ಮುಹಮ್ಮದ್‌ ಆರಿಫ್‌ ಮಂಗಳೂರು: ಕೋವಿಡ್‌ ಇಳಿಮುಖಗೊಂಡರೂ ಆತಂಕ ಕಡಿಮೆಯಾಗಿಲ್ಲ. ಈ ನಡುವೆ ಮಂಗಳೂರು ಅಂತಾರಾಷ್ಟ್ರೀಯ ನಿಲ್ದಾಣದಲ್ಲಿ ನವೆಂಬರ್‌ ತಿಂಗಳಲ್ಲಿ ವಿಮಾನ ನಿರ್ವಹಣೆ ಸಂಖ್ಯೆ ಒಂದು ಸಾವಿರ ದಾಟಿ ದಾಖಲೆ ಮಾಡಿದೆ. ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಅಕ್ಟೋಬರ್‌ ತಿಂಗಳಲ್ಲಿ ಒಟ್ಟು 987 ಅಂತಾರಾಷ್ಟ್ರೀಯ ಮತ್ತು ದೇಶೀಯ ವಿಮಾನಯಾನ ನಿರ್ವಹಣೆ ಮಾಡಲಾಗಿದೆ. ಅದರಲ್ಲಿ 196 ಅಂತಾರಾಷ್ಟ್ರೀಯ ವಿಮಾನಗಳು ಸೇರಿವೆ. 2020ರ ಅಕ್ಟೋಬರ್‌ನಲ್ಲಿ 593 ವಿಮಾನಗಳ ನಿರ್ವಹಣೆ ಮಾತ್ರ ನಡೆಸಿತ್ತು. ಲಕ್ಷ ದಾಟಿದ ಪ್ರಯಾಣಿಕರುನವೆಂಬರ್‌ ತಿಂಗಳಲ್ಲಿ ಒಂದೂಕಾಲು ಲಕ್ಷ ಮಂದಿ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಮೂಲಕ ಸಂಚರಿಸಿದ್ದಾರೆ. ಅಕ್ಟೋಬರ್‌ನಲ್ಲಿ 25,458 ಮಂದಿ ಅಂತಾರಾಷ್ಟ್ರೀಯ ಮತ್ತು 81,583 ದೇಶೀಯ ಪ್ರಯಾಣಿಕರು ಸೇರಿ ಒಟ್ಟು 1,07,041 ಮಂದಿ ಸಂಚರಿಸಿದ್ದಾರೆ. ಕೋವಿಡ್‌ ಹಿನ್ನೆಲೆಯಲ್ಲಿ ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಪ್ರಯಾಣಿಕರ ಸಂಖ್ಯೆ ತೀವ್ರ ಕುಸಿದಿದ್ದು, ಅಂತಾರಾಷ್ಟ್ರೀಯ ಮತ್ತು ದೇಶೀಯ ಎರಡೂ ಸೇರಿ ಒಟ್ಟು 53,566 ಮಂದಿ ಮಾತ್ರ ಪ್ರಯಾಣಿಸಿದ್ದರು. ಹೆಚ್ಚಳ ನಿರೀಕ್ಷೆ ದಿನದಿಂದ ದಿನಕ್ಕೆ ಪ್ರಯಾಣಿಕರ ಸಂಖ್ಯೆ ಹೆಚ್ಚುತ್ತಿದ್ದು, ಡಿಸೆಂಬರ್‌ ತಿಂಗಳಲ್ಲಿ ಕ್ರಿಸ್ಮಸ್‌, ಹೊಸ ವರ್ಷ ಮತ್ತು ಸೌದಿ ಅರೇಬಿಯಾಕ್ಕೆ ನೇರ ಸಂಚಾರಕ್ಕಿದ್ದ ನಿರ್ಬಂಧ ತೆರವು ಹಿನ್ನೆಲೆಯಲ್ಲಿ ಪ್ರಯಾಣಿಕರ ಸಂಖ್ಯೆ ಹೆಚ್ಚಳ ನಿರೀಕ್ಷಿಸಲಾಗಿದೆ. ಹೊಸ ಪ್ರದೇಶಕ್ಕೆ ವಿಮಾನ ಸಂಚಾರ ಆರಂಭಿಸುವ ನಿರೀಕ್ಷೆಗಳಿದ್ದು, ಕೋವಿಡ್‌ ನಿಯಮಾವಳಿ ಸಡಿಲಿಕೆ ಬಳಿಕ ಪ್ರಯಾಣಿಕರ ಸಂಖ್ಯೆ ಬಹಳಷ್ಟು ಹೆಚ್ಚಲಿದೆ. ಇಂಡಿಗೊ ವಿಮಾನ ಸಂಸ್ಥೆಯು ಡಿ.1ರಿಂದ ಮುಂಬಯಿಗೆ ಇನ್ನೊಂದು ವಿಮಾನ ನಿರ್ವಹಣೆ ಮಾಡಲಿದ್ದು, ಅದು ಜನವರಿ ಅಂತ್ಯ ತನಕ ಕಾರ್ಯಾಚರಿಸಲಿದೆ. ತಿರುಪತಿ ವಿಮಾನ ನಿಲ್ದಾಣಕ್ಕೂ ಹೊಸ ವಿಮಾನ ಆರಂಭಿಸಲು ಹಿರಿಯ ಅಧಿಕಾರಿಗಳ ಅನುಮೋದನೆಗಾಗಿ ಕಾಯಲಾಗುತ್ತಿದೆ. ಬೆಂಗಳೂರಿಗೆ ಪ್ರತಿದಿನ ನಾಲ್ಕು, ಮುಂಬಯಿಗೆ ತಲಾ ಎರಡು, ಹೈದರಾಬಾದ್‌ ಮತ್ತು ಚೆನ್ನೈಗೆ ಒಂದು ಮತ್ತು ಶಾರ್ಜಾಕ್ಕೆ ವಿಮಾನ ಆರಂಭಿಸುವ ಪ್ರಯತ್ನ ನಡೆಸುತ್ತಿವೆ. ಹುಬ್ಬಳ್ಳಿಗೆ ವಿಮಾನ ಆರಂಬಿಸುವ ಯೋಜನೆ ಇತ್ತಾದರೂ ಕೋವಿಡ್‌ನಿಂದ ವಿಳಂಬವಾಗಿದೆ ಎಂದು ಸಂಸ್ಥೆಯ ಮೂಲಗಳು ಹೇಳುತ್ತಿವೆ. ಸ್ಪೈಸ್‌ ಜೆಟ್‌ನಿಂದ ದುಬಾಯಿ, ಬೆಂಗಳೂರು ಮತ್ತು ಹೈದರಾಬಾದ್‌ ಮಾತ್ರ ವಿಮಾನ ಹಾರಾಟವಿದ್ದು, ಶೀಘ್ರ ಬೆಂಗಳೂರಿಗೆ ಮತ್ತೊಂದು ವಿಮಾನ ಸೇವೆ ಆರಂಭಿಸುವ ಬಗ್ಗೆ ಚಿಂತನೆ ನಡೆಯುತ್ತಿದೆ ಎಂದು ಸಂಸ್ಥೆಯ ಮೂಲಗಳು ತಿಳಿಸಿವೆ.
from India & World News in Kannada | VK Polls https://ift.tt/32LQ0V7
