನ್ನು ಮಾಮ್‌ ಬ್ಯಾಂಕ್‌ಗೆ ದಾನ ಮಾಡಲು ಆರಂಭಿಸಿದೆ. ಇನ್ನು ಮುಂದೆಯೂ ಎದೆಹಾಲು ದಾನ ಮಾಡುತ್ತೇನೆ' ಎಂದು ರುಶಿನಾ ವಿವರಿಸಿದರು. ತಾಯಿಯ ಎದೆಹಾಲು ಸೇವನೆ ಮಕ್ಕಳಿಗೆ ದೀರ್ಘ ಆಯಸ್ಸು ನೀಡುತ್ತದೆ ಎಂದು ನಂಬಿರುವ ರುಶಿನಾ ಅಪರ್ಣಾ ಮಾಮ್‌ ಬ್ಯಾಂಕ್‌ನ 250 ದಾನಿಗಳ ಪೈಕಿ ಒಬ್ಬರು. ಇದುವರೆಗೆ 90 ಲೀಟರ್‌ ಎದೆ ಹಾಲು ಈ ಸಂಸ್ಥೆಗೆ ದಾನವಾಗಿ ಬಂದಿದೆ. ಇದರಿಂದ ಪ್ರತಿ ಮಗುವಿಗೆ 150 ಮಿ.ಲೀ.ನಂತೆ ಸುಮಾರು 600 ಮಕ್ಕಳಿಗೆ ಹಾಲುಣಿಸಬಹುದು.
from India & World News in Kannada | VK Polls https://ift.tt/2F2WWhn
