ಪೊಲೀಸ್ ಕಮಿಷನರ್ ಭಾಸ್ಕರ್ರಾವ್ ಹೇಳಿಕೆ; ಸಿಸಿಬಿ ತನಿಖೆ ಬೆಂಗಳೂರು: (ಕೆಪಿಎಲ್) ಮ್ಯಾಚ್ ಫಿಕ್ಸಿಂಗ್ ತನಿಖೆ ಇನ್ನೂ ಹಲವು ಆಯಾಮಗಳಲ್ಲಿ ತೆರೆದುಕೊಳ್ಳುತ್ತಿದ್ದು, ಮ್ಯಾಚ್ ಫಿಕ್ಸರ್ಗಳು ಹಾಗೂ ಬುಕ್ಕಿಗಳ ಜತೆ ಕೆಲವು ಸಿನಿಮಾ ನಟಿಯರೂ ಭಾಗಿಯಾಗಿದ್ದಾರೆ ಎನ್ನುವ ಸುಳಿವು ಸಿಕ್ಕಿದೆ. ಆ ಬಗ್ಗೆಯೂ ತನಿಖೆ ನಡೆಸಲಾಗುವುದು ಎಂದು ನಗರ ಪೊಲೀಸ್ ಕಮಿಷನರ್ ಭಾಸ್ಕರ್ರಾವ್ ತಿಳಿಸಿದ್ದಾರೆ. ಮಾಧ್ಯಮ ಪ್ರತಿನಿಧಿಗಳ ಜತೆ ಮಾತನಾಡಿದ ಅವರು, ''ಕ್ರಿಕೆಟ್ ತಾರೆಯರು ಹಾಗೂ ಸದ್ಯ ಸಿಕ್ಕಿ ಬಿದ್ದಿರುವ ಆರೋಪಿ ಆಟಗಾರರ ಜತೆ ಸಂಪರ್ಕದಲ್ಲಿದ್ದು ಪಂದ್ಯದ ನಂತರದ ಪಾರ್ಟಿಗಳಲ್ಲಿ ತೊಡಗಿಸಿಕೊಳ್ಳುತ್ತಿದ್ದ ನಟಿಯರೂ ಮ್ಯಾಚ್ ಫಿಕ್ಸಿಂಗ್ನಲ್ಲಿ ಭಾಗಿಯಾಗಿರಬಹುದು ಎನ್ನುವ ಶಂಕೆಯಿದೆ. ಈ ಬಗ್ಗೆ ಆರೋಪಿಗಳ ವಿಚಾರಣೆ ವೇಳೆಯೂ ಸುಳಿವು ಸಿಕ್ಕಿವೆ. ಒಂದೆರಡು ಸಿನಿಮಾಗಳಲ್ಲಿ ನಟಿಸಿದ ನಟಿಯರೂ ಅತ್ಯಂತ ದುಬಾರಿಯ ಐಷಾರಾಮಿ ಕಾರುಗಳಲ್ಲಿಓಡಾಡುತ್ತಿದ್ದಾರೆ. ಈ ಹಣದ ಮೂಲ ಪತ್ತೆ ಹಚ್ಚಿದರೆ ಇನ್ನೂ ಹೆಚ್ಚಿನ ಮಾಹಿತಿ ಸಿಗಬಹುದು. ಸದ್ಯ ಸಿಕ್ಕಿರುವ ಸುಳಿವು ಆಧಾರದಲ್ಲಿ ಸಾಕ್ಷ್ಯಗಳನ್ನು ಸಂಗ್ರಹಿಸುವ ಕಾರ್ಯ ಮುಂದುವರೆದಿದೆ,'' ಎಂದು ಹೇಳಿದರು. ''ಮ್ಯಾಚ್ ಫಿಕ್ಸಿಂಗ್ನಲ್ಲಿ ತೊಡಗಿ ವಿಚಾರಣೆ ಎದುರಿಸಿರುವ ಕೆಲವರು ಅಪ್ರೂವರ್ಗಳಾಗಿ ಸಾಕ್ಷ್ಯ ನುಡಿಯಲು ಒಪ್ಪಿಕೊಂಡಿದ್ದಾರೆ. ಇನ್ನೂ ವಿಚಾರಣೆ ಎದುರಿಸದ ಆಟಗಾರರೂ ತಾವಾಗೇ ಮುಂದೆ ಬಂದು ಸಾಕ್ಷ್ಯ ನುಡಿದರೆ ಅವರಿಗೆ ವಿಚಾರಣೆಯಿಂದ ವಿನಾಯಿತಿ ನೀಡಲಾಗುವುದು. ಪೊಲೀಸರು ನಿಮ್ಮನ್ನು ಹುಡುಕಿಕೊಂಡು ಬರುವ ಮೊದಲು ನೀವೇ ಪೊಲೀಸರ ಮುಂದೆ ಬಂದು ಅಪ್ರೂವರ್ ಆಗಿ. ಕಾನೂನಿನಡಿಯಲ್ಲಿಅದಕ್ಕೆ ಅವಕಾಶವಿದೆ. ಇದರಿಂದ ಮ್ಯಾಚ್ ಫಿಕ್ಸಿಂಗ್ ಎನ್ನುವ ಕೊಳೆಯನ್ನು ತೊಳೆದು ಕ್ರಿಕೆಟ್ ಅನ್ನು ಶುದ್ಧೀಕರಿಸಲು ಸಾಧ್ಯ,'' ಎಂದು ತಿಳಿಸಿದರು. ತನಿಖೆಯ ಪ್ರಗತಿ ಕುರಿತು ಮಾಹಿತಿ ನೀಡಿದ ಅಪರಾಧ ವಿಭಾಗದ ಮುಖ್ಯಸ್ಥ ಸಂದೀಪ್ ಪಾಟೀಲ್, ''ಬೆಂಗಳೂರಿನ ಜಯನಗರದಲ್ಲಿ ಸೋಷಿಯಲ್ ಕ್ಲಬ್ ನಡೆಸುತ್ತಿರುವ ಹಾಗೂ ಕೋಚ್ ಆಗಿರುವ ಸುಧೀಂದ್ರ ಶಿಂಧೆ ಮತ್ತು ಬೆಳಗಾವಿ ಪ್ಯಾಂಥರ್ಸ್ ಮಾಲೀಕ ಅಷ್ಫಕ್ ಅಲಿ ಇಬ್ಬರೂ ಒಟ್ಟಾಗಿ ಮ್ಯಾಚ್ ಫಿಕ್ಸಿಂಗ್ನಲ್ಲಿ ತೊಡಗಿರುವುದು, ಆಟಗಾರರನ್ನು ಫಿಕ್ಸ್ ಮಾಡುತ್ತಿದ್ದ ಸಂಗತಿಗಳು ತನಿಖೆ ವೇಳೆ ಬೆಳಕಿಗೆ ಬಂದಿವೆ. ಹೀಗಾಗಿ, ಶಿಂಧೆಯನ್ನೂ ಬಂಧಿಸಲಾಗಿದೆ. ಈತ ಕೆಎಸ್ಸಿಎ ಆಡಳಿತ ಮಂಡಳಿ ಸದಸ್ಯ ಕೂಡ ಆಗಿರುವುದರಿಂದ ತನಿಖೆಯ ಮುಂದಿನ ಹಂತದಲ್ಲಿಇನ್ನೂ ಹಲವರು ಈ ಪ್ರಕರಣದಲ್ಲಿ ತೊಡಗಿಸಿಕೊಂಡಿರುವುದು ಬೆಳಕಿಗೆ ಬರುವ ಸಾಧ್ಯತೆಗಳಿವೆ,'' ಎಂದು ತಿಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2sF3rEe
