ಹೊಸದಿಲ್ಲಿ: ಸದ್ಯದ ಸಂಗತಿಗಳಿಂದಾಗಿ ಜೋ ರೂಟ್‌ ಅತಿ ಶೀಘ್ರದಲ್ಲಿಯೇ ಇಂಗ್ಲೆಂಡ್‌ ತಂಡದ ನಾಯಕತ್ವವನ್ನು ಕಳೆದುಕೊಳ್ಳಲಿದ್ದಾರೆಂದು ಆಸ್ಟ್ರೇಲಿಯಾ ತಂಡದ ಮಾಜಿ ವಿಕೆಟ್ ಕೀಪರ್‌-ಬ್ಯಾಟ್ಸ್‌ಮನ್‌ ಭವಿಷ್ಯ ನುಡಿದಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧ ಆಷಸ್‌ ಟೆಸ್ಟ್ ಸರಣಿಯ ಆರಂಭಿಕ ಎರಡೂ ಪಂದ್ಯಗಳಲ್ಲಿ ಜೋ ರೂಟ್‌ ನಾಯಕತ್ವದ ಇಂಗ್ಲೆಂಡ್‌ ಭಾರಿ ಅಂತರದ ಸೋಲು ಅನುಭವಿಸಿದೆ. ಈ ಹಿನ್ನೆಲೆಯಲ್ಲಿ ಐದು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಇಂಗ್ಲೆಂಡ್‌ 0-2 ಹಿನ್ನಡೆ ಅನುಭವಿಸಿದೆ. ಅಷ್ಟೇ ಅಲ್ಲದೆ, ಅಡಿಲೇಡ್‌ ಟೆಸ್ಟ್ ಬಳಿಕ ಜೋ ರೂಟ್‌ ತನ್ನ ಸಹ ಆಟಗಾರರ ಬಗ್ಗೆ ನೀಡಿದ್ದ ಹೇಳಿಕೆ ಎಲ್ಲರನ್ನೂ ಕೆರಳಿಸಿತ್ತು. ಈ ಹಿನ್ನೆಲೆಯಲ್ಲಿ ಆಸ್ಟ್ರೇಲಿಯಾ ಮಾಜಿ ನಾಯಕ ರಿಕಿ ಪಾಂಟಿಂಗ್‌ ಸೇರಿದಂತೆ ಹಲವು ಮಾಜಿ ಆಟಗಾರರು ಜೋ ರೂಟ್‌ ಹೇಳಿಕೆ ವಿರುದ್ದ ತಿರುಗಿ ಬಿದ್ದಿದ್ದರು. ಇದೀಗ ಆಸ್ಟ್ರೇಲಿಯಾ ಮಾಜಿ ಆಟಗಾರ ಬ್ರಾಡ್‌ ಹ್ಯಾಡಿನ್‌ ಕೂಡ ಜೋ ರೂಟ್‌ ಸದ್ಯದಲ್ಲಿಯೇ ಟೆಸ್ಟ್ ನಾಯಕತ್ವ ಕಳೆದುಕೊಳ್ಳಲಿದ್ದಾರೆಂದು ಭವಿಷ್ಯ ನುಡಿದಿದ್ದಾರೆ. ಟ್ರಿಬಲ್‌ ಎಂ ಕ್ರಿಕೆಟ್ ಜೊತೆ ಮಾತನಾಡಿದ ಬ್ರಾಡ್‌ ಹ್ಯಾಡಿನ್‌, ಎರಡನೇ ಟೆಸ್ಟ್ ಪಂದ್ಯದ ನಾಲ್ಕನೇ ದಿನ ಬೆಳಗ್ಗೆ ಗಾಯದಿಂದಾಗಿ ನಾಯಕ ಜೋ ರೂಟ್‌ ಅಂಗಣಕ್ಕೆ ಆಗಮಿಸಿರಲಿಲ್ಲ. ಈ ವೇಳೆ ತಂಡದ ಸಾರಥ್ಯ ವಹಿಸಿದ್ದ ಬೆನ್‌ ಸ್ಟೋಕ್ಸ್‌ ಅತ್ಯುತ್ತಮ ತಂತ್ರಗಾರಿಕೆಯನ್ನು ಪ್ರದರ್ಶಿಸಿದ್ದರು. ಸ್ಟೋಕ್ಸ್‌ ಅಡಿಯಲ್ಲಿ ಇಂಗ್ಲೆಂಡ್‌ ತಂಡ ವಿಭಿನ್ನವಾಗಿ ಕಂಡಿತ್ತು ಎಂದಿದ್ದಾರೆ. "ನಾಲ್ಕನೇ ದಿನ ಬೆಳಗ್ಗೆ ಇಂಗ್ಲೆಂಡ್‌ ತಂಡ ತಾಂತ್ರಿಕವಾಗಿ ಅತ್ಯುತ್ತಮವಾಗಿ ಕಂಡಿತ್ತು. ಈ ವೇಳೆ ನಾಯಕ ಜೋ ರೂಟ್‌ ಹೊರಗಡೆ ಉಳಿದಿದ್ದರು. ತಂಡದ ಸಾರಥ್ಯವನ್ನು ಬೆನ್‌ ಸ್ಟೋಕ್ಸ್‌ ಪಡೆದುಕೊಂಡ ಬಳಿಕ ಪರಿಸ್ಥಿತಿ ಶಾಂತವಾಗಿತ್ತು. ಅವರಲ್ಲಿ ಒಂದು ಸೂಕ್ತ ಯೋಜನೆ ಇತ್ತು ಹಾಗೂ ಬೌಲರ್‌ಗಳು ಪುಲ್‌ ಲೆನ್ತ್‌ ಎಸೆಯುತ್ತಿದ್ದರು. ಈ ವೇಳೆ ಮಿಡ್‌ ವಿಕೆಟ್ ಹಾಗೂ ಶಾರ್ಟ್‌ ಕವರ್ಸ್‌ನಲ್ಲಿ ಕ್ಯಾಚಿಂಗ್‌ಗೆ ನಿಲ್ಲಿಸಲಾಗಿತ್ತು," ಎಂದರು. "ಸ್ಟಂಪ್ಸ್‌ ಟು ಸ್ಟಂಪ್ಸ್‌ಗೆ ಬೌಲರ್‌ಗಳು ಬೌಲ್ ಮಾಡುತ್ತಿದ್ದರು ಹಾಗೂ ಇದು ಆಸ್ಟ್ರೇಲಿಯಾ ಬ್ಯಾಟ್ಸ್‌ಮನ್‌ಗಳಿಗೆ ಸವಾಲುದಾಯಕವಾಗಿತ್ತು. ಈ ವೇಳೆ ಕೇವಲ 20 ರನ್‌ ಅಂತರದಲ್ಲಿ ಇಂಗ್ಲೆಂಡ್‌ 4 ವಿಕೆಟ್ ಪಡೆಯುವ ಮೂಲಕ ಆತಿಥೇಯ ತಂಡವನ್ನು ಒತ್ತಡಕ್ಕೆ ನೂಕಿತ್ತು. ಆದರೆ ಒಮ್ಮೆ ರೂಟ್‌ ಅಂಗಣಕ್ಕೆ ಆಗಮಿಸಿದ ಬಳಿಕ ಎಲ್ಲವೂ ಮಣ್ಣು ಪಾಲಾಗಿತ್ತು," ಎಂದರು. ರೂಟ್‌ ಹೇಳಿಕೆಗೆ ಪಾಂಟಿಂಗ್‌ ಕಿಡಿ ಅಡಿಲೇಡ್‌ ಟೆಸ್ಟ್ ಸೋಲಿನ ಬಳಿಕ ಮಾತನಾಡಿದ್ದ ಜೋ ರೂಟ್‌, ಬೌಲರ್‌ಗಳು ಸಾಧ್ಯವಾದಷ್ಟು ದೀರ್ಘ ಸಮಯ ಚೆಂಡನ್ನು ಸರಿಯಾದ ಜಾಗದಲ್ಲಿ ಬೌಲ್ ಮಾಡಬೇಕಾಗುತ್ತದೆ ಹಾಗೂ ಬ್ಯಾಟ್ಸ್‌ಮನ್‌ಗಳು ದೊಡ್ಡ ಮೊತ್ತದ ರನ್‌ಗಳನ್ನು ಗಳಿಸಬೇಕಾಗುತ್ತದೆ ಎಂದು ದೂರಿಸಿದ್ದರು. ಇದಕ್ಕೆ ಆಸ್ಟ್ರೇಲಿಯಾ ಮಾಜಿ ನಾಯಕ ರಿಕಿ ಪಾಂಟಿಂಗ್‌ ಬೇಸರ ವ್ಯಕ್ತಪಡಿಸಿದ್ದಾರೆ. "ರೂಟ್‌ ಮಾತನ್ನು ಕೇಳಿದಾದ ನನಗೆ ಒಂದು ರೀತಿ ಕುರ್ಚಿ ಮೇಲಿಂದ ಕೆಳಗೆ ಬಿದ್ದ ಅನುಭವವಾಯಿತು. ಹಾಗಾದರೆ ಅವರನ್ನು(ಬೌಲರ್‌ಗಳು) ಬದಲಾಯಿಸುವುದು ಯಾರ ಕೆಲಸ? ಹಾಗಾದರೆ ನೀವು ಯಾಕೆ ಕ್ಯಾಪ್ಟನ್ ಆಗಿದ್ದೀರಿ? ಯಾವ ಲೆನ್ತ್‌ ಹಾಕಬೇಕೆಂದು ನಿಮ್ಮ ಬೌಲರ್‌ಗಳ ಮೇಲೆ ನೀವು ಪ್ರಭಾವ ಬೀರಿಲ್ಲವಾದರೆ, ನೀವು ಮೈದಾನದಲ್ಲಿ ಏನು ಮಾಡುತ್ತಿದ್ದೀರಿ?," ಎಂದು ಪಾಂಟಿಂಗ್‌ ಪ್ರಶ್ನಿಸಿದ್ದರು. "ಪಂದ್ಯದ ಬಳಿಕ ಮೈದಾನದಿಂದ ಹೊರಗಡೆ ಬಂದು ಜೋ ರೂಟ್‌ ಇಷ್ಟಬಂದಂತೆ ಮಾತನಾಡುವುದಲ್ಲ. ತಾನು ಅಂದುಕೊಂಡ ರೀತಿಯಲ್ಲಿ ಬೌಲರ್‌ಗಳು ಬೌಲ್ ಮಾಡುತ್ತಿದ್ದಾರೆಯೇ ಇಲ್ಲವೇ ಎಂಬುದನ್ನು ನಾಯಕನಾಗಿ ಮೈದಾನದಲ್ಲಿ ಗಮನಿಸುತ್ತಿರಬೇಕು ಹಾಗೂ ಅವರನ್ನು ಉತ್ತಮ ಹಾದಿಯಲ್ಲಿ ಬೌಲಿಂಗ್‌ ಮಾಡುವಂತೆ ಪ್ರಭಾವ ಬೀರಬೇಕು. ಇದು ನಾಯನಕ ಕೆಲಸ," ಎಂದು ಹೇಳಿದ್ದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3yQao3z
