ಹೊಸದಿಲ್ಲಿ/ಬೆಂಗಳೂರು: ಭಾರತದಲ್ಲಿ ಫೆಬ್ರವರಿಯಲ್ಲಿ ಮೂರನೇ ಅಲೆ ಉತ್ತುಂಗಕ್ಕೆ ತಲುಪಲಿದೆ ಎಂಬ ತಜ್ಞರ ಎಚ್ಚರಿಕೆ ನಡುವೆಯೇ ದೇಶದಲ್ಲಿ ಕೋವಿಡ್‌ ಹೊಸ ರೂಪಾಂತರಿ ಸೋಂಕಿನ ಸಂಖ್ಯೆ ಏರುಗತಿಯಲ್ಲಿ ಸಾಗಿದೆ. ದೇಶಾದ್ಯಂತ ಓಮಿಕ್ರಾನ್‌ ಪ್ರಕರಣಗಳ ಸಂಖ್ಯೆ 415ಕ್ಕೆ ಜಿಗಿದಿದ್ದು, 24 ಗಂಟೆಯಲ್ಲೇ 57ಕ್ಕೂ ಹೆಚ್ಚು ಮಂದಿಗೆ ಈ ಸೋಂಕು ದೃಢಪಟ್ಟಿದೆ. ರಾಜಸ್ಥಾನದಲ್ಲಿ ಶನಿವಾರ ವಿದೇಶದಿಂದ ಬಂದ ಐವರು ಸೇರಿದಂತೆ 21 ಮಂದಿಗೆ ಓಮಿಕ್ರಾನ್‌ ದೃಢಪಟ್ಟಿದೆ. ಮಹಾರಾಷ್ಟ್ರದಲ್ಲಿ ಮತ್ತಿಬ್ಬರಲ್ಲಿ ರೂಪಾಂತರಿ ಪತ್ತೆಯಾಗಿದೆ. ಈ ಮಧ್ಯೆ, ಸೋಂಕು ಭೀತಿಯ ಹಿನ್ನೆಲೆಯಲ್ಲಿ ಮತ್ತಷ್ಟು ರಾಜ್ಯಗಳು ಹೊಸ ವರ್ಷಾಚರಣೆ, ಮೆರವಣಿಗೆ, ಸಮಾವೇಶ ಮುಂತಾದ ಜನರು ಸೇರುವ ಸಭೆ-ಸಮಾರಂಭಗಳ ಮೇಲೆ ನಿರ್ಬಂಧ ಹೇರಿವೆ. ಮೂರನೇ ಅಲೆ ಎದುರಿಸಲು ರಾಜ್ಯ ಸರಕಾರಗಳು ಸಿದ್ಧತೆಯಲ್ಲಿತೊಡಗಿವೆ. ಮತ್ತೆ ಏರಿಕೆ ಟ್ರೆಂಡ್‌ * ಭಾರತದಲ್ಲಿ 24 ಗಂಟೆಯಲ್ಲಿ 57 ಓಮಿಕ್ರಾನ್‌ ಕೇಸ್‌ ದೃಢ * ದಿಲ್ಲಿ, ಮುಂಬಯಿ ಸೇರಿ ಹಲವು ನಗರಗಳಲ್ಲಿ ಸೋಂಕು ಏರಿಕೆ ಟ್ರೆಂಡ್‌ * ಜನರು ಸಹಕರಿಸದಿದ್ದರೆ ಲಾಕ್‌ಡೌನ್‌ ಎಚ್ಚರಿಕೆ ನೀಡಿದ ಮಹಾರಾಷ್ಟ್ರ ಸಚಿವ * ಗುಜರಾತ್‌ ಬಳಿಕ ಅಸ್ಸಾಂನಲ್ಲಿ ಭಾನುವಾರಿಂದ ನೈಟ್‌ ಕರ್ಫ್ಯೂ * 24 ಗಂಟೆಯಲ್ಲಿ ದೇಶಾದ್ಯಂತ 7,189 ಕೇಸ್‌, 387 ಮಂದಿ ಸಾವು * 5 ಸಾವಿರ ಮಟ್ಟಕ್ಕೆ ಇಳಿದಿದ್ದ ದೇಶದ ದೈನಂದಿನ ಸೋಂಕು ಮತ್ತೆ ಏರಿಕೆ * ಜನವರಿ ಅಂತ್ಯ, ಫೆಬ್ರವರಿಯಲ್ಲಿ ಓಮಿಕ್ರಾನ್‌ ಅಲೆ ಉತ್ತುಂಗಕ್ಕೆ ಎಂದ ತಜ್ಞರು ರಾಜ್ಯದಲ್ಲಿ270 ಕೇಸ್‌ ರಾಜ್ಯದಲ್ಲಿ ಕೋವಿಡ್‌ ಸೋಂಕಿನ ಏರಿಳಿತ ಮುಂದುವರಿದಿದ್ದು, 24 ಗಂಟೆಗಳಲ್ಲಿ270 ಹೊಸ ಪ್ರಕರಣಗಳು ಪತ್ತೆಯಾಗಿವೆ. ಸೋಂಕಿಗೆ ನಾಲ್ವರು ಬಲಿಯಾಗಿದ್ದಾರೆ. ಬೆಂಗಳೂರಿನಲ್ಲಿ 152 ಮಂದಿಗೆ ಸೋಂಕು ದೃಢಪಟ್ಟಿದೆ. ರಾಜ್ಯದಲ್ಲಿ ಸಕ್ರಿಯ ಪ್ರಕರಣಗಳ ಸಂಖ್ಯೆ 7,271ಕ್ಕೆ ತಲುಪಿದೆ. ಕರ್ನಾಟಕಕ್ಕೂ ಕೇಂದ್ರದ ತಂಡ 'ಓಮಿಕ್ರಾನ್‌' ವೈರಾಣು ನಿಯಂತ್ರಣಕ್ಕೆ ಕೇಂದ್ರ ಅಖಾಡಕ್ಕೆ ಇಳಿದಿದ್ದು, ಕರ್ನಾಟಕ ಸೇರಿದಂತೆ ಪ್ರಕರಣಗಳು ಅಧಿಕವಾಗಿರುವ ಹತ್ತು ರಾಜ್ಯಗಳಿಗೆ ತಜ್ಞರ ವಿಶೇಷ ತಂಡಗಳನ್ನು ಕಳುಹಿಸಿದೆ. ಪ್ರತಿ ತಂಡವೂ ಐದು ದಿನ ಕಾಲ ರಾಜ್ಯದಲ್ಲಿಯೇ ವಾಸ್ತವ್ಯ ಹೂಡಿ, ಆರೋಗ್ಯ ಇಲಾಖೆಯ ಸಮನ್ವಯದೊಂದಿಗೆ ಕಾರ್ಯನಿರ್ವಹಿಸಲಿದೆ. ಸೋಂಕು ಹೆಚ್ಚಳ, ನಿಧಾನಗತಿ ಲಸಿಕೆ ಸೇರಿ ಹಲವು ವಿಷಯಗಳ ಬಗ್ಗೆ ತಂಡ ಪರಿಶೀಲನೆ ನಡೆಸಲಿದೆ. ರಾಜ್ಯದಲ್ಲೂ ಕಠಿಣ ಕ್ರಮ? ಓಮಿಕ್ರಾನ್‌ ಪ್ರಕರಣಗಳ ನಿಯಂತ್ರಣ ಕುರಿತಂತೆ ತಜ್ಞರ ಜತೆ ಸೋಮವಾರ ಸಮಾಲೋಚನೆ ನಡೆಸಿ, ಇನ್ನಷ್ಟು ಕಠಿಣ ಕ್ರಮ ಜಾರಿಗೆ ತರಲಾಗುವುದು ಎಂದು ಸಿಎಂ ಹೇಳಿದ್ದಾರೆ. ಪ್ರಸ್ತುತ ಸ್ಥಿತಿಗಳಿಗೆ ಅನುಗುಣವಾಗಿ ರಾಜ್ಯದಲ್ಲಿ ಕೈಗೊಳ್ಳಬೇಕಾಗಿರುವ ಮುಂದಿನ ಕ್ರಮಗಳ ಕುರಿತಂತೆ ಚರ್ಚಿಸಿ ತೀರ್ಮಾನ ಕೈಗೊಳ್ಳಲಾಗುವುದು. ರಾಜ್ಯದಲ್ಲಿ ನೈಟ್‌ ಕರ್ಫ್ಯೂ ವಿಚಾರದ ಬಗ್ಗೆ ಕೂಲಂಕಷವಾಗಿ ಪರಿಶೀಲಿಸಿ ತೀರ್ಮಾನ ತೆಗೆದುಕೊಳ್ಳಲಾಗುವುದು. ಓಮಿಕ್ರಾನ್‌ ಆತಂಕದ ಹಿನ್ನೆಲೆಯಲ್ಲಿ ಹೊಸ ವರ್ಷಾಚರಣೆಗೆ ಸಂಬಂಧಿಸಿದಂತೆ ಹೊಸ ಮಾರ್ಗಸೂಚಿ ಹೊರಡಿಸಲಾಗುವುದು ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದ್ದಾರೆ.
from India & World News in Kannada | VK Polls https://ift.tt/3HaXSi2
