ಬೆಂಗಳೂರು: ಭೂಸ್ವಾಧೀನ ಪ್ರಕ್ರಿಯೆ ಸೇರಿದಂತೆ ಇತರೆ ಕಾರಣಗಳಿಂದಾಗಿ 'ನಮ್ಮ ಮೆಟ್ರೊ' ಎರಡನೇ ಹಂತದ ಯೋಜನೆಯ ನಗರದ ಅತ್ಯಂತ ಉದ್ದದ ಸುರಂಗ ಮಾರ್ಗವಾದ 'ಗೊಟ್ಟಿಗೆರೆ-ನಾಗವಾರ' ನಡುವಿನ ಕಾಮಗಾರಿ ಕುಂಟುತ್ತಾ ಸಾಗಿದೆ. ಇದರಿಂದ ಮೆಟ್ರೊ ರೈಲು ಸಂಚಾರವು ಎರಡು ವರ್ಷ ವಿಳಂಬವಾಗುವ ಸಾಧ್ಯತೆಗಳಿವೆ. ಉತ್ತರದಿಂದ ದಕ್ಷಿಣದತ್ತ ಸಾಗಿರುವ ಈ ಮಾರ್ಗದ ಒಟ್ಟು ಉದ್ದ 21.25 ಕಿ.ಮೀ. ಇದರಲ್ಲಿ 13.79 ಕಿ.ಮೀ ಸುರಂಗ ಮಾರ್ಗವೂ ಸೇರಿದೆ. ಡೇರಿ ವೃತ್ತದಿಂದ ನಾಗವಾರವರೆಗಿನ ಸುರಂಗ ಮಾರ್ಗವನ್ನು 9 ಟಿಬಿಎಂಗಳು (ಟನೆಲ್‌ ಬೋರಿಂಗ್‌ ಮೆಷಿನ್‌) ಕೊರೆಯುತ್ತಿದ್ದು, ಇದುವರೆಗೆ ಶೇ 30.90ರಷ್ಟು ಕಾಮಗಾರಿ ಮಾತ್ರ ಪೂರ್ಣಗೊಂಡಿದೆ. ಹಲವೆಡೆ ಬಂಡೆಗಳು ಸಿಕ್ಕಿರುವುದು ಸಮಸ್ಯೆಯಾಗಿದೆ. ಉಳಿದ ಶೇ.69.10ರಷ್ಟು ಕಾಮಗಾರಿ ಪೂರ್ಣಗೊಳ್ಳಲು ಇನ್ನೂ 2-3 ವರ್ಷಗಳಷ್ಟು ಸಮಯ ಬೇಕಾಗಬಹುದು. ಗೊಟ್ಟಿಗೆರೆ-ನಾಗವಾರ ಮಾರ್ಗದಲ್ಲಿ ರುದ್ರ ಎಂಬ ಟಿಬಿಎಂ ಕಾರ್ಯ ಸುರಂಗ ಕೊರೆಯುತ್ತಿದೆ. ದಕ್ಷಿಣ ರ್ಯಾಂಪ್‌ನಿಂದ ರಾಷ್ಟ್ರೀಯ ಮಿಲಿಟರಿ ಶಾಲೆ ಕಡೆಗೆ ಶೇ 595 ಮೀಟರ್‌ ಸುರಂಗವನ್ನು ಮಾತ್ರ ಕೊರೆಯಲಾಗಿದೆ. ಡೇರಿ ವೃತ್ತದ ಕಡೆಗೆ 614.60 ಮೀಟರ್‌ (ಶೇ.100ರಷ್ಟು) ಸುರಂಗ ನಿರ್ಮಿಸಲಾಗಿದೆ. ಇದೇ ಮಾರ್ಗದಲ್ಲಿ 'ಒಮಿಕ' ಎಂಬ ಮತ್ತೊಂದು ಟಿಬಿಎಂ ಕಾರ್ಯ ನಿರ್ವಹಿಸುತ್ತಿದ್ದು, ಒಟ್ಟು 443.80 ಮೀಟರ್‌ ಸುರಂಗ (ಶೇ.72.30) ನಿರ್ಮಿಸಿದೆ. ರಾಷ್ಟ್ರೀಯ ಮಿಲಿಟರಿ ಶಾಲೆಯಿಂದ ಲ್ಯಾಂಗ್‌ಫೋರ್ಡ್‌ ಟೌನ್‌ ನಿಲ್ದಾಣದವರೆಗೆ 'ವರದ' ಎಂಬ ಟಿಬಿಎಂ ಕಾರ್ಯಾಚರಿಸುತ್ತಿದ್ದು, 595 ಮೀಟರ್‌ ಸುರಂಗ ನಿರ್ಮಾಣ ಪೂರ್ಣಗೊಳಿಸಿದೆ. ರಾಷ್ಟ್ರೀಯ ಮಿಲಿಟರಿ ಶಾಲೆಯಿಂದ ಶಿವಾಜಿನಗರದವರೆಗಿನ ಒಟ್ಟು 2.62 ಕಿ.ಮೀ ಉದ್ದದ ಸುರಂಗ ಮಾರ್ಗ ಕಾಮಗಾರಿ ಸಹ ಮಂದಗತಿಯಲ್ಲಿ ಸಾಗುತ್ತಿದೆ. ಈ ಮಾರ್ಗದಲ್ಲಿ 'ಅವನಿ' ಮತ್ತು 'ಲಾವಿ' ಎಂಬ ಟಿಬಿಎಂಗಳು ಕಾರ್ಯ ನಿರ್ವಹಿಸುತ್ತಿದ್ದು, ಶೇ 35.70ರಷ್ಟು ಕಾಮಗಾರಿ ಮುಗಿದಿದೆ. 'ಅವನಿ' ಟಿಬಿಎಂ ಒಟ್ಟು 929.20 ಮೀಟರ್‌ ಮತ್ತು 'ಲಾವಿ' ಟಿಬಿಎಂ 633.60 ಮೀಟರ್‌ ಸುರಂಗ ಮಾರ್ಗ ನಿರ್ಮಾಣ ಮಾಡಿದೆ. ಟ್ಯಾನರಿ ರಸ್ತೆಯಿಂದ ನಾಗವಾರದ ನಡುವಿನ ಕಾಮಗಾರಿ ಸಹ ಶೇ 4.76ರಷ್ಟು ಮಾತ್ರ ಪೂರ್ಣಗೊಂಡಿದೆ. ಸುಮಾರು 4.591 ಕಿ.ಮೀ. ಉದ್ದದ ಈ ಸುರಂಗವನ್ನು 'ಭದ್ರ' ಮತ್ತು 'ತುಂಗಾ' ಎಂಬ ಟಿಬಿಎಂಗಳು ಕೊರೆಯುತ್ತಿವೆ. ವೆಂಕಟೇಶಪುರ ನಿಲ್ದಾಣದಿಂದ ರಿಟ್ರೀವಲ್‌ ಶಾಫ್ಟ್‌ವರೆಗೆ 'ಭದ್ರ' ಟಿಬಿಎಂ ಒಟ್ಟು 203 ಮೀಟರ್‌ ಹಾಗೂ ಇದೇ ಮಾರ್ಗದಲ್ಲಿ 'ತುಂಗಾ' ಟಿಬಿಎಂ 117.6 ಮೀಟರ್‌ ಸುರಂಗ ಕೊರೆದಿದೆ. ಕಂಟೋನ್ಮೆಂಟ್‌ನಿಂದ ಪಾಟರಿ ಟೌನ್‌ವರೆಗೆ 2.884 ಕಿ.ಮೀ. ಉದ್ದ ಸುರಂಗ ಮಾರ್ಗದಲ್ಲಿ 'ಉರ್ಜಾ' ಮತ್ತು 'ವಿಂದ್ಯಾ' ಎಂಬ ಟಿಬಿಎಂಗಳು ಕಾರ್ಯ ನಿರ್ವಹಿಸುತ್ತಿವೆ. 'ಊರ್ಜಾ' ಒಟ್ಟು 864 ಮೀಟರ್‌ ಮತ್ತು 'ವಿಂದ್ಯ' 856 ಮೀಟರ್‌ಗಳಷ್ಟು ಸುರಂಗ ತೋಡಿವೆ. ಈ ಮಾರ್ಗದ ಮೆಟ್ರೊ ಕಾಮಗಾರಿ ಶೇ.37ರಷ್ಟು ಮಾತ್ರ ಮುಕ್ತಾಯವಾಗಿದೆ. ಭೂಸ್ವಾಧೀನ ಎಷ್ಟು ? ಗೊಟ್ಟಿಗೆರೆಯಿಂದ ಡೇರಿ ವೃತ್ತದವರೆಗೆ ಎತ್ತರಿಸಿದ ಮಾರ್ಗಕ್ಕೆ ಅಗತ್ಯವಾದ ಭೂಮಿಯನ್ನು ಸ್ವಾಧೀನಪಡಿಸಿಕೊಂಡು ಎಂಜಿನಿಯರ್‌ ವಿಭಾಗಕ್ಕೆ ಹಸ್ತಾಂತರಿಸಲಾಗಿದೆ. ಡೈರಿ ವೃತ್ತದಿಂದ ನಾಗವಾರವರೆಗಿನ ಸುರಂಗ ಮಾರ್ಗಕ್ಕೆ ಭೂಸ್ವಾಧೀನಗೊಂಡ ವಿಸ್ತೀರ್ಣಕ್ಕೆ ಪರಿಹಾರ ಕೂಡ ನೀಡಲಾಗುತ್ತಿದೆ. ಕೊತ್ತನೂರು ಡಿಪೊವರೆಗೆ ಅಗತ್ಯವಿರುವ 32.6 ಎಕರೆ ಭೂಮಿಯನ್ನು ಸ್ವಾಧೀನಪಡಿಸಿಕೊಂಡು ಎಂಜನಿಯರ್‌ ವಿಭಾಗಕ್ಕೆ ಹಸ್ತಾಂತರಿಸಲಾಗಿದೆ. ಅಂಕಿ ಅಂಶ
- 21.25ಕಿ.ಮೀ. ಗೊಟ್ಟಿಗೆರೆ- ನಾಗವಾರ ಮಾರ್ಗದ ಒಟ್ಟು ಉದ್ದ
- 13.79ಕಿ.ಮೀ. ಡೇರಿ ವೃತ್ತ- ನಾಗವಾರ ಸುರಂಗ ಮಾರ್ಗದ ಉದ್ದ
- 11,500 ಕೋಟಿ ರೂ. ಮಾರ್ಗದ ಅಂದಾಜು ಯೋಜನಾ ವೆಚ್ಚ
- 12 ಸುರಂಗದಲ್ಲಿ ಬರುವ ನಿಲ್ದಾಣಗಳು
- 06 ಎತ್ತರಿಸಿದ ನಿಲ್ದಾಣಗಳು
from India & World News in Kannada | VK Polls https://ift.tt/3FvCWSb
